Ontopolwa 17
Okugaluka kwaKristus—Ongiini Taku Ka Monika?
1. (a) Kristus oku uvaneke okuninga shike? (b) Ompumbwe yashike yi li po kegaluko lyaKristus?
“OTANDI GALUKA.” (Johannes 14:3) Jesus Kristus okwa ningi euvaneko ndika kaalongwa ye uusiku wa tetekele eso lye. Ngiika oto ka zimina kutya inapu kala nando nale ompumbwe onene ngawo kombili, kuundjolowele nokomwenyo mbyoka tayi ke etelwa uuntu kokugaluka kwaKristus noonkondo dhUukwaniilwa. Ihe ongiini Kristus ta galuka? Olye te mu mono, nomomukalo guni po?
2. (a) Pokugaluka kwe, openi Kristus ta fala aalanduli ye aagwayekwa, sha kwatela mo aayapostoli ye? (b) Omalutu goludhi luni po yo ye na hwiya?
2 Pokugaluka kwe Kristus ite ya a kale kombanda yevi. Ihe mboka taa ka pangela pamwe naye oyo aakwaniilwa, otaye ki ilwa po ya ka kale pamwe naye megulu. Jesus okwa lombwele aayapostoli ye: “Otandi galuka notandi mú ile, mu kale wo nkoka ndi li.” (Johannes 14:3) Ano uuna Kristus ta galuka, mboka taa falwa megulu otaa ka ninga aantu yopambepo notaa mono Kristus molutu lwe lwopambepo lwa adhimithwa. (1 Aakorinto 15:44) Ihe oshihupe shuuntu, shoka itaashi yi megulu, otashi mono tuu Kristus uuna ta galuka?
OMOLWASHOKA YE KA LI TA VULU OKUGALUKA OYE OMUNTU
3. Uunzapo wopaMbimbeli uni po tau holola kutya aantu itaa ka mona we nando Kristus?
3 Uusiku tuu mboka Jesus okwa ti kaayapostoli ye: “Okathimbo natango, uuyuni noitau mono ndje we.” (Johannes 14:19) “Uuyuni” otashi ulike kuuntu. Ano mpaka Jesus okwa ti sha yela kutya aantu kombanda yevi kaya li taye ke mu mona we konima yelondo lye lyokuya kegulu. Omuyapostoli Paulus okwa nyola: “Nonando twa li twa tseya Kristus panyama, katu mu shi we ngaaka.”—2 Aakorinto 5:16.
4. Oshike tashi holola kutya Kristus ota galuka oye omuntu omunankondo gwopambepo ihaa monika?
4 Ihe aantu oyendji oyi itaala kutya Kristus ota ka galuka nolutu lwopantu tuu ndoka a li e na sho ye a dhipagwa, nokutya ayehe kombanda yevi otaye ke mu mona. Ihe Ombimbeli otayi ti kutya Kristus ota galuka meadhimo lye pamwe naayengeli ye ayehe, nonokutya ye ota “kuutumba koshipangelapundi sheadhimo lye.” (Mateus 25:31) Ando Jesus okwa li ta ka galuka oye omuntu nokukuutumba koshipangelapundi shokevi, andola ye okwa li ta ka kala a shonopala e vulike kaayengeli. Ihe ye ote ya oye omunankondo nomeadhimo e vule oyana aamati ayehe mbaka yopambepo yaKalunga nomolwashoka ye ihaa monika ongaashi owala yo ye li.—Aafilippi 2:8-11.
5. Omolwashike Kristus kwa li itaa vulu okugaluka molutu lwopantu?
5 Ihe oomvula dhi vulithe 1 900 dha piti, Jesus okwa li e na okwiishonopeka nokuninga omuntu. Ye okwa li e na oku tu gandjela omwenyo gwe gwopantu gwa gwanenena ogwo iikulila. Oshikando shimwe Jesus okwe shi yelitha ngaashi tashi landula: “Oshikwiila shoka tandi shi gandja, osho onyama yandje, tandi yi gandjelele omwenyo guuyuni.” (Johannes 6:51) Ano Jesus okwa yamba olutu lwe lwopanyama eyambo molwuuntu. Ethimbo li thike peni eyambo ndyoka lya li tali ka kala li na oonkondo? Omuyapostoli Paulus ota yamukula: “Twa yapulwa meyambo lwolutu lwaJesus Kristus lumwe aluke nosigo aluhe.” (Aaheberi 10:10, NW) Konima sho Kristus a gandjele onyama ye omwenyo gwuuyuni, ka li we ta vulu oku yi kutha okuninga ishewe omuntu. Omolwetompelo ndyoka enene, itashi vulika nando ye a galuke nolutu lwopantu ndoka ye a yamba eyambo lumwe aluke nosigo aluhe.
OLUTU LWE LWOPANYAMA INALU YA MEGULU
6. Omolwashike aantu oyendji yi itaala kutya Kristus okwa yi megulu nolutu lwe lwopanyama?
6 Ihe aantu oyendji oyi itaala kutya Kristus okwa yi megulu nolutu lwe lwopanyama. Yo otaa ulike kuushili kutya olutu lwopanyama lwaKristus konima yeyumuko lye kalwa li we mombila. (Markus 16:5-7) Nokonima yeso lye Jesus okwi iholola kaalongwa ye nolutu lwopanyama e ya ulikile kutya ye oku na omwenyo. Nokuli lumwe Ye okwe etha omuyapostoli Tomas a tse oshikaha she mombululu yolupati Lwe opo Tomas a vule okwiitaala kutya Ye okwa yumuka shili. (Johannes 20:24-27) Shika itashi ulike kutya Kristus okwa yumuka nolutu tuu ndoka ye a dhipagwa nalwo?
7. Oshike tashi ulike kutya Kristus okwa yi megulu oye omuntu gwopambepo?
7 Aawe. Ombimbeli otayi yelitha tayi ti: “Kristus okwa sile wo oondjo lumwe . . . okwa dhipagwa panyama, ihe okwa tulwa omwenyo pambepo.” (1 Petrus 3:18) Aantu yomalutu gonyama nombinzi itaa vulu okukala megulu. Kombinga yeyumuko okuya megulu, Ombimbeli otayi ti: “Otamu kunwa olutu lwopanshitwe, . . . Ihe otandi shi mú lombwele, aamwameme, onyama nombinzi kayi wapa okuthigulula oshilongo shaKalunga.” (1 Aakorinto 15:44-50) Aantu owala yopambepo ye na omalutu gopambepo taa vulu okukala megulu.
8. Oshike sha ningwa nolutu lwaJesus lwopantu?
8 Ano oshike sha ningilwa olutu lwaJesus lwopanyama? Aalongwa ye inaya adha mombila ye mwaa na sha? Osho, molwashoka Kalunga okwa kutha po olutu lwaJesus. Omolwashike Kalunga e shi ningile? Osha li egwanitho lyaashono sha nyolwa mOmbimbeli. (Epsalmi 16:10; Iilonga 2:31) Ano Jehova okwe shi dhiladhila nawa okukutha po olutu lwaJesus, ngaashi naanaa a ningila olutu lwaMoses nale. (Deutoronomium 34:5, 6) Niishewe, ando olutu lwaJesus olwa thigalele mombila, andola aalongwa ye inaye shi uva kutya ye okwa yumuka, oshoka pethimbo ndyoka kaya li yu uva ko thiluthilu iinima yopambepo.
9. Ongiini Tomas kwa li a vulu okutsa oshikaha she moshiyadhi sholutu lwaJesus omuyumuki, ndoka lwi ishitukitha?
9 Ihe sho Tomas a li a vulu okutsa oshikaha she mombululu yolupati lwaJesus, ano itashi holola kutya Jesus okwa yumuka nolutu tuu ndoka lwa li lwa alelwa komuti? Aawe, oshoka Jesus okwi ishitulula owala nenge a kutha olutu lwopanyama, ngaashi sha ningilwe kaayengeli nale. Okushilipalekitha Tomas kutya Ye okwa li lye, Okwa longitha olutu lu na iiyadhi. Osha monika sha fa Ye ongo kwa li omuntu lela, ngoka ta vulu okulya nokunwa, ngaashi aayengeli mbeyaka nale ya yakulilwe kuAbraham.—Genesis 18:8; Aaheberi 13:2.
10. Oshike tashi holola kutya Jesus okwa kutha omalutu gi ili nogi ili gopanshitwe?
10 Nonando Jesus a holokele Tomas molutu lwa faathana naanduyaka moka Ye a dhipagwa, Ye okwa kuthilile wo omalutu gamwe gi ili sho a holokele aalanduli Ye. Onkee ano Maria Magdalena tango okwa li a dhiladhila kutya Jesus omukeeleli gweyana. Iikando yimwe aalongwa ye tango kaya li ye mu dhimbulula. Mwaayihe mbika, hameholoko lye ye mu dhimbulula, ihe omoohapu nomiilonga.—Johannes 20:14-16; 21:6, 7; Lukas 24:30, 31.
11, 12. (a) Okomukalo guni po Kristus a thigi po evi? (b) Ano okomukalo guni po tu na okutegelela okugaluka kwaKristus?
11 Muule womasiku 40 konima yeyumuko lye, Jesus okwa holokele aalongwa ye molutu lwopanyama. (Iilonga 1:3) Opo nduno ye a yi megulu. Ihe yamwe otaa pula: ‘Aayengeli yaali mbeyaka ya li po ano inaa lombwela aayapostoli kutya Kristus “osho tuu ngeyi ta galuka, ngaashi mwe mu mono a yi megulu”?’ (Iilonga 1:11) Eeno, osho ya ti. Ihe ndhindhilika kutya yo oya ti “osho tuu ngeyi,” hamolutu tuu ndoka. Ongiini ano Jesus a zi po? Opwa li pwa mwenwa, nopwaa na eulikilo lyomontaneho. Aayapostoli ye ayeke ya li ye shi shi. Uuyuni inau shi tseya.
12 Dhiladhila nkene Ombimbeli tayi hokolola omukalo ngoka Jesus a thigi po aalongwa ye sho a londo kegulu: “Okwa yeluthwa pombanda montaneho yawo, noshikogo she mu fala ko, kaye mu wete we.” (Iilonga 1:9) Ano sho Jesus a tameke okuya pombanda, oshikogo oshe mu holeke omeho gopanyama gaayapostoli ye. Onkee ano Jesus omuzepo okwa ningi omwaamonika kuyo. Yo kaya li taa vulu oku mu mona. Opo nduno a londo megulu nolutu lwe lwopambepo. (1 Petrus 3:18) Onkee ano okugaluka kwe otaku ka kala wo okwaamonika notaku ka kala nolutu lwopambepo.
NKENE OMEHO AGEHE TAGE KE MU MONA
13. Tu na okuuva ko ngiini elombwelo ‘omeho agehe otaga ka mona Kristus’ uuna ye te ya miikogo?
13 Ano otu na okuuva ko ngiini oohapu dhEhololo 1:7? Moka omuyapostoli Johannes ta nyola: “Tala, oye te ya miikogo nomeho agehe otage ke mu mona nogaamboka ye mu ulula, nomazimo agehe gokombanda yevi otaga lilagana, sho taye mu mono.” Mpaka Ombimbeli otayi popi kombinga yokumona, hanomeho go genegene, ihe okomukalo gwopandunge nenge okuuva ko. Pashiholelwa, omuntu ngele u uva ko oshinima, oha ti: ‘Ondi wete ko.’ Dhoshili, Ombimbeli otayi popi kombinga ‘yomeho geni gokomwenyo.’ (Aaefeso 1:18) Onkee ano etumbulo “omeho agehe otage mu mono” otashi ti kutya ayehe otaa ka uva ko nenge taa ka dhimbulula ekalopo lyaKristus.
14. (a) Oshike sha dhiladhilwa noohapu “mboka ye mu ulula”? (b) Omolwashike tashi ka kala oluhodhi olunene ngele hugunina ayehe taa ka dhimbulula ekalopo lyaKristus?
14 Mboka yu “ulula” lelalela Jesus, kaye ko we kombanda yevi. Ano yo otaa thaneke aantu mboka taa landula eihumbato lyaalumentu mbeyaka yopethelemumvo lyotango, mokuhepeka aalanduli yonena yaKristus. (Mateus 25:40, 45) Masiku ethimbo otali ka thika opo Kristus a dhipage po aakolokoshi ya tya ngaaka. Yo oya londodhwa nale mwaashoka. Uuna edhipago ndika tali ka ningwa, yo otaa ka “mona” nenge taa ka dhimbulula shoka tashi ningwa. Noluhodhi lwawo otalu ka kala olunene shili!
KRISTUS OTA GALUKILE KEVI?
15. Ongiini oshitya “egaluko” hashi longithwa olundji?
15 Okugaluka, haaluhe tashi ti kutya omuntu ota yi kehala lyo lyenelyene. Pashiholelwa, otatu ti omuntu ‘okwa galuka mepuko,’ ngele tatu dhiladhila kutya ye okwi itedhulula. Sha faathana, omupsalmi Asaf okwa galikana Jehova: “Kalunga koongundu dhaakwiita, galuka ko, entamena mo megulu, ngu u tale.” (Epsalmi 80:15) Osha yela kutya Asaf ka li a tegelela Jehova a thige po egulu okugalukila koshigwana she. Ye okwa galikana owala Kalunga u ukithe eitulomo lye koshigwana she, Israel.
16. (a) Ongiini Kristus ta galukile kevi? (b) Uunake Kristus a galuka, nopo nduno oshike sha ningwa po?
16 Komukalo tuu ngoka, okugaluka kwaKristus itashi ti kutya ye ota galukile lelalela kevi ndika. Ihe otashi ti kutya ye okwa taamba oonkondo dhUukwaniilwa okupangela evi ndika alihe nokuukitha eitulomo lye kulyo. Ye ina pumbwa okuthiga po oshipangelapundi she megulu nokuya shili kevi oku shi ninga. Ngaashi tuu twa mono montopolwa ya tetekele, uunzapo wopaMbimbeli otau holola kutya mo 1914 E.N. ethimbo lyaKalunga olya li lya thikana kuKristus a galuke nokutameka okupangela. Opo nduno opu uvika eigidho megulu: “Ngashingeyi ehupitho noonkondo [nuukwaniilwa owa ningi wa]Kalunga ketu, nepangelo olyaKristus gwe.”—Ehololo 12:10, faathanitha KB.
17. Oshoka okugaluka kwaKristus okwaamonika, oshike ye e tu pe opo tu tseye kutya ye okwa galuka?
17 Oshoka okugaluka kwaKristus okwaamonika, opu na ngaa shoka tashi ulike kutya okwa ningwa shili? Eeno, opu na. Kristus mwene okwa gandja “endhindhiliko” li wetike, kulyo tatu vulu okutseya kutya ye oku li po ngashingeyi ihaa monika nokutya ehulilo lyuuyuni oli li popepi. Natu konakoneni “endhindhiliko” ndyoka.
[Picture on page 142]
Kristus okwa yamba olutu lwe eyambo. Ye ka li ta vulu oku li kutha we nokuninga ishewe omuntu
[Pictures on page 144, 145]
Omolwashike Maria Magdalena a tumpakanitha Jesus nomukeeleli gweyana konima yeyumuko lye?
Omolutu lwonyama luni po Jesus omuyumuki i indile Tomas a tse eke lye?
[Picture on page 147]
Kristus okwa li ta ka galuka momukalo tuu ngoka ye a thigi po evi. Okomukalo guni po ye a zi po?