Oshinima 2

Ino iyeleka nayalwe

OMBIIMBELI OTAYI LONGO SHIKE? “Kehe gumwe na konakone ye mwene, iilonga ye nkene ya tya. Iilonga ye ngele iiwanawa, nena ota vulu okwiitangela shoka e shi longo, ihe ita vulu okuyelekanitha iilonga ye niilonga yamukwawo.”—Aagalati 6:4.

ESHONGO LINI LI LI PO? Otashi vulika tu kale tu na egamo lyokwiiyelekanitha nayalwe, omathimbo gamwe onaamboka ye na oshishona tu ya vule, nolundji onaamboka ye na oonkondo, aayamba nenge ye na omagano ye tu vule. Kutya nduno etompelo olini, okwiiyelekanitha nayalwe kaku shi okuwanawa. Ohatu dhiladhila papuko kutya ongushu yomuntu oyi ikolelela kwaashoka e na nenge kwaashoka ta vulu okuninga. Otashi vulika wo tu kwatwe kefupa nokombepo yethigathano.—Omuuvithi 4:4.

OSHIKE TO VULU OKUNINGA? Itala ko ngaashi Kalunga he ku tala ko. Etha etaloko lye li ku nwethe mo opo kuu kale wu na ko nasha owala nuuwanawa woye mwene. “Omuntu oha tala kombanda, ihe [Jehova,a oha tala, NW] momutima.” (1 Samuel 16:7) Jehova oha kala e wete kutya owu na ongushu mokulesha omutima gwoye, mokukonakona omadhiladhilo goye, omaiyuvo goye nosho wo omahalo goye, ihe hamoku ku yelekanitha nayalwe. (Aahebeli 4:12, 13) Jehova oku shi omangambeko goye note ku ladhipike wu kale wo wu ga shi. Ngele oho iyeleke nayalwe, oto ka kala omunuuntsa nenge ihoo gwanenwa aluhe. Onkee ano, shi taamba ko neifupipiko kutya ito ka kala wa dhenga mbanda mukehe shimwe to lalakanene.—Omayeletumbulo 11:2.

Oshike naanaa wu na okuninga opo wu kale wu na ongushu momeho gaKalunga? Okwa nwetha mo omupolofeti Mika a nyole ta ti: “Aawe, OMUWA okwe tu lombwela shoka shu uka. Shoka te tu pula, osho okulonga shoka shu uka, oku mu ulukila ohole yashili nokukala muukumwe nomeifupipiko naKalunga ketu.” (Mika 6:8) Ngele owa landula omayele ngoka, Kalunga ote ke ku sila oshimpwiyu. (1 Petrus 5:6, 7) Mbela okulonga shoka shu uka oko oshinima tashi tu etele egwaneno?

[Enyolo lyopevi]

[Ethano pepandja 5]

Jehova oha yeleke ongushu yetu shi ikolelela kwaashoka shi li momitima dhetu