‘Etelela oondhingambo, unene ndhoka dhopergamendi’
OMUYAPOSTOLI Paulus okwa li a lombwele omutumwa omukwawo Timoteus oohapu ndhoka dhi li pombanda e mu etele iinyolwa yimwe. Oondhingambo noopergamendi dholudhi luni Paulus a li ta pula? Oshike sha li she mu ningitha e dhi pule? Oshike tatu vulu okwiilonga mwaashoka Paulus a li a pula e etelwe?
Lwopokati kethelemumvo lyotango E.N. sho Paulus a nyola oohapu ndhika, omambo 39 gOmanyolo gOshihebeli oga li ga topolwa pokati tashi vulika omambo 22 nenge 24 ngoka ogendji gomugo ga li ga topolwa moondhingambo dha yoolokathana. Omupolofesoli Alan Millard okwa li a ndhindhilike kutya nonando oondhingambo ndhoka odha li dhi na ondilo “kadha li . . . itaadhi vulu okulandwa kwaamboka aayamba.” Yamwe oya li ya vulu okukala ye na nando yimwe yomudho. Pashiholelwa, omulumentu elenga enene lyokuEtiopia okwa li e na ondhingambo metemba lye nokwa li “ta lesha membo lyomuhunganeki Jesaja.” Okwa li ‘omudhiginini gweliko lyaKandeka, omukwaniilwa omukiintu gwaEtiopia.’ Omulumentu ngoka oku na okukala a li omuyamba nokukala e na Omanyolo ge mwene.—Iil. 8:27, 28.
Sho Paulus a li a pula Timoteus e mu etele iinima mbyoka a li a hala, okwa nyola a ti: “Etelela ombayikitha yandje nde yi thigi maandjaKarpus muTroas, etelela wo [oondhingambo, unene ndhoka dhopergamendi, NW].” (2 Tim. 4:13) Shika otashi ulike kutya Paulus okwa li e na omambo ogendji. Oshike nduno sha li shi na ongushu mongulumambo ye moka kaashi shi owala oohapu dhaKalunga? Omulongwantu A. T. Robertson okwa li a a popi shi na ko nasha noshitya ‘pergamendi’ shoka shi li movelise ndjika a ti: “Otashi vulika omambo ngaka gEtestamendi ekulu goopergamendi ga li ge na ondilo unene ge vulithe ngoka ga ningwa momanenge.” Okuza kuugundjuka, Paulus okwa li a ‘longwa kuGamaliel’ ngoka a li ha longo Ompango yaMoses nokwa li a simanekwa kaantu ayehe. Onkee ano, oshi shi okuuviwa ko sho Paulus a li e na oondhingambo dhe mwene dhOohapu dhaKalunga.—Iil. 5:34; 22:3.
Nkene Aakriste ya li haya longitha oondhingambo
Osha li uuthembahenda kaantu mboka ya li ye na oondhingambo dhOmanyolo Omayapuki. Ongiini nduno oyendji yomAakriste yopethimbo ndyoka ya li ya vulu okulesha Oohapu dhaKalunga? Ontumwafo yotango ndjoka Paulus a li a nyolele Timoteus otayi gandja uuyelele uushona kombinga yoshinima shoka. Okwa li a nyola a ti: “Longitha ethimbo lyoye mokulesha Omanyolo omayapuki montaneho yaayehe, . . . sigo tandi ya.” (1 Tim. 4:13) Okulesha montaneho okwa li kumwe kwomiinima mbyoka ya li hayi ningwa momagongalo gopaKriste shoka sha li omukalondjigilile mokati koshigwana shaKalunga okuza pethimbo lyaMoses.—Iil. 13:15; 15:21; 2 Kor. 3:15.
E li omukuluntugongalo, Timoteus okwa li a ‘longitha ethimbo lye’ mokulesha Omanyolo shoka sha ningitha yalwe mboka ya li kaaye na Oondhingambo ya mone uuwanawa. Osha yela kutya, pethimbo lyokulesha montaneho Oohapu dhaKalunga, ayehe oya li haya pulakene neitulomo opo kaaya pitililwe po nando okohapu yimwe, aavali nosho wo aanona osha yela kutya oya li wo haya kundathana komagumbo shoka sha li sha leshwa pokugongala.
Ondhingambo yaJesaya yomEfuta lya Sa ndjoka ya li ya tseyika nawa oya li yi na uule woometa 7,3. Osha yela kutya ondhingambo oya li ondhigu molwaashoka oya li yi na iiti koongenge nolundji oya li hayi tulwa mompunda omolwegameno. Otashi vulika Aakriste oyendji kaya li haya vulu okuhumbata oondhingambo odhindji uuna taye ku uvitha. Nokuli nonando Paulus okwa li e na oondhingambo dhimwe dhOmanyolo ndhoka ha longitha otashi vulika kaa li ta vulu okuya nadho adhihe momalweendo. Osha yela kutya okwa li a thigile kuume ke Karpus ngoka a li muTroas oondhingambo dhimwe.
Oshike tatu vulu okwiilonga moshiholelwa shaPaulus?
Manga inaa ninga eindilo lye, Paulus okwa li a nyola e li mondholongo muRoma oshikando oshitiyali a ti: “Methigathano ndika ondi itula mo nda mana mo. Onda matuka oshinano ashihe, . . . Ngashingeyi ondjambi yesindano oya tegelela ndje.” (2 Tim. 4:7, 8) Oohapu ndhika okwa li e dhi nyola lwopomumvo 65 E.N. pethimbo shoNero a li ta hepeke aantu. Pethimbo mpoka okwa li ta hepekwa noonkondo mondholongo. Okwa li e wete kutya oku li pokudhipagwa. (2 Tim. 1:16; 4:6) Oshi uvitikiwe ko sho Paulus a li ulike kutya okwa halelela okukala e na oondhingambo dhe. Nonando okwa li e na einekelo kutya okwa matuka methigathano sigo a sindana, okwa li a halelela okutsikila okwiinkondopaleka mokukonakona Oohapu dhaKalunga.
Timoteus otashi vulika a li muEfeso natango sho Paulus a li e mu pula e mu etele iinima ye. (1 Tim. 1:3) Ondjila ndjoka ya pita muTroas ya za muEfeso yu uka kuRoma oyi na ookilometa 1 600 lwaampono. Montumwafo oyo tuu ndjoka Paulus okwa li a ladhipike Timoteus a ti: “Kambadhala, u ye huka, manga okufu inaaku thika.” (2 Tim. 4:21) Ombiimbeli inayi holola ngele Timoteus okwa li a mono osikepa yi mu fale kuRoma opo a ka thike pethimbo mpoka Paulus a li a hala.
Oshike tatu vulu okwiilonga mwaasho Paulus a li a pula Timoteus e mu etele “oondhingambo, unene ndhoka dhopergamendi”? Okwa li a kala aluhe e na ondjuulukwe yokulesha Oohapu dhaKalunga pethimbo lyuudhigu wonkalamwenyo ye. Mbela ku wete kutya shoka osho sha li she mu ningitha a kale aluhe a tonata pambepo nokwi ipyakidhila nosho wo okukala ta vulu okuladhipika yalwe?
Kunena inatu yambekwa tuu ngele otu na Ombiimbeli yi ihwapo! Yamwe yomutse otu na nokuli Ombiimbeli dhi vulithe puyimwe nosho wo omatoloko gi ili nogi ili. Ngaashi Paulus, otwa pumbwa okukokeka okukala twa halelela okumona ontseyo yomuule yOohapu dhaKalunga. Ontumwafo ontiyali ndjoka Paulus a li a nyolele Timoteus oyo ya li ya hugunina yomoontumwafo 14 dha nwethwa mo ndhoka Paulus a li e na uuthembahenda wokunyola. Shoka a li a pula e etelwe osha nyolwa lwopehulilo lyembo ndyoka. Dhoshili, Paulus okwa li i indile Timoteus e mu ‘etele oondhingambo, unene ndhoka dhopergarmendi’ shoka sha li shimwe shomiinima mbyoka a li a pula a ningilwe hugunina.
Mbela owa halelela okumatuka wi itula mo nowa mana mo methigathano ndika ewanawa lyeitaalo sigo wa sindana, ngaashi naanaa Paulus a li a ningi? Mbela owa hala okukala wi ipyakidhila pambepo miilonga yaJehova nowi ilongekidha wu kuthe ombinga miilonga yokuuvitha ngaashi Omuwa a hala tu tsikile okuninga? Omolwashike nduno itoo ningi shoka Paulus a li a ladhipikile Aakriste ya ninge? “Itonatela ano mwene nosho wo elongo lyoye” mokukala wa halelela okukonakona Ombiimbeli pandjigilile embo ndyoka li li ngashingeyi kaantu oyendji nepu okulongithwa li vulithe oondhingambo.—1 Tim. 4:16.
[Okaalita/Omathano pepandja 18]
(Opo wu mone nkene uuyelele wu unganekwa, tala oshileshomwa)
Efeso
Troas
Roma