Aaleshi yoshifo shetu taya pula . . .

Mbela oshiwinayi kuKalunga ngele ohandi hili omakaya?

▪ Omuntu ngoka a hala okutseya oshili otashi vulika a pule epulo ndyoka, molwaashoka mOmbiimbeli kamu na ompango tayi popi kombinga yomakaya. Mbela shika otashi ti kutya oshidhigu okutseya kutya Kalunga okwa tala ko ngiini oshinima shino? Hasho nando.

Ombiimbeli otayi ti kutya ‘enyolo kehe olya nyolithwa kombepo yaKalunga.’ (2 Timoteus 3:16) MOmanyolo omu na omakotampango ga yela noohapu ndhoka tadhi holola kutya Kalunga okwa hala tu sile ngiini uukolele wetu oshimpwiyu. Tango natu tale shoka aakonakoni ya mona kombinga yankene omakaya ga guma uukolele waantu. Opo nduno otatu ka tala nkene omakotampango gOmbiimbeli ga pambathana naashoka sha monika po.

Omakaya ohaga yono po uukolele waahili nohaga fala sigo omeso. Gumwe gwomaantu yatano mboka haya si moAmerika okwa sa komakaya. Ehangano lyoNational Institute on Drug Abuse olya ti kutya moshilongo moka, omakaya ohaga dhipaga aantu oyendji omumvo kehe ge vulithe pomiyalu dha tulwa kumwe dhaamboka haya dhipagwa “kiikolitha, kelongitho lyiingangamithi, kedhipago, keidhipago, kiiponga yoohauto noko-AIDS.”

Mboka haya nu omakaya ohaye etele yalwe oshiponga. Osha nika aluhe oshiponga okukala paantu taya hili omakaya. Aantu mboka ihaaya hili omakaya, ihe ohaya kala paantu taya hili, oye li moshiponga shokukwatwa kokankela yokomapunga nokuuvu womutima. Oondohotola odha dhimbulula ishewe oshiponga shilwe shoka hashi zi muuzigo mboka hawu thigwa miikutu, momamate nokombanda yiinima yilwe konima nokuli sho olwithi lwa ya nale. Uuzigo mboka ohawu yono po unene tuu uukolele waanona nohawu ya ningitha yi ilonge nuudhigu.

Omakaya ohaga piki aantu. Mboka haye ga nu ohaya ningi aapika yoshinima shika sha nika oshiponga. Aakonakoni oyi itaala nokuli kutya uuzigo wonikotina mboka hawu piki aantu owo wumwe womiipiki mbyoka iidhigu okweetha po.

Omakotampango gOmbiimbeli otaga ti ngiini kombinga yiinima mbyoka? Natu tale kiinima tayi landula:

Kalunga okwa hala tu kale twa simaneka omwenyo. Mompango ndjoka Kalunga a li a pe oshigwana shaIsraeli, okwa li a popi kutya mboka ya hala oku mu nyanyudha oye na okusimaneka omwenyo. (Deuteronomium 5:17) Aaisraeli oya li ye na okutunga omushigo nenge okakuma okafupi ka kunduka ontala kombanda yongulu yomagumbo gawo. Omolwashike mbela? Kombanda yoongulu dhomagumbo gawo okwa li haku kala kwe elekana nokwa li haku kalwa. Okakuma oka li haka gamene aanegumbo nosho wo yalwe kaaya gwe ko nokumona oshiponga nenge ya se. (Deuteronomium 22:8) Kakele kaashono, Aaisraeli oya li ye na okushilipaleka kutya iimuna yawo itayi etele yalwe oshiponga. (Eksodus 21:28, 29) Omuntu ngoka ha nu omakaya oha taaguluka omakotampango ngoka ga tsuwa omuthindo moompango ndhoka. Oha yono po owina uukolele we. Oshikwawo, oha yono po uukolele waamboka ye li puye.

Kalunga okwa tegelela tu kale tu mu hole notu hole yalwe. Jesus Kristus okwa popya kutya aalanduli ye oye na okuvulika kiipango iyali iinene. Oye na okukala ye hole Kalunga nomutima gwawo aguhe, nomwenyo gwawo aguhe nomadhiladhilo gawo agehe nonoonkondo dhawo adhihe nokuhola yalwe ngaashi yi ihole yo yene. (Markus 12:28-31) Molwaashoka omwenyo ogu li omagano ga za kuKalunga, omuntu ngoka ha nu omakaya ohu ulike kutya ina simaneka omagano gomwenyo noke hole Kalunga. (Iilonga 17:26-28) Omikalo dhomuntu ngoka otadhi vulu okutula yalwe moshiponga oshinene, onkee ano, oha popi iifundja ngele ota ti kutya oku hole yalwe.

Kalunga okwa hala tu yande omikalo dha nyata. Ombiimbeli otayi lombwele Aakriste yi iyoge “shaa shoka tashi nyateke olutu nenge omwenyo.” (2 Aakorinto 7:1) Omakaya ohaga nyateke lela omuntu. Mboka ya hala okweetha po omakaya ya nyanyudhe Kalunga, oya taalela eshongo enene. Ihe kekwatho lyaKalunga, otaya vulu okumanguluka mo muupika mboka.