Mano Okumi Anyu Onachara Ephiro Taani?
• Achu ancipale ari awuukhuwaxa mu saweera sa nihiku nnihiku, mwawihiihaa hanathokororya ephiro yeeyo okumi aya onacharaaya.
• Piipiliya onnanleela saweereya sootikiniha sa muhoolo. Nyenya, onnanlopola tho vooloca sa orukunuwa otokotoko onii weereye veelaponi yoothene yavathi mu mareheryelo a achu. Naariki niphwanye mareeliho wa yeeyo Piipiliya onanleeleiye hiyaano, nave tho wi nrapele epahu eyo, onnachuneya weera echu moohilekela.
• Aakhalavo achu akina anasuwela tiheeni yeeyo Piipiliya onaloceiye nave aneererya opharihela muteko, nyenya anneemererya wi ichu sawiipiha murima sa okumi saakerihe ephiro yoonanara.
• Hanka nyuwo munnahakalala ni ephiro yeeyo okumi anyu onacharaaya? Mano mwaachunaka opaka echu, munnupuwela wi ti mwawiihayi yeeyo enahaalaya ovolowela okumi anyu muhoolo?
[Ekaaxa/Iruku va epaaxina 9]
Mano Tiheeni Eri Echu Yoochuneyaxa wa Nyuwo?
Mano munaya othanla mwawiihayi ichu seiya inacharela? Repani ineneeryo opacerya 1 ophiyerya 10 moovarihana ni yeeyo eri yoopacerya okhala yoochuneya wa nyuwo.
Sincipale sa seiya sookhalano nipuro noophwanelela mu okumi, nyenyanto vaavaa munayaanyu othanla, tiivi enii ekhale va nipuro noopacerya? Nipuro na naawiili? Ni mapuro makina enii echarele.
․․․ Othata nari ochekula
․․․ Muteko aka
․․․ Okumi aka
․․․ Ohakalala waka
․․․ Aiyaka nari amwaaraka
․․․ Asitiithi aka
․․․ Anamwane aka
․․․ Empa yaphaama, soowara sooreera
․․․ Okhala oopwaha mu soothene kineeraaka
․․․ Omulapela Muluku
[Eruku va ipaaxina 10, 11]
Soothanla Sanyu Sinookerihaani Weiwo Nyuwo Munachunaanyu Oyawo Chiryene?
THOKORORYANI MAKOHO ALA
OTHATA NARI OCHEKULA: Mano mathatelo kithanlilaaka annakiichuwiha miyo? Annavolowela murima aka ophiyerya ohooxa nari orakaliha okumi aka woothene? Mano ti “mathatelo’’ anachuna ikuru, akhweya ilukuluku sincipale, ophiyerya okitannya wiicela muru? Naamwi mathatelo aka ekhanle aphaama, kinnamaliha ilukuluku sincipale ni othata ophiyerya ohithokororya ichu iri soochuneyaxa?
MUTEKO AKA: Mano kinaphara muteko wi kiphwanye soolya ni soowara, nari muteko aka onakipaka okapuro? Muteko aka onnakikuxerya elukuluku yoothene ophiyerya opahula okumi aka? Miyo kinnathanla olapa iwora sawaacereryeya omutekoni ohiya opharihela muteko elukuluku yeeyo kiri ni amwaaraka, aiyaka nari anamwane aka? Wakhala wi patarau aka onakiruma wi kiphare muteko onaakanyerya olela-wa-murima aka nari wi onnakiyeleeliha ichu soomunepani ikwaha sincipale, kinnaphara muteko yoowo wi kihiyeleele muteko?
OKUMI AKA: Mano miyo kinnathokororya okumi aka, nari kinnavyavya okhapelela okumi ola elukuluku yoothene? Mano ilukuluku soothene kinaloca sa okumi aka pahiru? Okhapelela waka okumi onnooniherya waathokororya achu a echoko aka?
OHAKALALA WAKA: Mano ohakalala waka onakhala va nipuro noopacerya? Kinahela vahoolo opwaha ohakalala wa amwaaraka, aiyaka nari echoko aka? Mano ichu kineeraaka ntakhara ohakalala wa okumi aka sinnooniherya wi ka murummwa a Muluku eeparipari?
AIYAKA NARI AMWAARAKA: Mano kinawoona aiyaka nari amwaaraka ntoko nthamwene aka vaavaa aneeraaya ichu inakisivela miyo pahiru? Kinnaveleela ncicimiho noomuchu wa aiyaka nari amwaaraka ntoko muchu onaphwanela ocicimihiwa? Mano omuroromela waka Muluku onnahoolela moonelo aka vooloca sa aiyaka nari amwaaraka?
ASITIITHI AKA: Mano ntoko mwaana, kinnawiiwelela asitiithi aka, kinnawaakhula mwa ncicimiho, kinnaphara muteko anakirumaaya, kinnaphiya vaate mu elukuluku anachunaaya, kinnasepa onthamwene ni saweera seiyo asitiithi aka aniicaaya? Wakhala wi kamutokweene, kinnaawiriyana asitiithi aka ni ncicimiho, kinnaavaha yaawo nikhaviheryo noophwanelela mu elukuluku yookhweleya? Mano mukhalelo kinaathokororyaaka onalamuleliwa ni ochuna waka, nari ni ikano sa Masu a Muluku?
ANAMWANE AKA: Mano kinnoona okhala murici aka waahusiha anamwane aka makhalelo aphaama, nari kinawehererya wi anaya ohusihiwa oxikola? Kinnamaliha iwora sincipale kichekulaka vamoha ni anamwane aka, nari kinnahiya wi ekhale ooweiwa ni ichu soothatano, televisau nari computador? Kinnaalaka anamwane aka ikwaha soothene vaavaa awo ahinaakhwanihaaya soolopola sa Muluku, nari kinaalaka pahiru awo yeera echu enakiximwiha?
EMPA YAPHAAMA, SOOWARA SOOREERA: Mano tiheeni enalamula wuukhuwa waka vooloca sa owarela waka vamoha ni muhakhu aka, kinachuna wooniherya wa amwaachamane aka? Kinaavyavya okhala phaama wa achu a echoko aka? Mano ti nthowa nawii kinamulapela Muluku?
OKHALA OOPWAHA MU SOOTHENE KINEERAAKA: Mano kinnoona wi opaka ichu phaameenexa ti yoochuneya? Kinnawaniha wi kikhale oopwaha mu ikwaha soothene? Mano kinnakhala oonanariwa wakhala wi muchu mukina oopaka ichu phaameenexa okipwaha miyo?
OMULAPELA MULUKU: Mano okhala aweemereryiwa ti Muluku ori woochuneyaxa wa miyo opwaha okhala aweemereryiwa ni aiyaka nari amwaaraka, anamwane aka, asitiithi aka nari apatarau aka? Moochunachuna okhalano mukhalelo wa okumi waphaama, kinneemererya okuha muteko wa Muluku va nipuro na naawiili?
Mano nipuro taani Muluku oreiyevo mu okumi anyu?
Eklesiasti 12:13, NM: ‘Mooveni Muluku [eeparipari] nave khapelelani malamulo awe. Ntakhara nla [nlamulo] wa muchu.’
NKAIKOHEENI WII: Mano okumi aka onnooniherya wi kinnathokororya ichu moovarihana ni Eklesiasti 12:13? Wiiwelela malamulo a Muluku onnalamula othokororya waka mirici sa vaate vaka, omutekoni nari oxikola? Mano soochuna sikina nari makachamiho a okumi annalamula wakhala wi kinnahiya elukuluku ntakhara muteko wa Muluku nari hooye?
Mano onthamwene anyu ni Muluku ti wa mukhalelo taani?
Proverpio 3:5, 6, NM: ‘Muroromeleeni Yehova ni murima anyu woothene nave muhiroromele osuwela wanyu. Muupuweleeni mu iphiro sanyu soothene, vanonto Owo mwaneene onamookolola meecelo anyu.’
Mateyu 4:10: “Apwiya Mulukuá onarwa-omukokhorela, Nave Yowo mekhiyeru onarwa-omuruméla.”
NKAIKOHEENI WII: Mano ti mwawihiihaa miyo kinuupuwelaaka vooloca sa Muluku? Miteko aka sa nihiku nnihiku, ni othokororya waka makachamiho, onnooniherya nroromelo ni wiiveleela chiryene?
Omwaalakhanya ni omuhuserya Piipiliya ti woochuneya mwawiihayi wa nyuwo?
Yohane 17:3: “Nyenya okumi wohimala ti ola, wi yasuwele Nyuwo Mulukuru éparipari, ni Yesu Kristu yowo mwámurummanyu.”
NKAIKOHEENI WII: Waalakhanya waka Masu a Muluku ni wuupuwela waka ichu kinaalakhanyaaka sinnooniherya wi miyo kinnaroromela yeeyo chiryene?
Ophiya mmithukumano yeeKiristu eri yoochuneya mwawiihayi wa nyuwo?
aHebri 10:24, 25: “Nave nanyiheryane mukina ni mukhwawe wi nákuvihaneke o masivelelo ni o mitekoni yaphama, nihihiyeke othukumana wahu vamoha, ntoko akina enéraya, nyenya nchenyeryane, nave mopwahasha munonanyu nihiku nrikimwachamela.”
Saalimu 122:1, Sociedade Bíblica em Moçambique: “Kaahakalala yaaloncaaya ni miyo: ‘Hankooni ompa ya Apwiya.’”
NKAIKOHEENI WII: Makhalelo a okumi aka annooniherya wi kinnathamalela nlamulo nla nnaphwanyeya mu Masu a Muluku? Mano mweeri ovinre koochompa mithukumano yeeKiristu nthowa na ophara miteko mikina?
Nyuwano mookhalano mvai wa waaleela achu akina vooloca sa Muluku ni yookhwela awe?
Mateyu 24:14: “Nave mitchaka eyo ya Omwene enarwa-elaleyeryiwa velaponi yothene ya vathi vano, ekhale namona wa atchu a maloko othene; nave vavo enarwa-ephiya makutchuwelo.”
Mateyu 28:19, 20: “Ntakhara awe rowani, husihani atchu a maloko othene, . . . ohusiha yawo ekhapelele itchu sothe sene kólamulenlakani nyuwo.”
Saalimu 96:2, SBM: “Wiipeleeni Apwiya, cicimihani nsina naya. Laleyaani ovuluxa waya nihiku nnihiku.”
NKAIKOHEENI WII: Mano muteko yoola ori vanipuro noophwanelela mu okumi aka chiryene? Okhaviherya waka muteko ola onnathoonyerya nroromelo naka vooloca sa ilukuluku sawoopiha nnakhalaahu?