Ester

9 Mu nihiku naneekhumi nararu na mweeri waneekhumi napiili, ela tiwi, mweeri wa Atar, vaavaa masu a mwene ni nlamulo nawe naaphwanelaaya waakhwaniheryiwa, nihiku nenlo amwiicani a Ayuta yaaweheryaaya waavootha yaawo, yaaheereya moohiyana: Yaari Ayuta yaavoonthe yaawo yaawiica. 2 Ayuta yaathukumana mu ipooma saya, mu iprovinsiya soothene sa Mwene Asuweru wi ewiiphe yaale yaavya oweerela yoonanara. Nave haavo aawenrye owanano, ntakhara achu a maloko oothene, yaasareya woova. 3 Nave asitokweene oothene a iprovinsiya, ahooleli, alamuleli ni oothene yaawo yaahoolela miteko sa mwene yaahaakhaviherya Ayuta, woona wi yaanamoova Mortekayi. 4 Mortekayi aakhalano owerya vaate va mwene, nave ovuwa wawe waasuweliwa mu iprovinsiya soothene, woona wi owo aamvira akhalaka oowerya.

5 Ayuta yaahaakwasa ni nlema amwiicani aya oothene, ewiipha nave yaatoloxa; yaaweerela yeeyo yaachunaaya wa yaale yaawiica. 6 Nave mu epooma yoolipihiwa yo Susani,* Ayuta yaawiipha ni waatoloxa alopwana masana mathanu.* 7 Yaamwiipha tho Parsantata, Talfoni, Asipata, 8 Porata, Ataliya, Aritata, 9 Parmasita, Arisai, Aritai ni Vaisata, 10 anamwane khumi a Hamani, mwiicani a Ayuta, mwaana a Hametati. Nto emanle owiipha, hiyaakunxe muhakhu aya.

11 Nihiku nenle aaleeliwa mwene waaca wa achu yiiphiwe o epooma yoolipihiwa yo Susani.*

12 Mwene aahi wa Ester, mwaara a mwene:* “Waakhanle wi pahiru o epooma yoolipihiwa yo Susani* Ayuta awiiphale ni waatoloxa achu masana mathanu ni anamwene khumi a Hamani, tiheeni nto yeenraaya mu iprovinsiya sikina sa mwene? Vano apwanne wookhalano yooveka ekina? Onarwa ovahiwa. Yookhalavo echu ekina onachunaawe? Onahaala ovahiwa.” 13 Ester aahaakhula: “Mwasiveliwa mwene, mulamule wi Ayuta o Susani* yaakhele weemereryiwa wi yeerevo echu tho omeelo, mwawiiwanana ni nlamulo nivuwihiwe ntakhara olelo, nave wi anamwane khumi a Hamani ethomeiwe vamwirini.” 14 Mwawiihiiha, mwene aalamulela wi eyo yeeriweno. Nlamulo naalaleiwa o Susani,* nave anamwane khumi a Hamani yaathomeiwa vamwirini.

15 O Susani Ayuta yaathukumana wanaawiili mu nihiku naneekhumi naxexe na mweeri wa Atar nave ewiipha achu masana mararu o Susani, nto hiyaakunxe muhakhu aya.

16 Ayuta akina yaawo yaakhala mu iprovinsiya sa mwene, yaathukumana tho vamoha nave yiisaakiha. Awo yaahiisoopola wa amwiicani aya nave ewiipha achu yaawiica awaakhwana macikhwi makhumi mathanu napiili ni macikhwi thanu,* nto hiyaakunxe muhakhu aya. 17 Ela yeeren’ye nihiku naneekhumi nararu na mweeri wa Atar. Mu nihiku naneekhumi naxexe, awo yaahiichuuwa nave etikitherya nihiku nenla ntoko nihiku na efesta etokweene ni ohakalala.

18 Nto Ayuta o Susani,* yaathukumanne mu nihiku naneekhumi nararu ni nihiku naneekhumi naxexe na mweeri wa Atar. Mu nihiku naneekhumi nathanu, awo yaahiichuuwa nave epaka nihiku nla ntoko nihiku na efesta etokweene ni ohakalala. 19 Ti nthowa nene Ayuta yaamanke mu ipooma sikina yaapankaaya nihiku naneekhumi naxexe na mweeri wa Atar ntoko nihiku na ohakalala, na efesta etokweene ni ochapa, ni elukuluku ya ovahana yoolya mukina ni mukhwaawe ntoko yamahala.

20 Mortekayi aarepa saweereya seiha nave avonya ikaarata wa Ayuta oothene a iprovinsiya soothene sa Mwene Asuweru, wa iprovinsiya sawaacamela ni soorakamela. 21 Owo aahaalamulela wi yuupuweleleke nihiku naneekhumi naxexe ni nihiku naneekhumi nathanu na mweeri wa Atar, eyaakha ti eyaakha, 22 woona wi mmahiku yaala, Ayuta yaahikhala ootaphuwa wa amwiicani aya, nave mweeri yoola, othanana waya waathatuwa okhala ochapa, nave winla waya waathatuwa okhala ohakalala. Awo yaaphwanela wuupuwelelaka mahiku yaala ntoko mahiku a ifesta ni ochapa, elukuluku ya ovahana yoolya mukina ni mukhwaawe ntoko yamahala ni ovaha samahala wa alipa oohaawa.

23 Nave Ayuta yaaheemererya otitelela wuupuwelela ochapela yoola yaapacerinhaaya ni opaka yeeyo Mortekayi aarepenleiye. 24 Tiwi Hamani mwaana a Hametati a nloko na Akaki, mwiicani a Ayuta oothene, aapaka marehereryo a waatoloxa Ayuta nave aamvonya Puri, ela tiwi, Ekari, wi Ayuta ekhale awuukhuwa ni waatoloxa yaawo. 25 Nto vaavaa Ester aakeleiye wa mwene, owo aalamulela orempwa nlamulo: “Marehereryo awe oonanara ntakhara Ayuta emmorele yoowo.” Nave owo ni anamwane awe yaathomeiwa vamwirini. 26 Ti nthowa nene yaavanhaaya mahiku yaala nsina nawi Purim, nsina nenlo nnarweela mu nsu nawi Puri.* Hiihaa, wanthowa na masu a ekaarata ya Mortekayi, yeeyo awo yonnaaya ni yeeyo yaaweerenle, 27 Ayuta yaatikitherya nlamulo ntakhara yaawo aneene, anamwane aya a muhoolo, ni oothene yaahaala ophitaana ni yaawo, wi yuupuweleleke mahiku yaala meeli ni opaka soothene saarempwale ntakhara yaawo, mu elukuluku yoolakaniwa, mu iyaakha soothene. 28 Ala yaari mahiku yaaphwanela wuupuweleliwaka ni ochapeliwa ni muyareriwo woothene wa muhoolo, imusi soothene, mu iprovinsiya soothene ni mu ipooma soothene. Mahiku yaala a Purim hiyaaphwanela ohiiwa ni Ayuta, nave ochapela wuuwu hiwaaphwanela omala variyari va anamwane aya a muhoolo.

29 Voocharela, ekaarata yanaawiili yaarempwa vooloca mahiku yaala a Purim, nave Ester, mwaara a mwene,* mwaana a Apihayili vamoha ni Mortekayi Muyuta, yaaheerela onamoona* ni owerya woothene. 30 Voocharela, saarumihiwa ikaarata wa Ayuta oothene mu iprovinsiya nsana nimoha ni makhumi meeli ni thanu napiili* sa olamulelo wa Asuweru, ni masu a murecele ni oororomeleya, 31 wi yeerele onamoona* ochapeliwa wa mahiku a Purim mu elukuluku yoolakaniwa, hiihaa ntoko Mortekayi Muyuta, ni Ester, mwaara a mwene* yaalamulenlaaya, nave tho hiihaa ntoko yaatikithenryaaya nlamulo wa yaawo aneene ni wa anamwane aya a muhoolo, ophitaanyerya wiinanela olya ni mavekelo a vathi va murima. 32 Nlamulo na Ester naaheerela onamoona* miyaha seiha vooloca sa mahiku a Purim, nave ela yaarempwa mu liivuru.