Yupu
28 “Nookhalavo nipuro enathimpwaayavo eparata
Nnipuro onathimpweiyevo ooru awo anrehereryaaya.
2 Muthipo onakumihiwa vachayani,
Nave enyacu enakumihiwa* mmiyalani.
3 Muchu onnavootha epiiphi,
Mmapuro ooripa ni eepiiphi, owo onnavolowa ophiyerya vathi venexa
Aavyaka maluku asisapo.
4 Owo onnathipa nlici nawiixa ocai wa weiwo achu amankaayawo,
Mmapuro oocuwaliwa, ocai wa weiwo achu anaviraayawo;
Achu akina annakhuruwelawo yiimakelenle mikoi nave annakhala osulusulu.
5 Vasulu, echaya ennakumiha soolya;
Nto vathi, enakhala ntoko wi evyile ni mooro.*
6 Mmalukuni mwemmo onnakhalamo safira,
Nave munchupini onnaphwanyeyamo ooru.
7 Hiyaavo enaka enasuwela ephiro enakeriha weiwo;
Niitho na saaka hinoonneru mphiro yoowo.
8 Haavo mwaaxinama ooluwa onanyikalawo,
Nave mwaco akuru hanaphiyaworu.
9 Muchu onnapwexa maluku oolipa ni mata awe;
Owo onnapicula mathipelo a miyaako.
10 Owo onnathipa mikoti sa maahi mmalukuni;
Miitho awe annawerya woona ichu soothene sookhweleyaxa.
11 Owo onnaaciya anaacuucu a mihice,
Nave onnaruuha vanlakani yeeyo yaari yoovitheya.
12 Vano hanka miruku, inaphwanyeya woowi?
Nave eri woowi ehime ya osuwelaxa?
13 Haavo muchu onasuwela okhweleya waya,
Nave iho hinnaphwanyeya mweelaponi ya achu akumi.
14 Maahi awiixa ani: ‘Iho hiri mwa miyo!’
Nave ephareya eni: ‘Iho hiri ni miyo!’
15 Iho hinnawerya othummwa ni ooru aphaama;
Naari honaweryeya ophwimmwa eparata wi etorokanihiweno.
16 Iho hinnawerya othummwa ni ooru a Ofiri,
Naari ni maluku asisapo a onixi, naari ni safira.
17 Iho hinnawerya olikanyihiwa ni ooru naari eviituru;
Naari mano hinnawerya olikanyihiwa ni etixela* epakiwe ni ooru aphaama.*
18 Korale ni kristaale tahi echweenevo,
Tiwi murupa woosareya miruku ti wookhweleyaxa opwaha murupa woosareya ni maluku asisapo.
19 Iho hinnawerya olikanyihiwa ni topaasiyu o Kuxi;
Iho hinnawerya naari mano olikanyihiwa ni ooru aphaama.
20 Nto miruku inarwa woowi?
Nave eri woowi ehime ya osuwelaxa?
21 Iho iri soovitheya vamiithoni va ikumi soothene
Nave iri sookhuweya wa ipalame sa wirimu.
22 Otoloxa ni okhwa sinnaloca iriki:
‘Pahiru nrimoona wiiwa vooloca sa seiho.’
23 Muluku oosuwela mphiro inaphwanyeyaayawo;
Yooworu pahi tonasuwela weiwo inakhalaayawo,
24 Tiwi, owo onnavarerya ophiyerya weiwo elapo ekotenlaayawo,
Nave onnoona soothene iri vathi veerimu.
25 Vaavaa aalakelenleiye ikuru sa echeku*
Nave aphima maahi,
26 Vaavaa aatikithenryeiye nlamulo wa epula
Ni othala mphiro wa overunya ni etari,
27 Vaavaanto, owo aahoona miruku nave athariha seiho,
Owo aatikitherya nave avareryela seiho.
28 Nave aloca wa muchu:
‘Omoova Yehova, ti miruku.
Nave osepa yoonanara, osuwelaxa.’”