2 Atesalonika

2 Nyenya anna, vooloca sa orwa wa Apwiya ahu Yesu Kristu ni othukumanyiwa wahu vamoha ni yaawo, ninnoovekaani 2 wi muhaakuveleke okhala oocikinyeya mmuupuweloni mwanyu, muhikhale ootuthuwa naari moorweela wa masu ooveereliwa,* naari moorweela wa muchaka woolociwa, naari moorweela wa ekaarata enakhala ntoko wi enarweela wa hiyo, elocaka wi nihiku na Yehova noophiya.

3 Ahikhale oni oohuweliheeni,* ntakhara hiniphiya nihiku nlo ohipacenrye orwa omwaryeya nave ahuupululiwe muchu onachekela nlamulo, mwaana a otoloxiwa. 4 Owo mwiicani nave onniikuha vasulu va oothene yaawo aneeriwa amuluku naari eruku enalapeliwa, mwawiihiiha owo onnakiraathi mu empa ya Muluku, iisooneihaka mwaneene ntoko muluku. 5 Mano, hamunuupuwela wi vaavaa kaaryaaka ni nyuwo, kaanawuupuseryaani ichu seiha?

6 Vano nyuwo moosuwela yeeyo enamuhiiha, wi uupululiwe mu elukuluku awe yoophwanelela. 7 Eparipari wi yawiiphiini ya ochekela yoola wa nlamulo onnaphara muteko, nyenya pahiru ophiyerya yoole hiihaano onahiiha ari okhwipi wa mphiro. 8 Voocharela, namachekela a nlamulo onarwa uupululiwa, yoowo Apwiya Yesu aneeraaya emutoloxe ni munepa wa mwaano mwaya ni omunyaanya moorweela wa woonihiwa wa orwa waya. 9 Nyenya orwa wa yoole onachekela nlamulo ori moorweela wa meerelo a Satana, ni owerya woothene wakuru ni ineneeryo vamoha ni sootikhiniha 10 ni owoka woothene woohookololowa wa yaale anarimeela, ntoko yoolivela woona wi hiyeemerenrye osivela ntakhara eparipari wi awo evulusiwe. 11 Ti nthowa nene Muluku eemerenryeiye wi ovolowela woowoka oweerihe awo weemererya sawootha, 12 yeerihaka wi oothene awo ethorihiwe nthowa na oheemererya eparipari nto enasiveliwano soohookololowa.

13 Nyenya, ninnaphwanela omuthamalela Muluku mahiku oothene wa nthowa na nyuwo, anna oosiveliwa ni Yehova, woona wi ovinyerya woopaceryani Muluku ohoothanlaani wi mvulusiwe moorweela wa oweelihaani ni munepa awe nave moorweela wa nroromelo nanyu mu eparipari. 14 Owo oowiichanelaani yeela moorweela wa michaka saphaama nnalaleyaahu, wi nyuwo mphwanye ncicimiho na Apwiya ahu Yesu Kristu. 15 Mwawiihiiha anna, mukhale awiithipela nave mwaakeelele ikano seiho muhusihiwaanyu, moohipwacha waari ni muchaka woolociwa naari moorweela wa ekaarata yoorweela wa hiyo. 16 Opwaha yeeyo, Apwiya ahu Yesu Kristu mwaneene vamoha ni Muluku Atiithi ahu, yaawo anisivenle, enivaha nihakararyo noohimala ni ewehereryo yaphaama moorweela wa mahala matokweene, 17 ehakararye mirima sanyu ni yootikitheryeeni* mmiteko soothene saphaama ni mmasu.