Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
3-9 MEI
OMALIKO OKUZA MOOHAPU DHAKALUNGA | NUMERI 27–29
“Holela uukwatya waJehova wokwaanontondo”
Kala wa lenga uukwatya waJehova pakuudha
Aamwayinathana mbaka oya yi kuMoses e taye mu pula taya ti: “Edhina lyatate otali dhimine mo moluvalo lwe, sho a li [kee] na omuna omumati?” Oyi indile ya ti: “Tu pii mo wo oshitendelwa omaamwayina yatate!” Mbela Moses okwa li e ya yamukula kutya ‘Ompango ndjoka itayi lunduluka nando’? Aawe, “oohapu ndhoka okwe dhi etele koshipala shOMUWA.” (Num. 27:2-5, OB-1954) Oya li ya yamukulwa ngiini? Jehova okwa lombwele Moses a ti: “Shoka sha pulwa kaana yaZelofhad, oshi li mondjila, ya pa oshitendelwa mokati kaamwayina yahe. Ya pa oshitendelwa shahe.” Jehova ina hulila owala mpoka. Shoka a yamukula aakadhona mboka, okwe shi ningi ompango sho a lombwele Moses a ti: “Ngele oku na omuntu ta si ye ke na aanona aamati, omwana omukadhona na thigulule eliko lye.” (Num. 27:6-8; Jos. 17:1-6) Okuza mpoka, aakiintu Aaisraeli mboka ya li ye na uupyakadhi wa tya ngaaka oya li taya ka kala ya gamenwa.
Kala wa lenga uukwatya waJehova pakuudha
Kalya li tuu etokolo li li pahenda notali ulike kutya Jehova ke na ontondo! Jehova okwa li ungaunga nesimaneko naakiintu mbaka ya li itaaya vulu okwiikwatha ngaashi a li e shi ningile Aaisraeli mboka ya li ye li moonkalo dhi li hwepo. (Eps. 68:5) Ehokololo ndika olyo limwe lyomomahokololo gOmbiimbeli ngoka tagu ulike uushili kutya Jehova ihu ungaunga nontondo naapiya ye. — 1Sam. 16:1-13; Iil. 10:30-35, 44-48.
Kala wa lenga uukwatya waJehova pakuudha
Ongiini tatu vulu okuholela oshiholelwa shaJehova shokukala kee na ontondo? Dhimbulukwa kutya okwaanontondo okwa kwatela mo iinima iyali. Ngele katu na ontondo opo owala itaatu ka ungaunga nayalwe nontondo. Odhoshili kutya atuhe ohatu dhiladhila kutya otwa mangulukila kehe gumwe nokatu na ontondo. Otashi vulika to tsu kumwe nedhiladhilo kutya haaluhe hashi kala oshipu okukonakona omaiyuvo getu paushili. Onkee ano, oshike tatu vulu okuninga opo tu mone ngele otu na okayoya nenge hasho? Sho Jesus a li a hala a tseye shoka aantu haya popi kombinga ye, okwa pula ookuume ke aainekelwa a ti: “Aantu otaa ti ngiini, Omuna gwOmuntu oye olye?” (Mat. 16:13, 14) Omolwashike itoo holele Jesus mwaashoka? Oto vulu okupula kuume ngoka te ke ku lombwela oshili ngele owa tseyika kutya ku na ontondo. Ngele kuume koye okwa ti oku wete kutya mungoye omu na ngaa iikala yokuyoolola aantu shi ikolelela kuukwamuhoko, keputuko nenge kiiniwe yawo, owu na okuninga po shike? Galikana kuJehova waa na ezimbuko kombinga yankene wu uvite, to mu indile e ku kwathele wu lundulule iikala yoye opo wu mu holele thiluthilu. — Mat. 7:7; Kol. 3:10, 11.
Omaliko gomOmbiimbeli
it-2-E ep. 528, okat. 5
Omayambo
Iinuwandjambo. Iinuwandjambo oya li ya gandjwa pamwe nomayambo galwe ogendji, unene tuu konima sho Aaisraeli ya yi mEvi lyEuvaneko. (Num 15:2, 5, 8-10) Oya li ya kwatela mo omaviinu (“iikolitha,” NW) nogali ga tilwa koshiyambelo. (Num 28:7, 14; yelekanitha Eks 30:9; Num 15:10.) Omuyapostoli Paulus okwa li a nyolele Aakriste yomuFilippi a ti: “Nonando ondi tilwehi ngaashi oshinuwandjambo kombanda yomayambo ngoka eitaalo lyeni tali ga yambele Kalunga, ngame onda nyanyukwa notandi ka nyanyukwa pamwe nane amuhe.” Movelise ndjika Paulus okwa longitha oshinuwandjambo pathaneko, tu ulike kutya okwa li a hala okulonga lela pehala lyAakritse ooyakwawo. (Fil 2:17 yelekanitha NW) Konima yethimbo efupi manga inaa sa, okwa nyolele Timoteus a ti: “Ngame ohandi tilwahi ongomayambo giikunwa, nethimbo olya thika, ethimbo lyokuthiga po okukalamwenyo huka oli li popepi.” — 2Tim 4:6 yelekanitha OB-1954.
10-16 MEI
OMALIKO OKUZA MOOHAPU DHAKALUNGA | NUMERI 30–31
“Gwanitha po euvaneko lyoye”
it-2-E ep. 1162
Euvaneko
Olya li hali ningwa nehalo ewanawa, nolya li li na okudhigininwa. Omuntu okwa li ha gana nehalo ewanawa. Ihe ngele omuntu okwa ningi egano, ompango yaKalunga oya li tayi pula e li dhiginine. Kungawo, egano ndyoka olya li lya popiwa kutya “oti idhilike sha,” shoka tashi ulike kutya omuntu ngoka monkalamwenyo ye ayihe okwa li e na okugwanitha po oohapu dhe. (Num 30:2; tala wo Rom 1:31, 32.) Molwaashoka onkalamwenyo oyi li moshiponga, oshi shi okuuviwa ko sho Ombiimbeli tayi tu lombwele tu kale twa kotoka lela manga inaatu ninga euvaneko, okudhiladhila nawa kiinakugwanithwa mbyoka omuntu ta ka kala e na. Ompango otayi ti: “Ngele to uvanekele sha Omuwa Kalunga koye, . . . Omuwa ota tegelele euvaneko lyoye, notashi ningi ondjo, ngele ino li gwanitha. Kayi shi ondjo, ngele ito uvaneke sha.” — Deut 23:21, 22.
it-2-E ep. 1162
Euvaneko
Euvaneko ndyoka omuntu ta ningile Kalunga a ninge oshinima shontumba, a gandje omayambo nenge omagano, a ye miilonga nenge monkalo yontumba, nenge i idhilike iinima yontumba mbyoka inaayi puka pampango. Euvaneko olya li hali ningwa nehalo ewanawa tashi ulike kutya omuntu okwa hala okuninga oshinima shontumba. Molwaashoka euvaneko ndyoka olya kwata miiti, omuntu okwa li ha uvaneke nenge ta gana, nopoompito dhimwe uutumbulilo mboka uyali owa popilwa pamwe mOmbiimbeli. (Num 30:2; Mat 5:33) ‘Euvaneko’ okupopya kutya oto ka ninga oshinima shontumba, omanga “okugana” okwiindila ngoka e li pondondo yopombanda to ulike kutya shoka to gana oshinima shoshili nenge kutya owu na oku shi ninga. Olundji okugana ohaku ningitha omuntu a hangane nenge a ye mehangano lyontumba. — Gen 26:28; 31:44, 53.
Omanenedhiladhilo okuza membo lyaNumeri
30:6-8 — Omulumentu Omukriste ota vulu mbela okukaleka omauvaneko gomukiintu gwe? Shi na ko nasha nomauvaneko, Jehova ngashingeyi ohe endathana naalongeli ye pauhandimwe. Pashiholelwa, okwiiyapulila Jehova oku li euvaneko lyopaumwene. (Aagalati 6:5) Omusamane ke na uuthemba okukaleka euvaneko lya tya ngaaka. Ihe omukulukadhi oku na okuyanda okuninga euvaneko ndyoka tali kondjithathana nOohapu dhaKalunga nenge niinakugwanithwa mbyoka a pumbwa okukwathela omusamane gwe.
Omaliko gomOmbiimbeli
it-2-E ep. 28, okat. 1
Jefta
Aantu oya li haya vulu okugandjwa po ya ka longe owala miilonga yaJehova metsalihangano. Aavali oya li haya vulu oku shi ninga. Samuel oye omuntu gumwe naye a li a uvanekwa kuyina Hanna a ka longe metsalihangano manga inaa valwa. Euvaneko ndyoka olya li lya taambiwa ko komusamane gwe Elkana. Nziya sho Samuel a toyo, Hanna okwe mu fala ketsalihangano. Okwa faalele wo oshinamwenyo shi li eyambo. (1Sam 1:11, 22-28; 2:11) Simson naye wo okwa li okanona kamwe hoka kali ka gandjwa ka longe miilonga yaJehova ke li Okanasiri. — Aatok 13:2-5, 11-14; yelekanitha nepitikilo lyomusamane li na ko nasha nomwanakadhona li li muNum 30:3-5, 16.
17-23 MEI
OMALIKO OKUZA MOOHAPU DHAKALUNGA | NUMERI 32–33
“Tidhii mo aakwashilongo ayehe”
w10-E 8/1 ep. 23
Owe shi tseya ngaa?
“Omitumbo” ndhoka dha popiwa mOmanyolo gOshihebeli odha li shike?
Sho Aaisraeli ya li ye li pokuthika mEvi lyEuvaneko, Jehova okwa li e ya lombwele ya hanagule po omahala agehe moka mwa li hamu longelwa iikalunga kAakaanana mboka ya li ya kala mevi ndyoka. Kalunga okwe ya lombwele a ti: ‘Teyagulii po iimenka yawo ayihe ya hongwa memanya nenge ya hambulwa mosheela. Hanagulii po omitumbo dhawo adhihe dhiinonoma yuupagani.’ (Numeri 33:52) Omitumbo ndhoka otashi vulika dha li omahala ga andjakana ge li koondungu dhoondundu nenge omituni dha tungwa momahala galwe, ngaashi kohi yomiti nenge miilando. (1 Aakwaniilwa 14:23; 2 Aakwaniilwa 17:29; Hesekiel 6:3) Otashi vulika dha li hadhi kala dha tulwa iiyambelo, oongundhimanya, iihongwathano, iiyambelo yiitsinino niinima yilwe.
w08-E 2/15 ep. 27, okat. 5-6
Ilonga komapuko gAaisraeli
Kunena, otu li momashongo ogendji ngaashi ngoka ga li ge niwe kAaisraeli. Aantu pethimbo ndika nayo ohaya longele iikalunga. Iikalunga mbyoka ongaashi iimaliwa, aantu mboka ya tseyika nawa momainyanyudho, aadhani yomaudhano, opolotika, aawiliki yomalongelokalunga yontumba nokuli naapambele. Kehe shimwe shomiinima mbyoka otashi vulika tu tameke okukala twe shi pititha komeho monkalamwenyo. Okupanga uukuume wopothingo naamboka kaye hole Jehova, otashi ka yona po ekwatathano lyetu naye.
Omilalo dha nyata odho dha li dha pitithwa komeho mokulongela Baal, nAaisraeli oyendji oya li ya kokelwa momilalo ndhoka. Aantu yamwe yomoshigwana shaKalunga natango ohaya kokelwa moomwiigo dha faathana. Pashiholelwa, omuntu ngoka e na okatalekonawa nenge inaa kotoka, ota vulu okutala nuupu iinima ya nyata kokompiuta megumbo lye, oshinima shoka tashi yono po eiyuvo lye ewanawa. Itashi yemateke tuu ngele Omukriste okwa kokelwa mokutala omathano giipala kointaneta!
it-1-E ep. 404, okat. 2
Kaanan
Josua “okwa ningi ashihe shoka Omuwa a li a lombwele Moses” shi na ko nasha nokuhanagula po Aakaanana. (Jos 11:15) Ihe Aaisraeli kaya li ya landula ewiliko lye ewanawa nokuhanagula po thiluthilu mboka taya nyateke evi ndyoka. Aaisraeli sho ya tsikile okukala mumwe nAakaanana, oya nwethwa mo kuyo, shoka mokweendela ko kwethimbo sha etitha eso lyoyendji (kakele komiyonena, komilalo dha nyata nokiikalunga) pehala andola ya hanagulile po Aakaanana mboka ayehe, ngaashi ya li ya lombwelwa ye shi ninge. (Num 33:55, 56; Aatok 2:1-3, 11-23; Eps 106:34-43) Jehova okwa li a londodha Aaisraeli kutya ota ka katuka aluhe pauyuuki nota ka pangula aantu nokee na ondjoolola. Okwa li wo a ti kutya ngele Aaisraeli oya yi momakwatathano nAakaanana, ya hokanathana nayo, ya tameke okulongela nayo iikalunga nokutaamba ko omikalondjigilile dhomalongelokalunga gawo nosho wo omikalondjigilile dhilwe dha nyata, osha li tashi ke ya etela ya hanagulwe po noyu ‘umbwe mo moshilongo’ shoka. — Eks 23:32, 33; 34:12-17; Lev 18:26-30; Deut 7:2-5, 25, 26.
Omaliko gomOmbiimbeli
it-1-E ep. 359, okat. 2
Ongamba
Konima ngele aantu yu umbu oshihogololitho, e taku monika kutya ezimo lyontumba nali ye peni, opo nduno ya li haya tala kutya nali pewe ehala li thike peni shi ikolelela koshinima oshitiyali: uunene wezimo ndyoka. “Topoleni evi pamazimo nopamaludhi geni mokuumba iihogololitho. Oludhi olunene nalu pewe oshitopolwa oshinene, noludhi olushona oshitopolwa oshishona.” (Num 33:54) Etokolo lyoshihogololitho kutya ezimo lyontumba nali ka kale peni kalya li hali lundululwa, ihe evi olya li hali kuthwa oshitopolwa ngele ezimo eshona. Onkee, sho oshitopolwa shezimo lyaJuda sha monika kutya oshinene unene, ombinga yasho yimwe oya li ya pewa ezimo lyaSimeon. — Jos 19:9.
24-30 MEI
OMALIKO OKUZA MOOHAPU DHAKALUNGA | NUMERI 34–36
“Konga egameno puJehova”
Mbela oho kongo ngaa egameno puJehova?
Aaisraeli oya li haya ungaunga ngiini nedhipago lyaa shi lyoshiningilawina? Omuntu ngoka a dhipaga mukwawo inee shi ningila owina, okwa li natango e na ondjo. (Gen. 9:5) Nonando ongawo, okwa li he ethwa a ye ontuku kushimwe shomiiholamenolando ihamano, opo kaa dhipagwe komunezimo gwanakudhipagwa. Hoka oko a li ta vulu okumona egameno. Omudhipagi okwa li ha kala moshilando shokwiigamena sigo omuyambimukuluntu a si. — Num. 35:15, 28.
Mbela oho kongo ngaa egameno puJehova?
Uuna omuntu a dhipaga mukwawo, oku na okufadhuka po e ta yi a ka ‘lombwele aakuluntugongalo shoka a ningi,’ mboka ye li posheelo shoshilando shokwiigamena. Koshilando hoka oko ha pewa ehala lyokukala. (Jos. 20:4) Konima yethimbo, oha tuminwa natango kaakuluntugongalo yokoshilando hoka a dhipagela omuntu, opo ye mu pangule. (Lesha Numeri 35:24, 25.) Ngele aakuluntugongalo mboka oya mono kutya nakudhipaga ine shi ningila owina, ohaye mu lombwele a shune koshilando shokwiigamena.
Mbela oho kongo ngaa egameno puJehova?
Uuna omuntu ngoka a dhipaga mukwawo e li moshiholamenolando, oha kala e li megameno. Shi na ko nasha niilando mbyoka, Jehova okwa ti: ‘Otayi ka kala oshiholameno shoye.’ (Jos. 20:2, 3) Jehova ka li a tegelela nakudhipaga a kale ta pangulilwa oshipotha sha faathana. Ka li wo a tegelela nakupula ombinzi yanakudhipagwa a pitikwe okuya moshiholamenolando moka mu na nakudhipaga, opo ando e ke mu dhipage. Kungawo nakudhipaga ka li ha kala a tila okukwatelwa iikonene. Uuna e li moshilando moka, oha kala e li megameno lyaJehova. Oshilando shoka kasha li ondholongo yokwiigamena. Nakudhipaga, moshilando moka okwa li ha kala e na ompito yokulonga, yokukwathela yalwe noyokulongela Jehova e na ombili. Odhoshili kutya okwa li ha vulu okukala a nyanyukwa noku na onkalamwenyo tayi ti sha.
Omaliko gomOmbiimbeli
w91 2/1 ep. 24, okat. 13
Ekulilo lyaayehe lya gwana po
Ihe Adam naEva itaya mono uuwanawa wekulilo. Ompango yaMoses oya li yi na ekotampango ndika: “Omudhipagi na dhipagwe. Ita vulu okuhenuka eyono lye a fute ondjo ye.” (Numeri 35:31) Adam ka li a pukithwa, eyono lye ano olya li lyowina. (1Timoteus 2:14) Shika osha li tashi ti okudhipaga oluvalo lwe, oshoka ngashingeyi oya thigulula okwaagwanenena kwe, ano ya tokolelwa eso. Osha yela kutya Adam okwa li a gwana okusa, oshoka okwa hogololele owina okwaavulika kompango yaKalunga e li omulumentu a gwanenena. Andola Jehova okwa longithile ekulilo okudhimina po Adam, ando osha kondjitha omakotampango ge guuyuuki. Ofuto yondjambi yeyono lyaAdam, otayi dhimi po etokolo lyeso ndyoka lya tokolelwa oluvalo lwaAdam! (Aaroma 5:16) Pampango, oonkondo dhomayono hadhi hanagula, konzo yadho odha tetwa ko lela. Omukulili ota “makele eso omolwaayehe,” (OB-1954) nokwa humbata iilanduliko ayihe yomayono gaanona ayehe yaAdam. — Aahebeli 2:9; 2 Aakorinto 5:21; 1 Petrus 2:24.
31 MEI–6 JUNI
OMALIKO OKUZA MOOHAPU DHAKALUNGA | DEUTERONOMIUM 1–2
‘Etokolo olyaKalunga’
w96-E 3/15 ep. 23, okat. 1
Jehova oku hole uuyuuki
Aakuluntugongalo oye na oshinakugwanithwa shokupangula megongalo mboka ya yona omayono ga kwata miiti. (1 Aakorinto 5:12, 13) Uuna taye shi ningi, ohaya dhimbulukwa kutya uuyuuki waKalunga owa kwatela mo okusila omuntu ohenda mpoka tashi wapa. Ihe ngele itashi wapa, ngaashi ngele aayoni inaa iyela ombedhi, itaya vulu okusilwa ohenda. Aakuluntugongalo ihaya kondo mo omuyoni megongalo molwaashoka ye mu kwatela onkone. Ohaya kala ye na einekelo kutya okukondwa otaku ningitha omuntu ngoka i iyele ombedhi. (Yelekanitha Hesekiel 18:23.) Aakuluntugongalo ohaya katuka pauyuuki kohi yewiliko lyaKristus, naashoka osha kwatela mo okukala ya fa “eshigo lyokushiga ombepo.” (Jesaja 32:1, 2) Onkee kaye na okutokola nondhipi nokaaye na ondjele. — Deuteronomium 1:16, 17.
w02 8/1 ep. 22, okat. 4
Vulika nuudhiginini koonkondopangelo dhopakalunga
Ihe opwa li hapu pulwa oshindji opo u kale omupanguli kaashi shi owala okukala wa tseya Ompango. Molwokukala inaaya gwanenena, aalumentu mba aakuluntu oya li ye na okukala ya tonata opo ya pangele iikala kehe yawo iiwinayi — ngaashi okwiihola, okayoya nolwiho — mbyoka tashi vulika yi goyokithe okupangula kwawo. Moses okwe ya lombwele ta ti: ‘Inamu yoolola oshipala noshipala mokutokola oohapu dhawo; pulakeneni naanguka omufupi wo, ngashika omule gwooyakwawo, inamu tila omuntu, oshoka etokolo olyaKalunga.’ Eeno, aapanguli yaIsrael oya li ya pangula ye lile po Kalunga. Mbuno kawa li tuu uuthembahenda uukumithi! — Deuteronomium 1:16, 17.
Omaliko gomOmbiimbeli
Omalombwelo gaJehova oge shi okwiinekelwa
Sho Aaisraeli ya li yi idhenge ondjila ‘mombuga ontilithi’ moka ya kala uule woomvula 40, Jehova ka li e ya pe uuyelele wokondandalunde komeho yethimbo shi na ko nasha nankene a li te ke ya wilika, te ke ya gamena note ke ya sila oshimpwiyu. Nonando ongawo, okwa li u ulike iikando niikando kutya oya li taya vulu okukala ye mu inekela nosho wo omalombwelo ge. Mokulongitha oshikogo shomuzile omutenya nosho wo shomulilo uusiku, Jehova okwa li a dhimbulukitha Aaisraeli kutya okwa li te ya ambidhidha sho a li te ya pititha mombuga moka mwa li mwa nika oshiponga. (Deut. 1:19; Eks. 40:36-38) Okwa li wo a sile oshimpwiyu oompumbwe dhawo dhakehe esiku. “Oonguwo dhawo inadhi kulupa, noompadhi dhawo inadhi zinda.” Eeno shili, okwa li e ya “gwanithile oompumbwe dhawo adhihe.” — Neh. 9:19-21.
7-13 JUNI
OMALIKO OKUZA MOOHAPU DHAKALUNGA | DEUTERONOMIUM 3–4
“Oompango dhaJehova odhi li pandunge nodhu uka”
it-2-E ep. 1140, okat. 5
Oondunge
Okukonakona nokutula miilonga Oohapu dhaKalunga niipango ye, otaku vulu okuningitha omuntu a kale e na oondunge e vule aanongeki ye noku na euvoko e vule mboka aakuluntu kuye. (Eps 119:99, 100, 130; yelekanitha Luk 2:46, 47.) Shika osho molwaashoka uunongo noondunge ohawu zi moompango dhaKalunga; onkee Aaisraeli sho ya li taya ka vulika thiluthilu koompango ndhoka, osha li tashi ka ningitha iigwana mbyoka ya li ye ya kundukidha yi ya tale ko ‘aanongo naanandunge.’ (Deut 4:5-8; Eps 111:7, 8, 10; yelekanitha 1Aak 2:3.) Omuntu ngoka e na oondunge oku shi kutya Oohapu dhaKalunga oondjapuki, oha kala a hala eihumbato lye li kale metsokumwe nadho, noha indile Kalunga e mu kwathele mwaashoka. (Eps 119:169) Ohe etha etumwalaka lyoohapu dhaKalunga li ningine momutima gwe (Mat 13:19-23), ohe dhi nyolele koshipelende shokomutima gwe (Omayel 3:3-6; 7:1-4), nohadhi mu ningitha a kale e tonde “uugoyoki.” (Eps 119:104) Omuna gwaKalunga sho a li kombanda yevi okwa li a ulike oondunge, nokali a ningi omaipopilo kaa dhipagelwe komuti gwomahepeko, molwaashoka Omanyolo oga li ga hunganeke kutya ota ka sa momukalo ngoka. — Mat 26:51-54.
w99-E 11/1 ep. 20, okat. 6-7
Uuna aantu haya gandja nehalo ewanawa
Omunyekadhi okwa li a kumwa kwaashoka a mono, e ta yamukula neifupipiko a ti: “Aapiya yoye aanelago ngiini, mboka taa kala aluhe koshipala shoye noye na ompolo okuuva, sho to popi uunongo woye!” (1 Aakwaniilwa 10:4-8) Kali a popi kutya aapiya yaSalomo oya nyanyukwa molwaashoka ye li puuyamba. Pehala lyaashono, aapiya yaSalomo oya li ya yambekwa, molwaashoka oya li aluhe haya pulakene kuSalomo sho ta popi kombinga yuunongo mboka a pewa kuKalunga. Omunyekadhi gwokuSheba ina tulila po tuu oshigwana shaJehova kunena oshiholelwa oshiwanawa, shoka hashi pulakene kuunongo wOmushiti nowOmwana, Jesus Kristus!
Oohapu dhilwe ishewe oondhindhilikwedhi oondhoka omunyekadhi ngoka a lombwele Salomo a ti: ‘Omuwa, Kalunga koye, na hambelelwe.’ (1 Aakwaniilwa 10:9) Osha yela kutya okwa li a mono kutya Jehova oye a pe Salomo uunongo nuuyamba. Shoka otashi tsu kumwe naashoka Jehova a li a uvanekele Aaisraeli a ti: ‘Vulikeni koompango dhandje ne mu dhi dhiginine, notashi ulukile iigwana yilwe kutya ne aanandunge. Shampa taa kundana oompango adhihe ndhika, otaa ka tya: ‘Oshigwana shika oshi na uunongo noondunge dhi thike peni!’’ — Deuteronomium 4:5-7.
Owu li ngaa “omuyamba koshipala shaKalunga”?
Uuna Jehova ta laleke nuuyamba oshigwana she, ohe shi laleke nuuyamba momukalo gwa dhenga mbanda. (Jakob 1:17) Pashiholelwa, sho Jehova a li a pe Aaisraeli evi, olya li tali “tondoka omahini nomagadhi goonyushi.” Nonando evi lyaEgipiti nalyo olya li tali tondoka omahini nomagadhi goonyushi, evi ndyoka Jehova a li a pe Aaisraeli olya li lya yooloka ko kevi lyaEgipiti omolwoshinima shontumba sha simanenena. Moses okwa li a lombwele Aaisraeli a ti: “Omuwa Kalunga keni ota sile evi ndika oshimpwiyu.” Oohapu ndhoka odha li tadhi ulike kutya Aaisraeli oya li taya ka kala ya hepuluka oshoka Jehova okwa li te ke ya sila oshimpwiyu. Aaisraeli oya li taya ka lalekwa nuuyamba lela kuJehova nokunyanyukilwa onkalamwenyo yi vule yiigwana ayihe mbyoka ya li ye ya dhingoloka, ngele oya kala aadhiginini kuye. Dhoshili, eyambeko lyaJehova olyo hali “yambapaleke”! — Numeri 16:13; Deuteronomium 4:5-8; 11:8-15.
Omaliko gomOmbiimbeli
Omanenedhiladhilo okuza membo lyaDeuteronomium
4:15-20, 23, 24 — Mbela okwiindikwa okuninga iihongwathano okwa li taku ti kutya osha puka okuhonga iinima omolwelalakano lyokumonikitha nawa? Aawe. Okwiindikwa hoka okwa li ku na ko nasha nokuninga iihongwathano yi na sha nelongelokalunga — taku indike ‘okutsila oongolo iihongwathano noku yi simaneka.’ (OB-1954) Omanyolo itaga indike okuhonga iinima nenge okuthaneka iinima omolwelalakano lyokumonikitha nawa. — 1 Aakwaniilwa 7:18, 25.
14-20 JUNI
OMALIKO OKUZA MOOHAPU DHAKALUNGA | DEUTERONOMIUM 5–6
“Dheula aamwoye ya kale ye hole Jehova”
Aavali, sileni oshimpwiyu oompumbwe dhomaukwanegumbo geni
Shi na ko nasha naashoka, enyolo ndyoka hali tothwa mo olundji oDeuteronomium 6:5-7. Pandjeni Oombiimbeli dheni poovelise ndhoka e tamu dhi lesha. Ndhindhilika kutya aavali otaya lombwelwa tango kutya naya kokeke uupambepo wawo, ya kokeke ohole yawo yokuhola Jehova nokudhiginina oohapu dhe momitima dhawo. Eeno, omwa pumbwa okukala aakonakoni yOohapu dhaKalunga ya mana mo, sha hala okutya, omu na okukala hamu lesha Ombiimbeli pandjigilile nokutedhatedha kwaashoka tamu lesha, opo mu kale neuvoko lyolela nohole yokuhola oondjila dhe, omakotampango ge noompango dhe. Oshizemo, omitima dheni otadhi ka kala dhu udha ooshili oonkumithi dhomOmbiimbeli ndhoka tadhi ke mu inyengitha mu kale mu na enyanyu, etilosimaneko nohole yokuhola Jehova. Otamu ka kala mu na oshindji oshiwanawa okulombwela aanona yeni. — Lukas 6:45.
w07-E 5/15 ep. 15-16
Ongiini tandi vulu okukwathela aamwandje ya kale lela ya longwa?
Shoka ho dhiladhila, iikala yoye, omithikampango dhoye niinima mbyoka wu na ohokwe muyo, ihayi holoka owala mwaashoka ho popi, ihe nomwaashoka wo ho ningi. (Aaroma 2:21, 22) Manga owala okanona okashona, ohaka tameke nale okukonenena nawa kutya aavali yako otaya ningi shike. Aanona ohaya mono kutya oshike sha simana kaavali yawo, niinima mbyoka oyo olundji hayi ka kala ya simana kuyo. Ngele owu hole shili Jehova, aanona yoye otaye shi ndhindhilike mo. Pashiholelwa, otaya ka mona kutya okulesha Ombiimbeli noku yi konakona okwo kwa simana kungoye. Otaya ka ndhindhilika kutya owa pititha komeho iinima yUukwaniilwa. (Mateus 6:33) Okukala aluhe kwoye pokugongala kwopaKriste nokukutha aluhe ombinga miilonga yokuuvitha Uukwaniilwa, otaku ka ulika kutya okulonga miilonga iiyapuki yaJehova okwo kwa simanenena kungoye. — Mateus 28:19, 20; Aahebeli 10:24, 25.
=
Aavali, sileni oshimpwiyu oompumbwe dhomaukwanegumbo geni
Ngaashi Deuteronomium 6:7 te shi popi, opu na oompito odhindji mpoka aavali tamu vulu okukundathana iinima yopambepo naanona yeni. Ngele tamu ende pamwe, tamu longo megumbo pamwe, nenge tamu fudha po pamwe, otamu vulu okulongitha oompito dha tya ngaaka okugwanithila po aanona yeni oompumbwe dhawo dhopambepo. Ihe inamu pumbwa okukala tamu “uvithile” aanona yeni ooshili dhOmbiimbeli nokaapu na oluthuwo. Pehala lyaashono, omu na okukambadhala okukundathana momukalo tagu tsu omukumo, mwi ikolelela kiinima yopambepo. Pashiholelwa, iifo yo-Awake! ohayi kala niitopolwa oyindji mbyoka tayi kundathana iinima yi ili noyi ili. Iitopolwa ya tya ngaaka otayi vulu okukala onzo yoonkundathana dhi na ko nasha neshito lyaJehova lyiinamwenyo, omahala ge na ko nasha nuunshitwe uuwanawa muuyuni nosho wo omaputuko gaantu omahokithi gi ili nogi ili nomikalo dhawo dhokukalamwenyo. Oonkundathana dha tya ngaaka otashi vulika dhi inyengithe aagundjuka ya kale haya lesha olundji iileshomwa mbyoka hayi gandjwa kongundu yomupiya omudhiginini nomunandunge. — Mateus 24:45-47.
Omaliko gomOmbiimbeli
Ohole nuuyuuki muIsraeli shonale
Iiyilongomwa: Jehova ihe tu tala owala kombanda. Oha mono wo nkene tu li momitima. (1Sam. 16:7) Kapu na shoka sha holekwa momeho ge. Oha mono uuwanawa mutse nohe tu ladhipike tu wu longe. Ihe okwa hala tu kale hatu ndhindhilike mo omadhiladhilo omawinayi noku ga pangela, manga inaage tu ningitha tu yone. — 2Ondjal. 16:9; Mat. 5:27-30.
21-27 JUNI
OMALIKO OKUZA MOOHAPU DHAKALUNGA | DEUTERONOMIUM 7–8
“Ino hokanathana nayo”
w12-E 7/1 ep. 29, okat. 2
Omolwashike Kalunga a li a tula po ompango kutya aalongeli ye naya hokanathane owala nooitaali ooyakwawo?
Jehova okwa li e shi shi lela nawa kutya Satana okwa li a hala okuyona po oshigwana She moku shi ningitha shi longele iikalunga. Onkee Kalunga okwa li e ya londodha kutya mboka kaaye shi ooitaali “otaa ka kutha aamwoye pOmuwa yo ya ka longele iikalunga.” Oshinima shoka osha li lela tashi ka eta uupyakadhi. Ngele oshigwana shaIsraeli osha tameke okulongela iikalunga, Kalunga kali we ta ka kala e shi hokwa noku shi gamena, nosha li tashi ka vula okuponokelwa nuupu kaatondi yasho. Oshigwana shono osha li tashi ka za ngiini Mesiasa ngoka a li a uvanekwa? Osha yela kutya Satana okwa li e na etompelo lyokukokela Aaisraeli mokuhokanathana naamboka kaaye shi ooitaali.
Ondjokana ‘yopakriste’ oshinima ngaa shi li pandunge natango?
Jehova ote tu kumagidha mOohapu dhe, Ombiimbeli, opo oondjokana dhetu dhi kale dhopaKriste. Omolwashike mbela? Omolwaashoka oku shi shoka oshiwanawa kutse, nokwa hala oku tu gamena. Jehova ina hala tu ninge omatokolo kaage li pandunge ngoka tage ke tu yemateka. Pethimbo lyaNehemia, Aajuda oyendji oya li haya hokana aakiintu mboka ihaaya longele Kalunga. Onkee ano, Nehemia okwe ya lombwele oshiholelwa shaSalomo, opo e ya londodhe. “Kalunga okwa li e mu hole e te mu ningi omukwaniilwa gwaIsrael alihe.” Ihe ‘aakulukadhi aakwiilongo oya yonitha Salomo.’ (Neh. 13:23-26) Jehova oku shi kutya omayele ge omawanawa kutse, nomolwaashoka ta lombwele Aakriste, opo oondjokana dhawo dhi kale owala dhopaKriste. (Eps. 19:7-10; Jes. 48:17, 18) Otwa pandula sho e tu pa omayele gopahole noge shi okwiinekelwa. Uuna tatu vulika komayele ngoka tatu pewa kuJehova Omupangeli gwetu, nena otwa zimina kutya oye e na uuthemba woku tu lombwela shoka tu na okuninga. — Omayel. 1:5.
Kotokela ookuume aawinayi, momasiku ngaka gahugunina
Aakriste mboka ya hala okuya mondjokana, oye na okukala ya kotokela mboka haya endathana nayo. Ombiimbeli otayi tu londodha tayi ti: “Inamu kambadhala okulongela kumwe naamboka yaa shi ooyitaali, oshoka shika itashi vulika. Shoka shi li mondjila naashoka sha puka, otayi vulu ngiini okukala kumwe? Uuyelele nomilema otayi vulu ngiini okukala mumwe?” (2 Aakorinto 6:14) Ombiimbeli otayi lombwele aapiya yaJehova kutya oondjokana dhawo “odhi na okukala dhopakriste.” Sha hala okutya, oye na okuya mondjokana nomuntu ngoka i iyapulila Jehova, a ninginithwa nohi iyutha komithikampango dhaJehova. (1 Aakorinto 7:39) Ngele owa yi mondjokana nomuntu ngoka e hole Jehova, oto ka kala wu na kuume ngoka te ke ku kwathela wu kale omudhiginini kuKalunga.
Omaliko gomOmbiimbeli
Jehova ohe tu pe shoka twa pumbwa esiku kehe
Egalikano lyetu lyoshikwiila shesiku kehe oli na wo oku tu dhimbulukitha ompumbwe yetu yakehe esiku yiikulya yopambepo. Nonando okwa li a sa ondjala konima yokwiidhilika ethimbo ele, Jesus okwa kondjitha emakelo lyaSatana lyokushitukitha omamanya oshikwiila, a ti: “Okwa nyolwa: ‘Omuntu ita kala e na omwenyo koshikwiila ashike, ihe okukehe ohapu tayi zi mokana kaKalunga.’” (Mateus 4:4) Mpaka Jesus okwa totha mo omuhunganeki Moses, ngoka a li a lombwele Aaisraeli a ti: ‘[Jehova] okwe mu fupipike nokwe mu sitha ondjala, e te mu pe omanna mu lye, iikulya mbyoka inaayi liwa nale kune nokoohokulu. Shika okwe shi ningi, opo e mu longe kutya omuntu iha kala e na omwenyo koshikwiila ashike, ihe okohapu kehe tayi zi mokana kwOmuwa.’ (Deuteronomium 8:3 yelekanitha OB-1954.) Momukalo moka Jehova a gandja omanna inagu pa owala Aaisraeli iikulya yopalutu ihe oge ya longo wo iiyilongomwa yopambepo. Oshiilongomwa shimwe, oya li ye na ‘okutoola iikulya ya gwanena esiku ndyoka alike.’ Ngele oya toola ogendji ge vule pwaangoka ga gwana esiku, ngoka ga hupu po oga li haga tameke okwoola nokuninga omazinyo. (Eksodus 16:4, 20) Ihe shoka kasha li hashi ningwa mesiku etihamano sho ya li ye na okutoola lwaali opo ya kale ye na naangoka ya pumbwa mEsabati. (Eksodus 16:5, 23, 24) Onkee ano, omanna oge ya dhimbulukitha kutya oya li ye na okuvulika nonokutya onkalamwenyo yawo inayi ikolelela owala koshikwiila ihe “okohapu kehe tayi zi mokana kwOmuwa.”
28 JUNI–4 JULI
OMALIKO OKUZA MOOHAPU DHAKALUNGA | DEUTERONOMIUM 9–10
‘Omuwa Kalunga koye okwa hala wu ninge shike?’
w09-E 10/1 ep. 10, okat. 3-4
Jehova okwa hala tu ninge shike?
Oshike tashi vulu oku tu inyengitha tu vulike kuJehova nehalo ewanawa? Moses okwa tumbula shimwe a ti: “Tila Omuwa.” (Ovelise 12) Kawu shi uumbanda wokutila okwaadhika kiilanduliko iiwinayi, ihe etilosimaneko okutila Kalunga nokuvulika kiipango ye. Ngele otu na etilosimaneko ndyono, otatu ka kala twa hala okuyanda shoka tashi mu yemateke.
Oshike lela shi na oku tu inyengitha tu vulike kuKalunga? Moses okwa ti: “Kala u . . . hole [Jehova], mu longela komutima gwoye aguhe nokomwenyo gwoye aguhe.” (Ovelise 12) Okukala tu hole Jehova inaku kwatela mo owala omaiyuvo. Embo limwe otali ti: “Iityalonga yOshihebeli yomaiyuvo ethimbo limwe ohayi kala ya kwatela mo okukatuka oonkatu ndhoka hadhi etithwa kugo.” Otali ti wo kutya okukala tu hole Kalunga otashi ti “okukatuka pahole” molwe. Niitya yilwe, ngele otu hole Kalunga, otatu ka katuka momukalo ngoka tu shi kutya otagu mu nyanyudha. — Omayeletumbulo 27:11.
w09-E 10/1 ep. 10, okat. 6
Jehova okwa hala tu ninge shike?
Ngele ohatu vulika nehalo ewanawa, Jehova ote ke tu yambeka. Moses okwa nyola a ti: ‘Dhiginina iipango ayihe. Otandi yi ku pe nena omolwelago lyoye.’ (Ovelise 13) Iipango yaJehova ayihe, ano kehe shoka te tu lombwele tu ninge, otashi tu etele shili uuwanawa. Omolwashike mbela? Ombiimbeli otayi ti “Kalunga oye ohole.” (1 Johannes 4:8) Onkee, okwe tu pa iipango mbyoka, opo yi tu etele uuwanawa tawu kalelele. (Jesaja 48:17) Ngele otwa kala hatu ningi kehe shoka Jehova te tu lombwele tu ninge, otashi tu kwathele kaatu iyadhe momaupyakadhi ogendji ngashingeyi notatu ka mona omayambeko gaaluhe monakuyiwa mUukwaniilwa waKalunga.
Mbela oto vulu ngaa shili ‘okuhedha popepi naKalunga’?
Tatekulululwa Abraham ngoka a li ko nale okwa li e na ekwatathano lya tya ngaaka, na Jehova okwa li e mu ithana “kuume” ke. (Jesaja 41:8) Eeno, Jehova okwa li a tala ko Abraham e li kuume ke. Okwa li e na ekwatathano lyopothingo naKalunga molwaashoka okwa li i ‘itaala muYe.’ (Jakob 2:23) Kunena Jehova oha “gama” kwaamboka taye mu longele molwaashoka ye mu hole. (Deuteronomium 10:15, OB-1954) Oohapu dhe otadhi tu ladhipike tadhi ti: “Hedheni kuKalunga, oye nota hedha kune.” (Jakob 4:8) Moohapu muka omu na ehiyo nosho wo euvaneko.
Omaliko gomOmbiimbeli
it-1-E ep. 103
Aayanaki
Omuhoko gwaantu aalefule ya li haya kala miitopolwa yoondundu yaKaanan nosho wo miitopolwa yokomunkulofuta, unene tuu kuumbugantu. Oshikando shimwe aalumentu yamwe aanamadhina yatatu Aayanaki, Ahiman, Sheshai naTalmai, oya yi ya ka kale muHebron. (Num 13:22) Moshitopolwa moka omo mwa li mwa monika Aayanaki kAahebeli oondaadhi 12, noondaadhi 10 dhomudho odho dha li dha gandja ehokololo tali tilitha lyomutoto kutya aalumentu mboka oya li yoluvalo lwAanefilim mboka ya li ko manga Eyelu inaali ya, nosho wo kutya Aahebeli kuyo oya li ya fa “oombahu, OB-1954.” (Num 13:28-33; Deut 1:28) Aayanaki oya ka kala haya popiwa kutya oya fa wo Aaemimi nAarafa mboka ya li aanankondo. Oonkondo ndhoka ya li ye na odha ningitha aantu ya kale haya popi eyeletumbulo tali ti: “‘Kaku na ngoka te yi itakeke.’” — Deut 2:10, 11, 20, 21; 9:1-3.