Liivuru Anaawiili a Matharihelo
15 Nave munepa wa Muluku waaya wa Asariya, mwaana a Oteti. 2 Mwawiihiiha, owo aaya okumana ni Asa nave aloca ariki: “Mukiwiriyane nyuwo Asa, ni Yuta oothene vamoha ni Penxami! Yehova onahaala okhala ni nyuwo mwatitelela okhala ni yoowo; nave wakhala wi moomwaavya, owo onahaala wiisooneiha wi mumphwanye, nto wakhala wi moomunyanyala, owo onahaala woonyanyalaani. 3 Mu elukuluku yincipale,* Isarayeli haarino Muluku eeparipari, naari mulipa a mukucho wi amuhusihe, naari nlamulo. 4 Nyenya vaavaa awo yaahooxeyaaya nave emukookela Yehova, Muluku a Isarayeli ni emwaavya, owo aahiisooneiha wi emphwanye. 5 Mu elukuluku yeele haavo aawerya weeca mookhapeleleya,* woona wi aatepa okhalawo namvutuka variyari va achu oothene a ilapo. 6 Nloko naatoloxiwa ni nloko nikina, epooma yaatoloxiwa ni epooma ekina, woona wi Muluku aahaaruuhela namvutuka ni mukhalelo woothene wa makacamiho. 7 Nto vooloca sa nyuwo, mukhale oolipa nave muhiceecheye,* woona wi nyuwaano munahaala ochuweliwa wa nthowa na saweera sanyu.”
8 Vaavaa Asa iiwaleiye masu yaala ni masu a miririmu a Oteti, mulipa a miririmu, aasareya olipa murima nave aamwarya soophwaniherya soothanyeya mu elapo yoothene yo Yuta ni yo Penxami, ni ipooma sa makupa o mwaako wo Efraimu seiho owo aakunseiye, nave aamurehererya altare a Yehova yoowo aakhala o nipithela na Yehova. 9 Owo aahithukumanya mahimo oothene o Yuta ni o Penxami, nave tho anamarwa yaawo yaari o Efraimu, Manase ni Siimiyoni, woona wi ancipale a yaawo yaakhuma makupa a Isarayeli eya makupa a Asa yoonaaya wi Yehova, Muluku awe aari ni yoowo. 10 Mwawiihiiha, awo yaathukumana o Yerusalemu mu mweeri waneeraru mu eyaakha yaneekhumi nathanu ya olamulelo wa Asa. 11 Mu nihiku nenle, yaavaha mikucho wa Yehova imope masana mathanu nameeli* ni ipucepuche macikhwi mathanu nameeli* yaaruuhalaaya okhoconi. 12 Ohiya yeeyoru, yaapaka nlakano na omwaavya Yehova, Muluku a makholo aya, ni murima aya woothene ni okumi* aya woothene. 13 Yoowo ahaamwaavya Yehova Muluku a Isarayeli, aaphwanela wiiphiwa, moohipwacha aari mukhaani naari mutokweene, mulopwana naari muthiyana. 14 Mwawiihiiha awo yaalipela wa Yehova ni masu oovuwa ni okhuwela woohakalala, ni mapeca vamoha ni aposina. 15 Nave Yuta oothene aahakalala wa nthowa na olipela, woona wi yaalipela ni murima woothene nave yaamwaavya ni nchuno ntokweene, Yehova aanaavaha wiichuuwa wa amwiicani aya oothene oorukurerya.
16 Ophiyerya wi Asa aawaakha amunnawe Maka okhala mwene amwaamuthiyana, woona wi awo yaapaka yoophwaniherya yawuuliha muru wi enalapeliwa vamwirini waweeliheya.* Owo aahuuwiherya vathi yoophwaniherya aya yawuuliha muru, akakachela nave asuka ompopa wo Kitroni. 17 Nto hiyaamwaryiwe mapuro oocukhuwa o Isarayeli. Naamwi hiiha, murima wa Asa waari wawookololowa variyari va okumi awe* woothene. 18 Nave owo aavoliiha mu empa ya Muluku eeparipari ichu seiho owo ni apapa awe yeelinhaaya: eparata, ooru ni ikaruma soohiyanahiyana. 19 Hiyaarivo ekhoco ophiyerya eyaakha ya makhumi mararu nathanu mu olamulelo wa Asa.