Okumi Mu Elapo Yahihano Ya Murechele

Vava munavareryanyu sawereya m’mwakarata ola, muniisona hai? Mano murimanyu hontchuna murechele, ohakalala ni orela sinoneya vava? Mwivelevelo tihihaa. Nyenya mano, onahala okhala oloha akhweya wanyiherya ororomela wi mikhalelo iho inarwa ikhalavo velaponi ya vathi mu nihiku nikina?

Atchu anchipale anona wi tihihaa. Evelevelo yolelo ti ekhocho, opahula, etala, irecha, wuluvala—wimona oromola savakhani sa hiho. Mwawihihaa, wokhalavo nthowa ntakhara a owehererya. Movarerya sa muholo, Biblia onnalocha sa “erimu yahihano ni elapo ya vathi yahihano yeyo nnawehereryahu ntoko mwa [na Muluku] nlakano nawe, mummo munitchála’mo ekhaikhai”.—2 Petro 3:13, NW; Yesaya 65:17.

“Erimu yahihano” eyo ni ‘elapo yahihano’, mopharihana ni Biblia, tahi erimwenesha yahihano akhweya elapwenesha yahihano nnonahu. Elapo ni erimu sawoneya sapakiwe m’mukhalelo wophameya, nave Biblia onnathonyerya wi sinarwa siikhalelaru okhala wokhala. (Salmo 89:36, 37; 104:5) ‘Elapo yahihano’ enahala okhala opharihana wekhaikhai wa atchu yawo anahala okhala velaponi, nave “erimu yahihano” enahala okhala omwene, akhweya epoma yawirimu yaphama, eni elamuleleke opharihana wene weiwo wa atchu velaponi. Nyenya mano, ori wevelevelo ororomela wi ‘elapo yahihano’, akhweya elapo yahihano yochichimiheya eri yoweryeya?

Yaphama, upuwelelani mwaha wawi mikhalelo sene seiyo sanapaka makupa a yotchuna yopacherya ya Muluku ntakhara a elapo ya vathi. Owo ahikuha etchoko yopacherya yomutchu mParadaiso avelaponi a mu Edeni, nave ahavaha murichi wotikiniha: “Muyarane mwache, ni musareye velaponi, ni oveliha.” (Maphatxuwelo 1:28) Ahee, Muluku atchunne wi ekhale ni anamwane ni wi vokutchula vaya epakihe elapo yothene okhala Paradaiso. Nari ori wawi mu ovira wa elukuluku yahithanla ohimwiwelela Muluku, mwawihiha yoniheryaka ohiphwanelela waya wa okhala ni okumi wohimala, yotchuna yopacherya ya Muluku herukununwe. Nave ennaphwanela wakhwaniheryiwa mwilapo yahihano!—Yesaya 55:11.

Mweparipari, vava nyuwo munanvekelanyu Atithihu, mvekaka wi Omwene wa Muluku orwe, nyuwo munaveka wi epomene yeyonto ya wirimu etaphule elapo ela mu sonanara ni wi elamulele elapo eyo yahihano. (Mateyu 6:9, 10) Nave winnaphwanela ororomela wi Muluku onarwa ákhula nivekelo ninle, tchiri Maswawe annalakana: “Ekhaikhai tiniriaya yaklele elapo ya vathi, yikhalelaru mummo okhala wokhala.”—Salmo 37:29.

Okumi Mu Elapo Yahihano Ya Muluku

Omwene wa Muluku onahala oruha sophuchula velaponi ya vathi sohilikanyihiwa ni sikina opakihaka okhala separipari itchu sothene saphama hiho Muluku vopacherya atchunniiye wi atchwawe epuhekeno velaponi. Omwichani ni nthalu hasirwa sikhalavo, nave o makutchuwelo aya othene velaponi anahala okhala asinthamwene eparipari akina ni akhwaya. Mbibliani, Muluku onnalakana wi ‘onnahíha ekhocho o makutchuwelo elapo ya vathi’. “Nloko hanrwa nikusherya nlema nloko nikhwaya movanyihana, navetho herwa ehuseryaru ekhocho.”—Salmo 46:9; Yesaya 2:4.

Wukutchulani waya elapo yothene enahala okhala ni woneya wa ithutu. Biblia oni: “Etakhwa ni mapuro awuma sinarwa sihakalala, ni mapuro orarala enarwa etchapa ni ophuwa ntoko nchalo. . . . Ahee mahi enarwa ekhuma mutakhwani, ni mihiche m’mapuroni orarala. Nave etchaya yawumihiwa ni oviha enarwa ethatuwa wohiwelelano mahi, elapo yohikhala mahi ntoko anapilupilu a mahi.”—Yesaya 35:1, 6, 7.

Onarwa okhalavo mathowa ari othene okhalela ohakalala mwilapo ya paradaiso. Atchu herwa enavoliwa etala nthowa na othowa yolya. “Elapo ya vathi enarwa-eveléla sawimma saya”, oni hiha Biblia. (Salmo 67:6; 72:16) Othene enarwa epuha ni sawima sa muteko wa yawo asinene, ntoko mummo Mpachushahu onlakaniye: “Enarwa yala miri ya mpesa ni olya sawima saya . . . herwa yala ni olya mutchu mukina.”—Yesaya 65:21, 22.

Mwilapo yahihano ya Muluku, atchu herwaru enakhala owomana mu ipa sitoko-toko sochinyanyeryana sokawanyeya-kawanyeya nari mmikotchani sonyala, vawi tchiri Muluku olakana: “Nave enarwa eteka ipa ni okhalamo . . . Herwa eteka ni okhalamo mukina.” Biblia onnalakanatho: “Herwa ephara muteko mahalene.” (Yesaya 65:21-23) Mwawihiha, atchu enarwa ekhala ni muteko wophuchuliha ni wohakalaliha. Okumi horwa okhala wosokonyerya.

Movira wa elukuluku, Omwene wa Muluku onarwa okokiherya watana wa murechele wiwo warivo mu emacha ya Edeni variari va inama, ni variyari va inama ni sopachushiwa somutchu. Biblia oni: “Nave mwiichi, tchiryene, onarwa okhala mu elukuluku ni mwasana epuche-putche nave havara onarwa akona vamoha ni mwasana apuri, ni mwasana amope, ni mwasana a mwacho a nsese, ni yophuwa yoneneva, sothene vamoha; nave mwamwana tani akhale oholela hiho.”—Yesaya 11:6-9; Oseya 2:18.

Nkanyiheryani, mwilapo yaparadaiso irecha sothene ni sawichela sothene sammwilini sinarwa sipenushiwa! Masu a Muluku annachichimiherya: “Havovo okhala mwilapo eyo ani aloche: ‘Kinamwicheliwa.’” (Yesaya 33:24) “[Muluku] anarwa-avuta mithori yothene ovíha’mo m’mithoni mwaya; nave hevarwa-vakhalatho okhwa; nave hevarwa-vakhalatho iyinlo, nari wunla, nari sawichela, ntakhara sopacherya iho sóvira.”—Yawupulula 21:4.

Ephiro Ya Mummo Muniryanyu Mphwanyerye

Murimanyu tchiryene onnaphwanela okhala otchunurunwene ni malakanwene yawo a Muluku olocha sa okumi mu elapo awe yahihano ya ekhaikhai. Nave, nari ori wawi atchu akina annahala wona weriwano wa mareliho yawo okhala etchu yaphama mopwaha wi ekhale eparipari, awo hari aphama mopwahasha wi ewerye okhumelela wa Mpachushahu a osivela owo.—Salmo 145:16; Mikeya 4:4.

Mwawihiha, wi nakhale ni okumi wohimala mParadaiso onorwa owo velaponi, sokhalavo sotchuneya wakhwaniherya. Yesu ahithonyerya wi tivini emoha ya sotchuneya sitokwene sene seiyo, alochaka mu nivekelo wa Muluku: “Nyenya okumi wohimala ti ola, wi yasuwele Nyuwo Mulukuru éparipari, ni Yesu Kristu yowo mwamurummanyu.”—Yohane 17:3.

Hihanto, wakhala wi ninnatchuna tchiri okhala ni okumi mwilapo yahihano ya Muluku, ninnaphwanelela vopacherya ohuserya yotchuna ya Muluku ni werano. Titchu eni yereye: “Elapo ya vathi ennavira ni minkheláya, nyenya yowo onerano okhwela wa Muluku onnikhalelaru okhala wokhala”, wi apuhe mohimala mareliho yawo eni emineliwe ni Mpachushahu a osivela owo.—1 Yohane 2:17.

Wahimukhalavo yothonyerya ekina, masu othene a mbibliani ophariwa vasulu va ti a mu sorepa se egriki sa m’Bibliani Nlakano Nahihano na Yesu Kristu Apwiyahu ni Masalmo a Elomwe (Lomwe New Testament and Psalms). Sa mu ehebrini ti sa New World Translation of the Holy Scriptures—With References (NW).