Ester
7 Mwene ni Hamani yaaya o efesta ya Ester, mwaara a mwene.* 2 Nihiku nenla nanaawiili, vaavaa yaawuryaaya eviinyu, mwene aamukoha wanaawiili Ester ariki: “Tiheeni onachunaawe oveka Ester, mwaara a mwene?* Onarwa ovahiwa. Yoovekaa tiivi? Naamwi ovenke ovahiwa eriyari ya omwene aka, kinamoovaha!” 3 Ester, mwaara a mwene aahaakhula: “Kaaphwannye mahala vamiithoni vanyu, nyuwo mwene, nave mwasiveliwa mwene, kinaveka wi mvuluxe okumi aka ni wa achu a nloko naka. 4 Tiwi miyaano ni nloko naka nootumihiwa wi nikwasiwe, niiphiwe ni otoloxiwa. Waakhanle wi ntumihiwe wi nikhale akapuro, kaahaala omaala. Nto otoloxa yoola honaphwanela weemereryiwa, woona wi onahaala waaruuhela nikacamiho amwene.”
5 Mwene Asuweru aamukoha Ester, mwaara mwene:* “Taani yoowo? Ori woowi muchu yoowo eerenrye opaka echu si yeela?” 6 Ester aahaakhula: “Mutakhali ni mwiicani ene ti Hamani ola, mulopwana oonanara murima.”
Hamani aatepa woova nthowa na mwene ni mwaariye. 7 Mwene aavinya anyeenyen’ye nave ahiya efesta, aya nipuro nooreera na vaate va mwene. Nto Hamani aapacerya omveka Ester, mwaara a mwene* wi avuluxe okumi awe, ntakhara aahoona wi mwene aalakelela omulaka. 8 Mwene aakooka o nipuro nooreera na vaate va mwene, avolowa mpa waalyiwamo efesta nave aamoona Hamani iirihenle va sofa aarivo Ester. Mwene aakhuwela ariki: “Onachuna tho omukoniha mwaaraka vamiithoni vaka, mpa mwaka muumu?” Vaavaa mwene aamalinheiye oloca, anamuteko yaamukhuneela wiithoni Hamani. 9 Nave Harpona, mmoha a anamuteko a mwene, aahi: “Hamani tho oorehererya mwiri wi amuthomeyevo Mortekayi, mulopwana yoowo aavulunxe okumi wa amwene, aalokohaka alopwana yaale yaachuna owiiphaani. Mwiri owo ori vaate va Hamani nave orakama waya, miwono* makhumi mathanu.”* Mwawiihiiha, mwene aahi: “Mwamuthomeye va mwiri yoowo.” 10 Hiihaa, Hamani aathomeiwa va mwiri yoowo aareherenryeiye ntakhara Mortekayi, nave esara ya mwene yaakupha.*