Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
1-7 NOVOMBA
OMALIKO OKUZA MOOHAPU DHAKALUNGA | JOSUA 18–19
“Omukalo gwopandunge gwaJehova gwokutopola evi”
Oongamba
Osha fa shi li ngeyi kutya okutopolwa kwevi pamazimo okwa li ku na okuningwa shi ikolelela kiinima mbika iyali: oshizemo shoshihogololitho nosho wo kuunene wezimo. Oshihogololitho otashi vulika sha li owala hashi longithwa, opo shu ulike evi ndyoka li na okuthigululwa po kezimo kehe. Elongekidho ndyoka olyokuthigulula oshitopolwa shontumba shevi ngaashi ombinga yokuumbangalantu, yokuumbugantu, yokuuzilo, yokuuninginino, yokomunkulofuta nenge yokoshitopolwa shokoondundu. Elombwelo lyokulongitha oshihogololitho olya za kuJehova, nosha li hashi longithwa okukeelela ondumbo nenge omanyenyeto mokati komazimo. (Omayel 16:33) Okupitila moshinima shika Kalunga okwa li wo ta wilike, opo iinima mezimo kehe yi tse kumwe naashoka sha hunganekwa kutatekulululwa Jakob sho a li pokusa mbyoka ya nyolwa muGenesis 49:1-33.
it-1-E ep. 359, okat. 1
Ethigululo
Okuthigululwa kwomavi. Iinima mbyoka ya thigululwa koyanamati yaIsraeli oya li ye yi pewa kuJehova, ngoka a tende oongamba dhevi okupitila muMoses. (Num 34:1-12; Jos 1:4) Oyanamati yaGad, yaReuben nosho wo etatazimo lyaManasse, oya li ya pewa iitopolwa yawo kuMoses. (Num 32:33; Jos 14:3) Omanga omazimo galwe agehe ga pewa iitopolwa pashihogololitho mewiliko lyaJosua naEleasar. (Jos 14:1, 2) Metsokumwe nehunganeko lyaJakob ndyoka tali adhika muGenesis 49:5, 7, Simeon naLevi kaya li ya pewa iitopolwa yi ikalekelwa yevi. Oshitopolwa shaSimeon osha li sha kwatela mo evi (mwa kwatelwa iilando) ndyoka lya ya sigo omokati kevi lyaJuda (Jos 19:1-9), omanga Levi a li a pewa iilando 48 muIsraeli ashihe. Molwaashoka Aalevi oya li ya langekwa po ya longe miilonga yi ikalekelwa yometsalihangano, Jehova oye a li ta ka kala uuthiga wawo. Oshitimulongo shoka sha li hashi gandjwa, osho sha li uuthiga nenge oshipewa shawo, omolwiilonga yawo. (Num 18:20, 21; 35:6, 7) Aanegumbo oya li haya pewa iinakugwanithwa miitopolwa yomazimo gawo. Sho aanegumbo tayi indjipala, oyanamati oya li haya tendelwa iitopolwa yevi iishona.
it-1-E ep. 1200, okat. 1
Oongamba
Konima ngele oshihogololitho shu ulike oshitopolwa shezimo lyontumba, osha li wo pandunge iitopolwa yi gandjwe shi ikolelela koshinima oshitiyali: uunene wezimo. “Topoleni evi pamazimo nopamaludhi geni mokuumba iihogololitho. Oludhi olunene nalu pewe oshitopolwa oshinene, noludhi olushona oshitopolwa oshishona.” (Num 33:54) Nonando oshitopolwa shevi osha li hashi hogololwa pashihogololitho, opwa li wo hapu vulu okuningwa omalunduluko shi ikolelela kuunene wezimo. Sho kwa monika kutya oshitopolwa shaJuda oshinene unene, ombinga yimwe yoshitopolwa shoka oya pewa ezimo lyaSimeon. — Jos 19:9.
it-1-E ep. 359, okat. 2
Omaliko gomOmbiimbeli
Oongamba
Ehokololo kombinga yetopolo lyoshitopolwa shokuuninginino waJordan, otali ulike kutya oshihogololitho osha li sha kwata tango ezimo lyaJuda (Jos 15:1-63), lyaJosef (Efraim) (Jos 16:1-10) nosho wo etatazimo lyaManasse. Omazimo ngoka oga tula kuuninginino waJordan (Jos 17:1-13) hoka ya tokola oongamba dhawo nokuyalula iilando. Konima yaashika, opwa ka kala pu na omakuyunguto mokutopolwa kwevi, molwaashoka ontanda yAaisraeli oya li ya tembuka okuza muGilgal okuya kuShilo. (Jos 14:6; 18:1) Inapu popiwa kutya shoka osha li sha pula ethimbo li thike peni, ihe pehulilo Josua okwa ganda omazimo gaheyali, ngoka ga li ga hupa ko, omolwiikala yawo yokukakadhala okulala evi. (Jos 18:2, 3) Opwa kala omapopyo gi ili nogi ili ngoka ga ningitha omazimo gaheyali ga kakadhale. Yamwe oya ti kutya omasheko ogendji ngoka ga li ga ningwa pethimbo lyokukwata ko evi nosho wo emanguluko lya ngambekwa ndyoka ya li ya pewa kAakaanana mboka ya li taye ya ningile omatilitho, otashi vulika osho sha li sha ningitha omazimo ngaka ga kale gu uvite kutya itaga vulu okukutha ko mbala iitopolwa yevi mbyoka ya hupa ko. Okukakadhala okukondjitha aatondi yawo aanankondo, otashi vulika nakwo kwa gwedha ko kokweenda kwago kashona ya kuthe ko evi. (Jos 13:1-7) Shimwe ishewe, ontseyo yawo kombinga yoshitopolwa shika shEvi lyEuvaneko otashi vulika ya li onshona okuyelekanitha nontseyo ndjoka ya li ye na yi na ko nasha niitopolwa mbyoka ya adhika ya lalwa nale.
it-1-E ep. 359, okat. 5
8-14 NOVOMBA
OMALIKO OKUZA MOOHAPU DHAKALUNGA | JOSUA 20–22
“Iiyilongomwa okuza mokuuva ko oshinima pambambo”
Iinima mbyoka tayi ku kwathele opo u popye nakuume koye kopandjokana
Okupopya wa manguluka otaku vulu okukeelela, opo pwaaha kale oontamanana nokwaauvathana. Nalenale mondjokonona yAaisraeli, ezimo lyaRuben, lyaGad netata lyezimo lyaManasse ngoka ga li haga kala kuuzilo womulonga gwaJordan, oga li ga tungu “oshiyambelo oshinene” puJordan. Omazimo galwe oga li gu uvu ko oshinima shoka pombambo. Molwaashoka oga li taga dhiladhila kutya aamwayina mboka ye li handiyaka yaJordan oya li ya longo oshilonga shuushunimonima, omazimo gokuuninginino oga li gi ilongekidha okuhingila iita mboka ye li aniwa aanashipotha. Ihe manga inaa hinga iita, oya li ya tumu aatumwakalelipo opo ya ka popye nomazimo ngoka gokuuzilo. Kaya li tuu ya katuka pandunge! Oya li ya mono kutya oshiyambelo kasha li shokuningilwa omafikiloyambo ngoka kaage li pampango. Pehala lyaashono, omazimo gokuuzilo oga li ga tila kutya monakuyiwa omazimo gamwe otage ke ya lombwela taga ti: “Ne kamu na sha nOMUWA.” Onkee ano oshiyambelo osha li owala endhindhiliko kutya nayo wo oya li aalongeli yaJehova. (Josua 22:10-29) Oya li ya luku oshiyambelo shoka Onzapo, tashi vulika molwaashoka osha li shi li endhindhiliko kuyo kutya Jehova okwa li Kalunga kashili. — Josua 22:34.
“Natu lalakanene iinima mbyoka tayi eta ombili”
Aaisraeli yamwe otashi vulika ya li yu uvite kutya opu na nale uumbangi wa yela wu na ko nasha nepuko ndyoka lya ningwa nonokutya okuponoka monanguwi itaku ke etitha lela iiponga oyindji. Pehala lyokukatuka onkatu meendelelo, omazimo gokuuninginino waJordan, oga li ga tumu aawiliki ya ka kundathane uupyakadhi mboka naamwahe. Oya pula ya ti: “Omolwashike mwa ningi uuwinayi u thike mpono okuyona kuKalunga kalsraeli? . . . . Nani ne itamu mu landula we?” Uushili owo kutya omazimo ngoka ga li ga tungu oshiyambelo, kaga li ge shi ningi ando molwokwaa na uudhiginini. Mbela oga li gi inyenge ngiini kelundilo ndyoka? Mbela oya li ya ponokele nongeyo mboka ye ya lundile nenge ya tindi okupopya nayo? Hasho nando. Pehala lyaashono, omazimo ngoka ga lundilwa oga yamukula nombili nokuyelitha kutya shoka ya ningi oye shi ningi, molwaashoka ya hala okulongela Jehova. Momukalo moka yi inyenge ogwe ya kwathele ya kaleke po ekwatathano lyawo naJehova Kalunga nosha hupitha wo oomwenyo. Oonkundathana dhawo dhopambili odha kandula po omukundu nokukaleka po ishewe ombili. — Jos. 22:13-34.
w08-E 11/15 ep. 18, okat. 5
Omaliko gomOmbiimbeli
Kaanana
Nonando Aakaanana oya li ya hupu sho oshitopolwa shawo oshinene sha kwatwa ko, okwa li taku vulu natango okutiwa: “Osho Omuwa a pe Israel evi alihe ndyoka e li uvanekele oohekulu nokugana, e li ya pe. . . . Omuwa okwa dhiginine euvaneko lye kehe a li u uvanekele oshigwana shalsrael.” (Jos 21:43-45) Aatondi ayehe mboka ya li ya kundukidha Aaisraeli, oya li ye ya tila nokapu na ngoka a li e ya ningile omatilitho. Kalunga okwa li a popi metetekelo kutya ota ka tidha po Aakaanana “kashona nakashona,” opo iithitukuti kaayi indjipale nevi kaali mbugale. (Eks 23:29, 30; Deut 7:22) Nonando Aakaanana oya li ye na iikondjitho ya kola yomiita, mwa kwatelwa omatembakwiita giiyela, uuna Aaisraeli ya nyengwa okukutha ko iitopolwa yontumba, Jehova haye a li ta vulu okupewa ombedhi kutya andola ina gwanitha po shoka a uvaneka. (Jos 17:16-18; Aatok 4:13) Pehala lyaashono, ehokololo otali ulike kutya Aaisraeli oya li ya sindika iikando yontumba, omolwokwaanuudhiginini kwawo. — Num 14:44, 45; Jos 7:1-12.
it-1-E ep. 402, okat. 3
15-21 NOVOMBA
OMALIKO OKUZA MOOHAPU DHAKALUNGA | JOSUA 23–24
“Ekumagidho lyaJosua lyahugunina koshigwana”
Ehangano
Sho oshigwana shaIsraeli sha li pokuya mEvi lyEuvaneko, muKaanana, opwa holoka onkalo yontumba. Kalunga Omupangeliawike okwa li a pe Aaisraeli uuthemba wokulala evi, opo euvaneko ndyoka a uvanekela oohekulululwa li gwanithwe po. Onkee ano, kaya li taye ke li lala ongaakwiilongo, na Jehova okwa li e ya indike kaaya hangane niigwana yaapagani mbyoka ya adha mo. (Eks 23:31-33; 34:11-16) Aaisraeli oya li owala ye na okuvulika koompango dhaKalunga, ihe hakwaandhoka dhiigwana mbyoka. (Lev 18:3, 4; 20:22-24) Oya li lela ya londodhwa kaaya hokanathane niigwana mbyoka. Okuhangana hoka kakwa li owala ta ku ke ya ningitha ya hokane aakiintu aapagani, ihe noya hangane wo naapambele yawo nokukutha ombinga miinima yomalongelokalunga giifundja pamwe nomithigululwakalo dhago. Shoka osha li tashi ke ya pundukitha nokuninga aashunimonima. — Deut 7:2-4; Eks 34:16; Jos 23:12, 13.
it-1-E ep. 75
Molwaashoka otwa mona omauvaneko gamwe gaJehova taga gwanithwa, otatu vulu okutya: “Omuwa Kalunga keni okwe mu pe iinima ayihe iiwanawa mbyoka e yi mu uvanekele. Okwa gwanitha euvaneko kehe e li uvaneke; kape na nando olimwe lya gwile pohi.” (Josua 23:14) Jehova oha mangulula aapiya ye, ohe ya gamene nohe ya sile oshimpwiyu. Mbela opu na ngaa limwe lyomomauvaneko ge ndyoka inaali gwanithwa po peuthwathimbo lye? Hasho nando! Onkee ano, oshi li pandunge okukala tu na einekelo momauvaneko gaKalunga, ngoka ge li mOohapu dhe.
Onakuyiwa yetu otayi ka kala ya tya ngiini? Jehova okwe tu uvanekela kutya oyendji yomutse otatu vulu okukala tu na etegameno lyoku ka kala moparadisa kombanda yevi. Aashona yomutse oye na etegameno lyoku ka pangela pamwe naKristus megulu. Onkee otatu vulu okukala aadhiginini ngaashi Josua, kutya nduno otu na etegameno lini. Otu na uushili kutya euvaneko ndyoka otali ka gwanithwa. Opo nduno otatu ka dhiladhila shi na ko nasha nomauvaneko agehe ngoka Jehova a li e tu uvanekela, notatu ka vula okutya: “Kape na nando olimwe lya gwile pohi.”
Jehova oha gwanitha po aluhe omauvaneko ge
Omaliko gomOmbiimbeli
Omanenedhiladhilo okuza membo lyaJosua
24:2 — Mbela he yaAbraham Tarah, okwa li ha longele iikalunga? Tango, ka li ha longele Jehova Kalunga. Osha yela kutya okwa li ha longele kalunga komwedhi e na edhina Sin, oshikalunga shi holike muUr. Pamuthigululwakalo gwOshijuda, Tarah otashi vulika nokuli a li ha ningi iikalunga. Ihe sho Abraham a zi muUr molwelombwelo lyaKalunga, Tarah okwa li a yi pamwe naye kuHaran. — Genesis 11:31.
22-28 NOVOMBA
OMALIKO OKUZA MOOHAPU DHAKALUNGA | AATOKOLIHAPU 1–3
“Ehokololo ehokithi kombinga yuulaadhi”
Ehud okwa teyagula ondjoko yomuhepeki gwawo
Ondungedhiladhilo yaEhud oya pondola, ihe hamolwoondunge dhe mwene nenge kutya ando omutondi ka li a kotoka. Okugwanithwa po kwomalalakano gaKalunga inaku ikolelela koonkondo dhopantu. Etompelo enene lyesindano lyaEhud olyo kutya okwa kwathelwa kuKalunga, sho a katuka metsokumwe nehalo lye lyokumangulula oshigwana she. Kalunga oye a hogolola Ehud, ‘nuuna Omuwa a gandja kulsrael omuwiliki, Omuwa okwa li a hala oku mu kwatha.’ — Aatokolihapu 2:18; 3:15.
w04-E 3/15 ep. 31, okat. 3
Ehud okwa teyagula ondjoko yomuhepeki gwawo
Oshinima shotango shoka Ehud a ningi, okwi “ihambulile omwele gwa tsa” gu na oongenge mbali nomufupi gwa gwana okuholekwa miiteta ye. Otashi vulika a li a tegelelwa okuhadhwa. Olundji omwele ogwa li hagu zalwa kolumoho, hoka oshikaha shokolulyo hashi gu kutha mo nziya. Molwaashoka Ehud okwa li e na olumoho, omwele okwa li “e gu zala miiteta kombinga yokolulyo,” hoka kaakwa li naanaa haku hadhwa kaalangeli yomukwaniilwa. Onkee ano, kapwa li shoka she mu imbi ‘a gandje omagano kuEglon, omukwaniilwa gwaMoabi.’ — Aatokolihapu 3:16, 17.
Uuyelele wu na ko nasha niiningwanima mbyoka ya ningwa petameko mombala yaEglon inawu popiwa. Ombiimbeli otayi ti: “Ehud sho e mu pe omagano, okwa lombwele aalumentu mboka ya li ya humbata omagano, ya shune kegumbo.” (Aatokolihapu 3:18) Ehud sho e mu pe omagano, okwa thindikile aalumentu mboka oshinano shontumba okuza puuwa waEglon, e ta shuna ko. Omolwashike mbela? Mbela okwa li a yi naalumentu mboka omolwegameno nenge oya li owala ye mu humbatitha ko komagano? Mbela okwa li e ya thindikile omolwegameno lyawo, opo a tsakanithe nawa ompangela ye? Kutya nduno okwa li ta dhiladhila shike, Ehud okwa li a katuka nuulaadhi a shune kuEglon oye awike.
“Ehud mwene okwa galukile piihongwamenka mbyoka ya li muGilgal a shuna kuEglon e ta ti: ‘Nkeyama, ondi na oshiholekwa okukundathana nangoye.’” Omanyolo inaga popya kutya okwe ende ngiini a vule okushuna muuwa waEglon. Mbela aalangeli kaya li ya ndhindhilike po sha? Mbela oya li taya dhiladhila kutya Omuisraeli gumwe ita vulu okweetela mwene gwawo oshiponga? Mbela sho Ehud a galukile kuuwa oye awike, mbela osha gandja ethano kutya okwa li ta kengelele aantu yomoshilongo shawo? Kutya nduno ongiini, Ehud okwe ende mevi omukwaniilwa nokwa mono ompito yokukala naye, ye li oyo ayeke. — Aatokolihapu 3:19.
w04-E 3/15 ep. 30, okat. 1-3
Omaliko gomOmbiimbeli
Omanenedhiladhilo okuza membo lyAatokolihapu
2:10-12. Otu na okukala tu na elandulathano lyekonakonombimbeli ihaali faula opo ‘kaatu dhimbwe uuwanawa washa mboka Jehova e tu ningila.’ (Episalomi 103:2) Aavali oya pumbwa okuthindila oshili yOohapu dhaKalunga momitima dhaanona yawo. — Deuteronomium 6:6-9.
29 NOVOMBA–5 DESEMBA
OMALIKO OKUZA MOOHAPU DHAKALUNGA | AATOKOLIHAPU 4–5
“Jehova okwa longitha aakiintu yaali a hupithe oshigwana she”
‘Owu uluka ko ngaashi yina yaIsraeli’
Edhina Sisera uuna tali tumbulwa muIsraeli, aantu oya li haya kala ya tila noya ngwangwana. Elongelokalunga lyAakaanana nomithigululwakalo dhawo odha nika oshiponga, molwaashoka oya li haya yambele oyana iikalunga nenge ye ya ninge oohonda dhomotempeli. Mbela onkalo oya li ngiini sho ondjayi yAakaanana netanga lyayo tayi thindile Aaisraeli kongudhi? Eimbilo lyaDebora olya ti kutya moshilongo nomomikunda kamwa li we naanaa mu na aantu. (Aatokolihapu 5:6, 7) Natu kale ando twa fa tu wete aantu ya tila, ya holama miihwa nomiikulundundu, ya tila okulonga omapya nenge okukala momikunda, molwaashoka kadhi li menkolokuma. Oya li ya tila okweenda moondjila, molwaashoka ohaya ponokelwa, aanona yawo taya yiwa nayo, yo aakiintu taya kwatwa onkonga.
‘Owu uluka ko ngaashi yina yaIsraeli’
Epangelo ekwanyanya olya kala nokutyakaleka uule woomvula 20, sigo Jehova a mono kutya oshigwana she shoka sha tangalala, osha hala okulundulula omikalo dhasho. Ehokololo lyOmbiimbeli lyeimbilo lyaDebora naBarak otali ti: ‘Sigo Debora e ya, u uluka ko ngaashi yina yaIsraeli.’ Debora, omukulukadhi gwaLappidot, ka li lela yina yoshigwana, ihe uutumbulilo mboka owopathaneko owala. Jehova oye a langeke po Debora a gamene oshigwana a fa yina yasho. Okwe mu lombwele i ithane omupanguli Barak, omulumentu ngoka e na eitaalo lya kola. Okwe mu wilike a ka kondjithe Sisera. — Aatokolihapu 4:3, 6, 7; 5:7.
‘Owu uluka ko ngaashi yina yaIsraeli’
Jael okwa longitha nawa omutse gwe. Okwa pe Sisera ehala, opo a vululukwe po. Sisera okwa anda ko Jael kaa popye kutya omo e li, uuna pwe ya omulumentu te mu pula. Sho Sisera a lala, Jael okwe mu siikile, naasho e mu pula omeya gokunwa, okwe mu pe omahini. Konima yokathimbo Sisera okwa kotha a pwila mo. Opo ihe Jael okwa kutha omboha nohamala, iinima mbyoka ya li hayi longithwa olundji kaakiintu mboka haya kala mootenda. Okwi inyoweke u uka pomutse gwaSisera, nokwa li a longo oshilonga shoka tashi pula onyati, shoka Jehova a hokwa. Andola okwa kakadhalele nenge a kwatakwata, ando otashi vulika a yi moshiponga. Oshike she mu kwathele a dhipage Sisera? Mbela okwa li ta dhiladhila kombinga yoshigwana shaKalunga, nokunkene omulumentu ngoka a kala noku shi hepeka nonyanya uule womimvo omilongo odhindji? Nenge okwa li ta dhiladhila kuuthembahenda mboka a mona wokugama kombinga yaJehova? Ombiimbeli inayi shi popya. Ihe otu shi shi owala kutya, sho Jael a dhipaga Sisera inapu kalwa. — Aatokolihapu 4:18-21; 5:24-27.
Omaliko gomOmbiimbeli
Omanenedhiladhilo okuza membo lyAatokolihapu
5:20 — Oonyothi odha li dha kondjo ngiini kegulu molwaBarak? Ombiimbeli itayi popi ngele shoka osha li sha kwatela mo ekwatho lyaayengeli, okukoloka kwoonyothi pombanda hoka kwa li kwa talika ko ku li endhindhiliko lyoshiponga kaanandunge yaSisera, nenge tashi vulika omahunganeko ngoka ga li ga hunganekelwa Sisera kaayanekelinyothi ngoka ga li giifundja. Ihe kapu na omalimbililo kutya Kalunga oye a li e ya katukile oonkatu dhontumba.
6-12 DESEMBA
OMALIKO OKUZA MOOHAPU DHAKALUNGA | AATOKOLIHAPU 6–7
“Inda noonkondo dhoye”
Omakotampango gopakalunga otaga vulu oku ku kwathela
Gumwe ngoka e na iikala iiwanawa kombinga ye mwene nokwa li a konakona nawa kutya oku na ongushu yi thike peni, okwa li Gideon, omutokolihapu mokati kAaheberi yonale. Ina lalakanena okukala omuwiliki gwaIsrael. Ihe sho a li a tulwa po a gwanithe oshilonga shoka, Gideon okwa li e wete inaa gwana. Okwa li a yelitha ta ti: “Ezimo lyetu [olyowalaelela kuManasse, KB] nangame mwene omufupi gwomezimo lyaandjetu.” — Aatokolihapu 6:12-16.
w02 3/1 ep. 6-7
“Egonga lyOmuwa nolyaGideon!”
Aamidiana oya li ya tila noonkondo. Manga ye li po, ombaadhilila oya haluthwa kokutatulwa kwiiyuma 300, kokuhikwa koombenda 300 nosho wo kekaluluko lyaalumentu 300. Aamidiana oya tameke okudhekweta noya kunkwa, unene tuu sho yu uvu eigidho ndyoka tali ti: “Egonga lyOmuwa nolyaGideon!” Molwaashono oya li ya ngwangwana, kaya li taya vulu okulombwela ookuume kawo kombinga yaatondi yawo. Manga aalumentu 300 ya thikama ya dhingilila ontanda, Omuwa okwa vundakanitha aatondi, noya pilukilathana nomagonga gawo ga tagananenathana. Aamidiana oya yi ontuku okuza montanda ya tila, oya tidhwa sigo ya sindika. Onkee ano, nonando olugodhi ndoka olwa li lwa kutha ethimbo nopwa li pwa dhipagwa aantu oyendji, osho ngaa nduno lwe ke ya pehulilo nokapwa li we omahindo. — Aatokolihapu 7:19-25; 8:10-12, 28.
w05-E 7/15 ep. 16, okat. 3
Omaliko gomOmbiimbeli
Omanenedhiladhilo okuza membo lyAatokolihapu
6:25-27. Gideon okwa kala a kotoka, opo kaa geyithe mboka taye mu pataneke. Uuna tatu uvitha onkundana ombwanawa, otu na okukala twa kotoka kaatu uvithe nayi yalwe inaashi pumbiwa okupitila momukalo moka tatu popi.
13-19 DESEMBA
OMALIKO OKUZA MOOHAPU DHAKALUNGA | AATOKOLIHAPU 8–9
“Eifupipiko oli vule uuntsa”
Oho ungaunga ngiini nokwaahagwanenena kwayalwe?
Gideon okwa li a kondjo olugodhi olululu nAamidiana, na lwanima okwa li a pula ezimo lyaEfraim li ya kwathele. Nonando ongawo, sho olugodhi lwa hulu, Aaefraim oya li ya pilukile po Gideon noku mu tamaneka nonyanya kutya ine ya ithana, sho olugodhi lwa tameke. Ombiimbeli otayi ti: ‘Oye mu tamaneke noonkondo.’ Gideon okwe ya yamukula a ti: “Shoka nda li te vulu okuninga, kashi shi sha nokuyelekwa naashoka mwe shi ningi. Nokuli oshishona shoka mwe shi ningi, oshi vule shoka ezimo lyandje alihe lye shi ningi. Sho shene, okoonkondo dhaKalunga mwa dhipaga aawa yaali yAamidiana, Oreb naSeeb. Oshike nda ningi, shi tukule shino?” (Aatokolihapu 8:1-3) Molwashoka Gideon okwa li a longitha oohapu dha hogololekeka nodhuukuume, osha geyululukitha Aaefraim nosha keelele kaapu holoke iita yi nyanyalitha pokati komazimo. Otashi vulika mboka yomezimo lyaEfraim ya li ye na uupyakadhi wokwiitala ko ya simana noye na uuntsa. Nonando ongawo, shoka inashi keelela Gideon a ninge shoka tashi eta ombili pokati kawo. Mbela natse itatu vulu okuninga sha faathana?
w00-E 8/15 ep. 25, okat. 3
Omolwashike eishonopeko lya simana?
Gideon oku li oshiholelwa sha dhenga mbanda sheishonopeko. Sho omuyengeli gwaJehova e mu holokele oshikando shotango, Gideon okwa li u ulike eishonopeko, molwaashono okwa li e wete inaa gwana okulonga oshilonga shoka a lombwelwa komuyengeli. (Aatok. 6:15) Konima sho Gideon a taamba ko oshinakugwanithwa shaJehova, okwa li a shilipaleke kutya oshike e na okuninga nokwa li a landula ewiliko lyaJehova. (Aatok. 6:36-40) Gideon okwa li ependa noku na omukumo. Onkee ano, okwa katuka pandunge. (Aatok. 6:11, 27) Ina taamba ko oshinakugwanithwa she a mone esimano. Pehala lyaashono, okwa gwanitha po iilonga ye ayihe e ta shuna kegumbo. — Aatok. 8:22, 23, 29.
Kala nokweenda moondjila dhaJehova
Opo tu kale ookuume kaKalunga, otu na okukala ‘aaifupipiki.’ (1 Pet. 3:8; Eps. 138:6) Aatokolihapu ontopolwa 9 otayi ulike nkene sha simana okukala aaifupipiki. Omwanamati gwaGideon, Jotam, okwa ti: “Konalenale omiti odha li dha gongala, dhi ihogololele omukwaniilwa.” Omiti ndhoka odha li dha kwatela mo omuholivi, omukwiyu nosho wo omuviinu. Omiti ndhoka odha li tadhi thaneke oohandimwe mboka ya li ya gwana, ihe kaya li ya lalakanene okupangela Aaisraeli ooyakwawo. Ihe eno ndyoka lya li hali longithwa li li iikuni, olya li tali thaneke uukwaniilwa womwiinenepeki Abimelek, omudhipagi ngoka a li a hala okupangela yalwe. Nonando okwa li a “pangele Israeli omimvo ndatu,” okwa ka sa eso lyompiya. (Aatok. 9:8-15, 22, 50-54) Inashi simana tuu okukala ‘aaifupipiki’!
w08 2/15 ep. 13, okat. 9
Omaliko gomOmbiimbeli
Ondjatha
Nonando Gideon okwa li e na elalakano ewanawa lyokunyanyukilwa esindano ndyoka Jehova a pe Aaisraeli nolyokusimaneka Kalunga, ondjatha oya li ya “ningi epundukitho kuGideon noluvalo lwe,” molwaashoka Aaisraeli oya gamuka ko kuJehova, e taye yi simaneke noku yi ninga oshikalunga shawo. (Aatok 8:27) Nonando ongawo, Ombiimbeli kayi na mpoka ya popya kutya Gideon okwa li a galikana ondjatha ndjoka. Mepingathano naashono, okwa popiwa kondandalunde kedhina komuyapostoli Paulus kutya oku li Omukriste omudhiginini ‘gwomongundu onene’ yoonzapo dhaJehova. — Heb 11:32; 12:1.
it-1-E ep. 753, okat. 1
20-26 DESEMBA
OMALIKO OKUZA MOOHAPU DHAKALUNGA | AATOKOLIHAPU 10–12
“Jefta — Omulumentu omudhiginini”
Kalunga ota ka kala e ku hokwa, uuna wu li omudhiginini kuye
Otashi vulika Jefta a li a tseya nkene Josef a sile aamwahe ohenda, nonando “oya li ye mu tonde.” Oshiholelwa shoka otashi vulika sha li she mu kwathele. (Gen. 37:4; 45:4, 5) Sho e shi dhiladhila otashi vulika she mu kwathele a katuke momukalo ngoka tagu nyanyudha Jehova. Shoka a ningilwa kaamwayina osha li she mu uvitha nayi unene, ihe omaiyuvo ge hago ga li ga simana. Shoka sha li sha simana kuye, okukondjela edhina lyaJehova noshigwana she. (Aatok. 11:9) Jefta okwa li a tokola okukala omudhiginini kuJehova, na Jehova okwe mu laleke nuuyamba pamwe noshigwana shaIsraeli. — Heb. 11:32, 33.
Jefta
Jefta omulumentu ngoka a li ha katuka oonkatu nokwa li omuwiliki omunankondo. Okwa tumu etumwalaka komukwaniilwa gwaAmmon, ta ti kutya oya ponokele evi lyaIsraeli. Omukwaniilwa okwa yamukula kutya evi moka mu na Aaisraeli olya li oshitopolwa shAayammoni. (Aatok 11:12, 13) Mpaka Jefta okwa li a ulike kutya oku shi ondjokonona, unene tuu kombinga yankene Jehova a kala nokuungaunga noshigwana she, ihe ka li ando omuntu omudhigu nomukolokoshi. Jefta okwa tumununa ko ishewe aatumwa komukwaniilwa gwaAmmon, noku ulike kutya (1) kashi shi oshili kutya Israel okwa kutha po evi lyaAmmon, lyaMoab nenge lyaEdom (Aatok 11:14-18; Deut 2:9, 19, 37; 2Ondjal 20:10, 11); (2) Aayammoni kaya li ya thigulula evi pethimbo Aaisraeli ya sindana, oshoka olya li miikaha yAakaanana nAayamori, na Kalunga okwa li a gandja omukwaniilwa gwawo, Sihon, nosho wo evi lye miikaha yAaisraeli; (3) Aayammoni kaya li ya homona Aaisraeli uule womimvo 300 ndhoka dha adhika dha pita po, onkee ano, omolwashike ya li ya hala oku shi ninga ngashingeyi? — Aatok 11:19-27.
it-2-E ep. 27, okat. 2
Jefta
Jefta okwa li a tala oshinima shoka muule, sho a ulike kutya osha kwatathana nokulongela Kalunga. Okwa ti kutya Jehova Kalunga okwa pe Aaisraeli evi, nomolwetompelo ndyoka kaya li taya ka gandja nando okatopolwa kalyo kwaamboka haya longele iikalunga. Okwi ithana Kemosh kutya okalunga kAayammoni. Yamwe oya li ye uvite kutya shoka osha puka. Ihe nonando kalunga kAayammoni okwa li oMilkom nonokutya Kemosh okwa li okalunga kAamoabi, iigwana mbyoka ya pambathana oya li hayi longele iikalunga oyindji. Salomo okwa li nokuli e etha oshikalunga Kemosh shi longelwe muIsraeli, omolwaakiintu aakwiilongo mboka a li a hokana. (Aatok 11:24; 1Aak 11:1, 7, 8, 33; 2Aak 23:13) Shimwe ishewe, aalongwantu yamwe oya ti kutya edhina “Kemosh” otashi vulika tali ti “Omusindani.” (Tala embo Gesenius’s Hebrew and Chaldee Lexicon ep. 401, lya tolokwa ku S. Tregelles mo 1901.) Jefta otashi vulika a popi oshikalunga shoka, oshoka osha li tashi tangwa kAayammoni kutya osha ‘sinda’ yalwe noku ya pa evi.
it-2-E ep. 27, okat. 3
Omaliko gomOmbiimbeli
Jefta
Jefta okwa valelwa mondjokana. Yina yaJefta okwa li “omukiintu ohonda,” ihe shoka itashi ti kutya Jefta okwa valwa pethimbo yina a li ohonda. Yina okwa kala ombwanda, manga inaa hokanwa e li omukulukadhi omutiyali gwaGilead, ngaashi owala Rahab a li ohonda, ihe lwanima okwa ka hokanwa kuSalmon. (Aatok 11:1; Jos 2:1; Mat 1:5) Uushili wumwe mboka tawu ulike kutya Jefta ina valelwa muumbwanda, owo kutya aamwahe mboka ya valwa komukulukadhi gwotango (omunyalombe) gwaGilead, oya tidha Jefta opo kaa vule okuthigulula uuthiga washa puhe. (Aatok 11:2) Shimwe ishewe, Jefta lwanima okwa ka ninga omuleli gwaantu yaGilead (moka mwa kwatelwa aamwahe mboka ya li ya talika ko ya fa oyo ye li pondondo yotango). (Aatok 11:11) Kakele kaashono, Jefta okwa gandja eyambo kuKalunga ketsalihangano. (Aatok 11:30, 31) Iinima ayihe mbika kaya li tayi vulu okuningwa komuntu ngoka a valwa muumbwanda, oshoka Ompango oya li ya popya kondandalunde kutya: “Omuntu gwoombinzi mbali ita vulu okukala megongalo lyOmuwa, nokuli oluvalo lwe olutimulongo italu vulu okukala megongalo lyOmuwa.” — Deut 23:2.
it-2-E ep. 26
27 DESEMBA–2 JANUALI
OMALIKO OKUZA MOOHAPU DHAKALUNGA | AATOKOLIHAPU 13–14
“Shoka aavali tayi ilongo kuManoak nomukadhi”
Aavali — Dheuleni aanona yeni okuza kuunona
Tala koshiholelwa shaManoak gwomezimo lyaDan, ngoka a li a kala moshilando Zora muIsraeli shonale. Omuyengeli gwaJehova okwa li a lombwele Manoak kutya omukulukadhi gwe ngoka ontimbe okwa li ta ka mona okanona okamati. (Aatok. 13:2, 3) Nopwaahe na omalimbililo, omulumentu omudhiginini Manoak nomukulukadhi gwe oye na okukala ya li ya nyanyukwa noonkondo omolwetegameno ndyoka. Ihe, oya li wo ye na omaipulo gomuule. Onkee ano Manoak okwa li a galikana a ti: “OMUWA, tumununa omuntu gwaKalunga kutse, opo e tu lombwele kutya okamati otatu ka ningi ngiini, nge ka valwa.” (Aatok. 13:8) Manoak nomukulukadhi gwe oya li tayi ipula neputudho lyokanona kawo. Nopwaahe na omalimbililo, oya li ya longo omwanamati gwawo Simson, oompango dhaKalunga, noonkambadhala dhawo odha li dha pondola. Ombiimbeli oya ti kutya ‘oonkondo dhOMUWA odha tameke okukoleka [Simson].’ Omolwoonkondo ndhoka a li a pewa, Simson okwa li a longo iilongankondo oyindji e li gumwe gwomaatokolihapu yaIsraeli. — Aatok. 13:25; 14:5, 6; 15:14, 15.
Simson okwa pondola kekwatho lyaJehova!
Sho Simson ta koko, ‘Omuwa okwe mu laleke nuuyamba.’ (Aatokolihapu 13:24) Esiku limwe Simson okwe ya kuhe nayina, e ta ti: “Onde endela omukadhona Omufilisti kuTimna. Ke mu talelii ndje; onda hala oku mu hokana.” (Aatokolihapu 14:2) Dhiladhila owala nkene ya li ye shi kuminwa! Pehala Simson a mangulule Israeli miikaha yaatondi yawo, okwa li a hala okuhokanathana nayo. Okukutha omukulukadhi mokati kaantu mboka haya longele iikalunga, osha li ompinge nOmpango yaKalunga. (Eksodus 34:11-16) Onkee ano, aakuluntu ye oye mu pula: “Omolwashike to yi kumboka aapagani Aafilisti, u kuthe ko omukiintu? Ito vulu okukutha omukiintu moludhi lwetu, mokati koshigwana shetu?” Natango, Simson okwe ya thiminike a ti: “Oye awike nda hala, mu ke mu talele ndje. Ondi mu hole.” — Aatokolihapu 14:3.
w05-E 3/15 ep. 25-26
Omaliko gomOmbiimbeli
Simson okwa pondola kekwatho lyaJehova!
Omomukalo guni omukiintu nguka Omufilisti “oye awike” a li a halika kuSimson? O-Cyclopedia yaMcClintock naStrong oya ti kutya kashi shi andola kutya omukiintu ngoka okwa li “omwaanawa, enzuna nenge e na ondjelo ombwanawa, ihe okwa li e mu hala, omolwelalakano lilwe.” Elalakano ndyoka olini? Aatokolihapu 14:4 oya yelitha kutya Simson “okwa li ta kongo olweedhe lwo opala okukondjitha Aafilisti.” Simson okwa li a hala omukiintu ngoka, omolwelalakano ndyoka. Sho Simson e ende ta ningi omukuluntu, “oonkondo dhOmuwa nodha tameke oku mu koleka.” (Aatokolihapu 13:25) Onkee ano, ombepo ondjapuki yaJehova oyo ya li tayi wilike Simson a kale a hala omukiintu ngoka nokuninga omutokolihapu gwaIsraeli. Mbela Simson okwa li ngaa a mono olweedhe ndoka a li ta kongo? Tango natu tale nkene Jehova e mu shilipaleke kutya ota vulu oku mu kwathela.
w05-E 3/15 ep. 26, okat. 1