“Ngame otandi kala pamwe nane”

“Aantu oyendji otaa ke li konakona, nontseyo [yashili, NW] otayi indjipala.”—DAN. 12:4.

OTO YAMUKULA NGIINI?

Oshe ende ngiini ‘ontseyo yashili’ yi taandele pethimbo lyetu?

Oshe ende ngiini opo mboka ya taamba oshili ya ninge “oyendji”?

Omomikalo dhini ontseyo yashili yi “indjipala”?

1, 2. (a) Otu shi shi ngiini kutya Jesus oku li pamwe naalongwa ye ngashingeyi nota ka kala pamwe nayo monakuyiwa? (b) Ngaashi sha popiwa muDaniel 12:4, uuwanawa wuni tatu ka mona ngele ohatu konakona Omanyolo muule?

KALA ando wu iwete wu li mOparadisa. Ongula kehe to penduka owu uvite wa ndjanga nowa halelela oku ka longa iilonga yoye. Iho uvu we to ehama nenge oshigombo shasha. Uungolomena kehe mboka wa li wu na kawu po we. Owu wete ko nawa nowu uvite ko nawa, ezimba kehe tali nika owu li uvite, kehe okanima take ku gumu owu ka uvite noshikulya kehe to makele omulyo gwasho owu gu uvite. Owu na oonkondo lela, kehe shimwe to ningi oto ka kala we shi nyanyukilwa, owu na ookuume oyendji, ngoye ku na omaipulo gasha. Uukwaniilwa waKalunga otawu ke ku etela omayambeko agehe ngoka. Omukwaniilwa gwawo, Jesus Kristus, ota ka laleka nuuyamba aapangelwa ye noku ya longa ontseyo yokutseya Jehova.

² Jehova ota ka kala pamwe naapiya ye aadhiginini sho taya longwa oku mu tseya muuyuni auhe. Uule womathelemumvo Kalunga nOmwana oya kala nokukwathela mboka yi inekela muyo. Omanga Jesus inaa londa megulu okwa lombwele aalongwa ye aadhiginini kutya ota ka kala pamwe nayo. (Lesha Mateus 28:19, 20.) Opo tu kale tu na einekelo moohapu dhaJesus ndhoka, natu konakoneni ehunganeko limwe ndyoka lya nwethwa mo, lya nyolelwa muBabilonia omimvo 2 500 nasha dha ka pita. Omupolofeti Daniel okwa nyola kombinga ‘yehulilo lyuuyuni’ moka tu li ngashingeyi. Okwa ti: “Aantu oyendji otaa ke li konakona, nontseyo [yashili, NW] otayi indjipala.” (Dan. 12:4) Oshityalonga shOshihebeli shoka sha tolokwa “konakona” otashi gandja edhiladhilo lyokutala oshinima muule. Okukonakona kwa tya ngaaka otaku eta uuwanawa wa dhenga mbanda wuni? Mboka taya konakona muule Omanyolo, otaya ka mona ontseyo yashili yokutseya Ombiimbeli. Daniel okwa ti wo kutya aantu oyendji otaya ka mona ‘ontseyo yashili.’ Shimwe ishewe, ontseyo ndjoka otayi ki indjipala. Otayi ka taandela apuhe notayi ka monika kwaamboka ya hala oku yi mona. Sho tatu konakona nkene ehunganeko ndika lya gwanithwa, otatu ka mona kutya Jesus oku li pamwe naalongwa ye kunena nosho wo kutya Jehova ota vulu okugwanitha po shili omauvaneko ge agehe.

“ONTSEYO [YASHILI]” TAYI TSEYIKA

3. Oshike sha li sha ningilwa ‘ontseyo yashili’ konima yeso lyaayapostoli?

³ Konima yeso lyaayapostoli, mokati kAakriste yashili omwa li mwa zi aashunimonima ngaashi sha kala sha hunganekwa nokutaandela ya fa epeya. (Iil. 20:28-30; 2 Tes. 2:1-3, yelekanitha NW.) Shika osha li sha ningitha ‘ontseyo yashili’ kaayi indjipale nuupu uule womathelemimvo mokati kaamboka kaaye shi Ombiimbeli nomokati kaamboka hayi iti Aakriste aniwa. Nonando aakwatelikomeho yUukwakriste oya li yi itaala mOmbiimbeli, oya li ya longo aantu iifundja, “omalongo goompwidhuli” ngoka taga shekitha Kalunga. (1 Tim. 4:1) Shoka osha ningitha aantu oyendji ya kale momilema dhopambepo. Omalongo gaashunimonima oga kwatela mo elongo lyuukwatatu, omwenyo ihaagu si nosho wo kutya oomwenyo dhimwe otadhi ka hepekwa sigo aluhe moheli.

4. Ongundu yAakriste oya li ya tameke ngiini okukonga ‘ontseyo yashili’ okutameka mo 1870 nasha?

⁴ Momumvo 1870 nasha, omimvo 40 lwaampono manga ‘omasiku gahugunina’ inaaga tameka mo 1914, ongundu onshona yAakriste yashili moAmerika oya li hayi gongala yi konakone Ombiimbeli ya mana mo noyi konge ‘ontseyo yashili.’ (2 Tim. 3:1, OB-1954) Oya li yi iyithana Aakonakoni yOmbiimbeli. Aantu mboka kaya li “aanongo naanamayele” mboka Jesus a ti kutya oya holekwa ontseyo yOmbiimbeli. (Mat. 11:25) Oya li aaifupipiki mboka ya hala lela okulonga ehalo lyaKalunga. Oya li haya lesha Omanyolo, haye ga kundathana nohaye ga tedhatedha nuukeka pamwe negalikano. Oya li wo haya yelekanitha oohapu dhOmbiimbeli nokukonakona iinyolomwa yayalwe mboka ya ninga nale omalafululo moshinima sha faathana. Kashona nakashona, Aakonakoni yOmbiimbeli mboka oya li ya mono oshili ndjoka ya kala ya holekwa uule womathelemimvo.

5. Uufo The Old Theology mboka wa li wa nyanyangidhwa wa landulathana elalakano lyawo olyashike?

⁵ Nonando Aakonakoni yOmbiimbeli oya li ya nyanyukilwa iinima mbyoka tayi ilongo, inayi inenepeka omolwontseyo ndjoka opo ya mono. Yo inaya kala tayi itanga kutya oye eta po oshinima oshipe. (1 Kor. 8:1) Pehala lyaashono, oya nyanyangidha uufo wa landulathana hawu ithanwa The Old Theology. Elalakano lyawo olya li okukwathela aaleshi ya tseye oshili yOmbiimbeli. Okafo kotango oka li ke na “iinima yilwe mbyoka tayi kwathele mokukonakona Ombiimbeli, nelalakano olya li okukwathela aantu ye ekelehi omithigululwakalo adhihe dha totwa kaantu, noya landule thiluthilu elongo lyonale ndyoka Omuwa gwetu naayapostoli ya longa aantu.”—The Old Theology, onomola yo-1, Apilili 1889, ep. 32.

6, 7. (a) Okuza momumvo 1870 nasha otwa kwathelwa tu uve ko oshili yini? (b) Owa pandula unene sho wi ilongo oshili kombinga yashike?

⁶ Uule womimvo dha konda 100 dha pita, oshili onkumithi ndjoka ya monika kongundu onshona yAakonakoni yOmbiimbeli oyi iwetikile nokunena.a Oshili ndjoka kayi shi oshinima shanathangwa nenge elongo lyokukala tali patanwa kaateolohi. Ihe otayi tu etele uuwanawa, enyanyu netegameno monkalamwenyo yetu. Oye tu kwathela tu tseye omaukwatya nomalalakano gopahole gaJehova. Otayi yelitha onkandangala ndjoka Jesus ta dhana, otayi tu pe uuyelele kutya omolwashike i ile kombanda yevi nokusa, notayi tu lombwele shoka ta ningi ngashingeyi. Oshili ndjoka yi na ondilo otayi tu kwathele tu mone kutya omolwashike Kalunga e etha iinima iiwinayi tayi ningwa, omolwashike hatu si, otu na okugalikana ngiini nosho wo mpoka tatu vulu okumona enyanyu lyashili.

⁷ Ngashingeyi otatu vulu okuuva ko omahunganeko ngoka ga kala ga ‘holekwa’ uule womathelemimvo dha ka pita, molwaashoka otaga gwanithwa pethimbo ndika lyehulilo. (Dan. 12:9) Omahunganeko ngoka oga kwatela mo ngoka ge li mOmanyolo agehe, unene tuu ngoka ge li mOmavaangeli nomEhololo. Jehova okwe tu kwathela tu uve ko iinima mbyoka itaatu vulu okumona nomeho getu, ngaashi okupangela kwaJesus, olugodhi ndoka lwa tukuluka megulu nosho wo okuumbilwa kwaSatana kombanda yevi. (Eh. 12:7-12) Kalunga okwe tu pa wo omayele tu uve ko iinima mbyoka tatu vulu okumona. Otu shi shi kutya omolwashike pu na iita, omakakamo gevi, oondjala, omalega nosho wo aantu mboka haya longo uukolokoshi shoka sha ningitha ‘omathimbo ga kale omadhigu’ unene.—2 Tim. 3:1-5; Luk. 21:10, 11.

8. Olye tu na okupandula omolwiinima mbyoka twa mona notu uva?

⁸ Oshipu kutse okupopya shoka Jesus a li a lombwele aalongwa ye sho a ti: “Omeho geni oge na elago, sho taga mono iinima mbika mwe yi tala. Oshoka otandi mú lombwele: Aahunganeki oyendji naakwaniilwa oya li ya hala nokuhalelela okumona mbyoka tamu yi tala, yo inaye yi mona, nokuuva ndhoka tamu dhi uvu, yo inaye dhi uva.” (Luk. 10:23, 24) Otu na okupandula Jehova Kalunga sho e tu kwathela tu mone notu uve iinima mbyoka. Katu na tuu olupandu sho ‘omupopili,’ ombepo ondjapuki yaKalunga hayi wilike aalanduli yaJesus moku ya “longa oshili ayihe”! (Lesha Johannes 16:7, 13.) Onkee ano, natu kale aluhe twa lenga ‘ontseyo yashili’ ndjoka tu na noku yi lombwela yalwe nomutima aguhe.

AANTU “OYENDJI” OYA KAKATELA ‘ONTSEYO YASHILI’

9. Moshifo shaApilili 1881, omwa li mwa popiwa kutya opu na ompumbwe yashike?

⁹ Konima yomimvo mbali lwaampono okuza sho oshifo shotango shOshungolangelo yOshiingilisa sha nyanyangidhwa, moshifo shaApilili 1881 omwa li mwa popiwa kutya opwa pumbiwa aauvithi 1 000. Oshifo shoka osha ti: “Mboka tamu vulu okulonga etatasiku nenge ethimbo li vulithe po miilonga yOmuwa, otwa hala oku mu lombwela edhiladhilo . . . , tali ti: Indeni miilando kutya nduno iishona nenge iinene, mu li aatandelithi yiileshomwa nenge yevaangeli, ningeni ngaashi tamu vulu mu konge ayehe mboka ya hala okuninga Aakriste, ayehe mboka tamu adha ye na uulaadhi wokulongela Kalunga, ihe kaye na ontseyo yasha, ya tseyithileni ohenda yaKalunga mpoka yi thike nuuwanawa mboka wu li moohapu Dhe.”

10. Aantu oya li yi inyenge ngiini kehiyo lyokuya miilonga yethimbo lyu udha?

¹⁰ Ehiyo ndyoka olya li tali ulukile Aakonakoni yOmbiimbeli kutya iilonga ya simanenena yAakriste yashili oyo okuuvitha onkundana ombwanawa. Pethimbo ndyoka opwa li owala aantu omathele omashona mboka ya li pomutumba gwAakonakoni yOmbiimbeli. Aantu oyendji sho ya mono kutya shika oshili, oya taamba ehiyo ndyoka konima sho ya lesha okatrakatate nenge oshifo. Pashiholelwa, mo 1882 omuleshi gumwe moLondona, shaIngilanda konima sho a lesha Oshungolangelo nokabroshure ka nyanyangidhwa kAakonakoni yOmbiimbeli okwa nyola a ti: “Longii ndje nkene ndi na okuuvitha naashoka ndi na okutya opo ndi longe iilonga iiyapuki mbyoka Kalunga a hala ya longwa.”

11, 12. (a) Elalakano lini lya fa lyetu aatandelithi yiileshomwa ya li ye na? (b) Aatandelithi yiileshomwa oya li haya toto po ngiini “oongundu” nomagongalo?

¹¹ Mo 1885, Aakonakoni yOmbiimbeli 300 lwaampono oya li ya kutha ombinga miilonga yokutaandelitha iileshomwa. Aakalele mboka yethimbo lyu udha oya li ye na elalakano lya fa lyetu kunena, lyokuninga aantu aalongwa yaJesus Kristus. Ihe omikalo dhawo odha li dha yooloka ko kudhetu. Kunena ohatu konakona owala Ombiimbeli nomuntu gumwe poshikando noku mu pa uuyelele pauhandimwe. Ohatu hiya wo aakonakonimbiimbeli ya kale taye endathana negongalo ndyoka li li po nale. Pethimbo lyonale aataandelithi yiileshomwa oya li owala haya gandja omambo e taya gongele aantu mboka tayu ulike ohokwe nokukonakona nayo Ombiimbeli ye li ongundu. Pehala lyokukonakona naantu pauhandimwe, oya li ya toto po “oongundu” nenge omagongalo.

¹² Pashiholelwa, mo 1907 ongundu yimwe yaataandelithi yiileshomwa oya li yi ihanene moshilando shimwe tayi kongo mboka ye na nale omambo Millennial Dawn. Oshungolangelo yimwe oya ti: “Mboka [ye na ohokwe] oya li haya gongala muungundu uushona mugamwe gomomagumbo gawo. Omutaandelithi gwiileshomwa okwa li ha popi nayo Osoondaha ayihe ta longitha embo Divine Plan of the Ages, nomOsoondaha tayi landula okwa li he ya ladhipike ya kale haya kala pokugongala pandjigilile.” Mo 1911, aamwatate oya li ya toto po omulandu omupe. Oya ningi po elongekidho, opo aakalele aaendi yi ikalekelwa 58 ya kale taya gandja iipopiwa yomontaneho mIilongo ya Hangana yaAmerika nomuKanada. Aamwatate mboka oya li ya pula omadhina noondjukithi dhaamboka ya li yu ulike ohokwe mboka ya li ya kala piipopiwa noku yu unganeka ya tsakanene nayo momagumbo gawo opo ya tote po “oongundu” oompe. Mo 1914, opwa li omagongalo 1 200 gAakonakoni yOmbiimbeli muuyuni auhe.

13. Omukalo moka ‘ontseyo yashili’ ya taandela kunena otagu ku kumitha ngiini?

¹³ Kunena opu na omagongalo 109 400 lwaampono muuyuni auhe naamwatate naamwameme 895 800 lwaampono otaya longo ye li aakokolindjila. Aantu omamiliyona gahetatu lwaampono ngashingeyi oya mona ‘ontseyo yashili’ nohaye yi tula miilonga. (Lesha Jesaja 60:22.)b Shika otashi kumitha, molwaashoka Jesus okwa li a lombwele aalongwa ye kutya ‘otaya ka tondwa kwaayehe’ omolwedhina lye. Okwa ti ishewe aalanduli ye otaya ka hepekwa nokweedhililwa moondholongo nokudhipagwa nokuli. (Luk. 21:12-17) Nonando oshigwana shaJehova ohashi ponokelwa kuSatana noompwidhuli dhe nosho wo kaapataneki mboka ye li mokati kasho, otashi nyanyukilwa oshilonga oshiwanawa shokuninga aantu aalongwa. Oshi ipyakidhila nokuuvithila “aantu ayehe” kunena, kutya nduno oye li miiheke, miitopolwa moka mu na uutalala wamatutu, moondundu, moombuga, miilando nosho wo miitopolwa yokuushayi. (Mat. 24:14) Shika osha ningwa kekwatho lyaKalunga.

‘ONTSEYO YASHILI’ TAYI “INDJIPALA”

14. ‘Ontseyo yashili’ oya taandele ngiini okupitila miileshomwa?

¹⁴ ‘Ontseyo yashili’ oyi indjipala omolwoyendji mboka tayu uvitha onkundana ombwanawa. Oyi indjipala wo okupitila miileshomwa. MuJuli 1879, Aakonakoni yOmbiimbeli oya li ya nyanyangidha oshifo shotango hashi ithanwa Zion’s Watch Tower and Herald of Christ’s Presence. Osha li sha nyanyangidhwa komahangano gomuuyuni noga li ga nyanyangidha iifo 6 000 mOshiingilisa. Omunyoli gwasho okwa li Charles Taze Russell ngoka a li e na omimvo 27. Opwa li Aakonakoni yOmbiimbeli yalwe ya pyokoka ye li yatano mboka ya li haye mu pe aluhe omayele. Ngashingeyi Oshungolangelo ohayi nyanyangidhwa momalaka 195. Oyi li oshifo shoka hashi taandelithwa noonkondo apuhe muuyuni. Omwedhi kehe ohapu taandelithwa Ooshungolangelo 42 182 000. O-Awake! oyo oshifo sha landula ko mokutaandelithwa. Omwedhi kehe ohapu taandelithwa oo-Awake! 41 042 000 momalaka 84. Omumvo kehe ohapu pilintwa wo omambo nOombiimbeli omamiliyona 100 lwaampono.

15. Iilonga yetu yokupilinta ohayi ambidhidhwa ngiini pashimaliwa?

¹⁵ Oshilonga shoka oshinene shokunyanyangidha ohashi ambidhidhwa pashimaliwa nomaambidhidho gehalo ewanawa. (Lesha Mateus 10:8.) Oshinima shoka ohashi kumitha oyendji mboka ye na ontseyo miinima yokupilinta. Oye shi kutya oshi na ondilo okukaleka po eshina lyokupilinta, okulanda oombapila, ohinga yalyo nosho wo iikwaniipangitho yilwe. Omumwatate ngoka ha tala oondando dhiinima muuyuni okwa ti: “Aanangeshefa mboka haya talele po iinyanyangidho yetu ohaya kala ya kumwa okuuva kutya omashina getu ngoka goshinanena haga nduluka iinima yi na ongushu, oga kwatelwa po owala komaambidhidho gehalo ewanawa. Ohaya kala ya kumwa okumona kutya aaniilonga yetu mObetel aagundjuka noya nyanyukwa.”

EVI ALIHE OTALI KA KALA LYU UDHA ONTSEYO YOKUTSEYA KALUNGA

16. Onelalakano lyashike ‘ontseyo yashili’ ya tseyithwa?

¹⁶ ‘Ontseyo yashili’ oyi indjipala omolwelalakano ewanawa. Kalunga okwa hala “aantu ayehe ya hupithwe noya tseye oshili.” (1 Tim. 2:3, 4) Okwa hala aantu ya tseye oshili, opo ya vule oku mu longela momukalo gu uka ye e ya laleke nuuyamba. Opo ‘ontseyo yashili’ yi thike kuyo, Jehova okwa gongela oshihupe shAakriste aagwayekwa aadhiginini shi yi tseyithe. Okwa gongela wo “ongundu onene” (NW) okuza “maantu yomomihoko adhihe, momaludhi agehe, miigwana ayihe nomomalaka agehe.” Aantu mboka oye na etegameno lyoku ka kala nomwenyo sigo aluhe kombanda yevi.—Eh. 7:9.

17. Okutamunuka mo kwelongelokalunga lyashili otaku ulike shike?

¹⁷ Okutamunuka mo kwelongelokalunga lyashili muule woomvula 130 dha pita, otaku tu eta pehulithodhiladhilo kutya Kalunga nOmukwaniilwa gwe omugwayekwa, Jesus Kristus, oye li pamwe naapiya Ye kombanda yevi. Otaye ya wilike, otaye ya gamene, otaye yu unganeke notaye ya longo. Okwiindjipala kwawo otaku ulike wo kutya omauvaneko gaJehova ge na ko nasha nonakuyiwa otaga ka gwanithwa shili. Jesaja 11:9 ota ti: “Evi otali ka udha okutseya OMUWA kwa fa omeya ga siikila efuta.” Aantu otaya ka kala ya lalekwa nuuyamba.

[Omanyolo gopevi]

[Ethano pepandja 6]

Aakonakoni yOmbiimbeli yonale oya li aaifupipiki mboka ya hala lela okulonga ehalo lyaKalunga

[Ethano pepandja 7]

Jehova okwa lenga oonkambadhala dhoye dhokutaandelitha ‘ontseyo yashili’