Yupu
7 Ekumi ya muchu a veelaponi yavathi, heri ntoko muteko woophareliwa,
Nave mahiku awe hari ntoko namuteko onaamulapa?
2 Ntoko kapuro, owo onnanlela oya vamuuruxini,
Nave ntoko namuteko onaamulapa, owo onnaweherya nlivelo nawe.
3 Mwawiihiiha, mmiyeeri sincipale ekumi aka yaari ya siiyo,
Nave kaavahiwa sawuukhula ohiyu ti ohiyu.
4 Kakona, kinniikoha: ‘Kini kivinye liini?’
Vaavaa ohiyu onalekelaaya, kinnavelavela orukunuwa vakaamani ophiyerya osa.*
6 Mahiku aka annavira mwawaakuveya ompwaha sikano oochavano ikuwo,
Nave annakuchuwa ehirivo ewehereryo.
8 Miitho yaawo anakoona hiihaano herwa ekoona tho,
Miitho anyu anamukaavya, nto nkikhalavo.
9 Ntoko neeku nnamwareyaaya nave ncakanela,
Yoowo onakhuruwela o Mahiyeni* hanakooka tho.
10 Owo harwa akookela tho owannyawe,
Nave achu a nipuro aamankeiyevo enarwa emucuwala.
11 Mwawiihiiha, nkimaala oloca.
Kinamuloca sa wuukhuwa wa munepa aka;
Kinamwiikhupanyeryaka wa nthowa na osooseya murima!
12 Apwanne ka ephareya naari mwaaxinama mutokweene a mphareya,
Wi mmwaavye mulipeleli wi akilipeleleke?
13 Kaloca kiriki: ‘Ekaama aka enamukihakararya;
Nipuro kinakoonaakavo nnamukikhaviherya ovukulela ohooxeya waka,’
14 Nyuwo munnakoopopiha ni sooloha,
Nave munnakitutuxa ni sawoona,
15 Mwawiihiiha, ti waphaama okhwa kiphutiwe ephula ni eyano,
Aa, ti waphaama wa miyaano okhwa, opwaha mwiili aka okhala hiiha.*
16 Kinnathanya okumi aka, nkinachuna okhala.
Mukihiye, woona wi mahiku aka ari ntoko nwiya.
17 Muchu pahi, tixeeni wi munamuthokororya
Nave munampwacha* yoowo?
18 Ntakhara heeni munamvareryelaanyu wooxiixelo ori woothene
Ni omweeha elukuluku yoothene?
19 Apwanne hamuhiya okivarerya
Naari okivaha elukuluku mano wi kimirye mara aka?
20 Waakhanle wi koocheka, apwanne eyo yohoovolowelaani, nyuwo Mulipa Awaavarerya achu?
Ntakhara heeni mukipankaanyu ntoko yooluluwanya anyu?
Apwanne ka murici woolimela wa nyuwo?
21 Ntakhara heeni muhinakhurumuwelaanyu yoocheka aka
Ni oviihavo yoohesa aka?
Tiwi, voohilekela kinahaala okookela onchupini,
Nyuwo munamukaavya, nto nkikhalavo.”