Iileshomwa moka mwa za omayamukulo gomapulo ngoka ge li mokafo Onkalamwenyo yopaKriste niilonga yetu yokuuvitha
© 2024 Watch Tower Bible and Tract Society of Pennsylvania
4-10 NOVOMBA
OMALIKO OKUZA MOOHAPU DHAKALUNGA EPISALOMI 105
“Ota dhiginine ehangano lye sigo aluhe”
Ongiini tatu vulu okukoleka eitaalo lyetu meuvaneko lyaJehova lyuuyuni uupe?
11 Tala kiinima yimwe mbyoka Jehova a li u uvanekele oshigwana she monakuziwa, ya li tayi monika ya fa itaayi wapa. Okwa li a lombwele Abraham naSara kutya otaya ka mona okanona kokamati momimvo dhawo dhuukulupe. (Gen. 17:15-17) Okwa li wo a lombwele Abraham kutya oluvalo lwe otalu ka pewa evi lyaKaanan. Pethimbo lyomimvo odhindji ndhoka oluvalo lwaAbraham, ano Aaisraeli ya li aapika muEgipiti, oshi na okukala sha li tashi monika sha fa euvaneko ndyoka itaali ka gwanithwa shili. Ihe olya ka gwanithwa. Konima yethimbo, Jehova okwa li a lombwele kuku Elisabet kutya ota ka mona okanona. Jehova okwa li wo a lombwele Maria, omukadhona gwanakatyepa kutya ota ka mona okanona kokamati hoka Jehova a li u uvaneka omimvo omayovi dha ka pita moshikunino shaEden kutya otake ke ya, neuvaneko ndyoka olya li lya gwanithwa shili! — Gen. 3:15.
12 Uuna tatu dhiladhila kombinga yomauvaneko gaJehova ngoka a ninga nankene e ga gwanitha po, ohatu shi mono kutya oku na oonkondo oonene. Shoka ohashi koleke eitaalo lyetu meuvaneko lye lyuuyuni uupe. (Lesha Josua 23:14; Jesaja 55:10, 11.) Ohashi tu ningitha tu kale twa ilongekidha nawa, opo tu kwathele yalwe ya uve ko kutya euvaneko lyaJehova lyuuyuni uupe kali shi ondjodhi yowala nenge omafekela. Jehova ye mwene okwa popya shi na ko nasha negulu epe nevi epe a ti: “Oohapu ndhika . . . odhoshili nodhi shi okwiinekelwa.” — Eh. 21:1, 5.
it-2-E ep. 1201, okat. 2
Oohapu dhaKalunga
Eshito, mwa kwathelwa iinima mbyoka yi na omwenyo naambyoka kaayi na omwenyo, ohali vulika komalombwelo gaKalunga noha vulu oku li longitha a gwanithe po elalakano lye. (Eps 103:20; 148:8) Oohapu dhe odhi shi okwiinekelwa, oshoka oha gwanitha po shoka a uvaneka. (Deut 9:5; Eps 105:42-45) Okwa popi ye mwene a ti kutya oohapu dhe “otadhi kala sigo aluhe” noitadhi galukile kuye inaadhi gwanitha elalakano lye. — Jes 40:8; 55:10, 11; 1Pet 1:25.
Omaliko gomOmbiimbeli
w86-E 11/1 ep. 19, okat. 15
Nkene aagundjuka taya vulu okukwathela yaandjawo ya kale ya hangana
15 “[Josef] okwa kwatwa e ta tulwa momalyenge nokwa tulwa olinga yosheela mothingo, sigo ehunganeko lye lya gwanithwa. Oohapu dhOmuwa odhe shi koleke wo.” (Episalomi 105:17-19) Uule womimvo 13 Josef okwa kala ta mono iihuna e li omupika nokwa kala mondholongo sigo osho euvaneko lyaJehova lya gwanithwa. Oshinima shoka osha li she mu kwathele. Nonando Jehova haye he tu etele omaupyakadhi, oha etha ge tu adhe, omolwelalakano lyontumba. Mbela Josef okwa li ngaa ta ka kala e na einekelo ‘mOohapu dhOmuwa,’ nonando okwa li monkalo itaayi nuwa meya? Mbela okwa li ngaa ta ka kokeka omaukwatya omawanawa ngaashi eidhidhimiko, eifupipiko, okukala a kola pambepo nokukala a tokola toko a ungaunge noshinakugwanithwa she oshidhigu? Josef okwa li a kwathelwa a kale a kola ngaashi oshingoli sha yothwa momulilo, naashoka oshe mu ningitha a kale e na unene ongushu momeho gaKalunga. Okuza mpono, Kalunga okwa li e mu longitha momukalo gwa dhenga mbanda. — Genesis 41:14, 38-41, 46; 42:6, 9.
11-17 NOVOMBA
OMALIKO OKUZA MOOHAPU DHAKALUNGA EPISALOMI 106
“Oya dhimbwa Kalunga ngoka e ya hupitha”
‘Olye a gama kombinga yaJehova?’
13 Aaisraeli sho ya mono oshikogo oshiluudhe, olwaadhi nosho wo omandhindhiliko galwe omakumithi ga za kuKalunga, oya kwatwa kehaluko. Oya pula Moses oye e ya kalele po, nokwa zimine oye a ka popye naJehova kondundu Sinai. (Eks. 20:18-21) Sho Moses a yi kondungu yondundu, okwa kala ko ethimbo ele. Mbela Aaisraeli oya li ye wete ye li mombuga kaaye na ngoka te ya kwatele komeho? Osha fa shi li ngeyi kutya eitaalo lyawo olya li unene li ikolelela kuMoses sho e li po. Onkee ano, Aaisraeli oya tameke okukala tayi ipula unene, noya lombwele Aaron ya ti: “Katu shi wo tuu shoka sha adha omulumentu nguka Moses, ngoka e tu tembudha muEgipiti; tu ningila kalunga e tu kwatele komeho.” — Eks. 32:1, 2.
Omaliko gomOmbiimbeli
Omanenedhiladhilo okuza membo etitatu netine lyOmapisalomi
106:36, 37. Oovelise ndhika otadhi ulike kutya okusimaneka iimenka oku na ekwatathano nokuyambela oompwidhuli. Shika otashi ulike kutya omuntu ngoka ha simaneke iikalunga ota vulu okunwethwa mo koompwidhuli. Ombiimbeli otayi tu ladhipike tayi ti: “Yandeni iikalunga.” — 1 Johannes 5:21.
18-24 NOVOMBA
OMALIKO OKUZA MOOHAPU DHAKALUNGA EPISALOMI 107–108
“Hambeleleni Omuwa, oshoka oye omwaanawa”
w07-E 4/15 ep. 20, okat. 2
Natu tange Jehova tu li egongalo
2 Egongalo kali shi owala ongundu yaantu ya hangana, mboka ya za momaputuko ga faathana, nenge mboka ye hole okudhana uudhano wontumba. Pehala lyaashono, olya totwa po nelalakano lyokutanga Jehova Kalunga, ngaashi sha tsuwa omuthindo mEpisalomi. Episalomi 35:18 otali ti: ‘Otandi ke ku pandula megongalo lyaantu yoye; otandi ke ku hambelela montaneho yawo ayehe.’ Episalomi 107:31, 32 otali ti: “Naa pandulile Omuwa esilohenda lye, omolwiikumitha e yi ya ningile. Naye mu simaneke megongalo lyaantu ye.”
Natu gandjeni omapandulo kuJehova, opo e tu yambeke
4 Opo tu kale hatu pandula Jehova, otu na okutedhatedha komayambeko ngoka Jehova e tu pa nokudhiladhila nawa kesilohenda lye enene. Sho omupisalomi a tedhatedha, okwa li a kuminwa iinima oyindji mbyoka Jehova a ninga. — Lesha Episalomi 40:5; 107:43.
Omaliko gomOmbiimbeli
it-2-E ep. 420, okat. 4
Moab
Lwanima, sho David a li ta pangele e li omukwaniilwa, opwa li wo iita pokati kaIsraeli naMoab. Aamoabi oya li ya sindika noya li haya futu iifendela kuDavid. Osha fa shi li ngeyi kutya aalumentu yaali yomaakwiita yatatu Aamoabi, oya li ya dhipagwa molugodhi. David okwa li e ya lombwele ya lale pevi e teya topola moongundu ndatu dhi thike pamwe, nokwa dhipaga oongundu mbali e ta hupitha yimwe. (2Sam 8:2, 11, 12, yelekanitha OB-1954; 1Ondjal 18:2, 11) Molugodhi olwo tuu ndjoka, Benaia yaJehoiada okwa li a ‘dhipaga aakwiita yaali Aamoabi ya simana.’ (2Sam 23:20; 1Ondjal 11:22) Esindano lyaDavid lyokusinda Aamoabi, olya gwanitha po oohapu dhopahunganeko dhaBileam, ndhoka dha popilwe omimvo 400 dha ka pita, tadhi ti: “Onyothi otayi piti muJakob, ondhimbo yuukwaniilwa otayi yeluka mulsrael. Oye ta nyanyagula po aawiliki yaMoab, nota kombo po oluvalo aluhe lwaSet.” (Num 24:17) Osha fa wo shi li ngeyi kutya omupisalomi okwa popi shi na sha nesindano ndyoka, sho a ti kutya Kalunga okwa tala ko Moabi e li ‘oshiyaha she shokwiiyogela.’ — Eps 60:8; 108:9.
25 NOVOMBA–1 DESEMBA
OMALIKO OKUZA MOOHAPU DHAKALUNGA EPISALOMI 109–112
Yambidhidha Omukwaniilwa Jesus!
Omanenedhiladhilo okuza mEmbo etitano lyOmapisalomi
110:1, 2 — “Omuwa [gwaDavid],” Jesus Kristus, okwa li a ningi shike sho a li a kuutumba kolulyo lwaKalunga? Jesus konima yeyumuko lye okwa li a londo megulu nokwa li a tegelela e li kolulyo lwaKalunga sigo omo 1914 a tameke okupangela e li Omukwaniilwa. Pethimbo ndyoka, Jesus okwa li ta pangele aalanduli ye aagwayekwa, te ya wilike miilonga yokuuvitha noyokuninga aantu aalongwa nosho wo oku ya longekidhila oku ka pangela pamwe naye mUukwaniilwa we. — Mateus 24:14; 28:18-20; Lukas 22:28-30.
w00-E 4/1 ep. 18, okat. 3
Mboka haya kondjitha Kalunga itaya ka sindana!
3 Oshigwana shaJehova osha kala nokuponokelwa okuza petameko lyethelemumvo eti-20. Miilongo oyindji, aantu mboka ye na oombepo ombwinayi oya kambadhala okuya moshipala nokuhulitha po nokuli iilonga yokuuvitha onkundana ombwanawa yUukwaniilwa waKalunga. Oya kala taya hongakanithwa Komukondjithi gwetu Ondiyapoli, ngoka e tu kundukidha “ta ndunduma a fa onime, ta kongo ngoka, te mu ninagula po.” (1 Petrus 5:8) Konima sho “euthwathimbo lyiigwana” lya hulu mo 1914, Kalunga okwa ningi Omwanamati gwe Omukwaniilwa omupe kombanda yevi, nokwe mu lombwela a ti: ‘Pangela mokati kaatondi yoye.’ (Lukas 21:24; Episalomi 110:2) Kristus okwa longitha oonkondopangelo dhe, e ta umbu mo Satana megulu noku mu umbila kombanda yevi. Molwaashoka Ondiyapoli oyi shi shi kutya oyi na ko owala okathimbo okafupi, oya sila ondjahi Aakriste aagwayekwa nosho wo oonzi dhilwe. (Ehololo 12:9, 17) Oshizemo osha li shini shomaponokelo ga landulathana, ngoka ga ningwa kumboka haya kondjitha Kalunga?
be-E ep. 76, okat. 2
Tsikila okuninga ehumokomeho
Ekumagidho lyokulongitha omagano ngoka tu na, otali ulike kutya ohashi pula oonkambadhala. Mbela oho ningi ngaa oonkambadhala, opo wu longe pamwe nayalwe muukalele? Oho kwathele ngaa yalwe megongalo lyeni mboka aape, aagundjuka nenge mboka taya ehama? Oho yambidhidha ngaa elongekidho lyokwoopaleka Oshinyanga shUukwaniilwa nenge wu kwathele momikalo dhi ili nodhi ili piigongi iishona niinene? Mbela ito vulu okukutha uukwathelikokolindjila omalupita? Mbela ito vulu okulonga wu li omukokolindjila gwondjigilile nenge wu ka kwathele megongalo moka mu na ompumbwe onene? Ngele owu li omumwatate, mbela oto ningi ngaa oonkambadhala, opo wu gwanithe po iitegelelwa yopamanyolo yi na ko nasha nokukala omuyakuligongalo nenge omukuluntugongalo? Ngele owu na ehalo lyokukwathela mpoka pu na ompumbwe noho kala wa hala okutaamba ko iinakugwanithwa, oto ka ulika kutya oto ningi ehumokomeho. — Eps 110:3.
Omaliko gomOmbiimbeli
Kala wu na eitaalo lya kola mUukwaniilwa waKalunga
15 Nonando ehangano naAbraham nosho wo naDavid otali tu shilipaleke kutya oluvalo lwomukiintu otalu ka pangela, oshilonga shoka osho ashike, itashi ka etela aantu yomiigwana ayihe omayambeko. Opo ya vule lela okuyambekwa, otaya ka pumbwa okuyogwa uulunde wawo nokutaambiwa megumbo lyaKalunga. Shika otashi vulu owala okuningwa ngele oluvalo otalu ningi wo aayambi. Omushiti gwetu omunandunge okwa ningi po ishewe ehangano lyokulangeka po omuyambi ngaashi Melkisedek.
16 Jehova okwa hololele omukwaniilwa gwaIsraeli shonale, David kutya ota ka ninga ehangano naJesus, omolwomalalakano gaali. Elalakano lyotango olyo kutya Kalunga okwa li a hala Jesus ‘a kuutumbe kolulyo lwe,’ noku mu pa oonkondo dhokusinda aatondi ye. Elalakano etiyali, Jesus okwa li ta ka ninga “omuyambi gwaaluhe palandulathano lyopaMelkisedek.” (Lesha Episalomi 110:1, 2, 4.) Omolwashike taku tiwa ‘opalandulathano lyopaMelkisedek’? Omolwashoka manga oluvalo lwaAbraham inaalu ya mEvi lyEuvaneko, Melkisedek, omukwaniilwa gwaSalem, okwa li ‘omuyambi gwaKalunga gwokombandambanda.’ (Heb. 7:1-3) Omukwaniilwa nguka okwa li a langekwa po kuJehova mwene. Oye awike a popiwa mOmanyolo gOshihebeli a lela e li omukwaniilwa, nopethimbo opo tuu mpono oku li wo natango omuyambi gwaJehova. Molwashoka inaku tumbulwa nando omuntu gumwe a li komeho ge nenge e ke mu landula e na ondondo ya fa ye, otaku vulu okutiwa ye “omuyambi sigo aluhe.”
17 Kalunga okwa langeke po wo Jesus a ninge omuyambi okupitila mehangano ndika. Jesus ota ka kala “omuyambi gwaaluhe palandulathano lyaMelkisedek.” (Heb. 5:4-6) Ehangano nenge euvathano ndika otali shilipaleke kutya Jehova ota ka gwanitha po shili elalakano lye li na ko nasha naantu nosho wo nevi okupitila mUukwaniilwa wopaMesiasa mboka a dhika po megulu.
2-8 DESEMBA
OMALIKO OKUZA MOOHAPU DHAKALUNGA EPISALOMI 113–118
Jehova otatu mu futu shike?
w01 1/1 ep. 21, okat. 13
Kala wa tungwa kohole
13 Moohapu dhaJesus, osha yela kutya tangotango otu na okukala tu hole Jehova. Ihe inatu valwa tu na nale ohole ya gwana yokuhola Jehova. Oyo oshinima shoka tu na okukokeka. Sho tu uvu oshikando shotango kombinga ye, otwa li twa hililwa kuye kwaashoka tu uvu. Kashona nakashona, otwi ilongo nkene a longekidhile aantu evi. (Genesis 2:5-23) Otwi ilongo nkene e endathana naantu, kutya ine tu etha po sho uulunde wa homona tango aantu, ihe okwa katuka onkatu oku tu mangulula mo. (Genesis 3:1-5, 15) Okwa endathana nombili naamboka ya li aadhiginini nolwahugunina, okwe ya pe Omwana epona lye, omolwedhimopo lyoondjo dhetu. (Johannes 3:16, 36) Ontseyo yetu ndjika tayi indjipala oya kokeke olupandu lwetu okupandula Jehova. (Jesaja 25:1) Omukwaniilwa David okwa ti kutya ye oku hole Jehova, omolwesiloshimpwiyu Lye lyopahole. (Episalomi 116:1-9) Nena Jehova ohe tu sile oshimpwiyu, ohe tu wilike, ohe tu koleke nohe tu ladhipike. Mpoka pu thike okwiilonga kwetu kombinga ye, opo wo pu thike ohole yetu tayi yi muule. — Episalomi 31:23; Sefanja 3:17; Aaroma 8:28.
Taamba nolupandu nokugandja nomutima aguhe
Omupisalomi okwa li ipula a ti: “OMUWA otandi mu futu shike moluuwanawa we auhe e u ningile ndje?” (Eps. 116:12) Omupisalomi okwa li a mono uuwanawa washike? Jehova okwa li e mu kwathele, sho a gwililwa po “kuudhigu nokoluhodhi.” Natango, Jehova okwe mu ‘hupitha meso.’ Konima yaashono okwa li a hala ‘okufuta’ Jehova momukalo gwontumba. Oshike omupisalomi a li ta vulu okuninga? Okwa ti: “Omauvaneko gandje otandi ga gwanithile OMUWA.” (Eps. 116:3, 4, 8, 10-14) Okwa li a tokola toko a gwanithe po omauvaneko ge, ngoka u uvanekela Jehova nokugwanitha po iinakugwanithwa ayihe mbyoka e yi mu pa.
Nangoye oto vulu okuninga sha faathana. Ngiini mbela? Omokukala to vulika kiipango nokomakotampango gaKalunga monkalamwenyo yoye ayihe. Onkee ano, okulongela Jehova naku kale oshinima sha simanenena monkalamwenyo yoye ayihe, nokweetha ombepo ye yi ku wilike mwaashihe shoka to ningi. (Omuuv. 12:13; Gal. 5:16-18) Oshoshili kutya ito vulu nando okufuta Jehova omolwiilonga ayihe mbyoka e ku ningila. Ihe ohashi ‘nyanyudha omwenyo gwe’ oku ku mona to mu longele nomutima aguhe. (Omayel 27:11) Kashi shi li tuu uuthembahenda wa dhenga mbanda okunyanyudha Jehova momukalo ngoka!
Iiyilongomwa mbyoka tatu vulu okwiilonga membo lyaLevitikus
9 Oshiilongomwa oshitiyali: Ohatu longele Jehova, molwaashoka otwe mu pandula. Opo tu shi tse omuthindo, natu taleni kombinga yomakwatathanondjambo, oshinima shilwe shoka sha li sha simana mokulongela Kalunga kwashili muIsraeli shonale. Membo lyaLevitikus otatu ilongo mo kutya Aaisraeli oya li haya vulu okugandja ekwatathanondjambo, “omolwepandulo.” (Lev. 7:11-13, 16-18) Omuntu okwa li ha gandja eyambo ndyoka, molwaashoka a hala oku li gandja, ihe hamolwaashoka e na oku li gandja. Onkee ano, shoka osha li hashi ulike kutya okwe li gandja pahalo lye mwene, molwaashoka oku hole Kalunga ke, Jehova. Onyama yoshimuna shoka sha yambwa, oya li hayi liwa po komuntu ngoka e shi yamba, pamwe nuukwanegumbo we nosho wo aayambi. Ihe iitopolwa yimwe yoshimuna shoka sha yambwa, oya li hayi pewa Jehova oye awike. Iitopolwa mbyoka oyini?
10 Oshiilongomwa oshititatu: Ohatu gandja shoka oshiwanawa kuJehova, molwaashoka otu mu hole. Jehova okwa li ha tala ko iinkene yi li oshitopolwa dhingi shoshinamwenyo. Okwa li wo a popi kutya iilyo yilwe yomeni ya simanenena, mwa kwatelwa iitiyanathigo, oyi na ongushu. (Lesha Levitikus 3:6, 12, 14-16.) Onkee ano, Jehova okwa li ha kala unene a nyanyukwa, uuna Omuisraeli te mu pe nehalo ewanawa iitopolwa mbyoka ya simanenena nosho wo iinkene. Omuisraeli ngoka te shi ningi, okwa li ha ulike kutya okwa halelela okupa Kalunga shoka oshiwanawa lela. Momukalo gwa faathana, Jesus okwa li a gandja nehalo ewanawa kuJehova shoka oshiwanawa lela, moku mu longela nomutima aguhe, molwaashoka oku mu hole. (Joh. 14:31) Jesus okwa li e hole okulonga ehalo lyaKalunga, molwaashoka okwa li e hole noonkondo ompango ye. (Eps. 40:8) Jehova okwa li ha kala a nyanyukwa noonkondo, sho e wete Omwana te mu longele shili nehalo ewanawa.
11 Okulongela kwetu Jehova nehalo ewanawa, okwa faathana nomakwatathanondjambo ngoka, molwaashoka ohaku ulike nkene tu mu uvitile. Ohatu mu pe shoka oshiwanawa lela, molwaashoka otu mu hole nomutima gwetu aguhe. Jehova oha kala a nyanyukwa okumona aalongeli ye omamiliyona taye mu longele nehalo ewanawa, molwaashoka oye mu hole noonkondo nosho wo omithikampango dhe. Ohashi tu hekeleke, uuna tu shi kutya Jehova oku wete nokwa lenga iilonga yetu noku shi kutya omolwashike tatu yi longele. Pashiholelwa, ngele ngoye omukokele noiho vulu we okulonga oshindji ngaashi wa hala, kala wu na uushili kutya Jehova omangambeko goye oku ga wete. Otashi vulika wu kale wu uvite ho gandja oshishona, ihe Jehova oku wete ohole yoye yomuule, ndjoka tayi ku inyengitha wu ninge ngaashi to vulu. Okwa nyanyukwa okutaamba ko oshiwanawa shoka to mu pe!
Omaliko gomOmbiimbeli
Omapulo ga za kaaleshi
Omupisalomi okwa nwethwa mo a nyole ta ti: “Momeho gaJehova eso lyaapiya ye aadhiginini oli na ondilo.” (Eps. 116:15, NW) Jehova okwa lenga omwenyo gwomupiya gwe kehe. Ihe oohapu ndhoka dhi li mEpisalomi ontopolwa 116 odha kwatela mo oshindji kaashi shi owala eso lyomuntu pauhandimwe.
Uuna gumwe ta gandja oshipopiwa peso lyOmukriste, inashi opala a longithe Episalomi 116:15 mokupopya nakusa, nonando okwa sa omudhiginini. Omolwashike mbela? Omolwaashoka oohapu dhEpisalomi odhi na eityo lya mbwalangandja. Otadhi ti kutya Kalunga ita ka pitika aapiya ye ayehe aadhiginini ye li ongundu ya se, molwaashoka okwe ya tala ko ye na ongushu. — Tala Episalomi 72:14; 116:8.
Episalomi 116:15 otali tu shilipaleke kutya Jehova ke na siku a pitike aapiya ye ayehe aadhiginini ya kombwe ko kombanda yevi. Ondjokonona yetu oye shi ulika kutya otwa kala nokwiidhidhimikila omamakelo nomahepeko shoka shi li euliko kutya Kalunga ita ka pitika nando tu hulithwe po.
9-15 DESEMBA
OMALIKO OKUZA MOOHAPU DHAKALUNGA EPISALOMI 119:1-56
“Omugundjuka oto opaleke ngiini okukala kwe, a kale a yela?”
w87-E 11/1 ep. 18, okat. 10
Mbela oto tsikile ngaa okukala wa yogoka momukalo kehe?
10 MAaefeso 5:5 Paulus okwa londodha a ti: “Ndhindhilikeni ihe nawa oshinima shika: kape na ando omuhondeli nenge omuntu kehe e li muulunde nenge omunalwiho, oshoka olwiho olwo okusimaneka iimenka, ta ka kala e na oshitopolwa mOshilongo shaKristus noshaKalunga.” Nonando ongawo, omumvo kehe aantu omayovi ohaya geelwa nenge ya kuthwe mo megongalo, omolwoluhondelo, ano ‘okuyona komalutu gawo.’ (1 Aakorinto 6:18) Olundji shika ohashi etithwa kokukala itaatu “vulika koohapu [dhaKalunga].” (Episalomi 119:9) Pashiholelwa, aamwatate oyendji, uuna ye li momafudho ohaya etha po eihumbato ewanawa lyopaKriste. Ihaya endathana we naamwatate naamwameme nohaya panga uukuume naantu yomuuyuni mboka haya tsakanene nayo sho ye li momafudho. Aakriste yamwe ohaye ya wayimine miinima mbyoka ya puka, oshoka ohaya tompathana kutya oye li ‘lela aantu aawanawa.’ Yo yamwe ohaya kala ye na ekwatathano lya pitilila naaniilonga pamwe nayo. Omukuluntugongalo gumwe okwa li e na ekwatathano nomukiintu omuniilonga pamwe naye nokwa li a thigi po aanegumbo lye e ta kala ha zi pamwe nomukiintu ngoka. Oshizemo, okwa li a kuthwa mo megongalo. Oohapu dhOmbiimbeli odhoshili ndhoka tadhi ti: “We ende nombudhi, nangoye oto ningi ombudhi!” — 1 Aakorinto 15:33.
w06-E 6/15 ep. 25, okat. 1
“Omalongo goye ogo enyanyu lya ndje”
JEHOVA oha dhimbulukitha oshigwana she iikando niikando, opo shi vule okuungaunga nomathiminiko momathimbo ngaka omadhigu. Gamwe gomomadhimbulukitho ngoka ohatu ga pewa okupitila melesho lyOmbiimbeli lyopaumwene, omanga gamwe hatu ga uvu okupitila miipopiwa nenge momatyokosha gaamwatate pokugongala kwopaKriste. Oshindji shoka hatu lesha nenge hatu uvu poompito dha tya ngaaka, ihashi kala oshipe momakutsi getu. Uuyelele owundji mboka hatu konakona otashi vulika twe wu lesha nenge twe wu uva nale. Ihe molwaashoka ohatu dhimbwa nuupu, otwa pumbwa aluhe okupepaleka omadhiladhilo getu shi na ko nasha nomalalakano gaJehova, oompango dhe nosho wo omalongo ge. Otu na okukala tu na olupandu omolwomadhimbulukitho gaKalunga, oshoka ohage tu kwathele tu kaleke momadhiladhilo omatompelo ge nako nasha nokudhiginina omukalo gwetu gwokukalamwenyo kwometilokalunga. Omunyoli gwEpisalomi 119 okwa imbile Jehova a ti: “Omalongo [“omadhimbulukitho,” NW] goye ogo enyanyu lyandje.” — Episalomi 119:24.
Pilamenitha omeho goye kiinima kaayi na oshilonga
2 Ihe shoka hatu tala otashi vulu wo oku tu ehameka. Ekwatathano ndyoka li li pokati komeho getu nomadhiladhilo getu oli na oonkondo lela, molwaashoka iinima mbyoka hatu tala otayi vulu okupendutha omahalo gontumba momutima gwetu. Molwaashoka otu li wo muuyuni wa yonuka moka aantu yi ihole yo yene mboka tawu pangelwa kuSatana Ondiyapoli, otatu homonwa nomathano nonomauyelele ngoka taga vulu oku tu pukitha nuupu, nokuli nonando otwa li owala twa tala kugo meendelelo. (1 Joh. 5:19) Onkee ano, itashi kumitha sho omupisalomi i indile Kalunga ta ti: “Keelela ndje, ndaa [tale] iinima yaa na oshilonga; pe ndje omwenyo pamauvaneko goye.” — Eps. 119:37, yelekanitha NW.
Omaliko gomOmbiimbeli
w05-E 4/15 ep. 10, okat. 2
Inekela mOohapu dhaJehova
2 Esimano lyoohapu dhaKalunga nenge lyetumwalaka olyo enenedhiladhilo lyEpisalomi 119. Omunyoli okwa nyola eimbilo ndyoka palandulathano lyoalfabeta, tashi vulika opo shi kale oshipu oku li dhimbulukwa. Oovelise dhalyo 176 odhi ikolelela koondanda dha landulathana dhoalfabeta yOshiheberi. MOshiheberi shopetameko, Episalomi ndyoka olya li lya thikama po muutendo nenge tu tye moovelise 22. Ovelise kehe yomoovelise ndhoka 22 oya li yi na omikweyo dhi li 8 ndhoka dha tameka nondanda ya faathana. Episalomi ndyoka otali popi shi na ko nasha noohapu dhaKalunga, ompango, omalongo, oondjila, omalombwelo, omauthompango, iipango, omapangulo ge omayuuki nosho wo omauvaneko ge. Moshitopolwa shika naashoka tashi landula, Episalomi 119 otali ka kundathanwa shi ikolelela ketoloko li li mondjila lyOmbiimbeli yOshihebeli. Okutedhatedha kiimoniwa ya kwatela mo aapiya yaJehova yonale naamboka yo kunena, otaku ka gwedha ko keuvoko lyetu li na ko nasha neimbilo ndyoka lya nwethwa mo kuKalunga. Otali ka gwedha ko wo kolupandu lwetu li na ko nasha nOohapu dhaKalunga, Ombiimbeli.
16-22 DESEMBA
OMALIKO OKUZA MOOHAPU DHAKALUNGA EPISALOMI 119:57-120
Nkene tatu vulu okwiidhidhimikila omahepeko
w06-E 6/15 ep. 20, okat. 2
“Ompango yoye ondi yi hole ngiini!”
2 Otashi vulika wu ipule kutya: “Ompango yaKalunga ya li ya vulu ngiini okuhekeleka omupisalomi ngoka?” Molwaashoka okwa li e na uushili kutya Jehova oku na ko nasha naye, osha li she mu tsu omukumo. Okutula miilonga ompango yopahole ndjoka ya li ya gandjwa kuKalunga, okwa li kwa ningitha omupisalomi ngoka a kale a nyanyukwa, nonando okwa li ta thiminikwa kaatondi ye. Okwa li e shi kutya Jehova okwa li ta ungaunga naye nohenda. Kakele kaashono, okutula miilonga ewiliko lyompango yaKalunga okwa li kwa ningitha omupisalomi ngoka a kale e na uunongo e vule aatondi ye naashoka osha li nokuli sha hupitha omwenyo gwe. Okuvulika kompango okwa li kwe mu kwathela a kale e na ombili nosho wo eiyuvo ewanawa. — Episalomi 119:1, 9, 65, 93, 98, 165.
w00-E 12/1 ep. 14, okat. 3
Mbela owu hole ngaa lela omadhimbulukitho gaJehova?
3 Omadhimbulukitho gaKalunga oga li ga simanekwa komupisalomi ngoka a imbi a ti: “Otandi uluma mbala okuvulika kiipango yoye. Aakaanakalunga nando oya tule ndje moonkandja, itandi ka dhimbwa iipango yoye.” (Episalomi 119:60, 61) Omadhimbulukitho gaJehova otage tu kwathele tu idhidhimikile omahepeko, molwaashoka otu na einekelo kutya Tate yetu gwomegulu ota vulu okukutha po omandangalati ngoka aatondi haye tu tulile po. Shoka ote ke shi ninga pethimbo lye lyo opala, opo tu vule okutsikila niilonga yokuuvitha yUukwaniilwa. — Markus 13:10.
Omanenedhiladhilo okuza mEmbo etitano lyOmapisalomi
119:71 — “Okugeelwa [shoka tashi ti lelalela, “okumona iihuna,” NW]” oku na uuwanawa washike? Okumona iihuna otaku vulu oku tu longa okwiinekela lela muJehova, oku mu galikana twa mana mo nokukala tu li aalaadhi lela mokukonakona Ombiimbeli nokutula miilonga shoka tayi popi. Kakele kaashono, okwiinyenga kwetu shi na ko nasha nokumona iihuna otaku vulu okuholola okwaahagwanenena kwetu hoka taku vulu okulundululwa. Okumona iihuna itaku tu ningitha tu kwatele yalwe onkone, ngele otatu etha ku tu zule.
“Lileni pamwe naamboka taa lili”
3 Kapu na omalimbililo kutya Jehova, Kalunga ketu omunahenda, oye onzo yehekeleko alihe. (Lesha 2 Aakorinto 1:3, 4.) Jehova ngoka e li oshiholelwa dhingi shokuulika olukeno, okwa shilipaleka aantu ye a ti: “Ongame, eeno, ongame mwene handi mu hekeleke.” — Jes. 51:12; Eps. 119:50, 52, 76.
5 Otatu vulu okukala neinekelo lya kola kutya Jehova ote ke tu kwathela. Onkee ano, otu na okukala aluhe twa manguluka oku mu mbumbulila omitima dhetu okupitila megalikano, tatu mu lombwele nkene tu uvite. Itashi tu hekeleke tuu okutseya kutya Jehova oku uvite ko oluhodhi lwetu nohe tu pe ehekeleko ndyoka twa pumbwa! Mbela ohe shi ningi ngiini?
Omaliko gomOmbiimbeli
w17.05 ep. 19-20, okat. 11, 12
Ino etha ohole yoye yi huhwe
11 Tu li Aakriste, otwa lenga notu hole oshili. Oshili ndjoka otayi adhika mOohapu dhaKalunga. Jesus okwa li a galikana kuHe a ti: “Oohapu dhoye odho oshili.” (Joh. 17:17) Onkee ano, ohole yokuhola oshili ohayi tamekele kokukala nontseyo yashili yOohapu dhaKalunga. (Kol. 1:10) Inatu pumbwa owala okukala tu na ontseyo yowala, ihe otwa pumbwa wo okutula miilongo shoka twi ilonga. Ndhindhilika nkene omunyoli gumwe gwEpisalomi 119 a nwethwa mo te tu kwathele tu uve ko kutya osha hala okutya shike, okukala tu hole oshili yomOmbiimbeli. (Lesha Episalomi 119:97-100.) Mbela ohatu kongo ngaa ethimbo lyokudhiladhila shoka twa lesha mOmanyolo momukokomoko gwesiku? Uuna tatu dhiladhila kunkene tatu vulu okutula miilonga oshili yOmbiimbeli monkalamwenyo yetu, otashi ke tu kwathela tu kale tu yi hole noonkondo.
12 Omupisalomi okwa tsikile ko a ti: “Oohapu dhoye oontoye ngiini kelaka lyandje! Odho oontoyelela dhi vule omagadhi goonyushi.” (Eps. 119:103) Sha faathana, natse otatu vulu okulya iikulya yopambepo ya kankamena kOmbiimbeli mbyoka hatu mono okuza kehangano lyaKalunga. Nongele otwa ningi ngawo otatu ka nyanyukilwa lela “oohapu dho opala” dhoshili notatu ka vula oku dhi longa yalwe. — Omuuv. 12:10.
23-29 DESEMBA
OMALIKO OKUZA MOOHAPU DHAKALUNGA EPISALOMI 119:121-176
Nkene to vulu okuyanda okwiiyehameka pamaiyuvo
Etha oompango nomakotampango gaKalunga ga dheule eiyuvo lyoye
5 Opo tu mone uuwanawa moompango dhaKalunga, otwa pumbwa okuninga oshindji kaashi shi owala oku dhi lesha noku dhi tseya. Otwa pumbwa okukala tu dhi hole noku dhi simaneka. Ombiimbeli otayi ti: “Tondeni uuwinayi, holeni uuyuuki.” (Amos 5:15) Ongiini tatu vulu oku shi ninga? Shoka sha simana, otwa pumbwa okwiilonga okutala ko iinima ngaashi Jehova he yi tala ko. Pashiholelwa, natu tye ando iho kotha nawa. Ye ndohotola te ku lombwele wu lye iikulya yontumba, wu ninge omadhewo nowu ninge omalunduluko galwe monkalamwenyo. Konima sho we shi ningi, owa mono kutya oshe ku kwathela. Oto ka kala wu uvite ngiini? Odhoshili kutya oto ka pandula ndohotola ngoka, sho e ku kwathele.
6 Momukalo gwa faathana, Omushiti okwe tu pa oompango ndhoka tadhi vulu oku tu gamena kiilanduliko mbyoka hayi zi mokuyona notu hwepopaleke onkalamwenyo yetu. Dhiladhila owala kuuwanawa mboka hatu mono, uuna tatu landula oompango dhOmbiimbeli. Otadhi tu lombwele tu yande okufundja, okukengelela, okuyaka, oluhondelo, elongithonkondo nuumpulile. (Lesha Omayeletumbulo 6:16-19; Eh. 21:8) Uuna tatu mono omayambeko ngoka haga zi mokulonga shoka Jehova a hokwa, ohatu mu pandula, nohole yetu yoku mu hola noyokuhola oompango dhe ohayi koko.
w93-E 4/15 ep. 17, okat. 12
Aagundjuka — otamu lalakanene shike?
12 Komeho gaayihe, ilonga okutonda, okunyanyala nokukala kokule nuuwinayi. (Episalomi 97:10) Ongiini to vulu okutonda shoka wa li wa tala ko oshiwanawa nenge shinyanyudha kungoye? Ongele owala ho dhiladhila kiilanduliko! Ombiimbeli otayi ti: “Inamu ifundjaleka, Kalunga iha nyekelwa. Oshoka shono omuntu te shi kunu, osho wo ta ka teya. Ngele okwa kunu pauhalu we, nena eteyo olyo eso.” (Aagalati 6:7, 8) Ngele to adhika kemakelo wu igandje kehalo ndyoka lya kwata miiti, dhiladhila kwaashoka sha simanenena, ano ku nkene tashi ka nikitha Jehova Kalunga oluhodhi. (Yelekanitha Episalomi 78:41, NW.) Dhiladhila wo kutya otashi vulika wu ka ninge etegelelo inaali tegelelwa nenge wu kwatwe komukithi, ngaashi oAIDS. Shimwe ishewe, eiyuvo lyoye otali ka kala tali ku pe uusama noto ka kala wa shunduka nowa mona iihuna. Otashi vulika wo wu ka mone iilanduliko tayi kalelele. Omumwameme gumwe okwa ti: “Ngame nomusamane gwandje otwa li twa ya momilalo naantu yamwe yi ili, omanga twa li inaatu tseyathana. Nonando atuhe ngashingeyi otu li Aakriste, omakwatathano ge na ko nasha nomilalo ngoka twa li tu na monakuziwa, ohaga etitha oontamanana nuukodhi mondjokana yetu.” Ino dhimbwa kutya oto vulu okukanitha iinakugwanithwa yoye yopaKriste, nenge wu kondwe mo megongalo! (1 Aakorinto 5:9-13) Mbela oshi li ngaa pandunge okwiikanithila oshindji shi thike mpoka, omolwokwiinyanyudha pakathimbo?
Omaliko gomOmbiimbeli
Kala wa tompwa kutya ‘Oohapu dhaKalunga odhoshili’
2 Tu li aapiya yaJehova, otwa tompwa kutya oye “Kalunga omudhiginini” nenge tu tye koshili ngoka e tu halela aluhe shoka sha dhenga mbanda. (Eps. 31:5; Jes. 48:17) Otu shi kutya otatu vulu okukala twa inekela shoka tatu lesha mOmbiimbeli, oshoka “oohapu [dhaKalunga] adhihe odhoshili.” (Lesha Episalomi 119:160.) Otatu vulu okutsa kumwe nomulongwantu gumwe gwOmbiimbeli ngoka a nyola a ti: “Kapu na shoka Kalunga a popya kaashi shi shoshili nenge tashi ka kala inaashi gwanithwa. Oshigwana shaKalunga otashi vulu okwiinekela shoka ha popi, oshoka oshe mu inekela.”
30 DESEMBA–5 JANUALI
OMALIKO OKUZA MOOHAPU DHAKALUNGA EPISALOMI 120–126
Oya kunu nomahodhi, ihe oya teya nenyanyu
w04-E 6/1 ep. 16, okat. 10
Mboka haya simaneke Kalunga oya lalekwa nuuyamba
10 Ngele ohatu taamba ko ondjoko yokukala aalongwa, kungawo otatu kondjitha Satana. Jakob 4:7 oku uvaneka a ti: “Kondjitheni Satana, ye note mu yi ontuku.” Shoka inashi hala okutya okuninga ngawo otaku ka kala okupu. Okulongela Kalunga otaku pula oonkambadhala dha mana mo. (Lukas 13:24) Ihe Ombiimbeli oya uvaneka mEpisalomi 126:5, tayi ti: “Oomboka taa kunu nokulila omahodhi, otaa ka teya nokunyanyukwa.” Odhoshili kutya ihatu longele Kalunga ngoka kee na olupandu. Ota “futu ayehe mboka taye mu kongo,” nota laleke nuuyamba mboka taye mu simanake. — Aahebeli 11:6.
Mbela eitaalo lyoye otali ka kala ngaa lya kola?
17 Mbela owa silwa gumwe ngoka wu hole? Itulila po ethimbo wu koleke eitaalo lyoye metegameno lyeyumuko, mokulesha omahokololo gOmbiimbeli kombinga yaamboka ya li ya yumudhwa. Mbela owu uvite nayi sho gumwe ngoka wu hole a kondwa? Konakona Ombiimbeli, opo wu kale wa tompwa kutya egeeloputudho lyaJehova ohali kala aluhe pahole. Kutya nduno owa taalela uupyakadhi wuni, longitha ompito ndjoka wu koleke eitaalo lyoye. Mbumbulila Jehova omutima gwoye. Ino iteta ko kooitaali ooyakweni, ihe kala popepi nayo. (Omayel. 18:1) Kala ho kutha ombinga miilonga mbyoka tayi vulu oku ku kwathela wu idhidhimike, nonando natango owa sa eyeme. (Eps. 126:5, 6) Tsikila okukala pomakugongala, okuya muukalele nosho wo okulesha Ombiimbeli pandjigilile. Kala wo ho gandja eitulomo komauvaneko gaJehova gomonakuyiwa. Sho wu wete nkene Jehova te ku kwathele, eitaalo lyoye muye otali ka kala lya kola shi vulithe nale.
w01-E 7/15 ep. 18-19, okat. 13-14
Dhiginineni iilonga yeteyo!
13 Episalomi 126:5, 6 ota li ti: “Oomboka taa kunu nokulila omahodhi, otaa ka teya nokunyanyukwa. Otaa ende taa lili, sho taa humbata oombuto; otaa galuka ko nokuligola, sho taa humbata oondudhi.” Oohapu ndhika odhi li ehekeleko enene kaateyi yeteyo lyaKalunga, unene tuu kwaamboka taya hepekwa. Oohapu dhomupisalomi kombinga yokukuna nokuteya, otadhi ulike nkene Jehova a li a sile oshimpwiyu nokulaleka nuuyamba oshihupe shAaisraeli mboka ya galuka muupongekwa waBabilonia shonale. Oya li ya nyanyukwa sho ya mangululwa, ihe otashi vulika ya li ya lili sho taya kunu oombuto mevi lya mbugala, ndyoka lya kala inaali longwa omimvo 70 ndhoka ya kala muupongekwa. Nonando ongawo, mboka ya li ya humu komeho nokukuna nosho wo niilonga yokutunga, oya li ya likola iiyimati noya li yu uvite ya gwanenwa miilonga yawo.
14 Otashi vulika hatu hukula ehodhi ngele tu li momayeleko, nenge uuna tse nenge ooitaali ooyakwetu taya mono iihuna omolwokwaanuuyuuki. (1 Petrus 3:14) Miilonga yetu yeteyo, otashi vulika petameko tu shi mone oshidhigu, oshoka ohatu kala twa fa tu wete itaatu imike iiyimati, nonando otu ninge oonkambadhala dha mana mo muukalele. Ngele otwa tsikile okukuna nokutekela, Kalunga ota ka kokitha, nolundji ohe shi ningi shi vulithe pwaashoka twa li twa tegelela. (1 Aakorinto 3:6) Shika otu shi iwetele kiizemo yokutaandelitha Oombiimbeli nosho wo iileshomwa yopamanyolo.
Omaliko gomOmbiimbeli
“Kalunga oye epopilongulu” nomugameni gwetu
15 Tango, natu tale shi na ko nasha negameno lyopalutu. Jehova oha gamene aalongeli ye, ye li ongundu. Ngele hasho, otaya ka ninga iihakanwa yaSatana nuupu. Natu kale tu shi kutya Satana “omupangeli guuyuni mbuka,” okwa halelela okuhulitha po elongelokalunga lyashili. (Johannes 12:31; Ehololo 12:17) Omapangelo gamwe omanankondo muuyuni oga li gi indike iilonga yetu yokuuvitha noga kambadhala oku tu dhima po thiluthilu. Ihe aapiya yaJehova aadhiginini oya tsikile nokuuvitha nopwaahe na ezimbuko. Omolwashike iigwana iinankondo ya nyengwa okuhulitha po iilonga yetu yopaKriste, nonando otu li aashona notwa fa kaatu na omugameni? Omolwaashoka Jehova ohe tu gamene nomawawa ge gopathaneko. — Episalomi 17:7, 8.