Salmu
Wa muhooleli a macipo. Salmu a anamwane a Kora.
49 Mwiiwe ela, achu nyu oothene.
3 Eyano aka enahaala oloca mwa miruku,
Nave wuupuwelela wa murima aka onahaala wooniherya wiiwexexa.
4 Kinahaala owiriyana phaama nsiposipo;
Kinahaala othariha masu aka oosiphela ni chakare.
5 Ntakhara heeni kinahaalaaka okhala awoova mu ilukuluku sa sawuukhula,
Vaavaa kinahaalaaka orukureryiwa ni otakhala wa* yaale aneererya okuuwiha?
6 Yaale anaroromela ooreela waya
Ni aniirumiha ni muhakhu aya muncipale,
7 Haavo mmoharu mano a yaawo oni awerye omvuluxa* mukina
Naari mano omvaha Muluku yawoopola wi amvuluxe yoowo.
8 (Yoolivela ya yawoopola ya* okumi aya ti yoowalamelaxa
Ophiyerya wi muchu hani awerye oliva okhala wookhala);
9 Wi owo akhale okhala wookhala nave ahoone nlici.*
10 Muchu onnoona wi ophiyerya wi achu a miruku annakhwa;
Mulolo ni oolosowa annarimeela vamoha,
Nave annaahiyerya muhakhu aya akina.
11 Mmurimani mwaya, yoochuna aya ori wi ipa saya sikhale okhala wookhala;
Mixakala saya, wa muyareriwo ti muyareriwo.
Awo aavaha nsina naya sookhalano saya.
12 Nto muchu, naamwi ari oocicimiheya, hatitelela okhala;
Owo tahi aphaama waapwaha axinama, yaawo anakhwa.
13 Ela ephiro ya alolo ni ya yaale anaachara,
Yaale anasiveliwano ni masu aya asiiyo. (Selaha)
14 Ntoko ipuchepuche, awo aathoriheliwa o Mahiye*
Okhwa onahaala waakukhulaka yaawo;
Wooxixelo, yaale ari awookololowa murima anamwaalamulelaka yaawo.
Ncicimiho naya noothene nnamucakanela;
Nihiye,* nnahaala okhala nipuro naya nookhalawo, ohiya o empa ya mwene.
16 Ohikhale awoova vaavaa muchu onareeleiye,
Vaavaa ovuwa wa empa awe onaaceereryeyaaya,
17 Woona wi owo akhwa, hawerya okuxa echu;
Ovuwa wawe hokhuruwela mmahiye ni yoowo.
18 Tiwi variyari va okumi awe owo oniithamalela mwaneene*
(Achu anoocicimiha vaavaa oryaawe ooreela.)
19 Nto wookuchulani owo onnakhala vamoha ni muyareriwo wa asimakholo awe.
Awo herwa yoona omwaleela.
20 Muchu yoowo ohiniiwexexa yeela naamwi acicimihiwaka,
Tahi aphaama wapwaha axinama, yaawo anakhwa.