Salmu
Wa muhooleli a macipo; vooloca sa Muti-lapeni.* Salmu a Tavite.
א [Alefi]
9 Khwoo Yehova, kinarwa koocicimihaani ni murima aka woothene;
Kinarwa kiloca miteko sanyu soothene sootikhiniha.
2 Kinarwa kichapa ni ohakalala mwa nyuwo;
Kinarwa kiipa macipo oocicimihano* nsina nanyu, khwoo Awiirimurimu.
ב [Peti]
3 Vaavaa amwiicani aka aneeraaya ekookele oculi,
Awo anamukwaculiwa nave anamukhwa vamiithoni vanyu.
4 Tiwi nyuwo munnakaakiha nave munnaakiha mulacu aka;
Munnakiraathi va munyukhu anyu, muthorihaka mwawookololowa.
ג [Kimeli]
5 Moosamela maloko nave mohaatoloxa achu oonanara murima
Muxipiha masina aya okhala wookhala.
6 Amwiicani aatholowa emala;
Moophola ipooma saya,
Nave wuupuweleliwa waya woothene onamucakanela.
ה [He]
7 Nto Yehova ori va munyukhu awe okhala wookhala;
Owo ootikitherya moolipa munyukhu awe ntakhara ekhaikhai.
8 Owo onarwa athoriha elapo yavathi mwawookololowa;
Onarwa alaleya mathowa awookololowa ntakhara maloko.
ו [Vawu]
9 Yehova onarwa akhala nipuro noochawelavo nookhapeleleya* wa oohooxiwa,
Nipuro noochawelavo nookhapeleleya mu ilukuluku sa sawuukhula.
10 Yaale esuwenle nsina nanyu enarwa yoororomelaani;
Himurwa mwaanyanyala yaale anawaavyaani, khwoo Yehova.
ז [Sayine]
11 Mmwiipele Yehova macipo, yoowo onakhala o Siyoni;
Mwaasuwelihe achu miteko sawe.
12 Tiwi Yoole onanla ikuhu wa nthowa na nikhami na oohooxiwa onanwuupuwela yaawo;
Owo hani acuwale winla waya.
ח [Heti]
13 Mukooniherye mahala, khwoo Yehova; moone ohooxiwa waka, yoowo otannyiwe ni yaawo anakiica,
Nyuwo munakiviiha mmilako mitokweene sa okhwa,
14 Wi kilaleye miteko sanyu soocicimiheya mmilako mitokweene sa mwaana mwaamuthiyana o Siyoni
Nave kihakalale ni miteko sanyu sa ovuluxa.
ט [Teti]
15 Maloko aamorela mu nlici nenlo athimpaaya;
Nnaani naya nooheiwa va mulapa yaaren’yaaya.
16 Yehova oosuweliwa moorweela wa othoriha yoowo onapakeiye.
Aweera soonanara aaheiwa ni muteko wa matata aya
Hikayoni.* (Selaha)
י [Yoti]
17 Oonanara murima enarwa ecimula eyaaka o Mahiye,*
Maloko oothene yaawo anamucuwala Muluku.
18 Nto oohaawa herwa ecuwaliwa mahiku oothene,
Nave ewehereryo ya achu awiichacala herwa emala.
כ [Kafe]
19 Vinyani, khwoo Yehova! Muheemererye wi muchu oovootheeni.
Maloko ethorihiwe vamiithoni vanyu.
20 Mwaasareihe yaawo ni woova, khwoo Yehova;
Maloko esuwele wi awo ari pahiru achu anakhwa. (Selaha)