“Wi Muhivolowe Mu Wehiwa”
“Shishani ni ovekela, wi muhivolowe mu wehiwa.”—MATEYU 26:41.
MAKACHAMIHO yaatepa wunnuwa—hiyaalikana ni yoohooxa eri yoothene yeeyo Yesu Kiristu, mwaana a Muluku eerenryeiye wuupaceryani. Yesu Kiristu, Mwaana a Muluku, aanaacamela omakuchuwelo wa okumi awe veelaponi yavathi. Yesu aanasuwela wi moohilekela owo aahaala ophariwa, othorihiwa wi akhwe, ni okhomeliwa vamwirini woohooxa. Owo aanasuwela wi yoothanla ni yaaweera awe eri yoothene yahaala ovolowela nsina na Atiithi awe. Yesu aanasuwela tho wi okumi wa achu wa muhoolo waari mwawoopiha. Mano variyari va makachamiho oothene ala, tiheeni Yesu eenreiye?
2 Yesu aarowa o emaca ya Getsemane vamoha ni oohuserya awe. Yesu aanatepa osivela nipuro nenla. Wiiwo owo aarowa onipuro noorakamelana vakhaani ni oohuserya awe. Ari mekhaiye, owo aavekela wa Atiithi awe a wirimu avekaka ikuru, aahula murima awe mu nivekelo nookaphula—ohiya ekwaha emoha, nyenya ikwaha chaaru. Naamwi Yesu aari oohicheka owo hantonko wuupuwela wi aahaala owerya ovilela makachamiho ni ikuru sawe mukhateiye.—Mateyu 26:36-44.
3 Olelo, hiyaano tho nri variyari va makachamiho. Wuupaceryani wa ebrochura ela, hiyo noothokororya echu enooniherya wi hiyaano nnakhala omakuchuwelo wa mahiku a mukhalelo ola woonanara. Saweeha ni soothananiha sa elapo ya Satana inamvira iriki mwaacereryeya. Soothanla ni saweera sa muchu ori oothene a hiyo onaloca omurumeela Muluku eeparipari, sinnavolowela nsina na Muluku, nave sookhalano yootaphulela etokotoko, vooloca sa soowehererya sa okumi ahu wa muhoolo mu elapo awe yahihano. Hiyaano ninnamusivela Yehova. Hiyo nnachuna ovilela “ophiyerya o makutchuwelo”—omakuchuwelo a okumi ahu nari omakuchuwelo a mukhalelo ola, moovarihana ni yeeyo enii epacerye orwa. (Mateyu 24:13) Mano hiyo nni niwerye mwawiihayi okhalano muupuwelo wawaakuveya nave opwahiherya okhala oolipelela?
4 Asuwelaka wi oomuchara awe—a iyaakha nsana noopacerya Elukuluku ya Kiristu (E.K.) ni a olelo—yahaala okumana ni makachamiho, Yesu aaloca: “Shishani ni ovekela, wi muhivolowe mu wehiwa.” (Mateyu 26:41) Mano masu yaala antaphulela eheeni wa hiyaano olelo? Mano saweeha taani nyuwo munakumanaanyuno? Nave muni muwerye ‘oshisha’ nari okhala oolipelela mwawiihayi?
Saweeha wi Neere Eheeni?
5 Oothene hiyo ninnakumana ni saweeha sinanikeriha mu “murakhoni wa musaserya.” (2 Timoteo 2:26) Piipiliya onnanlopola hiyo wi yoochuna etokotoko ya Satana ti arummwa a Yehova. (1 Petro 5:8; Yawupulula 12:12, 17) Mano onachuna eheeni? Owo hanachuna omaliha okumi ahu. Satana hanaphura echu wakhala wi hiyaano nikhwile nri oororomeleya wa Muluku. Satana oosuwela wi mu elukuluku awe Yehova onahaala omaliha okhwa moorweela wa ovinya muukhwani.—Luka 20:37, 38.
6 Satana onachuna otoloxa echu ya esisapo yoowalamela vancipale opwaha okumi nryaahuno hihano—ororomeleya wahu wa Muluku. Satana onnaavyavya ekari eri yoothene wi anihiihe hiyo omulapela Muluku. Wakhala wi hiyaano noohuwela nikhala oohiroromeleya—nihiya olaleerya michaka yaphaama nari ohiya ochara malamulo eeKiristu a vasulu—vanonto, Satana onahaala ophura! (aEfeso 6:11-13) Mwawihiihaa, “Awéha owo” onnahela vahoolo vahu saweeha.—Mateyu 4:3.
7 Chiryene, “maphyakelo” a Satana ti oohiyana hiyana. (aEfeso 6:11) Owo poti oneeha ni muhakhu, woova, minikwa, nari waavyavya sootheiha. Nyenya mmoha wa miraakho awe woovitheyaxa onapharihana ni ocecheya. Ntoko nanrima oowaraala owo oosuwela wi ocecheya poti onivololiha mmunepani, ophiyerya hiyaano okhala ookhweya wuuwela mu saweeha. (Proverpio 24:10) Mwawiihihaa, mu ilukuluku nnakhalaahu ‘oocecheya’ mmuupuweloni, Satana onnaneeha wi nihiye omurumeela Muluku.—Saalimu 38:8.
8 Vaava hiyaano nnaacamelaahu omakuchuwelo wa mahiku ookuchula ala, ninnoona wi ichu inatannya ocecheya inamvira iriki mutepa waaca, nave seiyo sinnanivolowela hiyo. (Vareryani ekaaxa “Ichu Ikina Inatannya Ocecheya.”) Naamwi erivo echu enatannya ocecheya, ocecheya poti onuula ikuru sahu. “Okhala a mvai” mu miteko soomunepani, onaphitaanyerya omuhuserya Piipiliya, ophiya mmithukumano yeeKiristu, olaleerya michaka yaphaama—poti okhala wookachamiha wakhala wi nyuwano muri ocecheya mmwiilini, mmuupuweloni, ni mmakhaleloni. (aEfeso 5:15, 16) Upuwelani wi Satana onachuna wi nyuwo mweemele. Nyenya ela tahi elukuluku ya ocecheya nari oyeleela muupuwelo anyu wawaakuveya moovarihana ni elukuluku ela nnakhalaahu! (Luka 21:34-36) Mano nyuwano muni muwerye ovilela saweeha mwawiihayi wi mpwahiherye okhala oolipelela? Thokororyani ikano xexe seiyo inahaala onikhaviherya.
“Shishani ni Ovekela”
9 Muroromeleeni Yehova moorweela wa nivekelo. Upuwelani yootakiherya ya Yesu mu emaca ya Getsemane. Mano variyari va yoothananiha murima etokotoko, tiheeni owo eenreiye? Owo aaveka nikhaviheryo wa Yehova, avekelaka moolipaxa ophiyerya “nikhurumela nawe nákhala ntoko mamoromoro matokotoko a nikhami erikimmorela vathi.” (Luka 22:44) Nkuupuwelani vooloca sa ela. Yesu aanamusuwela phaama Satana. Yesu ari wirimu, aahoona saweeha soothene seiyo Satana onaphariheleiye muteko wi alipixerye waahuweliha arummwa a Muluku. Naamwi eri hiihaa, Yesu honne okhala wookhweya osepa ichu soothene Satana aahaaleiye omweeha. Okhala wi Mwaana a Muluku oohicheka aahoona ochuneya wa ovekela avekaka nikhaviheryo ni ikuru sa wirimu, ti woochuneya mwawiihayi nki hiyaano weerano mwawiihihaa!—1 Petro 2:21.
10 Upuwelani tho, wi vaculi va Yesu amanleene waaleela oomuchara awe wi “shishani ni ovekela” Yesu aaloca: “Munepa ori wokhwela tchiri, nyenya mwíli wa’enama ori wochetcheya.” (Mateyu 26:41) Mano mwiili wanama wawani yoowo Yesu aaloceiye? Mwevelevelo tahi wawawe mukhateiye; hiwaarimo echu yoocecheya mmwiilini wanama woophaameya wa Yesu. (1 Petro 2:22) Nyenya mukhalelo wa oohuserya awe waari woohiyana. Nthowa na orava ohiphaameya ni othitimanela yoocheka, awo yahaala okhwela vancipale nikhaviheryo wi evilele mu saweeha. (aRoma 7:21-24) Ti nthowa nenla owo aaleenleiye awo—ni aKiristu eeparipari oothene vaculi vaya—wi epwahiherye ovekela evekaka nikhaviheryo wi ewerye ovilela mu saweeha. (Mateyu 6:13) Yehova onnaakhula mavekelo ntoko yaawo. (Saalimu 65:2) Mano mwawiihayi? Mu iphiro piili.
11 Ephiro yoopacerya, Muluku onnanikhaviherya hiyo wi nsuwele saweeha. Saweeha sa Satana inaphwanaphwana ni miraakho ireiwe mu ephiro ya epiphi. Wakhala wi nyuwano hamunoona iho, munahaala omorelamo. Moorweela wa Piipiliya ni solaleeryiwa irino mathipelo a Piipiliya, Yehova onnuupulula miraakho sa Satana, anikhaviheryaka hiyaano wi niwerye osepa wuuwela mu saweeha. Moovira wa iyaakha, aliivuru apakiwe, ni mithukumano mitokotoko, ikwaha sincipale soonlopola hiyo vooloca sa woopiha wa ichu ntoko omoova muchu, ochapaheya, muhakhu, ni saweeha sikina sa Satana. (Proverpio 29:25; 1 aKorinto 10:8-11; 1 Timoteo 6:9, 10) Mano hamunathamalela vancipale wa Yehova va nthowa na onilopola hiyo vooloca sa miraakho sa Satana? (2 aKorinto 2:11) Soolopola soothene iha, ti maakhulo a mavekelo anyu vooloca sa nikhaviheryo wi muwerye ovaanya saweeha.
12 Ephiro yanaawiili, Yehova onaakhula mavekelo ahu mwa onivaha hiyo ikuru wi nivilele mu saweeha. Masu awe anii: “Muluku . . . harwa-emyeryerya nyuwo wi mwehiwe opwaha ni wiwo munaweryelanyu; nyenya vamoha ni yawéha anarwa-iyathitho vovuluwelavo, wi mwahiwerye ovilela’wo.” (1 aKorinto 10:13) Muluku harwa eemererya yaweeha wi ekhale etokotoko opwaha ikuru sahu soomunepani wi nivilele—wakhala wi hiyaano ninnapwahiherya omuroromela owo. Mano owo oniyathitho “vovuluwelavo” ntakhara hiyaano mwawiihayi? Owo ‘onnavaha munepa waweela wa yaawo annamveka yoowo.’ (Luka 11:13) Munepa owo, poti onikhaviherya hiyo wuupuwela malamulo a Piipiliya anawerya olipiha ochuna wahu weera yaphaama ni onikhaviherya hiyo opaka soothanla sa miruku. (Yohane 14:26; Yakobo 1:5, 6) Owo onnawerya onikhaviherya hiyo wi nooniherye makhalelo aphaama nnachunaahu wi niwerye osepa mawuupuwelo oonanara. (aGalatiya 5:22, 23) Munepa wa Muluku poti waakhaviherya anna ahu mu nroromelo wi enikhaviherye, nave wi ‘ekhale oonimaaliha murima.’ (aKolose 4:11) Mano nyuwo hamunathamalela nthowa nawii Yehova onnaakhula mavekelo anyu a nikhaviheryo mu iphiro sa osivela?
Khalani Oophimelela mu Soowehererya Sanyu
13 Wi nikhale oolipelela, hiyaano nnakhwela okhala oophimelela mu soowehererya sahu. Ikwaha ikina, hiyaano ninnatepa ovelavela nthowa na wunnuwa wa makachamiho. Nyenya hiyo, nnaphwanela wuupuwela wi Muluku hantonko olaiherya wi hiyaano nahaala okhalano okumi ohirino makachamiho mu elapo ela yoonanara. Khalai mu ilukuluku sa Piipiliya, arummwa a Muluku yaakumana ni makachamiho, ophitaanyerya ohooxiwa, ohaawa, ocecheya, ni ireca.—Saweriwa Tarummwa 8:1; 2 aKorinto 8:1, 2; 1 aTesalonika 5:14; 1 Timoteo 5:23.
14 Olelo, hiyaano tho, nookhalano makachamiho. Hiyo poti okumana ni ohooxiwa, ohikhalano ikhorowa, ocecheya, wiiceliwa, ni ohaawa mu makhalelo makina. Waakhanle wi Yehova onnaniikicha hiyo mootikiniha mwa makachamiho oothene, yeeyo yahaala omvaha Satana mathipelo wi amunyemule Yehova. (Proverpio 27:11) Yehova onneemererya wi arummwa awe ekhale aweehiwa ni aweereryiwa, ikwaha ikina ophiyerya okhwa moohiwehererya mmatani mwa amwiicani.—Yohane 16:2.
15 Mano tiheeni, vano, Yehova olaihenryeiye? Ntoko noonnahu wuupaceryani, owo oolaiherya wi onahaala onivaha ikuru wi nivilele mu saweeha soothene hiyo nnakumanahuno, wakhala wi hiyaano mweeparipari ninnamuroromela Muluku. (Proverpio 3:5, 6) Moorweela wa Masu awe, munepa awe, ni marehereryo awe, owo onnanikhapelela hiyo mmunepani, onnanikhaviherya hiyaano okhapelela waataana wahu ni yoowo. Nakhala awaataana ni Muluku moolipa, naamwi hiyo nikhwile, hiyaano noowina. Hiyaavo echu—nari okhwa—enii ewerye omoocheeliha Muluku waavaha phatamari arummwa awe oororomeleya. (aHebri 11:6) Nave mu elapo yahihano yeeyo vano eri vakhiviru, Yehova onahaala okhwaaniherya chiryene soolaiherya sawe soothene sootikiniha sa mareeliho, wa oothene yaale anamusivela owo.—Saalimu 145:16.
Upuwelani Miyaha Mitokotoko
16 Wi nivilele ophiyerya omakuchuwelo, hiyaano nnaphwanela wuupuwela miyaha mitokotoko inaphitaanyerya ntakhara heeni Muluku onneemererya onanara. Wakhala wi ilukuluku ikina makachamiho ahu anooneya okhala matokotoko ophiyerya wi hiyo nnachuna weemela, ti waphaama wuupuwela mukhatihu wi Satana oovaanya ophwanelela wa olamulelo wa Yehova. Satana ootannya tho minikwa vooloca sa osivela ni ororomeleya wa arummwa a Muluku. (Yobu 1:8-11; 2:3, 4) Miyaha seiya ni mukhalelo Yehova othanlileiye wi athorihe sootepa wunnuwa vancipale opwaha okumi ahu. Mano mwawiihayi?
17 Muluku weemererya wawe makachamiho ophiyerya olelo, woovaha elukuluku wi achu akina yaakhele eparipari. Upuwelani ela: Yesu aahoona masooso wi hiyaano nikhaleno okumi. (Yohane 3:16) Hiyaano ninnathamalela vancipale! Mano hiyo nnanwerya wiiveleela wi nivilele ni soohooxa mu elukuluku vakhaani, wi achu akina ewerye ophwanya okumi? Wi nivilele ophiyerya omakuchuwelo, hiyaano nnaphwanela osuwela wi miruku sa Yehova ti sa vasuluxa opwaha miruku sahu. (Yesaya 55:9) Owo onahaala omaliha onanara mu elukuluku yeeyo eri yaphaama ntakhara othoriha miyaha mitokotoko moomalela, ni ntakhara okhala wahu phaama okhala wookhala. Mano wookhalavo mukhalelo mukina wa othoriha miyaha seiya? Ni Muluku hiyaavovo yoohikhala ekhaikhai!—aRoma 9:14-24.
“Mwachameleni Muluku”
18 Wi nipwahiherye okhalano muupuwelo wawaakuveya, hiyaano nnaphwanela omwaacamela Yehova. Okhala wookhala muhichuwale wi Satana onnaavyavya ekari ni ikuru sawe soothene wi atoloxe waataana wahu waphaama ni Yehova. Satana onachuna oniroromeliha hiyo wi makuchuwelo herwa ephiya nave wi ti wa mahaleene olaleerya michaka yaphaama nari okhalaka moovarihana ni malamulo a vasulu a Piipiliya. Nyenya owo “ori awotha, ni atithinnya a wotha.” (Yohane 8:44) Hiyaano nnaphwanela wuumelela ‘omuhiiha Musaserya.’ Hiyaano hinnaphwanela wuupuwela wi waataana wahu ni Yehova ntoko echu ya esisapo yookhweya. Piipiliya moosivela onnanleela: “Mwachameleni Muluku, nave anarwa-awachamelani nyuwo.” (Yakobo 4:7, 8) Mano nyuwo muni muwerye mwawiihayi omwaacamela Yehova?
19 Waanyiherya ni mavekelo ti waphaama. Moona wi makachamiho a okumi aatepa wunnuwa, vuuvihani murima anyu woothene ntakhara Yehova mu nivekelo. Mwaloca ichu inoohooxani, onahaala okhala wookhweya woona maakhulo a mavekelo anyu. Maakhulo heni ekhale ikwaha soothene hiihaa ntoko nyuwo munuupuwelaanyu, nyenya wakhala wi yoochuna anyu ti omucicimiha Muluku nave wi mpwahiherye ororomeleya, owo onahaala wovahaani nikhaviheryo munakhwelaanyu wi muwerye ovilela moohakalaliha. (1 Yohane 5:14) Vaavaa muneeraanyu moone sohooleliha sawe mu okumi anyu, nyuwo munahaala omwaacamela yoowo. Waalakhanya ni waanyiherya vooloca sa makhalelo ni iphiro sa Yehova, hiihaa ntoko Piipiliya onuupululeiye, ti woochuneya tho vancipale. Waanyiherya wawihiihaa, onamookhaviheryaani nyuwo wi mmusuwele phaama Muluku, eyo enamutannya murima anyu nave enamwaacererya omusivela wanyu owo. (Saalimu 19:14) Mwakhalano osivela iwo opwaha echu ekina, onahaala wookhaviheryaani nyuwo wi mvilele mu saweeha nave mpwahiherye okhala oolipelela.—1 Yohane 5:3.
20 Wi nipwahiherye omwaacamela Yehova, ori woochuneya tho wi hiyaano nikhale vakhiviru ni anna ahu mu nroromelo. Ela enahaala othokororyiwa o makupa ookuchula a ebrochura ela.
MAKOHO A YOOHUSERYA
• Mano tiheeni Yesu eenreiye variyari va makachamiho matokotoko omakuchuwelo wa okumi awe veelaponi yavathi? Nave tiheeni owo aaleenleiye oohuserya awe wi yeere? (Ipar. 1-4)
• Mano ntakhara heeni Satana onnawaavyavyaxa arummwa a Yehova, nave owo onaneeha hiyo mu makhalelo taani? (Ipar. 5-8)
• Wi nivilele mu saweeha, ntakhara heeni ti woochuneya vancipale ovekela moohihiyererya (Ipar. 9-12), okhala oophimelela mu soowehererya sahu (Ipar. 13-15), wuupuwelela miyaha mitokotoko (Ipar. 16-17), ni ‘omwaacamela Muluku’ (Ipar. 18-20)?
[Ekaaxa va epaaxina 25]
Ichu Ikina Inatannya Ocecheya
Okumi/wuuluvala. Wakhala wi hiyaano niinnahooxeya ni ereca ehinamala nari wuuluvala weiwo onaneeriha ohipaka echu, hiyo poti ocecheya nthowa nawii hannawerya weera ichu sincipale mu muteko ahu wa omurumeela Muluku.—aHebri 6:10.
Opharihiwa Mwala. Hiyaano poti okhala oothanana wakhala wi hiyo nnoona wi wiilipixerya olaleerya Masu a Muluku onaakhuleliwa vakhaani pahiru.—Proverpio 13:12.
Wiisoona Ohikhala Echu. Nthowa na ohooxiwa iyaakha sincipale, muchu poti wiisoona wi hanasiveliwa, ophiyerya wuupuwela wi Yehova tho hanamusivela owo.—1 Yohane 3:19, 20.
Ohiiwanana. Wakhala wi muchu oochekeliwa ni munna awe mu nroromelo, owo poti ocecheya vancipale ophiyerya ochompa mithukumano yeeKiristu nari ohiya olaleerya michaka yaphaama.—Luka 17:1.
Ohooxiwa. Achu akina yaawo arino malapelo oohiyana ni annyu poti woovaanyani, woohooxani, nari wootheyaani.—2 Timoteo 3:12; 2 Petro 3:3, 4.
[Eruku va epaaxina 26]
Yesu oonileela hiyaano wi nipwahiherye “ovekela” nivekaka nikhaviheryo wi nivilele mu saweeha