Salmu
Wa muhooleli a macipo, ni ncipo na “Ithutu.” Wuupuwelela. Salmu a Asafi.
80 Muwiriyane, nyuwo Mukukhula a Isarayeli,
Nyuwo munamuhoolela Yosefe ntoko muhuwo.
2 Vamiithoni va Efarayimu, Penxami ni Manase,
Mviihe owerya wanyu;
Murwe munivuluxe.
3 Khwoo Muluku, muntikitherye wanaawiili;
Ethoi anyu enaaryele wi nivuluxiwe.
4 Khwoo Yehova, Muluku a anakhoco, ophiyerya liini muneeraanyu mutitelele owiica* achu anyu ni okhooca owiriyana mavekelo aya?
5 Nyuwo munnaalyiha awo miithori ntoko epau,
Nave munnaweeriha owurya miithori awaaca.
6 Nyuwo munnaweemererya amwaacamani ahu waakhulana wa nthowa nahu;
Amwiicani ahu annatitelela oniroha ochuna waya.
7 Khwoo Muluku a anakhoco, muntikitherye wanaawiili;
Ethoi anyu enaaryele wi nivuluxiwe.
8 Moheeriha mwiri wa uuva okhuma o Yikuputu.
Moohikara maloko nave mwaala yoowo.
9 Mwaarehererya nipuro ntakhara mwiri yoowo,
Nave mitathaari* saya saarapa isareya veelaponi.
10 Miyaako saakhuneeliwa ni muuruxi aya,
Nave miri sa seetru sa Muluku saakorowaceliwa ni mirai saya.
11 Mirai saya saaphiya ophareya,
Nave miphuwela saya o Muhice.*
12 Ntakhara heeni muuwinhaanyu ixiri sa maluku sa emaca ya uuva,
Ophiyerya wi oothene anavira enarukula sawiima saya?
13 Ikupa sa mutakhwani* soonanariha yeeyo,
Nave axinama amutakhwani analya mummo.
14 Khwoo Muluku a anakhoco, muhineera, mukooke.
Nwehe ovinyerya wirimu nave moone!
Mukhapelele mwiri yoola wa uuva,
15 Murai yoowo* mwaanlaanyu ni ntata nanyu noolopwana;
Nave munwehe mwaana yoowo mmulipinhaanyu* ntakhara ncicimiho nanyu.
16 Owo woosukiwa nave wookwatiwa.
Awo annakhwa variyari va osamela wanyu.*
17 Ntata nanyu nimukhaviherye muchu yoowo ori o ntata nanyu noolopwana,
Mwaana a muchu yoowo mmulipinhaanyu ntakhara ncicimiho nanyu.
18 Mwawiihiiha, hinoonyanyalaani.
Munikhapelele wi niweryeke wiichana nsina nanyu.
19 Khwoo Yehova, Muluku a anakhoco, muntikitherye wanaawiili;
Ethoi anyu enaaryele wi nivuluxiwe.