Salmu

76 Muluku oosuweliwa o Yuta;

O Isarayeli nsina nawe ntokweene.

 2 Nipuro nawe nawiichuuwavo nri o Salemu,

Nave muxakala awe ori o Siyoni.

 3 Weiwo owo aanyaanya mavaka oovarela a munra,

Eyaakiho, nlema ni ikaruma sakhoco. (Selaha)

 4 Munnaarya mwa ncicimiho;*

Nyuwo mwa mutokweenexa opwaha miyaako isaren’yemo axinama.

Awo yaaweryiwa ni ikhove;

Anakhoco oothene hiyaarino oowaakiha.

 6 Variyari va osamela wanyu, khwoo Muluku a Yakopo,

Alipa aweeciha ikaaro ni alipa ooweeciha akavalo ikhove sawiiseela saahaarweela.

 7 Pahiru nyuwo muri awoopiha

Taani onawerya weemela vamiithoni vanyu munyeenyen’ye?

 8 Orweela wirimu mwaalaleya othoriha;

Elapo yavathi yaahoova nave emaala cuu

 9 Vaavaa Muluku aavinyeiye wi athorihe,

Wi aavuluxe awiichacala oothene a veelaponi. (Selaha)

10 Tiwi onanariwa wa achu onamukumiherya ncicimiho wa nyuwo;

Masu ookuchula a onanariwa waya enamukhala ya wiireerihano wa nyuwo.

11 Mpake malakano anyu wa Yehova, Muluku anyu, nave mwaakhwaniherye yaawo;

Oothene yaale emurukurenrye eruuhe samahala saya ni woova.

12 Owo onnayeviha wiirumiha* wa ahooleli;

Owo ta woopiha wa mamwene a veelaponi yavathi.