Salmu
Salmu a Asafi.
50 Muluku a amiluku, Yehova,* onnaloca;
Owo onniichana elapo
Ovinyerya weiwo nnakhumawo nsuwa ophiyerya weiwo nnaneelaayawo.
2 Muluku onnarumiha waarya orweela o Siyoni, epooma yeeyo oreera waya ori woophaameya.
3 Muluku ahu onamphiya nave hawerya otitelela okhala oomala.
Vamiithoni vawe wookhalavo mooro wootoloxa,
Nave voorukurerya vawe echeku yawuupa.
4 Owo onniichana irimu ni elapo yavathi,
Woona wi onamwaathoriha achu awe:
5 “Mukithukumanyerye yaawo ari oororomeleya wa miyo,
Yaawo anapaka nlakano ni miyo moorweela wa mukucho.”
6 Irimu sinnalaleya wookololowa wawe,
Woona wi Muluku mwaneene tori Muthoriha. (Selaha)
7 “Wiriyanani, nyuwo achu aka, nave miyo kinamuloca;
Isarayeli, kinamuweerela onamoona.
Miyaano ka Muluku, Muluku aa.
8 Nkinoosamela wa nthowa na mikucho saa,
Naari mano wa nthowa na soovaha saa soopahiwa seiho iri va miithoni vaka ilukuluku soothene.
9 Nkinachuna okuxa emope ya vaate vaa,
Naari mano ipuri* sa mmakhola mwaa.
10 Ntakhara axinama oothene a mutakhwani tawaka,
Ophiyerya tho axinama a Mmiyaako ncikhwi.
11 Kinnasuwela ipalame soothene sa mmiyaakoni;
Axinama oohaalakhanyeya a mutakhwani tawaka.
12 Waakhanle wi koovoliwa etala, nkahaala wooleela,
Woona wi echaya yawuucelana ni soothene iri mwemmo ti sawaka.
13 Apwanne kinahaala olya emece ya imope seelopwana,
Naari owurya nikhami na ipuri?
14 Mvahe mathamalelo ntoko mukucho wa Muluku,
Nave mwaakhwaniherye malakano mpankaanyu wa Awiirimurimu;
15 Okiichane mu nihiku na sawuukhula.
Miyo kinanwoopola, nave weyo onamukicicimiha.”
16 Nto wa muchu oonanara murima, Muluku onarwa aloca:
“Ophwanelela taani oryaaweno wa oloca malamulo aka
Naari wa oloca nlakano naka?
18 Vaavaa onamoonaawe mpava, onnamweemererya;*
Nave oneeca ni alipa ooraruwa.
19 Onnapharihela eyano wi omwaramwaxe yeeyo eri yoonanara,
Nave owoka woopatela va nlumi naa.
20 Onnakiraathi wi omuloce moonanara munnaa;
Onnuupulula soohesa sa* mwaana a amamaa.
21 Vaavaa weenraweno ichu seiha, kaahititelela omaala;
Mwawiihiiha, wuupuwela wi kahaala okhala ntoko weyo.
Nto vano kinamoosamela
Nave kinamuloca mulacu aka ni weyo.
22 Muhineera, muthokororye ela, nyuwo munamucuwala Muluku,
Mwaaheerano kinamoomwasanyaani,* nave haavo oni awoopoleeni.
23 Yoole onavaha mathamalelo ntoko mukucho onnakicicimiha;
Nave yoole onachara ephiro elakeleliwe,
Miyo kinammweeriha woona nivuluxo noorweela wa Muluku.”