Mano Ichu Soothene Iha Inataphulela Eheeni?

YESU KIRISTU oriye: “Makutchuwelo a mahiku a vathi vano” yahaala wooniheryiwa ni ikhoco, etala, ipahu ni ochikinyeya wa elapo.—Mateyu 24:1-8; Luka 21:10, 11.

Ovinyerya eyaakha ya 1914 okumi wa achu onnatoloxiwa nthowa na ikhoco sa nloko ni nloko ni makhuuru a achu oohiyana, ikwaha sincipale nthowa na ahooleli a malapelo ovolowela epoliitika nave tho olelo moorweela wa wuulana wa soohiphela sa onamahita.

Naamwi makhalelo a osuwela olima eyaaka vahoolo, achu ancipale annahaawa nthowa na orama wa soolya mu elapo yoothene. Iyaakha soothene, mamilyawu mancipale a achu annakhwa nthowa na orama wa soolya.

Ipahu sinnapaka tho makupa a eneneeryo elociwe ti Yesu. Vaculi va Ekhoco Yoopacerya ya Elapo Yoothene yavathi, epahu ya kamasi Espanyola yoowiipha achu opwaha 21,000,000. Ohiyana ni ipahu saahooxa achu a makupa oothanleya khalai, epahu ela ehaahooxa achu a maloko oothene a elapo yavathi, vamoha ni ivilivili sa ocaicai. SIDA onnawiipha achu ancipale mu elapo yoothene, nave ireca ntoko okothomola otokotoko, malaariya, makokho ni koolera sinnapwahererya mu ilapo inampaceryaru oreela.

Onnalociwa wi iyaakha soothene onnakhalawo masana masaneene a ochikinyeya wa elapo yavathi wa ikuru sohiyana hiyana. Soohooxa ineereya nthowa na ochikinyeya wa elapo wakuru mmapuro matokweene onakhalamo achu, ti michaka sa nihiku nnihiku.

Piipiliya tho ooloca: “Nyenya róra ela, wi m’mahiku ókutchula sinarwa-siphiya ilukuluku sohósha. Ntakhara atchu enarwa-ekhala awisivela mkhataya, ósivela icharama, awithamala, awirumiha, ópwalu, óhiwiwelela yawo yáyanre, óhithamala, óhéla murima, óhikhalano osivela wophachuwano, óhátányiheya, ósasa, óhiwerya wíhíha, óshimwa, óhásivela aphama, amakhuche, ókakamela, awúra, awirumiha murima, ósivela hiho sinatheiha mutchu, óhikhala ómusivela Muluku; óhikhalano woneya wa mathamalelo, nyenya ikuru saya tiyákhonchaya; wa yawotho withanle.” –2 Timoteo 3:1-5.

Mano nyuwano hamuneemererya wi nri mu “ilukuluku sohósha’’?

Mano nyuwo munnoona wi achu ancipale tawisivela mkhataya, osivela icharama ni awiirumiha murima?

Mano taani onahaala okhooca wi elapo yavathi yoosareya ni achu oovaanya, nyenya oohithamala, oohaataanyiheya ni ooheela murima?

Mano nyuwo moosuwela wi ohiwiiwelela asitiithi ni ohisivela onnavira oriki mutepa, tahi mapuro oothanleya pahiru nyenya mu elapo yoothene yavathi?

Moohikhala minikwa, nyuwo munnasuwela wi hiyaano nnakhala mu elapo yoosareya ni achu oosivela ichu sinatheiha nyenya oohisivela ichu saphaama. Ala makhalelo Piipiliya onathoriheiye yahaala wooneya “m’mahiku ókutchula.”

Mano ninnachuna onamoona okina onathoonyerya elukuluku yeela nnakhalaahu? Yesu aahiloca tho wi mu mahiku ookuchula, michaka ya Omwene wa Muluku yahaala olaleeryiwa veelaponi yoothene ya vathi vano. (Mateyu 24:14) Mano yeeyo enneereya?

A Sentinela, erevista erino mathipelo a mPiipiliyani enapakiwa ntakhara olaleerya michaka yaphaama ya Omwene wa Yehova, ennapakiwa mu ilocelo sincipale opwaha erevista ekineene.

Iyaakha soothene, Anamoona a Yehova annamaliha iwora soopwaha ebilyawu emoha mu ovaha onamoona wa achu akina vooloca sa Omwene wa Muluku.

Anamoona a Yehova mu elukuluku ahu yeela, annapaka aliivuru anamutaphulela Piipiliya mu ilocelo sawaakhwana 400, ophitaanyerya tho ilocelo inalociwa ni achu a makhuuru makhaani ocaicai. Anamoona a Yehova ahaaphiyerya achu a maloko oothene ni michaka yaphaama; yaawo annalaleerya tho mu ivilivili sincipale ni miceche mikhaani ihinathokororyiwa mu elapo ya epoliitika. Mu ilapo sincipale, awo annalipiherya muteko aya wa waahusiha achu Piipiliya moohihiyererya.

Moohikhala minikwa, michaka yaphaama ya Omwene wa Muluku ennalaleeryiwa veelaponi yoothene yavathi vano, tahi wi yarukunuxe achu oothene, nyenya wi evahe onamoona. Achu a makupa oothene annavahiwa ekari yawi yooniherye wakhala wi anamuthokororya omusuwela taani opatunxe erimu ni elapo yavathi, nave tho wakhala wi anamucicimiha malamulo awe ni wooniherya osivela wa mukina ni mukhwaawe.—Luka 10:25-27; Yawupulula 4:11.

Moohilekela, Omwene wa Muluku onahaala waamaliha achu oonanara oothene veelaponi yavathi nave tho onahaala opaka elapo yavathi okhala paradaiso.—Luka 23:43.

[Ekaaxa va epaaxina 6]

Mahiku Ookuchula Eheeni?

Tahi mahiku ookuchula a achu. Nthowa nawii Piipiliya onnavaha ewehereryo ya okhalano okumi woohimala wa achu oothene yaawo aneerano yookhwela ya Muluku.—Yohane 3:16, 36; 1 Yohane 2:17.

Tahi mahiku ookuchula a elapo yavathi. Masu a Muluku annalakana wi elapo yavathi vano, yeela achu anakhalaayamo, enahaala wiikhalelaru okhala wookhala.—Saalimu 37:29; 104:5; Yesaya 45:18.

Mweeparipari, ala mahiku ookuchula a makhalelo yaala oowali ni oohisivela, nave tho ti mahiku ookuchula a achu yaale anapwahererya waakeelela weera ichu soonanara sa mukhalelo yoola wamutano.—Proverpio 2:21, 22.

[Ekaaxa/Eruku va epaaxina 7]

Piipiliya ti Masu a Muluku Chiryene?

Ikwaha sincipale, alipa a miririmo a Piipiliya yaarepa: ‘Ela ti yeeyo Yehova olonceiye.’ (Yesaya 43:14; Yeremiya 2:2, Tradução do Novo Mundo) Yesu Kiristu, mwaana a Muluku, oocicimiherya tho wi ‘huuluma wa yoowo mekhaiye.’ (Yohane 14:10) Piipiliya mkhatiye onnaloca moovuwa: “Sorempwa sothene sávereliwe ti Muluku.”—2 Timoteo 3:16.

Moovarihana ni marehereryo a United Bible Societies haavo liivuru mukina opakiwe mu ilocelo sincipale— soopwaha 2,200, ompwaha Piipiliya. Haavo liivuru mukina onakaiwa vancipale—hihano opwaha mabilyawu maxexe a aliivuru. Mano tahi yeela michaka yoorweela wa Muluku mwaaphwanelaanyu owehererya wi evahiwe achu oothene?

Wi muhuserye sawooniherya sincipale sinathoonyerya wi Piipiliya oveereliwe ti Muluku chiryene, mumvarerye liivuru onii: A Bíblia—Palavra de Deus ou de Homem?, olaleeryiwe ti Anamoona a Yehova.

Nyuwano mwamwaalakhanya Piipiliya mucicimiheryaka wi ala chiryene Masu a Muluku, munahaala waakhela mareeliho mancipale.

[Ekaaxa/Iruku va epaaxina 8]

Omwene wa Muluku Tiheeni?

Omwene wa Muluku epooma ya wirimu etikitheryiwe ti Muluku eeparipari, Yehova, Mpatuxa a erimu ni elapo yavathi.—Yeremiya 10:10, 12.

Piipiliya onnamuthoonya Yesu Kiristu ntoko yoowo ovahiwe ti Muluku ikuru sa olamulela. (Yawupulula 11:15) Vaavaa Yesu aareiye veelaponi yavathi, aahooniherya wi aahikhalano chiryene ikuru sootikiniha seiyo aavahiweiye ti Muluku—ikuru sa omaaliha echeku, waalyiha achu oovoliwa etala, openuxa ireca sa miloko soothene, nave tho ikuru sa waaveiha achu ookhwa. (Mateyu 9:2-8; Marko 4:37-41; Yohane 11:11-44) Yoorempwa yoovereliwa ya Piipiliya yaaloca tho wi Muluku ahaala onnvaha Yesu ‘olamulelo, ni ncicimiho, ni omwene, wi achu oothene, maloko oothene a mulaponi ni ilocelo emurumeele’ owo. (Danieli 7:13, 14, NM) Epooma eyo eniichaniwa Omwene wa wirimu, Yesu Kiristu vano, onnalamulela ovinyerya wirimu.

[Iruku va epaaxina 7]

Olaleeryiwa wa michaka yaphama mu elapo yoothene