Aantu taa kongo omayamukulo

“Otwa mona nale eyamukulo kepulo kutya ‘ongiini’ tu na okukonga uuhupilo, molwaashoka otu na iinima yuukengeli, ngaashi omashina gokutalaleka ombepo, omawi omawanawa guungalo wuu-CD . . . Ihe nonando ongaaka, otwa nyengwa natango okutseya kutya ‘omolwashike’ tu na omwenyo. Omolwashike tu na okutsikila nonkalamwenyo ndjika itaayi ti sha? Elalakano lyayo olyashike?”—David G. Myers, omuprofesoli gwuutseyimwenyo koHope College yi li muHolland, muMichigan, mIilongo yaHangana osho a pula.

ONGIINI to yamukula omapulo ngoka ga pulwa komuprofesoli ngoka? Otashi vulika yamwe tayi ipula ngele oshi na ngaa oshilonga okulongitha ethimbo okukonga omayamukulo. Ihe okukala to ipwililikile omapulo ngono owa fa omuntu to kambadhala okwiipwililikila okamanya ke li mongaku yoye: oto vulu okutsikila nolweendo, ihe ito ke lu nyanyukilwa.

Ngele owi ipula nale kutya onkalamwenyo oyi na ngaa elalakano, hangoye awike. Pakonakono limwe tali ningwa li na ko nasha neihumbato lyaantu muuyuni, olya mono kutya omwaalu omunene gwaantu muuyuni otagu ipula kutya “eityo nelalakano lyonkalamwenyo olyashike.”

Ngele owa hala okumona ombili yashili yopamadhiladhilo, owa pumbwa okumona omayamukulo gomapulo ngaka gatatu ga simana.

Otwa za peni?

Elalakano lyonkalamwenyo olyashike?

Oshike tashi ka ningwa po monakuyiwa?

Openi to vulu okwaadha omayamukulo ge shi okwiinekelwa gomapulo ngaka ga simana? Oshitopolwa tashi landula ko itashi gandja omayamukulo taga fekele nenge ga kankamena kuunongo wopantu, ihe otashi gandja omayamukulo okuza mOohapu dhaKalunga, Ombiimbeli. Otatu ku pula wu yanune Ombiimbeli yoye nokumona mwene shoka tayi ti.