Liivuru Anaawiili a Matharihelo

19 Nave Yehosafati, mwene o Yuta, aakooka akophonle* akookelaka owannyawe* o Yerusalemu. 2 Xewu, mwaana a Hanani, mulipa awoona, aaya okumana ni mwene Yehosafati nave aloca ni yoowo ariki: “Apwanne ti yaale oonanara murima munaphwanelaanyu waakhaviherya, nave apwanne ti yaale anamwiica Yehova munaphwanelaanyu waasivela? Wa nthowa na yeeyo, Yehova oonanariwa ni nyuwaano. 3 Naamwiihiiha, sookhalavo ichu saphaama wa nyuwo, woona wi nyuwaano moomwaryamo mweelaponi miri saweeliheya* nave moorehererya murima anyu wi* mmwaavye Muluku eeparipari.”

4 Yehosafati aatitelela okhala o Yerusalemu, nave aakhuma tho wi aaxekurye achu ovinyerya o Persepa ophiyerya makupa o mwaako o Efraimu, ni yoolakelela yawi aakookiherye wa Yehova, Muluku a makholo aya. 5 Owo tho aahaathanla athoriha mu elapo yoothene, epooma ti epooma wa ipooma soothene soolipihiwa o Yuta. 6 Owo aaloca wa athoriha: “Mukhaleno ephoole wa yeeyo muneeraanyu, vawi nyuwaano hamunathoriha ntakhara muchu, nyenya ntakhara Yehova; nave owo ori ni nyuwaano vaavaa munathorihaanyu. 7 Vano, mmooveke Yehova. Mukhaleno ephoole wa yeeyo munapakaanyu, ntakhara ni Yehova Muluku ahu, hiwaavo ohookololowa, naari nthalu, naari makhwankwa.”

8 Yehosafati aahaathanla tho o Yerusalemu akina a Alevi ni alipa mukucho, vamoha ni akina a ahooleli a imusi sa makholo sa Isarayeli, wi erumeeleke ntoko athoriha ntakhara Yehova ni othoriha miyaha soovila sa achu o Yerusalemu. 9 Nave aahaalamulela ariki: “Ti yeela munaphwanelaanyu weera, mmoovaka Yehova moororomeleya ni murima wawaakhwanela:* 10 Wakhala wi asinninyu yaawo anakhala mu ipooma ikina aaruuha mwaha onavolowela oyeeha nikhami naari mwaha vooloca sa nlamulo, ekano, malakiheryo naari mathoriheryo, nyuwaano munaphwanela waavaha miruku wi awo ehikhaleno nthowa vamiithoni va Yehova; moohiyana, owo onahaala onanariwa ni nyuwaano vamoha ni asinninyu. Ti yeela munaphwanelaanyu opaka wi muhikhaleno nthowa. 11 Amariya ola, muhooleli a alipa mukucho, yoowo onahaala okhala muhooleli anyu mmiyaha soothene inavolowela muteko wa Yehova. Sepatiya, mwaana a Isimayeli, onahaala okhala muhooleli a echoko ya Yuta mmiyaha soothene inamvolowela mwene nave Alevi anahaala orumeelaka ntoko akhaviheryi anyu. Mukhale akuru nave mweerevo echu, Yehova akhale ni yaale anapaka yeeyo eri yaphaama.”