Aagundjuka kaleni mwa ‘hala okulonga uuwanawa’

Omuyapostoli Paulus okwa li a nyolele Titus ontumwafo ya nwethwa mo a ti kutya aalumentu aagundjuka naTitus a kwatelwa mo naya kale ‘aaholelwa miilonga iiwanawa.’ (Tit 2:6, 7) Montopolwa oyo tuu ndjoka, oku ulike kutya oshigwana shaJehova osha yelithwa kuJesus, opo shi ‘longe uuwanawa’ nuulaadhi. (Tit 2:14) Yimwe yomiilonga mbyoka iiwanawa, okuuvitha nokulonga aantu kombinga yUukwaniilwa waKalunga. Ngele ngoye omugundjuka, mbela ito vulu okulongitha oonkondo dhoye mokukutha uukwathelikokolindjila nenge uukokolindjila wondjigilile? — Omayel 20:29.

Ngele owa hala okuninga omukokolindjila, ninga omalongekidho omawanawa, opo wu kuthe ombinga miilonga mbyoka. (Luk 14:28-30) Pashiholelwa, ongiini to vulu okwiisila oshimpwiyu pashimaliwa, sho wu li miilonga yethimbo lyu udha? Oowili dhoye oto ke dhi gwanitha po ngiini? Galikana kuJehova e ku kwathele. (Eps 37:5) Popya kombinga yaashoka to dhiladhila naavali yoye nosho wo naakokolindjila ya pyokoka. Opo nduno katuka oonkatu wu adhe elalakano lyoye. Jehova ota ka yambeka oonkambadhala dhoye ndhoka to ningi nuulaadhi moku mu longela.

TALA OKAVIDIO AAGUNDJUKA TAYA SIMANEKE JEHOVA, E TO YAMUKULA OMAPULO NGAKA:

• Aagundjuka yamwe oya sinda omashongo geni opo ya kokole ondjila noye shi ende ngiini?

• Ongiini aavali taya vulu okukwathela oyana ya ninge aakokolindjila yondjigilile?

• Omolwashike okukala tu na elandulathano lyiilonga yokuuvitha kwa simana?

• Ongiini iilyo yegongalo tayi vulu okuladhipika nokukwathela omukokolindjila?

• Aakokolindjila ohaya mono omayambeko geni?