Oshinima 5

Gwanitha po ompumbwe yoye yopambepo

OMBIIMBELI OTAYI LONGO SHIKE? “Aanelago oomboka ye shi ompumbwe yawo yopambepo.”—Mateus 5:3, NW.

ESHONGO LINI LI LI PO? Opu na omalongelokalunga gi ili nogi ili omayovi, ngoka ogendji gomugo taga longo aantu iinima mbyoka tayi ya imbi ya gwanithe po oompumbwe dhawo dhopambepo. Ongiini to vulu okutseya kutya olini tali longo oshili nolya hokiwa shili kuKalunga? Aanyoli yamwe yomambo ya tumbala ohaya ti kutya okwiitaala muKalunga nokwiigandja kuye oshinima kaashi li pandunge nosha nika oshiponga nokuli. Oshifo shaMaclean otashi ngongo omataloko gomulumentu a simana ngoka ini itaala muKalunga momukalo nguka, tashi ti: “Elongo lyUukwakriste otali longo kutya opu na oshinima shontumba shoka shi vule uunongononi nosho wo omaiyuvo getu . . . shoka tashi shundula onkalamwenyo yetu ndjoka oyo awike tu na notali tu ningitha tu kale twa hala okulonga omiyonena.”

OSHIKE TO VULU OKUNINGA? Konakona shoka tashi ulike kutya Kalunga oko e li. (Aaroma 1:20; Aahebeli 3:4) Ino etha gumwe e ku teye omukumo kuu konge omayamukulo gomapulo ga simana, ngaashi ngaka taga landula: Elalakano lyonkalamwenyo olya shike? Mbela aantu ohaya ka kala ngaa ye na omwenyo ishewe ngele ya si? Omolwashike pu na okumona iihuna okundji noonkondo? Kalunga okwa hala ndi ninge shike? Okumona omayamukulo taga mbilipaleke gomapulo ngoka, oko onkatu ya simanenena tayi ku kwathele wu kale wa gwanenwa sigo aluhe.

Ihe ino itaala owala ngeya shoka yalwe taye ku lombwele. Oohapu dhaKalunga otadhi ku ladhipike wu longithe ‘oonkondo dhoye dhokudhiladhila’ opo wu mone shoka tashi mu opalele. (Aaroma 12:1, 2) Oto ka lalekwa nuuyamba omolwoonkambadhala dhoye. Ngele owi itulile po ethimbo lyokukonakona Ombiimbeli nokutula miilonga omayele gayo ge na oshilonga, oto ka yanda omaupyakadhi, oto ka kala wu na iimpwiyu iishona noto ka nyanyukilwa onkalamwenyo yoye noonkondo. Ndika euvaneko li shi okwiinekelwa. Aantu omamiliyona ya za momaputuko agehe oya mona uuwanawa mokwiilonga oshili kombinga yaKalunga nomalalakano ge.

Sho to mono uuwanawa mokutula miilonga omayele gopandunge gOmbiimbeli, oto ki igandjela Kalunga thiluthilu. Omolwashike itoo zimine wu konakone Ombiimbeli nOonzapo dhaJehova ngele dhe ku pula? Ngele owe shi ningi, oto ka tsa kumwe nomuyapostoli Paulus ngoka a nyola a ti: “Eeno, uukriste owo shili eliko enene, ihe ongele wa gwana naashoka u shi na.”—1 Timoteus 6:6.

[Ethano pepandja 8]

Kala wu shi shoka tashi opalele Kalunga