Mano Elapo Yeela Enarukunuwela Woowi?

Makachamiho matokweene ni saweereya sawoopiha vancipale, ti michaka inavuwa elapo yoothene nihiku nnihiku! Mano makachamiho ni saweereya sawoopiha seiya inataphulela eheeni?

OHUUKHUWA WA ACHU: Oruma wa ibomba mmisikani. Mapurusore ni anaxikola annoopeliwa oxikola. Anamwane akhaani anniiyiwa, asitiithi aya evareryaka okhwipi mu elukuluku yavakhaani. Athiyana ni achu awuuluvala annahipheliwa nsuwa noopaka.

SAWEEREYA MU MALAPELO: Ikerexa sinnakhaviherya makhuuru meeli oohiyana anawana ekhoco. Nikhuuru na ahooleli a malapelo annasomeliwa mulacu nthowa na owiipha achu a nloko nikina. Alipa a ephepa annararuwa ni anamwane; achu amukerexa annakhuwa mwaha yoola. Achu anaya okerexa annavukuwa; ikerexa sinnatumihiwa.

SOOPATUXIWA: Matakhwa annamalihiwa nthowa na maroca. Achu oohaawa annuuwiha miri wi epake ikhuuni nari makhala. Maahi a vathi va echaya aananarihiwa, ehinareera owurya. Ihopa sinnatoloxiwa nthowa na manyewa anakhuma mfaabrika ni makhalelo amutano a ototha ihopa. Miwiya inamumuliwa tahi saphaama, nthowa nawii sootepa onanarihiwa.

SOOTHOWA SA MWIILI: O Afrika onaya echeku ya murupi, muchu ori oothene ikhorowa onaakheleiye sootepa oyeva vancipale. Nrima na alipa oohoolela miteko annapwatiha ikompaniya yeerihaka wi achu ancipale ohikhalano muteko. Alipa oolivela ikompaniya annayeleela muhakhu aya nthowa na wiiyeriwa.

ORAMA WA SOOLYA: Achu awaakhwana vakhiviru khiviru 800,000,000 mu elapo yoothene annakona ni etala mahiku oothene.

EKHOCO: Achu opwaha 100,000,000 aakhwa nthowa na ikhoco mu eseekulu 20. Sookhalawo ibomba sa ikuru soopwaha inawerya waatoloxa achu oothene mu ikwaha sincipale. Ikhoco sa achu a nloko nimoharu. Onamahita onnoopopiha elapo yoothene yavathi.

IPAHU NI IRECA IKINA: Opacerya mu eyaakha ya 1918 kamasi Espanyola oowiipha achu 21,000,000. Olelo, SIDA tori “epahu etokweene yawiiphaxa mu mwaha wa achu.’’ Kanser ni ireca sa murima sinnaahooxa achu mu elapo yoothene yavathi.

Vareryani opwaha michaka seiya iromoliwe. Mano ichu seiya ineereya va nipuro nimoharu pahi? Nari, michaka inapaka makupa a saweereya sa elapo yoothene erino yootaphulela yeeparipari?

[Ekaaxa/Eruku va epaaxina 5]

Muluku Onnaathokororya Achu Chiryene?

Ohihakararya nthowa na saweereya sawoopiha soothananiha vancipale, okhweliwa ni orimeeliwa muhakhu, achu ancipale anniikoha ntakhara heeni Muluku hanavolowela wi amalihe ichu ntoko seiya.

Muluku chiryene onnathokororya. Hihano Muluku onnavaha ikano soororomeleya ni wiichuuwa waphaama. (Mateyu 11:28-30; 2 Timoteo 3:16, 17) Muluku ootikitherya mathipelo wi amalihe owali, ireca ni okhwa, okhala wookhala. Mareheryelo a Muluku annooniherya wi Owo onnaathokororya achu a maloko oothene, a mahimo oothene ni a ilocelo soothene.—Saweriwa Tarummwa 10:34, 35.

Mano hiyaano ninnamuthokorya Muluku? Nyuwano moomusuwela taani opatunxe erimu ni elapo yavathi? Mano nsina nawe taani? Mano tiivi eri yookhwela awe? Muluku onnaakhula makoho yaala mPiipiliyani. Mummo Owo onnanleela yeeyo oneereiye wi amalihe owali, ireca ni okhwa. Wi niphwanye mareeliho yaala, tiheeni enachuneya wa hiyaano? Onachuneya wi nihuserye vooloca sa Muluku ni yookhwela awe. Mano nni naakhele mwawiihayi mareeliho awe, nihikhanleno nroromelo mwa Yoowo? (Yohane 3:16; aHebri 11:6) Ori woochuneya tho wiiwelela malamulo awe. (1 Yohane 5:3) Mano nyuwo munnachuna omuroromela Muluku ni wiiwelela malamulo awe chiryene?

Wi nsuwele ntakhara heeni Muluku oneemereryeiye ichu ineereya mmahiku ahu ala, onachuneya wiiwexexa mwaha mutokotoko. Piipiliya onnathoriha mwaha mutokotoko yoola. Va epaaxina 15 ya ebrochura ela nyuwo munahaala osuwela wi mwaha mutokotoko ola tiheeni.