Ester

3 Evinrevo elukuluku, Mwene Asuweru aamvaha otokweene Hamani, mwaana a Hametati, a nloko na Akaki, nave aamuweliha moorweela wa omvaha murici wavasuluxa waapwaha asitokweene oothene akina. 2 Alapeli oothene a mwene yaawo yaakhala va mulako mutokweene vaate va mwene yaanakokhora ni omucicimiha Hamani, hiihaa ntoko mwene aalamulenleiye vooloca sa yoowo. Nto Mortekayi taakhoca omukokhorela ni omucicimiha yoowo. 3 Mwawiihiiha, anamuteko a mwene yaawo yaakhala vamulako vaate va mwene yaamukoha Mortekayi: “Ntakhara heeni ohiniiwelelaawe nlamulo na mwene?” 4 Nihiku nnihiku yaanamukoha vooloca sa yeela, nyenya owo haawiriyana. Wanthowa nenla, yaamuleela Hamani wi esuwele waakhanle wi meecelo a Mortekayi yaahaala weemereryiwa; tiwi Mortekayi aahaaleela wi Muyuta.

5 Vano Hamani oonneiye wi Mortekayi haakokhora ni omucicimiha, aatepa oonyeenyeya. 6 Vanonto, owo aahoona wi omwiipha* pahiru Mortekayi yaari echu ekhaani, woona wi aaleeliwa vooloca sa nloko na Mortekayi. Mwawiihiiha, Hamani aahaavya mukhalelo wa otoloxa nloko na Mortekayi, ela tiwi, Ayuta oothene mu omwene wa Asuweru.

7 Mu eyaakha yaneekhumi napiili ya olamulelo wa Asuweru, mweeri woopacerya, mweeri wa Nisani,* yaavonyiwa Puuri (ela tiwi, Ekari) vamiithoni va Hamani, wi alakelele nihiku ni mweeri, nave ekari yaamorenle mweeri waneekhumi napiili, mweeri wa Atar.* 8 Voocharela, Hamani aaloca wa Mwene Asuweru: “Nookhalavo nloko nimwalamwanle nave nri voothevene variyari va maloko mu iprovinsiya soothene sa omwene anyu. Malamulo aya toohiyana ni malamulo a maloko oothene makina, nave awo haniiwelela malamulo a mwene. Honaphwanela wi nyuwo amwene mwaahiye hiiha. 9 Mwasiveliwa mwene, murepe nlamulo wi yiiphiwe. Kinamwaavaha anamuteko italentu* sa eparata macikhwi khumi,* wi yahele mu nipuro na muhakhu woomwene.”*

10 Mwawiihiiha, mwene aamurula muneela a sineti* yoowo aanwareiye mukathani amunnya Hamani, mwiicani a Ayuta, mwaana a Hametati, a nloko na Akaki. 11 Mwene aaloca wa Hamani: “Eparata ni nloko siri mmatani mwaa. Oweerele yeeyo onoonaawe okhala yoophwanelela.” 12 Mwawiihiiha, mu nihiku naneekhumi nararu mweeri woopacerya, alipa oorepa a mwene yaahichaniwa. Awo yaahaarepela ahooleli a mwene, alamuleli a iprovinsiya, ni asitokweene a maloko oohiyanahiyana soothene Hamani aalamulenleiye, echarihiwaka marepeliwo a eprovinsiya ti eprovinsiya ni elocelo ya nloko ti nloko. Ikaarata saarempwe mu nsina na Mwene Asuweru nave saaheeyeriwa eneneeryo ni muneela a sineti a mwene.

13 Ikaarata saarumihiwa moorweela wa anamichaka wa iprovinsiya soothene sa mwene, ilocaka wi ekwasiwe, yiiphiwe ni otoloxiwa Ayuta oothene, amiravo ni awuuluvala, athiyana ni anamwane, mu nihiku nimoha, nihiku na naneekhumi nararu, na mweeri waneekhumi napiili, ela tiwi, mweeri wa Atar, nave wi okuxiwe muhakhu aya. 14 Masu a ikaarata seihe yaaphwanela olaleiwa ntoko nlamulo mu iprovinsiya soothene ni olokohiwa wa maloko oothene wi yiirehererye ntakhara nihiku nenle. 15 Anamichaka yaacimula mwawaakuveya moorweela wa olamuleliwa ni mwene; nlamulo naalaleiwa o epooma yoolipihiwa yo Susani.* Voocharela, mwene ni Hamani yaakiraathi wi ewurye, nyenya achu a epooma yo Susani* yaari awuukhuwa.