Ester

2 Imanle weereya ichu seiya, vaavaa esara ya Mwene Asuweru yaakhurumun’waaya, owo aahuupuwela sa yeeyo Vasti eenreiye ni yeeyo owo aalakelenleiye ntakhara yoowo. 2 Voocharela, akhaviheryi a mwene yaaloca eriki: “Yaavyiwe asimwali ooreera ntakhara mwene. 3 Nave mwene, mwaathanle achu yaawo anahaala waathanlaka asimwali yaala mu iprovinsiya soothene sa omwene anyu, wi yaaruuhe asimwali oothene ooreera o epooma yoolipihiwa yo Susani,* o empa ya athiyana. Awo anahaala othokororyiwaka ni Hekai, ewunuku* a mwene ni mulipa awaathokororya athiyana, nave anamureerihiwaka. 4 Nave mwali yoowo amwene eneeraaya emusivele oni akhale mwaaraya mu nipuro na Vasti.” Moonelo yoola waamuhakalaliha mwene nave ti yeeyo owo eenreiye.

5 O epooma yoolipihiwa yo Susani,* aakhalawo Muyuta mmoha awiichaniwa Mortekayi, mwaana a Xairi, mwaana a Simei, mwaana a Kixi, a nloko na Peyamini. 6 Owo aakuxiwe o Yerusalemu vamoha ni achu yaaphariwe eri vamoha ni Yekoniya,* Mwene o Yuta, yoowo aakerihiwe wookapuroni o Papulo ni Mwene Napukotonosori. 7 Mortekayi taamphunwe Hatasa, ela tiwi, Ester, mwaana a atiyu awe, woona wi owo haarino apapa awe naari amama awe. Owo aari mwali ooreera ni oophwaneliwa, nave Mortekayi aamukuxa anamphuwa ntoko mwanawe apapa awe ni amama awe emanle okhwa. 8 Vaavaa nlamulo ni masu a mwene yaalokohiwaaya, nave vaavaa asimwali ancipale yaaruuhiwaaya o epooma yoolipihiwa* yo Susani* nave enakhapeleliwa ni Hekai, Ester tho aakuxiwa akerihiwa o empa ya mwene anakhapeleliwa ni Hekai, mulipa a waakhapelela athiyana.

9 Hekai aasiveliwano mwali ola nave aaphwanya mahala* vamiithoni vawe, mwawiihiiha owo aapaka marehereryo mwawaakuveya wi areerihiweke ni waakhela yoolya yavameekhaaya; nave aamwaavyerya asimwali athanu napiili yaawo yaalapa vaate va mwene wi emukhaviheryeke. Hekai tho aamuthaamiha owo ni asimwali yaale yaamukhaviherya, amukeriha o nipuro naphaamaxa na empa ya athiyana. 10 Ester haalonceru echu vooloca sa nloko nawe naari amusi awe, woona wi Mortekayi aamuleela owo wi ahimuleeleru muchu sa yeeyo. 11 Mahiku oothene Mortekayi aanavira vaate va empa ya athiyana wi asuwele sa Ester ni yeeyo yeereya ni yoowo.

12 Ehaakumve wiisooneiha wa Mwene Asuweru, asimwali oothene yaanareerihiwa mu miyeeri khumi napiili seiho saatikitheriwe wa athiyana. Nave oreerihiwa awo yaakhelaaya waakhala ha: Miyeeri mithanu nammoha awo yaacikicheliwa makhurwa a miira nave miyeeri mikina mithanu nammoha awo yaacikicheliwa makhurwa a palsamu ni makhurwa makina a wiireerihano. 13 Hiihaa, mwali aanakhala ooreheryeya oya wiisooneiha wa amwene, nave echu vyakala aavekeiye aanavahiwa vaavaa aacimuleiye o empa ya athiyana ayaaka o empa ya mwene. 14 Oxekuwa owo aanaya o empa ya mwene nave wooxiixelo aya, owo aanaya o empa yanaawiili ya asaara a amwene, yaawo yaathokororyiwa ni Sasikaxi, ewunuku* a amwene mulipa awaathokororya asaara akina a amwene. Owo haaphwanela okookela wa amwene, voohikhala wi mwene oosiveliwano nave oomwiichaniha.

15 Vaavaa yaaphin’yaaya ekwaha awe ya wiisooneiha wa amwene, Ester mwaana a Apihayili, atiyu a Mortekayi, yoowo aamukunxe wi akhale mwanawe, haavenkeru echu voohikhala yeele Hekai ewunuku* a mwene ni mulipa awaathokororya athiyana aamulenleiye wi akuxe. (Variyari va elukuluku yeele yoothene, achu oothene yaanamusivela Ester.) 16 Ester aakerihiwe wa Mwene Asuweru, o empa awe yoomwene, mweeri waneekhumi, ela tiwi, mweeri wa Tepeti,* mu eyaakha yaneethanu napiili ya olamulelo awe. 17 Nave mwene aamusivelaxa Ester waapwaha athiyana oothene akina, nave owo aaphwanya mahala ni weemereryiwa vamiithoni va amwene, waapwaha asimwali akina. Mwawiihiiha, owo aanwariha yoowara ya mmuruni ya omwene nave amweera mwaara a mwene* mu nipuro na Vasti. 18 Nave mwene aapaka efesta etokweene, efesta ya Ester, ntakhara asitokweene awe oothene ni anamuteko awe. Nave tho aalaleya otaphuwa mu iprovinsiya, nave aavaha samahala mwawiiwanana ni yeeyo mwene aareiyeno.

19 Vaavaa asimwali yaaruhiwaaya ekwaha yanaawiili, Mortekayi aakiranthi va mulako mutokweene vaate va mwene. 20 Ester haalocaru echu vooloca sa ahima awe naari vooloca sa nloko nawe, hiiha ntoko Mortekayi aamuleenleiye. Ester aatitelela omwiiwelela Mortekayi, hiihaa ntoko eereleiye elukuluku aakhaleiye ni yoowo.

21 Mmahiku yaale, vaavaa Mortekayi aakiraatheiye vamulako mutokweene vaate va mwene, Pikitana ni Teresi, anamuteko eeli a mwene, alipeleli a vamulako, yaanyeenyeya nave evaanela omwiipha* Mwene Asuweru. 22 Nto Mortekayi aasuwela sa yeeyo nave mwawaakuveya aamuleela Ester, mwaara a mwene. Voocharela Ester aamuleela mwene sa yeeyo mu nsina na Mortekayi. 23 Mwawiihiiha, mwaha waatholatholiwa nave weereliwa onamoona, nave alopwana oopiili yaathomeiwa va mwiri; soothene iha saarempwa vamiithoni va mwene mu liivuru a saweereya.