Antikristus ta hololwa kutya oye lye

OTO ki igamena ngiini ngele ou shi kutya moshitopolwa sheni omu na omukithi omudhipagi gwa pindjala? Oto ka ninga ashihe shoka to vulu opo u kale u na uukolele e to kala kokule naamboka ye na omukithi ngoka gwolukwayu. Otu na okuninga sha faathana mondunge yopambepo. Omanyolo otage tu lombwele kutya antikristus omo e li “nokuli muuyuni.” (1 Johannes 4:3, OB-1954) Ngele inatu hala okukwatwa “komukithi” ngoka “gwolukwayu,” otu na okudhimbulula mboka ye gu na e tatu ya yanda. Shi shi okupandulwa, Ombiimbeli otayi tu pe uuyelele oundji mwaashika.

Oshitya “antikristus” otashi ti “omupataneki gwaKristus (nenge ngoka ti itula pehala lyaKristus).” Onkee ano meityo lyasho lya mbwalangandja, uutumbulilo mbuka otau ulike kwaayehe mboka haya pataneke Kristus nenge aakalelipo ye, nenge haya fundju taya ti kutya oyo Kristus nenge oye li aakalelipo ye. Jesus okwa ti: “Kehe ngoka kee li kombinga yandje, oye okwa tsa ondumbo nangame [nenge oye antikristus]. Naangoka itaa gongele pamwe nangame, oye ota halakanitha po.”—Lukas 11:23.

Odhoshili kutya Johannes okwa li a nyola kombinga yaantikristus sho pwa piti oomvula 60 konima yokusa kwaJesus nokuyumukila kwe okuya megulu. Onkee ano oshi na okuuviwa ko kutya iilonga yaantikristus otayi ka guma aalanduli yaJesus aadhiginini kombanda yevi.—Mateus 25:40, 45.

Antikristus oku li ompinge naalanduli yaKristus

Jesus okwa li a londodha aalanduli ye kutya uuyuni auhe otau ke ya tonda. Okwa ti: “Aantu otaye ke mú kwata notaye ke mú gandja, mu hepekwe, e taye mú dhipaga. One tamu ka tondwa kaantu ayehe omolwandje. Otaku ka za aahunganeki aafundja oyendji e taa pukitha oyendji.”—Mateus 24:9, 11.

Molwaashoka Jesus aalongwa ye oya hepekwa ‘omolwe,’ aahepeki yawo osha yela kutya oya li ooantikristus, taya pataneke Kristus. “Aahunganeki aafundja,” yamwe mboka ya li nale Aakriste, nayo oye li wo ooantikristus. (2 Johannes 7) Johannes okwa nyola a ti: “Ooantikristus oyendji . . . oyo ya zile mutse, ihe kaya li ooyakwetu; oshoka andola ya li ooyakwetu, ando ya kala putse.”—1 Johannes 2:18, 19.

Oohapu dhaJesus nosho wo dhaJohannes otadhi ulike sha yela kutya antikristus ke shi omuntu gumwe awike ihe okwa thikama po mooantikristus oyendji. Kakele kaashono, molwaashoka oye li aapolofeti aafundja, elalakano lyawo limwe enene olyo okupukitha aantu palongelokalunga. Omikalo dhimwe odhini ndhoka haya longitha oku ya pukitha?

Okutaandelitha iifundja yopalongelokalunga

Omuyapostoli Paulus okwa li a londodha omulongi pamwe naye Timoteus a kale a kotokela omalongo gaashunimonima, ngaashi Himeneus naFiletus mboka “elongo lyawo [lya] fa ondhiya tayi kunya ko oontumba kolutu.” Paulus okwa gwedha ko a ti: “Oyo oya puka mo mondjila yoshili notaa yono po eitaalo lyoyendji, sho taa popi kutya eyumuko lyaasi olya ningwa nale.” (2 Timoteus 2:16-18) Osha yela kutya Himeneus naFiletus oya li ya longo aantu kutya eyumuko olya li lyopathaneko nonokutya Aakriste oya li ya yumuka nale mondunge yopambepo. Odhoshili kutya okuninga omulongwa gwashili gwaJesus ohaku ningi omuntu omwenyo pataloko lyaKalunga, ngaashi Paulus e shi popi sha yela. (Aaefeso 2:1-5) Nonando ongaaka, elongo lyaHimeneus naFiletus kalya li lya simaneka euvaneko lyaJesus li na ko nasha neyumuko lyo lyenelyene lyaasi kohi yelelo lyUukwaniilwa waKalunga.—Johannes 5:28, 29.

Omadhiladhilo ngoka taga ti kutya otapu ka kala owala eyumuko lyopathaneko oga li ge etwa po konima yethimbo kongundu yaantu hayi ithanwa Aagnostik. Aantu mboka yi itaala kutya ontseyo (mOshigreka gnoʹsis) otayi vulu okumonika momukalo gwuumpulile, oya kwatakanitha kumwe Uukriste uushunimonima nuufilosofi wOshigreka nosho wo nuumpulile waantu yokUuzilo. Pashiholelwa, oyi itaala kutya iinima ayihe yopanyama oyo iiwinayi, nomolwetompelo ndyoka oya ti kutya Jesus ine ya e li molutu lwopanyama, ihe okwa li owala ta monika a fa e na olutu lwopantu. Ngaashi twa mona, shika osho naanaa shoka omuyapostoli Johannes a li a londodha shi angalwe.—1 Johannes 4:2, 3; 2 Johannes 7.

Iifundja yilwe mbyoka ya li ya totwa po konima sho pwa piti omathelemimvo, oyo elongo lyaashoka shi ithanwa Uukwatatu uuyapuki, mboka tau popi kutya Jesus oye Kalunga Omunankondoadhihe noku li wo Omwana gwaKalunga. Dr. Alvan Lamson membo lye The Church of the First Three Centuries ota ti kutya elongo lyUukwatatu “inali za nandonando mOmanyolo gOshijuda nogopaKriste [ihe] olya tamekwa kOopata mboka yi itaala Plato noya li ye li gwedha mUukwakriste.” Oolye ya li “Oopata mboka yi itaala Plato”? Oya li aawiliki yopambepo aashunimonima mboka ya li ye hole unene omalongo goshipagani gomufilosofi Omugreka Plato.

Okugwedhwa kwUukwatatu mUukwakriste okwa li omukalo gwiineya gwaantikristus, molwaashoka elongo ndyoka olya ningitha aantu ya tale ko Kalunga e li oshiholekwa nosho wo olya ningitha ekwatathano lye nOmwana li kale inaali yela kuyo. (Johannes 14:28; 15:10; Aakolossa 1:15) Dhiladhila owala: Ongiini omuntu ta vulu ‘okuhedha kuKalunga’ ngaashi Omanyolo taga ladhipike, ngele Kalunga oku li oshiholekwa?—Jakob 4:8.

Oshinima shoka tashi eta natango evundakano, osho kutya aatoloki oyendji yOmbiimbeli edhina lyaKalunga Jehova oye li kutha mo momatoloko gawo, nokuli nonando otali holoka lwiikando yi vulithe 7 000 momanyolo gopetameko. Osha yela kutya okukambadhala okuninga Omunankondoadhihe kaa kale owala oshiholekwa ihe oku kale wo oshiholekwa kaashi na edhina, oko iilonga iinyanyalithi itaayi simanekitha Omushiti gwetu nosho wo Oohapu dhe dha nwethwa mo. (Ehololo 22:18, 19) Natango, okupingena po edhina lyaKalunga nomadhinasimaneko ngaashi Omuwa nosho wo Kalunga, otaku tsu ompinge noshiholelwa shegalikano shaJesus, moka ye a ti: “Edhina lyoye nali yapulwe.”—Mateus 6:9.

Ooantikristus ihaya taamba Uukwaniilwa waKalunga

Ooantikristus oye li yi ipyakidhila unene tuu ‘momasiku ngaka gahugunina,’ methimbo ndika tu li ngashingeyi. (2 Timoteus 3:1) Elalakano enene lyaahongololi yonena olyo okupukitha aantu shi na ko nasha noshilonga shaJesus e li Omukwaniilwa gwUukwaniilwa waKalunga, epangelo lyomegulu ndyoka masiku tali ka pangela ombanda yevi alihe.—Daniel 7:13, 14; Ehololo 11:15.

Pashiholelwa, aawiliki yamwe yomalongelokalunga ohayu uvitha kutya Uukwaniilwa waKalunga owo onkalo yomomutima gwomuntu, etaloko ndyoka inaali kankamena kOmanyolo. (Daniel 2:44) Yalwe otaya ti kutya Kristus ota longo okupitila momapangelo nomomahangano gopantu. Ihe Jesus okwa ti: ‘Uukwaniilwa wandje kau shi womuuyuni mbuka.’ (Johannes 18:36) Odhoshili kutya Satana oye “omupangeli gwuuyuni mbuka” noku li ‘kalunga kuuyuni mbuka,’ ihe haKristus. (Johannes 14:30; 2 Aakorinto 4:4, OB-1954) Shika otashi yelitha kutya omolwashike Jesus masiku ta ka kutha po omapangelo agehe gopantu e ta kala oye awike ta pangele ombanda yevi. (Episalomi 2:2, 6-9; Ehololo 19:11-21) Aantu ohaya galikana opo shika shi ningwe ngele taya galikana Egalikano lyOmuwa gwetu taya ti: “[Uukwaniilwa woye nau ye, KB]. Ehalo lyoye nali gwanithwe kombanda yevi.”—Mateus 6:10.

Molwaashoka aawiliki oyendji yomalongelokalunga ohaya yambidhidha omilandu dhopapolotika dhuuyuni mbuka, oya pataneke nokuhepeka nokuli mboka tayu uvitha oshili kombinga yUukwaniilwa waKalunga. Shihokitha, embo lyOmbiimbeli Ehololo otali popi ohonda yopathaneko, “Babiloni Oshinene,” ngoka “a kolwa kombinzi yaantu yaKalunga noyaamboka ya dhipagwa molwaasho yi inekela Jesus.” (Ehololo 17:4-6) Omukiintu nguka gwopathaneko oha hondele wo pambepo mokuyambidhidha “aakwaniilwa” yokevi nenge aapangeli yopapolotika, mboka taye mu kwathele wo. Omukiintu ngoka ke shi gumwe i ili kee shi omalongelokalunga giifundja guuyuni. Oku li oshitopolwa oshinene shaantikristus.—Ehololo 18:2, 3; Jakob 4:4.

Antikristus oha “nywitha omakutsi”

Kakele kokutinda oshili yOmbiimbeli, oyendji mboka hayi iti Aakriste oye etha po omithikampango dhOmbiimbeli dhi na ko nasha neihumbato noya taamba ko ndhoka dhi holike apuhe. Oohapu dhaKalunga odha hunganeka ehumokomeho ndika tadhi ti: “Ethimbo otali ke ya, uuna aantu [mboka tayi iti kutya otaya longele Kalunga] taa ka kala inaa hala okupulakena elongo lyu uka. Ihe otaa ka landula uuhalu wawo yene notaa ki ikongela aalongi mboka taye ya lombwele oohapu tadhi nywitha omakutsi gawo.” (2 Timoteus 4:3) Aakotokeli yopalongelokalunga mboka oya hokololwa wo ye li ‘aayapostoli aafundja, taa longitha iifundja miilonga yawo notaa iningi ya kale ya fa aayapostoli yaKristus.’ Ombiimbeli otayi tsikile tayi ti: “Hugunina otaa ka pewa shoka ye shi ilongela.”—2 Aakorinto 11:13-15.

Iilonga yawo oya kwatela mo “uukeeneidhiliko,” mboka tau ti okwaasimaneka owina omakotampango gopamikalo ga dhenga mbanda. (2 Petrus 2:1-3, 12-14) Mbela katu wete kutya aawiliki yomalongelokalunga oyendji naalanduli yawo oya taamba ko nenge oya hokwa iilonga yaa shi yopaKriste, ngaashi uushenge nomilalo pondje yondjokana? Oshi li nawa ngele to longitha okathimbo u yelekanithe omataloko gopantu nosho wo omikalo dhonkalamwenyo ndhoka dha taambiwa ko apuhe naashoka Ombiimbeli tayi ti muLevitikus 18:22; Aaroma 1:26, 27; 1 Aakorinto 6:9, 10; Aahebeli 13:4; nosho wo Judas 7.

‘Konakoneni mboka taa ti kutya oye na ombepo yaKalunga’

Mokutala kwaashoka sha popiwa metetekelo, otu na okupulakena koohapu dhomuyapostoli Johannes kutya katu na okutala ko eitaalo lyetu li li oshinima showala nenge kaashi na oshilonga. Okwe tu londodha a ti: “Inamu itaala ayehe mboka taa ti kutya oye na Ombepo yaKalunga, ihe ya konakoneni, mu tale kutya ombepo ndjoka ye yi na ngele oyaKalunga tuu. Oshoka aahunganeki aafundja oyendji oya ya nuuyuni auhe.”—1 Johannes 4:1.

Tala oshiholelwa oshiwanawa shaantu yontumba mboka ya li ye na “ehalo ewanawa” ya li ya kala moshilando Berea methelemumvo lyotango. Oya li ya “hokwa okupulakena oohapu dhaKalunga, nesiku kehe oya kala nokukonakona Omanyolo, opo ya tale, ngele shono tashi popiwa kuPaulus [naSilas], oshoshili tuu.” (Iilonga 17:10, 11) Nonando oya li ye na ehalo ewanawa okwiilonga, Aaberea oya li ya shilipaleke ngele shoka yu uva noya taamba ko osha za tuu lela mOmanyolo.

Nena wo Aakriste yashili ihaya nwethwa mo komataloko gopantu ngoka ge holike apuhe haga holoka po omathimbo nomathimbo, ihe ohaya kala ya kakatela thiluthilu koshili yOmbiimbeli. Omuyapostoli Paulus okwa nyola a ti: ‘Egalikano lyandje olyo ndika kutya Kalunga a kokithe nokutaneka ohole yeni, mokutseya [ontseyo yashili, NW] nomokuninga omatokolo goondunge.’—Aafilippi 1:9.

Ngele ino shi ninga nale, shi ninga elalakano lyoye okumona ‘ontseyo yashili nokuninga omatokolo goondunge’ mokwiilonga shoka Ombiimbeli tayi ti naanaa. Mboka taya holele Aaberea ihaya pukithwa ‘kiifundja’ yooantikristus. (2 Petrus 2:3) Pehala lyaashono, oya mangululwa koshili yopambepo yaKristus gwashili naalanduli ye yashili.—Johannes 8:32, 36.

[Oshimpungu/Ethano pepandja 4]

SHOKA OMBIIMBELI TAYI TI KOMBINGA YAANTIKRISTUS

“Aamwandje, ethimbo lyongashingeyi olyahugunina [sha yela kutya ehulilo lyethimbo lyaayapostoli]. Nongaashi one mu uvile, antikristus te ya, ano ngashingeyi ooantikristus oyendji oya holoka.”—1 Johannes 2:18, OB-1954.

“Omufundja ano olye kee shi oonguka ta ludhike, Jesus kee shi Kristus aniwa? Oye tuu nguka antikristus, ta ludhike He [nOmwana].”—1 Johannes 2:22, OB-1954.

“[Shaa] ombepo itayi hempulula Jesus, oyo kayi shi yomuKalunga; noyo ombepo yaantikristus, oongoka mwe mu uvu te ya, oye nokwa kala mo nokuli muuyuni.”—1 Johannes 4:3, OB-1954.

“Aahongololi oyendji ye ya [muuyuni], oomboka ihaa hempulula Jesus oye Kristus, oongoka kwa li e na okuya monyama; oye tuu ano omuhongololi omunene naantikristus.”—2 Johannes 7, OB-1954.

[Oshimpungu/Omathano pepandja 5]

OMUHONGOLOLI NGOKA HE YA MOMIKALO ODHINDJI DHA YOOLOKATHANA

Oshitya “antikristus” otashi ulike kwaayehe mboka haya tindi shoka tashi popiwa kOmbiimbeli kombinga yaJesus Kristus, ayehe mboka haya pataneke Uukwaniilwa we naayehe mboka haya hepeke aalanduli ye. Osha kwatela mo wo oohandimwe, omahangano niigwana mbyoka tayi popi iifundja kutya oyi lile po Kristus nenge mbyoka tayi ipe yo yene papuko ondondo yaMesiasa mokuuvaneka neinenepeko kutya otayi vulu okuninga shoka tashi vulu okuningwa owala kuKristus, sha hala okutya, okweeta ombili yashili negameno.

[Edhina lyomuthaneki]

Augustine: ©SuperStock/age fotostock

[Ethano pepandja 7]

Otu na ‘okukonakona Omanyolo esiku kehe’ ngaashi Aaberea