Nkene tu na okwiilongekidha omafalomo ngoka taga pondola

1. Omolwashike efalomo lyetu li na okukala ewanawa?

¹ Ngaashi owala ezimba lyiikulya mbyoka tayi nika nawa hali hili omuntu a kale a hala oku yi makela, efalomo ewanawa nalyo ohali ningitha omuntu a kale a hala okukundathana iinima yopambepo. Efalomo ndyoka ohashi vulika li kale lya yooloka muule nosho wo kwaashoka tashi kundathanwa. Ihe owa pumbwa oku li dhiladhila nawa noku li ilongekidha komeho yethimbo, opo li kale lya fa iikulya mbyoka ya dhoga nawa. (Omayel. 15:28) Oshike tashi ke ku kwathela wu ninge efalomo tali pondola?

2. Ongiini tatu vulu okwiilongekidha omafalomo ngoka taga hokitha?

² Popya iinima mbyoka tayi hokitha: Ngele omunegumbo ina hokwa efalomo lyetu, otashi vulika a hulithe po oonkundathana. Ngele to ilongekidhile uukalele, dhiladhila kutya aantu moshitopolwa oye na ohokwe miinima yini. Mbela oya hala epangelo ewanawa, nenge okukala ye na ombili momagumbo nosho wo okumona iita ya hula po? Olundji aantu oye hole okupopya omaiyuvo gawo. Onkee ano, natu ilongekidhe omapulo ngoka tage ya ningitha ya dhiladhile muule. Mbela ito vulu okuzula omafalomo ngoka haga kala mUukalele Wetu wUukwaniilwa, opo go opalele moshitopolwa sheni? Mbela itamu vulu okukala hamu idheula mEsiku lyElongelokalunga lyUukwanegumbo omafalamo ngoka tamu ka longitha muukalele?

3. Omaputuko nonakuziwa yaantu mboka ye li miitopolwa yetu otayi vulu ngiini oku tu kwathela tu lukile nawa omafalomo getu?

³ Ipula kombinga yeputuko nonakuziwa yomuntu: Momaputuko gamwe owu na okulombwela aantu nziya kutya owe endela shike. Ihe momaputuko gamwe inashi ndjanga nawa okupopya tango shoka we endela manga inoo kundana nkene aanegumbo ye li po nosho wo oku ya lombwela kutya ongoye lye. Miitopolwa yimwe, ohatu kala twa manguluka okulongitha Ombiimbeli momafalomo getu, molwaashoka aantu oye na ohokwe miinima yomalongelokalunga. (Iil. 2:14-17) Ihe miitopolwa yimwe moka aantu kaaye shi Aakriste nenge kaaye li iilyo yelongelokalunga nando olimwe, otashi ka kala shi li nawa tu longithe Ombiimbeli uuna tatu ningi omaishunoko, pehala lyoku yi longitha metalelo po lyotango. — Iil. 17:22-31.

4. Iitya mbyoka tatu ka popya tango oyi na okukala ya tya ngiini?

⁴ Shoka to ka popya tango: Longekidha nawa iitya yoye yotango. Olundji oshi li nawa okupopya omatumbulo ge li paufupi nogu uvitiwe ko nuupu. Omukalo moka tatu ka popya oohapu dhetu dhopetameko ogwa simanenena wo. Popya nehwamo nokukala to imemeha, opo omunegumbo a mone kutya owu na ko nasha shi li naye. Ngele otatu landula omaetopo ngoka otashi ke tu kwathela tu ilongekidhe omafalomo ngoka tage ki inyengitha aantu moshitopolwa shetu ya kale ya hala ya “lye koshililo shOmuwa.” — 1 Kor. 10:21.