Noowa nEyelu ehokololo lyoshili

MBELA owa yuulukwa okukala muuyuni wu li nawa, moka aantu taya ka kala nombili nayakwawo naamoka kaamu na iita, omuyonena nomathiminiko? Ngele osho, oto ka mona ehekeleko mehokololo lyondjokonona ndyoka tashi vulika wu shi nawa. Ehokololo olyaNoowa, omulumentu ngoka a li a tungu onguluwato moka ye a hupile nuukwanegumbo we pethimbo lyeyelu ndyoka lya li lya hulitha po aakolokoshi ayehe kombanda yevi.

Opu na owala omahokololo omashona ngoka ga tseyika apuhe. Ehokololo lyaashoka sha li sha ningwa pethimbo lyaNoowa otali adhika mOmbiimbeli montopolwa onti-6 sigo onti-9 yembo lyaGenesis, oli li wo moKoran nomomahokololo gaakulu yonale muuyuni auhe. Eyelu oko ngaa lya li shili, nenge mbela ehokololo owala lyopathaneko okuladhipika aantu opo ya longe shoka shu uka? Uule womathelemimvo aateolohi naanongononi oya kala nokuludhika epulo ndika. Ihe Ombiimbeli, Oohapu dhaKalunga otayi shi popi sha yela kutya ehokololo ndika olyoshili. Natu tale kwaashoka tashi landula ko:

Ehokololo lyaGenesis otali popi omumvo, omwedhi nesiku moka Eyelu lya tameka, uunake nopeni onguluwato ya li ya hakele nosho wo kutya uunake omeya ga li ga pwine. Uuyelele kombinga yokutunga, oometa niitungitho mbyoka yi na okulongithwa okutunga onguluwato owa li wa yela nawa. Mepingathano naashoka, omahokololo ngoka kaage shi goshili ihaga kala ga yela.

Omahokololo gaali gomOmbiimbeli ngoka taga gandja omusholondondo gwomazimo otagu ulike kutya Noowa oko a li shili. (1 Ondjalulo 1:4; Lukas 3:36) Esra naLukas mboka ya nyola omisholondondo ndhoka oya li ya pyokoka mokukonga uuyelele. Lukas okwa li a landula omusholondondo gwezimo lyaJesus sigo opuNoowa.

Euliko kombinga yaNoowa nosho wo Eyelu oya popiwa komuprofeti Jesaja naHesekiel nokomuyapostoli Paulus naPetrus mOmanyolo.—Jesaja 54:9; Hesekiel 14:14, 20; Aahebeli 11:7; 1 Petrus 3:19, 20; 2 Petrus 2:5.

Jesus Kristus okwa li a popi kombinga yEyelu sho a ti: “Oshoka ngaashi sha li pomasiku gaNoowa, osho tuu wo tashi ka kala pomasiku gOmuna gwOmuntu: Aantu oya li ye hole okulya nokunwa, okuhokana nokuhokanitha, sigo esiku ndyoka Noowa a yi monguluwato, eyelu nolye ya e tali ya hanagula po ayehe.” (Lukas 17:26, 27) Ando Eyelu kalya li ko, ando oohapu dhaJesus kombinga ‘yomasiku gOmuna gwOmuntu’ itadhi ti sha.

Omuyapostoli Petrus okwa hunganeka kutya otaku ke ya “aasheki” mboka taya ka sheka shoka Ombiimbeli tayi ti. Petrus okwa nyola a ti: ‘Oyo otaa ipwililike owina, ongo inaaya tseya oshinima shika kutya komeya geyelu wo uuyuni wopethimbo lyaNoowa owa hanagulwa po.’ Mbela otu na oku dhimbwa “oshinima shika”? Aawe nando! Petrus okwa tsikile ko ta ti: “Omagulu nevi sho yi li ko sigo onena, oya gamenwa kohapu tuu ndjoka yaKalunga, yi ka hanagulwe po nomulilo. Oyo oya pungulilwa esiku, uuna aakeenakonasha naKalunga taa ka pangulwa notaa ka yonagulwa po.”—2 Petrus 3:3-7, yelekanitha OB-1954.

Natango Kalunga ota ka hanagula po aakolokoshi, ihe ngaashi sha li pEyelu, otapu ka kala aahupipo. Mokulandula oshiholelwa shaNoowa, otashi vulika tu ka kale yamwe yomaayuuki mboka taya ka hupithwa nokuya muuyuni mboka uuwanawa.