Oshinima 3
Kala ho pandula
OMBIIMBELI OTAYI LONGO SHIKE? “Panduleni aluhe.”—1 Aatessalonika 5:18.
ESHONGO LINI LI LI PO? Otu li muuyuni mbuka mu na aantu ye na uuntsa nokaaye na olupandu, iikala mbyoka tayi vulu oku tu nwetha mo. (2 Timoteus 3:1, 2) Kakele kaashono, otashi vulika tu kale tu wete twa thiminikwa tu gwedhe ko komaipyakidhilo ogendjigendji ngoka tu na nale monkalamwenyo ndjika yu udha omaipyakidhilo. Otatu vulu okukala twa gwililwa po komaupyakadhi nenge twi itula mokulalakanena iinima mbyoka tu hole e tatu kala kaatu na ethimbo lyokukala tu na olupandu lwaashoka tu na nale nenge okupandula yalwe ngele ye tu ningile sha.
OSHIKE TO VULU OKUNINGA? Longitha ethimbo mokutedhatedha kiinima iiwanawa mbyoka to nyanyukilwa ngashingeyi. Dhoshili, otashi vulika wu kale wu uvite wa gwililwa po komaupyakadhi. Ihe tala oshiholelwa shomukwaniilwa David. Omathimbo gamwe okwa li ha kala e na omutima gwa nyanyagulwa nokwa li a gwililwa po komaupyakadhi ogendji. Nokuli nonando ongaaka, okwa li a galikana Kalunga a ti: “Otandi tedhatedha ayihe mbyoka we yi ninga, notandi dhiladhila iilonga yoye ayihe.” (Episalomi 143:3-5) Nonando okwa li momamakelo, David okwa li ha pandula nokwa kala a gwanenwa.
Dhiladhila kombinga yaashoka yalwe ya ninga opo ye ku kwathele e to pandula oonkambadhala dhawo. Jesus okwa tula po oshiholelwa sha dhenga mbanda moshinima shika. Pashiholelwa, sho kuume ke Maria a li e mu tile omugwayo gwondilo komutse nokoompadhi, aantu yamwe oya li ya pula ya ti: “Omolwashike omugwayo gwa hepithwa owala ngeyi?”a Mboka ya li ye shi geela oya li taya dhiladhila kutya omugwayo ogwa li gu na okulandithwa po, iimaliwa e tayi pewa oohepele. Jesus okwe ya yamukula a ti: “Mu etheni. Omolwashike tamu mu piyaganeke?” Opo nduno okwa ti ishewe: “Oye okwa ningi shoka shi thike poonkondo dhe.” (Markus 14:3-8; Johannes 12:3) Pehala lyokuukitha eitulomo kwaashoka Maria inaa ninga, Jesus okwa li a pandula shoka a ningi.
Aantu yamwe ihaya kala ye na olupandu monkalamwenyo, ihe ngele oya silwa nenge ya kanitha iiniwe nenge ngaa shaa shoka opo haya pandula ekwatho lyaakwanezimo nookuume nenge ya kale ye na olupandu lwomalaleko nuuyamba galwe ngoka ya mona. Oto vulu okuyanda oshizemo shoka shiyemateka mokukala to tedhatedha kombinga yiinima iiwanawa mbyoka to nyanyukilwa ngashingeyi. Omolwashike itoo dhiladhila kombinga yiinima yontumba mbyoka wa pandula nenge wu yi nyole?
Molwaashoka “oshipewa kehe oshiwanawa” ohashi zi kuKalunga, oshi li nawa ngele tatu mu pandula megalikano. (Jakob 1:17) Okukala hatu ningi ngawo aluhe otashi ke tu kwathela tu kale hatu pandula notwa gwanenwa.—Aafilippi 4:6, 7.
[Enyolo lyopevi]
a Methelemumvo lyotango, okutila omugwayo komutse gwomuyenda osha li omukalo gwokuyakula aayenda, omanga okutila omugwayo koompadhi dhomuyenda sha li oshilonga tashi ulike eifupipiko.
[Ethano pepandja 6]
Mbela oho pandula yalwe ngele ye ku ningila sha?