Elapo Yahihano Yeeyo Muluku Olaihenryeiye

PIIPILIYA, Masu oorempwa a Muluku, onnanivaha yoowehererya vaavaa onaloceiye wii: “Nyenya ntoko mwa nlakano nawe ninnawehererya erimu yahihano ni elapo yahihano mummo munitchála’mo ekhaikhai.”—2 Petro 3:13.

Mano “erimu yahihano” tiheeni? Piipiliya onnalikaniha erimu ni olamulelo. (Saweriwa Tarummwa 7:49) “Erimu yahihano” ti epooma yahihano yeeyo enii elamulele elapo yavathi. Epooma eyo eniichaniwa “yahihano” nthowa nawii enahaala oracheela mareheryelo a epoliitika amutano; nave tho ti yahihano mu mukhalelo wawi enahaala okhwaaniherya yookhwela ya Muluku. Ti Omwene yoowo Yesu onihusinheiye hiyaano wi nivekele. (Mateyu 6:10) Vawoona wi Muluku tori Mpatuxa aya nave tho nthowa nawii owo onakhala wirimu, epooma eyo enniichaniwa “Omwene wa wirimu.”—Mateyu 7:21.

Mano “elapo yahihano” tiheeni? Tahi elapo yavathi yahihano, nthowa nawii Piipiliya onnaloca mwawiiweyaxa wi elapo yavathi enarwa ekhaliwa okhala wookhala. “Elapo yahihano” ti muloko wa hihano wa achu. Enarwa ekhala yahihano nthowa nawii achu oonanara enahaala okwasiwa. (Proverpio 2:21, 22) Achu oothene anahaala okhala ni okumi enarwa emucicimiha ni omwiiwelela Mpatuxa nave enahaala okhalaka moovarihana ni malamulo awe. (Saalimu 22:27) Achu a maloko oothene annavekiwa wi ehuserye malamulo yaawo nave ekuxe okumi aya moovarihana ni malamulo awo. Mano nyuwo munneerano hiihaa?

Mu elapo yahihano ya Muluku, oothene enarwa ecicimiha olamulelo Awe. Mano omusivela wanyu Muluku onnaweerihaani omwiiwelela owo? (1 Yohane 5:3) Mano nyuwo munnooniherya wiiwelela iwo veechokoni vanyu? Omutekoni nari oxikola? Mu meecelo oothene a okumi anyu?

Mu elapo yahihano eyo achu oothene enahaala okhala oopharihana mu omulapela Muluku eeparipari. Mano nyuwo munnamulapela Mpatuxa a erimu ni elapo yavathi? Mano malapelo anyu, annaweerihaani okhala oopharihana chiryene ni asinthamwene a malapelo a ilapo soothene, maloko oothene ni ilocelo soothene?—Saalimu 86:9, 10; Yesaya 2:2-4; Zofoniya 3:9.

[Ekaaxa va epaaxina 17]

Muluku Yoowo Olaihenrye Ichu Seiya

Owo ti Mpatuxa a erimu yawooneya ni elapo yavathi. Ti yoowo Yesu Kiristu aalonceiye wi ti “Mulukuru éparipari.”—Yohane 17:3.

Achu ancipale anacicimiha miluku seiyo anapakaaya mukhataaya. Mamilyawu a achu annalapela soophwaniherya sihirino okumi. Akina anacicimiha mareheryelo a achu, muhakhu, nari soochuna saya mukhataaya. Nari yaale analoca wi annampharihela muteko Piipiliya, tahi oothene anacicimiha nsina na yoole onaromoliwa mPiipiliyani wi ti ‘Muluku mmoharu eeparipari.’—Detronomiu 4:35, NM.

Vooloca sa yoowo mukhateiye, Mpatuxa onii: ‘Miyo ka Yehova. Nla ti nsina naka.’ (Yesaya 42:5, 8, NM) Nsina nla ninnaphwanyeya mPiipiliyani ikwaha sawaakhwana 7,000 mu ilocelo soopacerya sa Piipiliya. Yesu Kiristu aahaahusiha oomuchara awe ovekela wii: “Atithihu a Wirimu, Nsina nanyu nélihiwe.”—Mateyu 6:9.

Mano Muluku eeparipari, muchu a mukhalelo taani? Owo onnaloca mukhateiye wi ta ‘ikharari ni oovaha, oohaakuvela onanariwa nave oosareya ni osivela ni eparipari,’ nave hanahiya omulaka yoole ohiniiwelela mwayini malamulo awe. (Eksodo 34:6, 7) Waathokororya wawe achu ovinyerya khalai onnathoonyerya wi masu awo ti eeparipari.

Vanonto, nsina, ni mwaneene nsina nlo, annaphwanela weelihiwa nari wooniwa ntoko aweela. Ntoko Mpatuxa ni Mwene a Soopatuxiwa Soothene, owo tori oophwanela wiiwelela ni olapela wahu woothene. Mano nyuwo mukhatinyu munnamwiiwelela ni omulapela yoowo?

[Ekaaxa/Eruku va epaaxina 18]

Mano “Erimu Yahihano ni Elapo Yahihano” Inahaala Oruuha Orukunuwa Wawiihayi?

Elapo yavathi enahaala orukunuxiwa okhala Paradaiso Luka 23:43

Muteko woohakalaliha, soolya sincipale Yesaya 25:6; 65:17, 21-23

[Ekaaxa/Iruku va epaaxina 19]

Mano Nyuwano Munahaala Opuha?

Muluku hanootha!—Tito 1:2.

Yehova ooloca wii: ‘Masu Aka . . . hanakookela wa miyo ehirino yookhumelelavo, nyenya anahaala weera chiri yeeyo kinakhwelaaka, nave enahaala okhwaaniherya chiryene mwa yeeyo kaaruminhaaka.’—Yesaya 55:11, NM.

Yehova onnapatuxa “erimu yahihano ni elapo yahihano.” Epooma ya wirimu yoopacerya olamulela. Mathipelo a “elapo yahihano” aatikitheriwa.

Vaculi va othoriha ichu ikina sootikiniha seiyo “erimu yahihano ni elapo yahihano” inahaalaya oruuha wa achu, Muluku, Mwene a Elapo Yoothene, onnaloca mu Yawupulula ariki: “Nkonani, kinerano sothe sene sikhale sahihano.” Nave, owo aaloca tho: “Nkarepa; ntakhara masu ala ari óroromeleya ni éparipari.”—Yawupulula 21:1, 5.

Nikoho noochuneya vancipale ti nla, Mano hiyaano ninneerano orukunuwa woochuneyaxa wi nikhale oophwanelela opaka makupa a “elapo yahihano” yeeyo enahaala olamuleliwa ni “erimu yahihano?