Ontopolwa ontimilongo mbali nayimwe
Elalakano lyaJehova otali gwanithwa po pamukalo omukumithi
1, 2. (a) Elalakano lyaJehova li na ko nasha niishitwa ye iinandunge olini? (b) Oolye ya kwatelwa muukwanegumbo waKalunga waalongeli ye ya hangana?
IISHITWA ayihe iinandunge oya hangana mokulongela Kalunga awike kashili naayihe yomuyo otayi nyanyukilwa emanguluko lyeadhimo lyaana yaKalunga—shoka osho elalakano lyaJehova lyopahole. Osho wo sha halelelwa kwaamboka ye hole uuyuuki.
2 Jehova okwa tameke okugwanitha elalakano ndyoka ekumithi sho a tameke iilonga ye yeshito. Oshishitwa she shotango osha li Omwana ngoka okuza keyumuko lye e li “eadhimo lyuuyelele [waKalunga] nondjelo yuukalunga we.” (Aaheberi 1:1-3) Omwana ngoka okwa li e li shimwe shi ili, oshoka oye a shitwa kuKalunga awike. Konima yaashoka, iishitwa yilwe ayihe oya li tayi ka shitwa okupitila mOmwana ngoka: tango aayengeli megulu, opo nduno aantu kombanda yevi. (Job 38:7; Lukas 3:38) Yo ayehe oya li uukwanegumbo umwe awike meshito alihe. Kuyo ayihe Jehova okwa kala e li Kalunga, Omunamapangelo gweshito alihe naHe yawo omunahole.
3. (a) Oshike tseni atuhe twa thigulula kaakuluntu yetu yotango? (b) Elongekidho lyopahole lini lya ningilwa oluvalo lwaAdam kuJehova?
3 Sho aakuluntu yetu yotango yopantu ya pangulilwa eso molwashoka ya yonene owina, oya li ya tidhwa mo muEden noye ekelwahi kuKalunga. Inaya kala we oshitopolwa shuukwanegumbo we womeshito alihe. (Genesis 3:22-24; Deuteronomium 32:4, 5) Atuheni otu li oluvalo lwawo, nomolwashono twa valwa tu na omagamo guulunde. Ihe Jehova okwa li a tseya kutya yamwe yomoluvalo lwaAdam naEva otaya ka kala ye hole uuyuuki. Onkee ano okwa ningi elongekidho lyopahole moka mbaka ya li taya vulu okumona ‘emanguluko lyeadhimo lyaana yaKalunga.’—Aaroma 8:20, 21.
Israel sha kanitha ondondo yasho yokuhokiwa kuKalunga
4. Uuthembahenda uni Jehova a li a pe Israel shonale?
4 Oomvula 2 500 lwaampono konima yokushitwa kwaAdam, Jehova okwa li a pe aantu yontumba uuthembahenda ya kale ye na ekwatathano lyi ikalekelwa naYe. Okwa hogolola Israel shonale shi kale oshigwana she nokwe shi pe Ompango ye. (Genesis 12:1, 2) Okwe shi ningi oshigwana nokwe shi longitha metsokumwe nelalakano lye. (Deuteronomium 14:1, 2; Jesaja 43:1) Ihe oya li natango muupika wuulunde neso, nomolwashono inaashi nyanyukilwa emanguluko lyeadhimo ndyoka Adam naEva ya li ye na petameko.
5. Aaisrael oya kanitha ngiini ekwatathano lyawo lyi ikalekelwa naKalunga?
5 Nonando ongaaka, Aaisrael oya li ya hokiwa kuKalunga. Oya li wo ye na oshinakugwanithwa shokusimaneka Jehova e li He yawo nokulonga metsokumwe nelalakano lye. Jesus okwa tsu omuthindo nkene okugwanitha kwawo oshinakugwanithwa shoka kwa simana. (Mateus 5:43-48) Ihe oshigwana shaIsrael inashi shi ninga. Nonando Aajuda mboka oya tile: “Otu na tate gumwe, oKalunga,” Jesus okwa ti kutya iilonga yawo nombepo ndjoka yu ulike itayi tsu kumwe nokupopya hoka. (Johannes 8:41, 44, 47) Mo 33 E.N., Ompango oya hulithwa po kuKalunga, nekwatathano lye lyi ikalekelwa naIsrael olya hulu po. Ihe mbela shoka osha li tashi ti kutya aantu kaya li nando taya vulu okunyanyukilwa ekwatathano ewanawa naKalunga?
Okuhanganitha ‘mbyoka yomegulu’
6. Elalakano ‘lyelelo’ ndyoka Paulus a tumbula mAaefeso 1:9, 10 olini?
6 Omuyapostoli Paulus oku ulike kutya yamwe yomaantu oya li taya vulu okukala ye na ekwatathano lyi ikalekelwa naKalunga. Pashiholelwa, shi na ko nasha nelongekidho lyaJehova moka mboka ye na eitaalo tali longo taya vulu okuninga iilyo yuukwanegumbo We, Paulus okwa nyola ta ti: “[Kalunga] sho e tu hololele oshiholekwa [oshiyapuki, NW] shehalo lye, nokutya a hala okuhanganitha ayihe kumwe muKristus, naambyoka yomegulu naambika yopevi opautho lye, ngaashi she mu opalela okwiiyuthila muye mwene elelo lyegumbo lye, a hala, e li tsakanithe, omathimbo nge ga thikana.” (Aaefeso 1:9, 10) “Elelo” ndyoka ondingandinga yalyo oJesus Kristus. Okupitila muye, aantu otaye etwa monkalo ya hokiwa kuKalunga. Omwaalu gwawo gwa ngambekwa ogu na etegameno lyokukala megulu. Oyendji noonkondo otaya ka kala sigo aluhe kombanda yevi.
7. Oolye ye li ‘mbyoka yomegulu’?
7 Tango, okutameka pOpentekoste 33 E.N., eitulomo olya li lyu ukithwa ‘kwaambyoka yomegulu,’ sha hala okutya, mboka ya li taya ka thigulula pamwe naKristus mUukwaniilwa womegulu. Molweitaalo lyawo mongushu yeyambo lyaJesus, Kalunga okwe ya popi kutya oye li aayuuki. (Aaroma 5:1, 2) Konima yethimbo, Aajuda naamboka kaaye shi Aajuda oya li ya kwatelwa mo, na ‘mbyoka yomegulu’ oya li tayi ka kala yi thike po 144 000. (Aagalati 3:26-29; Ehololo 14:1) Oshihupe owala shawo shi li natango kombanda yevi.
Okuhanganitha ‘mbyoka yokevi’
8. Oolye ye li ‘mbyoka yokevi,’ noye na ekwatathano lini naJehova?
8 Elelo olyo tuu ndyoka otali hanganitha wo ‘mbyoka yokevi.’ Aantu omamiliyona ngashingeyi otaya hanganithwa netegameno lyokukala nomwenyo sigo aluhe kombanda yevi. Muukumwe noshihupe shaathigululi yUukwaniilwa, ohaya tanga edhina lyaJehova nohaya tumbaleke elongelokalunga lye. (Jesaja 2:2, 3; Sefanja 3:9) Ohayi ithana wo Jehova ‘He’ molwashoka oya zimina kutya oye onzo yomwenyo. Noye na omuthika gwa hokiwa koshipala she molweitaalo lyawo mombinzi yaJesus ndjoka ya tika. (Ehololo 7:9, 14) Ihe molwashoka oye li natango inaaya gwanenena, omonakuyiwa owala taya ka talika ko thiluthilu kutya oye li oyana yaKalunga.
9. Aaroma 8:21 otayu uvanekele shike aantu?
9 Mboka ye na etegameno lyokukala kombanda yevi ngashingeyi oya tegelela nenyanyu ethimbo sho aantu taya ka “mangululwa muupika [weyonuko].” (Aaroma 8:21) Emangululo ndyoka otali ka tameka konima ngele Kristus nomatangakwiita ge gomegulu ya hulitha po uudhigu uunene okupitila muHarmagedon. Shoka otashi ka tya ehanagulo lyonkalelo ayihe yaSatana yiinima yuukolokoshi, ndjoka tayi landulwa komalaleko nuuyamba gElelo lyOomvula Eyuvi lyaKristus e na oonkondo dhopaukwaniilwa.—Ehololo 19:17-21; 20:6.
10. Eimbilo lini lyehambelelo aapiya yaJehova taye ki imba?
10 Itashi ka kala tuu shituntula sho aapiya yaJehova kombanda yevi taya ka hangana mokutsa kumwe nomadhiladhilo gaapiya ye yomegulu, mboka tayi igidha nenyanyu taya ti: “Iilonga yoye iinene noyokukumitha, Omuwa Kalunga, omupangeli gwaayihe, oondjila dhoye odhu uka nodhoshili, ngoye omukwaniilwa gwiilongo ayihe. Olye ngo kee ku tile, Omuwa, ye kee ku simaneke edhina lyoye? Oshoka ongoye awike omuyapuki; oshoka iigwana ayihe otayi ya notayi ku simaneke nokutsa oongolo, oshoka omapangulo goye oga holoka.” (Ehololo 15:3, 4) Dhoshili, aapiya ayehe yaJehova otaya ka kala ya hangana moku mu longela e li Kalunga awike kashili. Nokuli noonakusa otaya ka yumuka notaya ka pewa ompito okufala omawi gawo pombanda mokutanga Jehova.—Iilonga 24:15.
Emanguluko ekumithi oli li komeho
11. Emanguluko ekumithi lini tali ka nyanyukilwa kaahupipo puudhigu uunene?
11 Konima sho uudhigu uunene mboka tau hulu po puHarmagedon, wa yeleka ko uukolokoshi kombanda yevi, Satana Ondiaboli ita ka kala we ‘kalunga kuuyuni mbuka.’ Itashi ka kala we sha pumbiwa opo aalongeli yaJehova ya kondjithe enwethomo ewinayilela lyaSatana. (2 Aakorinto 4:4; Ehololo 20:1, 2) Omalongelokalunga giifundja itaga ka kala po we opo ga hokolole Jehova pamukalo gwa penga nokweeta etopauko muulipamwe waantu. Aapiya yaKalunga kashili itaya ka ningilwa we okwaahenuuyuuki noitaya ka nyokomwa we kaapangeli yopantu. Emanguluko ekumithi itali ka kala tuu linyanyudha!
12. Ongiini aantu ayehe taya ka mangululwa muulunde nokiilanduliko yawo?
12 Jesus e li “Onzigona yaKalunga tayi kutha po oondjo dhuuyuni,” kekankameno lyeyambo lye ota ka dhima po oondjo dhaantu. (Johannes 1:29) Sho Jesus a li kombanda yevi, nokwa dhimi po omayono gaantu, okwa aludha mboka ya dhiminwa po oku ulika kutya okwe shi ninga. (Mateus 9:1-7; 15:30, 31) Komukalo gwa faathana, Kristus Jesus e li Omukwaniilwa gwomegulu gwUukwaniilwa waKalunga, pashikumithalonga ota ka tsikulula aaposi, ta ka thitulula aathitamatsi nota ka aludha mboka ihaaya popi, mboka ya lemana palutu, mboka taye ehama pamadhiladhilo naamboka ye na omikithi dhilwe dhi ili. (Ehololo 21:3, 4) ‘Ompango yuulunde’ otayi ka kala itaayi longo we kwaayehe mboka haya vulika, nopo nduno omadhiladhilo niilonga yawo otayi ke ya nyanyudha notayi ka nyanyudha wo Kalunga. (Aaroma 7:21-23) Pehulilo lyEyuvimumvo, otaye ke etwa megwaneneno lyopantu, ye li “oshifetha” shaKalunga awike kashili.—Genesis 1:26.
13. Pehulilo lyElelo lyOomvula Eyuvi, Kristus ota ka katuka oonkatu dhini, noshizemo oshini?
13 Ngele Kristus e eta aantu megwaneneno, opo nduno ota ka shunitha oonkondopangelo kuHe ndhoka a li e mu pa omolwiilonga mbika: “[Ota] gandja [uukwaniilwa, KB] kuKalunga naHe, nge a hanagula po elelo alihe nepangelo noonkondo adhihe. Oshoka oye e na okupangela sigo a tula aatondi ayehe kohi yoompadhi dhe.” (1 Aakorinto 15:24, 25) Elelo lyUukwaniilwa lyOomvula Eyuvi otali ka gwanitha po thiluthilu elalakano lyalyo; opo nduno epangelo ndyoka itali ka pumbiwa we li kale pokati kaJehova naantu. Nomolwashoka uulunde neso otayi ka kala ya kuthwa po thiluthilu naantu otaya ka kala ya kulilwa, itashi ka kala we sha pumbiwa opo Jesus a kale Omuhupithi. Ombimbeli otayi yelitha tayi ti: “[Omwana] mwene oti igandja kungoka a gandja ayihe kuye, Kalunga, opo a kale oye awike omiinima ayihe.”—1 Aakorinto 15:28.
14. Aantu ayehe ya gwanenena otaye ke ethiwa ya ningwe shike, nomolwashike?
14 Konima yaashoka aantu ya gwanenena otaya ka pewa ompito okuulika kutya oshi li ehogololo lyawo okulongela Kalunga awike kashili sigo aluhe. Onkee ano, manga inee ya taamba ko ye li oyana, Jehova ote ke etha aantu ayehe mboka ya gwanenena ya makelwe memakelo lyahugunina. Satana noompwidhuli dhe otaya ka mangululwa mo molumbogo. Ihe mboka ye hole shili Jehova itaya ka ningilwa uuwinayi kuyo. Ihe kehe gumwe ngoka te etha nokwaanuudhiginini a kale ihaa vulika kuJehova ota ka hanagulwa po sigo aluhe, pamwe nomunashipotha gwotango nosho wo oompwidhuli dhe.—Ehololo 20:7-10.
15. Onkalo yini tayi ka kala po ishewe mokati kiishitwa ayihe yaJehova iinandunge?
15 Jehova ota ka taamba ko nduno aantu ayehe ya gwanenena ye li oyana mboka ya kala haya yambidhidha uunamapangelo we pethimbo lyemakelo ndyoka lyahugunina. Okuza ethimbo ndyoka wu uka komeho, otaya ka kala nombinga yu udha memanguluko lyeadhimo lyaana yaKalunga ye li oshitopolwa shuukwanegumbo we meshito alihe. Iishitwa ayihe iinandunge yomegulu noyokombanda yevi otayi ka kala ishewe ya hangana moku mu longela e li oye awike Kalunga kashili. Elalakano lyaJehova otali gwanithwa po pamukalo omukumithi! Mbela owa hala okukala u li oshitopolwa shuukwanegumbo womeshito alihe mboka wa nyanyukwa notau kalelele? Ngele osho, otatu ku ladhipike u pulakene shoka Ombimbeli tayi ti mu 1 Johannes 2:17: “Uuyuni notau hulu po pamwe nokahalu kawo, ihe oongoka ta gwanitha ehalo lyaKalunga, oye ha kala aluhe.”
Oonkundathana dhokweendulula
• Manga oshipotha inaashi tukuluka muEden, ekwatathano lini aalongeli ayehe yaJehova ya li ye na naye?
• Oshinakugwanithwa shini shi niwe kwaamboka ye li aapiya yaKalunga?
• Oolye ishewe taya ka ninga oyana yaKalunga, nongiini shoka shi na ekwatathano nelalakano lye li na ko nasha nelongelokalunga lya hangana?
[Ethano pepandja 190]
Aantu aavuliki otaya ka nyanyukilwa onkalamwenyo moparadisa yomuuyuni auhe