Ontopolwa 5

Elongelokalunga lyaLye Kalunga Ha Taamba Ko?

1. Omukiintu Omusamaria okwa li a hala okutseya shike shi na ko nasha nokulongela Kalunga?

OWI ipula mbela nale: ‘Elongelokalunga lyalye Kalunga ha taamba ko?’ Epulo lya tya ngaaka otashi vulika lya li lye ya momadhiladhilo gomukiintu gwontumba sho a popi naJesus Kristus popepi nOndundu Gerisim muSamaria. Oku ukitha eitulomo keyooloko pokati kelongelokalunga lyAasamaria naandyoka lyAajuda e ta ti: “Ookuku oya [longelele Kalunga] kondundu ndjika; ihe ne ohamu ti, [muJerusalem omo mepandja lyokulongela Kalunga].” (Johannes 4:20, yelekanitha NW.) Jesus okwa lombwele mbela omukiintu Omusamaria kutya Kalunga oha taamba ko elongelokalunga kehe? Nenge okwa ti kutya iinima yontumba oyo tayi pulwa opo u hokiwe kuKalunga?

2. Jesus okwa yamukula omukiintu Omusamaria ngiini?

² Eyamukulo lyaJesus ekumithi olya li: “Ethimbo tali ya, itamu [longele, NW] Tate kondundu ndjika nenge muJerusalem.” (Johannes 4:21) Aasamaria oya kala ethimbo ele haya tila Jehova nohaya longele ookalunga yalwe kOndundu Gerisim. (2 Aakwaniilwa 17:33) Opo nduno Jesus Kristus okwa ti kutya hahala ndika nenge Jerusalem tayi ka kala ya simana melongelokalunga lyashili.

OKULONGELA KALUNGA MOMBEPO NOMOSHILI

3. (a) Omolwashike Aasamaria ya li inaaya tseya shili Kalunga? (b) Ongiini Aajuda aadhiginini nayalwe ya li ya vulu okutseya Kalunga?

³ Jesus okwa tsikile okulombwela omukiintu Omusamaria: “One tamu galikana shono mwaa shi shi; otse otatu galikana shika tu shi shi, oshoka ehupitho otali zi mAajuda.” (Johannes 4:22) Aasamaria oya li ye na omadhiladhilo giifundja gopalongelokalunga noya zimina owala omambo gatano gotango gOmbimbeli kutya ogo ga nwethwa mo—naashika osha li owala menyanyangidho lyawo ndyoka lya tseyika olyo oPentateuh yAasamaria. Onkee ano, yo kaya li shili ya tseya Kalunga. Ihe Aajuda oya li yi inekelelwa ontseyo yopamanyolo. (Aaroma 3:1, 2) Omanyolo oga pe Aajuda aadhiginini nakehe gulwe i ili ngoka a li a hala okupulakena shoka ya li ya pumbwa opo ya tseye Kalunga.

4. PaJesus, Aajuda nAasamaria oya li ye na okuninga shike andola oya li ya hala elongelokalunga lyawo li taambiwe ko kuKalunga?

⁴ Dhoshili, Jesus oku ulike kutya Aajuda nosho wo Aasamaria oya li ye na okulundulula omukalo gwawo gwokulongela Kalunga opo ya hokiwe kuKalunga. Okwa ti: “Ethimbo otali ya noli li po ngashingeyi, uuna aalongelikalunga yashili taa longele Tate mombepo nomoshili, oshoka, Tate okwa hala shili mboka taye mu longele, ya kale ya tya ngeyi. Kalunga oye Ombepo, naamboka taye mu longele, oyo ye na oku mu longela mombepo nomoshili.” (Johannes 4:23, 24, NW) Otu na okulongela Kalunga “mombepo,” tatu inyengithwa komitima dhu udha eitaalo nohole. Okulongela Kalunga ‘moshili’ otashi wapa okupitila mekonakono lyOohapu dhe, Ombimbeli, nomoku mu longela tatu tsu kumwe noshili ye ya hololwa. Owa hala oku shi ninga?

5. (a) “Okulongela Kalunga” otashi ti shike? (b) Otu na okuninga shike ngele otwa hala elongelokalunga lyetu li taambiwe ko kuKalunga?

⁵ Jesus okwa tsu omuthindo kutya Kalunga okwa hala elongelokalunga lyashili. Shika otashi ulike kutya opu na omikalo dhokulongela Kalunga ndhoka ihaadhi taambwa ko kuJehova. Okulongela Kalunga otashi ti oku mu simaneka noku mu longela iilonga iiyapuki. Ngele owa hala okuulika esimano komupangeli omunankondo, osha yela kutya oto ka kala wa hala oku mu longela nokuninga shoka a hokwa. Dhoshili, tse otwa hala ano okuhokiwa kuKalunga. Pehala owala lyokutya: ‘Elongelokalunga lyandje olyo opalela ndje,’ otu na ano okushilipaleka shili kutya elongelokalunga lyetu otali gwanitha po shoka Kalunga ta pula.

OKULONGA EHALO LYATATE

6, 7. Omolwashike Jesus inaa zimina yamwe mboka taya ti kutya oyo aalongwa ye?

⁶ Natu leshe Mateus 7:21-23 e tatu tala ngele otatu vulu okwiikalekela oshinima sha simana shoka tashi ulike ngele elongelokalunga kehe ohali taambiwa ko kuKalunga. Jesus okwa ti: “Hakehe ngoka ta lombwele ndje: Omuwa, Omuwa, ta yi moshilongo shomegulu, aawe, oye tuu ngoka ta longo ehalo lyaTate yomegulu. Esiku ndyoka oyendji otaa lombwele ndje notaa ti: Omuwa, Omuwa, hatse tuu mboka tu uvithile medhina lyoye notwa tidha mo oompwidhuli [iishitwa iiwinayi yopambepo] medhina lyoye notwa longa iilonga oyindji yoonkondo medhina lyoye? Ongame otandi ya lombwele ihe: Ongame [inandi] mú tseya noshitonale; zii po pungame, ne aakolokoshi.”

⁷ Okuzimina Jesus Kristus e li Omuwa okwa simanenena melongelokalunga lyashili. Ihe melongelokalunga lyoyendji mboka tayi iti kutya oyo aalongwa yaJesus omwa kambela sha. Okwa ti kutya yamwe otaya ka longa ‘iilonga yoonkondo,’ ngaashi mbyoka haku tiwa omaaludho gopaikumithalonga. Ihe otaya ka nyengwa okuninga shoka Jesus a ti osha simana noonkondo. Itaya ka ‘longa ehalo lyaHe.’ Ngele otwa hala okuhokiwa kuKalunga, otu na okwiilonga shoka osho ehalo lyaTate nopo nduno otu na oku li longa.

ONTSEYO YASHILI—OYO EGAMENO

8. Oshike sha pumbiwa opo tu longe ehalo lyaKalunga, notu na okuyanda omataloko geni ga puka?

⁸ Okulonga ehalo lyaKalunga otaku pula ontseyo yashili okutseya Jehova Kalunga nosho wo Jesus Kristus. Ontseyo ya tya ngaaka otayi fala komwenyo gwaaluhe. Dhoshili, tseni atuhe otatu ka kala ano twa hala okutala ko okumona ontseyo yashili okuza mOohapu dhaKalunga, Ombimbeli, ku li oshinima sha kwata miiti. Yamwe ohaya ti kutya inashi pumbiwa tu kale tatu ipula shampa owala tu li aayuuki naalaadhi melongelokalunga lyetu. Yalwe otaya ti: ‘Mpoka pu thike okashona hoka u shi, opo pu thike okashona hoka to pulwa.’ Ihe Ombimbeli otayi tu ladhipike tu indjipaleke ontseyo yetu okutseya Kalunga nomalalakano ge.—Aaefeso 4:13; Aafilippi 1:9, OB-1986; Aakolossa 1:9.

9. Ongiini ontseyo yashili tayi tu gamene, nomolwashike twa pumbwa egameno lya tya ngaaka?

⁹ Ontseyo ya tya ngaaka otayi gamene elongelokalunga lyetu kaali nyatekwe. Omuyapostoli Paulus okwa popi oshishitwa shontumba shopambepo shoka tashi ifetha “omuyengeli guuyelele.” (2 Aakorinto 11:14) Mokwiifethitha ngeyi, oshishitwa shika shopambepo—Satana—otashi kambadhala oku tu pukitha tu longe iinima mbyoka tayi kondjithathana nehalo lyaKalunga. Iishitwa yilwe yopambepo mbyoka hayi endathana naSatana ohayi nyateke wo okulongela Kalunga kwaantu, omolwaashono Paulus a ti: “Iinima mbyoka aapagani taye yi saagele, otaye yi saagelele oompwidhuli, haKalunga.” (1 Aakorinto 10:20) Otashi vulika aantu oyendji ya kala taya dhiladhila kutya otaya longele Kalunga pamukalo gu uka, nonando yo inaya longa shoka Kalunga a hala. Yo oya li ya pukithwa ya ye melongelokalunga inaali yela nolyiifundja. Otatu ki ilonga natango oshindji kombinga yaSatana noompwidhuli konima yethimbo, ihe aatondi mbaka yaKalunga otaya nyateke shili okulongela Kalunga kwaantu.

10. Oto ka ninga shike ngele gumwe okwa tula owina uuzigo momuthima gwoye gwomeya gokunwa, nontseyo yashili yOohapu dhaKalunga otayi tu kwatha okuninga shike?

¹⁰ Ngele owa tseya kutya gumwe okwa tula uuzigo momuthima gwoye gwomeya owina, oto ka tsikila mbela okunwa mugwo? Dhoshili, oto ka katuka onkatu mbalambala okumona onzo yomeya ga gamenwa noga yela. Ontseyo yashili yOohapu dhaKalunga otayi ke tu ningitha twa gwana okundhindhilika elongelokalunga lyashili nokweekelahi ondoya ndjoka tayi ningi elongelokalunga lyetu lyaa taambiwe ko kuKalunga.

IIPANGO YAANTU YI LI OMALONGO

11. Oshike sha li sha puka shi na ko nasha nelongelokalunga lyAajuda oyendji?

¹¹ Sho Jesus a li kombanda yevi, Aajuda oyendji inaya longa metsokumwe nontseyo yashili okutseya Kalunga. Onkee ano ya kanitha ompito okukala ye na ondondo ya yela komeho gaJehova. Shi na ko nasha nayo, Paulus okwa nyola: “Otandi ya hokolola, oyo haa kondjele Kalunga, ihe [hapantseyo yashili, NW].” (Aaroma 10:2) Oyi itokolele yo yene nkene ye na okulongela Kalunga pehala lyokupulakena kwaashoka a ti.

12. Oshike sha nyateke elongelokalunga lyaIsrael, noshilanduliko osha li shike?

¹² Petameko Aaisrael oya li nelongelokalunga lya yela lya gandjwa kuKalunga, ihe konima olya ka nyatekwa komalongo nokomaufilosofi gaantu. (Jeremia 8:8, 9; Malakia 2:8, 9; Lukas 11:52) Nonando aawiliki yelongelokalunga lyAajuda mboka ya tseyika oyo Aafarisayi, oya li taya dhiladhila kutya elongelokalunga lyawo olya taambiwa ko kuKalunga, Jesus okwe ya lombwele: “Jesaja okwe mú hunganeka dha tsa, one aainingithi, ongaashi kwa shangwa: Oshigwana shika ohashi simaneke ndje nomilungu, ihe oomwenyo dhawo odhi li kokule nangame; ihe taa longele ndje owala nokulonga aantu omalongo giipango yaantu.”—Markus 7:6, 7.

13. Ongiini tashi vulika natse tu ninge naanaa ngaashi Aafarisayi ya li ya ningi?

¹³ Otashi vulika mbela natse tu ninge ngaashi Aafarisayi ya li ya ningi? Shika otashi vulu okuningwa ngele otatu landula omithigululwakalo dhopalongelokalunga ndhoka twa thigulula pehala lyokukonakona shoka Kalunga a ti shi na ko nasha noku mu longela. Paulus okwa londodha shi na ko nasha noshiponga shika sholela e ta nyola: “Ombepo tayi popi yu uvitike nokutya omasiku gokomeho yamwe [otayi] iteka eitaalo notaa landula oombepo oohongololi nomalongo goompwidhuli.” (1 Timoteus 4:1) Ano inashi gwana owala okudhiladhila kutya elongelokalunga lyetu olya hokiwa kuKalunga. Ngaashi omukiintu Omusamaria ngoka a tsakaneke Jesus, otashi vulika twa thigulula omukalo gwokulongela Kalunga kaakuluntu yetu. Ihe otu na okukala nuushili kutya iinima mbyoka tatu ningi oya hokiwa kuKalunga.

KOTOKELA OKUYEMATITHA KALUNGA

14, 15. Omolwashike tu na okukala twa kotoka, nokuli nando otu na ontseyo yontumba yehalo lyaKalunga?

¹⁴ Ngele inatu kotoka, otatu vulu okuninga sha shoka itaashi taambiwa ko kuKalunga. Pashiholelwa, omuyapostoli Johannes okwi isizimike poompadhi dhomuyengeli e mu “galikane.” Ihe omuyengeli okwe mu londodha: “Ino shi yelekela, ongame omumati omukweni nogwooyakweni mboka ye na ehokololo lyaJesus; galikana [“longela,” NW] Kalunga.” (Ehololo 19:10) Ou wete ano nduno nkene sha simana okushilipaleka kutya elongelokalunga lyoye inali nyatekwa koludhi kehe lwokulongela iikalunga?—1 Aakorinto 10:14.

¹⁵ Sho Aakriste yamwe ya li ya tameke okulongitha omikalondjigilile dhopalongelokalunga ndhoka itaadhi hokiwa kuKalunga, Paulus okwa pula: “Otamu wapa ngiini okugama ishewe komikalo ndhoka dhonale dhaa na oshilonga nodhaa na oonkondo, nomwa hala, mu ninge aapika yadho ishewe? One ohamu yoolola omatango noomwedhi nomathimbo giituthi nomimvo, Onda tila omolweni, pamwe ondi ihepeke owala mune.” (Aagalati 4:8-11) Aantu mboka oya li ya mono ontseyo okutseya Kalunga ihe konima yethimbo oya puka mokudhiginina omikalondjigilile dhopalongelokalunga nomasiku omayapuki mbyoka ya li inaayi taambiwa ko kuJehova. Ngaashi Paulus a ti, otu na ‘okukala tatu konakona shoka sho opalela Omuwa.’—Aaefeso 5:10.

16. Johannes 17:16 na 1 Petrus 4:3 otaye tu kwatha ngiini okutokola ngele omasiku gomafudho nomikalondjigilile oya hokiwa kuKalunga?

¹⁶ Otu na okushilipaleka kutya ohatu yanda omasiku gomafudho gopalongelokalunga nomikalondjigilile oonkwawo ndhoka tadhi yono omakotampango gaKalunga. (1 Aatessalonika 5:21) Pashiholelwa, Jesus okwa popi kombinga yaalanduli ye a ti: “Yo kaye shi oshitopolwa shuuyuni, ngaashi naanaa ngame ndaa shi oshitopolwa shuuyuni.” (Johannes 17:16, NW) Mbela elongelokalunga lyoye oli na ekwatathano nomadhanoshituthi nomasiku gomafudho ngoka taga yono ekotampango lyokwaahenombinga shi na ko nasha niinima yuuyuni mbuka? Nenge mbela aayambidhidhi yelongelokalunga lyoye ohaya kutha ombinga omathimbo gamwe momikalondjigilile nomiituthi mbyoka tashi vulika ya kwatela mo eihumbato lya fa ndyoka tali hokololwa komuyapostoli Petrus? Ye okwa nyola: “Osha gwana, sho mwa gwanitha ehalo lyaapagani omasiku ngeyaka ga kuka, sho mwa kala moluhondelo, muuhalu, muunkolwi, miituthi yuusiku, muufukedhi wiikunuwa nomiihuna yokusimaneka iimenka.”—1 Petrus 4:3.

17. Omolwashike tu na okuyanda kehe shimwe shoka tashi ulike ombepo yuuyuni?

¹⁷ Omuyapostoli Johannes okwa tsu omuthindo nkene sha pumbiwa okuyanda iilonga kehe mbyoka tayi ulike ombepo yuuyuni waahenakalunga we tu dhingoloka. Johannes okwa nyola: “Inamu kala mu hole uuyuni noshaa shoka sha kala mo. Oongoka e hole uuyuni, ohole yaHe kayi mo muye. Oshoka shaa shoka sha kala muuyuni, ongashika okahalu konyama nokahalu komeho nokwiitangela kuuyamba, oombino inayi za muHe, aawe, omuuyuni. Uuyuni notau hulu po pamwe nokahalu kawo; ihe oongoka ta gwanitha ehalo lyaKalunga, oye ha kala aluhe.” (1 Johannes 2:15-17) Owa ndhindhilika tuu mbela kutya mboka haya “gwanitha ehalo lyaKalunga” otaya ka kala sigo aluhe? Eeno, ngele tatu gwanitha ehalo lyaKalunga notatu yanda iilonga mbyoka tayi ulike ombepo yuuyuni mbuka, otatu vulu okukala tu na etegameno lyomwenyo gwaaluhe!

DHIGININA OMITHIKAMPANGO DHAKALUNGA DHA TUMBALA

18. Etaloko lya puka lini Aakorinto yamwe ya li ye na shi na ko nasha neihumbato, noshike tu na okwiilonga mwaashika?

¹⁸ Kalunga okwa hala mboka taya dhiginine omithikampango dhe dha tumbala dhopamikalo ya kale aalongeli ye. Yamwe yomuKorinto shonale oya li ya dhiladhila papuko kutya Kalunga ote ki idhidhimikila eihumbato inaali yogoka. Otatu vulu okumona nkene ya li ya puka mokulesha Aakorinto yoTango 6:9, 10. Ngele otwa hala okulongela Kalunga komukalo ngoka ha taamba ko, otu na oku mu nyanyudha moohapu nomiilonga. Mbela omukalo gwoye gwokulongela Kalunga ohagu ku vulitha oku shi ninga?—Mateus 15:8; 23:1-3.

19. Ongiini elongelokalunga lyashili tali gumu nkene hatu endathana nayalwe?

¹⁹ Okweendathana kwetu naantu yalwe oku na wo okuulika omithikampango dhaKalunga. Jesus Kristus okwe tu ladhipike tu ningile yalwe ngaashi twa hala ye tu ningile, molwashoka shika oshi li oshitopolwa shelongelokalunga lyashili. (Mateus 7:12) Ndhindhilika shoka a ti wo kombinga yokuulika ohole yuumwayinathana: “Opo mpoka ayehe taye mú dhimbulula, one aalongwa yandje, ngele mu holathane.” (Johannes 13:35) Aalongwa yaJesus oye na okukala ye holathane nokuningila aalongelikalunga ooyakwawo nayalwe shoka oshiwanawa.—Aagalati 6:10.

OKULONGELA KALUNGA NOMUTIMA AGUHE

20, 21. (a) Kalunga ota pula elongelokalunga lya tya ngiini? (b) Omolwashike Jehova e ekelehi elongelokalunga lyaIsrael pethimbo lyaMalakia?

²⁰ Momutima gwoye, otashi vulika wa hala okulongela Kalunga komukalo ngoka ha taamba ko. Ngele osho, opo nduno ou na okutala ko elongelokalunga ngaashi Jehova he li tala ko. Omulongwa Jakob okwa tsu omuthindo kutya etaloko lyaKalunga olyo lya simana, halyetu. Jakob okwa ti: “Elongelokalunga [lya] yela nolyaa na onyata koshipala shaKalunga Tate olyo okupendulila po oothigwa naaselekadhi mokunika uuthigwa kwawo, nokwiikeya, kaa nyatekwe kuuyuni.” (Jakob 1:27) Tu na ehalo okunyanyudha Kalunga, kehe gumwe gwomutse oku na okukonakona elongelokalunga lye okushilipaleka kutya inali nyatekwa kiilonga yokwaahenakalunga nenge kutya twaaha kale itaatu longo shoka ye a tala ko sha simana noonkondo.—Jakob 1:26.

²¹ Elongelokalunga owala ndyoka lya yela nolyokomutima aguhe tali nyanyudha Jehova. (Mateus 22:37; Aakolossa 3:23) Sho oshigwana shaIsrael sha pe Kalunga oshishona shi vulike kwaashika, ye okwa ti: “Omumati e na okusimaneka ohe nomupika omwene gwe. Ano ongame ngele ohe, okusimanekwa kwandje oku li peni? Ongame ngele Omuwa, etilo okutila ndje oli li peni?” Oya yematitha Kalunga moku mu yambela iinamwenyo iiposi, ya lemana notayi ehama, nokwe ekelehi iilonga yelongelokalunga ya tya ngaaka. (Malakia 1:6-8) Jehova okwa gwana okulongelwa pamukalo gwa yogoka kwaahe na we noiha taamba sha shaahe shi okwiigandjelwa oye awike.—Eksodus 20:5, NW; Omayeletumbulo 3:9; Ehololo 4:11.

22. Ngele otwa hala Kalunga a taambe ko elongelokalunga lyetu, otu na okuyanda shike, noshike tu na okuninga?

²² Omukiintu Omusamaria ngoka a popi naJesus osha fa kwa li e na ohokwe yokulongela Kalunga komukalo ngoka Kalunga a hokwa. Ngele ndika olyo ehalo lyetu, otatu ka yanda omalongo niilonga ayihe ya nyata. (2 Aakorinto 6:14-18) Pehala lyaashono, otatu ki itula mo noonkondo tse yene tu mone ontseyo yashili okutseya Kalunga nokulonga ehalo lye. Otatu ka gwanitha po lelalela shoka ta pula melongelokalunga ndyoka tali vulu okutaambiwa ko. (1 Timoteus 2:3, 4, NW) Oonzapo dhaJehova ohadhi lalakanene okuninga naanaa ngawo, notadhi ku ladhipike tashi zi komutima u kuthe ombinga pamwe nadho mokulongela Kalunga “mombepo nomoshili.” (Johannes 4:24) Jesus okwa ti: “Tate okwa hala mboka taye mu [longele, NW], ya kale ya tya ngeyi.” (Johannes 4:23) Otwi inekela kutya ngoye omuntu a tya ngaaka. Ngaashi omukiintu ngwiyaka Omusamaria, kapu na omalimbililo, ngoye owa hala okumona omwenyo gwaaluhe. (Johannes 4:13-15) Ihe ou wete kutya aantu otaya kulupa notaya si. Ontopolwa tayi landula otayi ka fatulula kutya omolwashike.

KONAKONA ONTSEYO YOYE

Ngaashi shu ulikwa muJohannes 4:23, 24, elongelokalunga lini tali taambiwa ko kuKalunga?

Otatu vulu okumona ngiini ngele omikalondjigilile niituthi yontumba oya hokiwa kuKalunga?

Iitegelelwa yimwe yelongelokalunga ndyoka tali vulu okutaambwa ko oyini?

[Full-page picture on page 44]