Salmu
Wa muhooleli a macipo; ni ncipo nniichaniwa “Ithutu sa Wuupuwelela.” Mikitawu.* Salmu a Tavite. Wi aphariheliweke mu ohusiha. Vaavaa owo aawanneiye ni Aramu-naharimu ni Aramu-Sopa nave Yowapi akooka awiipha Aetomu awaakhwana macikhwi khumi napiili o Mpopa wa Maakha.
60 Khwoo Muluku, nyuwo moonikhooca; moopasa sawiisaakihano sahu.
Mwaari oonyeenyeya ni hiyaano; nto vano, muneemererye wookookelaani!
2 Munneeriha elapo othukumela; moothala yeeyo.
Murehererye mithari saya, woona wi eyo ennamwaryeya.
3 Mooweeriha achu anyu ohooxeya ni masooso.
Mooneeriha owurya eviinyu yoowaawa.
4 Mwaavahe* eneneeryo yaale anawoovaani,
Wi echawe ni orapela mavaka. (Selaha)
5 Wi oosiveliwa anyu yoopoliwe,
Munivuluxe ni ntata nanyu noolopwana nave munaakhule.
6 Muluku aaloca mu weela wawe:*
“Kinamuhakalala, kinammukawa Sikemi ntoko yoohiyeryiwa,
Nave kinamphima mpopa* wo Sukoti.
7 Kiliyati taaka, hiiha ntoko Manase,
Nave Efarayimu kapaseti* ntakhara muru aka;
Yuta ekopo aka ya olamulelo.
8 Mowape epasiya kinarapihaakamo inaani saka.
O Etomu kinarwa kaarihelawo asantaalya aka.
Kinarwa kikhuwela moohakalala nthowa na omvootha Filistiya.”
9 Taani onahaala okihoola mu epooma yooriciwa?*
Taani onahaala okihoolela ophiyerya o Etomu?
10 Tahi nyuwaano, khwoo Muluku, nyeenyu munnyanyanle,
Muluku ahu, nyeenyu muhinaahoola tho anakhoco ahu?
11 Munikhaviherye mu wuukhuwa wahu,
Woona wi nivuluxo noorweela wa achu hinnaphuriha echu.
12 Moorweela wa Muluku nnamukhalano ikuru,
Nave owo onamwaanyikalela vathi amwiicani ahu.