Salmu
Wa muhooleli a macipo; wi ncharihiweke ni ikaruma sa mikoyi sawaafinaariwa mmukhalelo wa Seminiti.* Salmu a Tavite.
6 Khwoo Yehova, muhikisamele mu esara anyu,
Nave muhikilake mu owali anyu.
2 Mukooniherye mahala,* khwoo Yehova, woona wi kinnayeleela ikuru.
Mukipenuxe, khwoo Yehova, woona wi makhuva aka annathukumela.
3 Aa, okumi aka wootepa wuukhuwaxa;
Nave kinnookohaani nyuwo, khwoo Yehova: Ophiyerya liini eneeraaya ekhale hiiha?
4 Mukooke, khwoo Yehova, nave mukoopole;*
Mukivuluxe wanthowa na osivela wanyu woororomeleya.
5 Tiwi, mookhwani haavo onawuupuwelaani nyuwo;
Mmahiye,* taani oni oocicimiheeni?
6 Kiri oovelavela wanthowa na wuupulelaxa;
Ohiyu woothene kinnanaaniha ekaama aka ni miithori;*
Kinakonaakavo kinnasareihavo ni miithori.
7 Miitho aka ari ooceecheya wanthowa na othanana waka;
Hanoona phaama* wanthowa na oothene yaale anakihooxa.
8 Mukivinyeryevo oothene nyuwo muneera sootakhala,
Woona wi Yehova onamwiiwa winla waka.
9 Yehova onarwa iiwa oveka waka mahala;
Yehova onamweemererya nivekelo naka.
10 Amwiicani aka oothene anamuulihiwa muru nave anamuceecheya;
Mwawaakuveya, anamukookela muculi, yuulihen’ye muru.