Yupu

 2 “Kaamusiveliwa kaakookenle miyeeri seihe ivirale,

Mmahiku yaawo Muluku aakithokororyeiye,

 3 Vaavaa eeriheiye wi omwaleela wa epanthi awe waaryeleke vamuru vaka,

Nave kaaneeca mweepiiphi moorweela wa omwaleela wawe,

 4 Vaavaa* kaaryaaka mmiravo ni akuru,

Nave koonaaka onthamwene wa Muluku mmuxakalani mwaka,

 5 Vaavaa Aikuru Soothene nlelo aareiye ni miyo,

Nave anamwane* aka ekirince,

 6 Vaavaa kaarapihaaka inaani saka mu eleiti,*

Nave maluku yaamukumihaaya ooleyo awaaca ntakhara miyo.

 7 Vaavaa kaayaaka va mulako mutokweene wa epooma,

Nave kikiraathi va nipuro naka na othoriha,

 8 Amiravo yaakoona yaanakirapela,*

Nave ophiyerya awuuluvala yaaneemela nave yaanatitelela weemela.

 9 Asitokweene yaanamaala oloca;

Yaanaphuta iyano saya.

10 Achu oovuwa yaanamaalihiwa,

Nave nlumi naya naanapatelela mwaano mwaya.

11 Yoole aakiiwa aanakiloca mwaphaama,

Nave yaale yaakoona yaanakeerela onamoona.

12 Tiwi kaanamoopola oohaawa yoowo aakhuwela avekaka nikhaviheryo,

Nave tho ekwaasuni* ni muchu vyakala yoowo ahaarino oomukhaviherya.

13 Yoole aahala vakhaani okhwa aanakireeliha;

Nave kaanahakalaliha murima wa anaamukhwele.

14 Kaanawara wookololowa ntoko yoowara aka;

Ekhaikhai aka yaari ntoko yoowara yoorakama* ni yoowara ya mmuruni.

15 Mi kaari miitho wa muchu oohoona

Ni meco wa muchu oorakala meco.

16 Mi kaari tiithi wa achu oohaawa;

Nave kaanatholathola milacu sa yaale kahaasuwelaaka.

17 Kaanaamaaliha aweera soonanara yaawo analikana ni axinama a mutakhwani

Nave kaanawaakha mmiinoni mwaya yeeyo aphanraaya.

18 Kaanaloca kiriki: ‘Kinamukhwa vaate vaka,*

Nave mahiku aka anamwaaca ntoko ehaava.

19 Mitathaari saka inamvatha ophiyerya mmaahini,

Nave nikami nikaamwiimela mirai saka ohiyu woothene.

20 Achu anamukicicimihaka ilukuluku soothene,

Nave munra wa mmatani mwaka onamutitelela ovonya.’

21 Achu yaanakiwiriyana phaama,

Ewehereryaka moomaaleleya miruku saka.

22 Kimanle oloca, awo hiyaakhalano echu ekina ya oloca;

Masu aka yaanaavolowa phaama* waawaru.

23 Awo yaanakiweherya hiiha ntoko enaweheryiwaaya epula;

Yaanahula phaama iyano saya ntoko wi anachuna owurya epula yoopacerya yeelimwi.

24 Vaavaa kaatheyaaka wa yaawo, awo hiyaawerya weemererya;

Omwaleela wa ethoi aka waanaamaaliha.*

25 Kaanaavaha ohoolela ntoko muhooleli aya,

Nave kaakhala ntoko mwene variyari va anakhoco awe,

Ntoko yoowo onaahakararya yaale aninla.