MWAHA 8
Omwene wa Muluku Tiheeni?
Tiheeni Piipiliya onahusiheiye vooloca sa Omwene wa Muluku?
Tiheeni Omwene wa Muluku onahaalaya weera?
Ti liini Omwene wa Muluku onahaalaaya okhwaaniherya yookhwela ya Muluku veelaponi yavathi?
1. Nivekelo taani noosuweliwaxa nnahaala othokororyiwa hiihaano?
ACHU ancipale mu elapo yoothene annasuwela nivekelo nenlo ancipale aniichanaaya Atiithihu a wirimu naari Nivekelo na Apwiya. Nla ti nivekelo noosuweliwaxa naalociwe ti Yesu Kiristu ntoko yootakiherya. Ti nivekelo nrino yootaphulela etokotoko, othokororya sooveka chaaru soopacerya sa nivekelo nlo onahaala wookhaviheryaani wi muhuserye vancipale vooloca sa yeeyo Piipiliya onahusiheiye chiryene.
2. Ichu taani chaaru seiyo Yesu aahusinheiye oomuchara awe ovekela?
2 Wuupaceryani wa nivekelo nla, Yesu ohaahusiha alipa oowiriyana awe: “Mwavekelaka mwereke ha: Atithihu muri wirimu, nsina nanyu nèlihiwe. Omwene anyu orwe. Okhwela wanyu wereye, ntoko wirimu hiha vathi va.” (Mateu 6:9-13) Tiivi eri yootaphulela ya sooveka seiya chaaru?
3. Tiheeni nnaphwanelaahu osuwela vooloca sa Omwene wa Muluku?
3 Hiyaano noohuserya vancipale vooloca sa nsina na Muluku, Yehova. Nave noohuserya tho vooloca sa yookhwela ya Muluku—yeeyo eenreiye ni onahaaleiye oweerela achu. Tiheeni Yesu aachuneiye oloca vaavaa owo aalonceiye wi nivekele: “Omwene anyu orwe”? Omwene wa Muluku Tiheeni? Mano orwa waya onii weelihe nsina na Muluku mwawiihai? Nave orwa wa Omwene oniiwanana hai ni weereya wa yookhwela ya Muluku?
OMWENE WA MULUKU TIHEENI?
4. Omwene wa Muluku tiheeni, nave taani ori Mwene?
4 Omwene wa Muluku olamulelo otikitheryiwe ti Yehova Muluku orino Mwene oothanliwa ti Muluku. Mwene a Omwene wa Muluku taani? Yesu Kiristu. Ntoko Mwene, Yesu ti mutokotoko waapwaha achu oothene analamulela nave oniichaniwa “Mwene a mamwene ni Pwiya a asipwiya.” (1 Timóteo 6:15) Owo ookhalano ikuru sa opaka ichu sincipale saphaama ompwaha muchu ori oothene onalamulela, ophiyerya yoole ori oopwaha variyari vaya.
5. Omwene wa Muluku onahaala olamulela orweela woowi nave onahaala olamulela eheeni?
5 Omwene wa Muluku onahaala olamulela orweela woowi? Mano, Yesu ori woowi? Muupuwele wi Yesu aahiiphiwa vamwirini woohooxa, nave owo aaviihiwa muukhwani. Voocharela vaya, owo aakookela wirimu. (Saweriwa T’arummwa 2:33) Mwawiihiiha, ti weiwo oriwo Omwene wa Muluku—wirimu. Ti nthowa nenla Piipiliya oniichaneiye ‘omwene wa wirimu.’ (2 Timóteo 4:18) Naamwi Omwene wa Muluku ori wirimu, owo onahaala olamulela elapo yoothene yavathi.—Mwaalakhanye Wupulula 11:15.
6, 7. Tiheeni enamweeriha Yesu okhala mwene oocicimiheya?
6 Tiheeni enamweeriha Yesu okhala mwene aphaama? Nthowa nimoha ti nawi, owo harwa akhwa. Amulikanyihaka Yesu ni mamwene aachu Piipiliya onamwiichana “Ti yowo pahi ohinakhwa nave onakhala mwekamamani yotutha.” (1 Timóteo 6:16) Ela enataphulela wi ichu soothene saphaama seiyo Yesu oneereiye inahaala okhala, okhala wookhala. Nave owo onahaala weera ichu itokotoko ni saphaama.
7 Thokororyani yoolaiherya ela ya Piipiliya vooloca sa Yesu: “Va yowo onamukayavo munepa w’Apwiya [Yehova], munepa wa miruku ni wosuwela, munepa wa ikano ni wolipiha, munepa wawasuwela ni wawatxitximihano Apwiya. Onahawela osiveliweke ni watxitximiha Apwiya. Yowo hokathorihaka ntoko anonelayavo mitho; hokathorihaka mulatxu wa nthowa wa masu awiwa. Oni onamwathoriha atxhu òhawa ni wokololowa ni oni onan’wakhiha atxhu ohosiwa. Ni nsu nawe nni nikhale ekopo yawamanano alipa òwali; ni n’wiya wa mwano mwawe onammwipha mutakhali.” (Isaiya 11:2-4) Masu ala anooniherya wi Yesu oolaiheryiwa wi onahaala okhala Mwene eekhaikhai aikharari ntakhara achu veelaponi yavathi. Hamunachuna okhalano mwene ntoko yoowo?
8. Taani onahaala olamulela ni Yesu?
8 Yookhalavo eparipari ekina vooloca sa Omwene wa Muluku: Yesu hanaya olamulela meekheiye. Akina anahaala olamulela ni Yesu. Ntoko yawooniherya, murummwa Paulo aamuleela Timoteo: “Navilela, nnarwa nlamula ni Yowo.” (2 Timòteo 2:12) Ahee, Paulo, Timoteo, ni akina oororomeleya yaawo athanliwe ti Muluku anahaala olamulela vamoha ni Yesu mu Omwene wa wirimu. Achu akavi anahaala okhalano ekari eyo?
9. Achu akavi anaya olamulela vamoha ni Yesu, nave Muluku opacenrye liini waathukumanya?
9 Ntoko yooniheryiwaaya Mmwaha 7 wa liivuru ola, murummwa Yohane aavahiwa yawoona mummo owo oonneiye “Eputxeputxhe [Yesu Kiristu] yemenle va mwako Siau [nipuro nawe na omwene wirimu]. Ni yeyo yàkhalavo atxhu matxikhwi nsana nimoha ni matxikhwi makhumi masese ni masese [144.000] yarempwe vayutxi nsina na Eputxeputxhe ni na Atithi aya.” Taani yaawo ari 144.000? Yohane mukhateiye onnanleela: “Yawo annatxhara eputxheputxhe mapuro othene enayayawo. Àhopoliwa mwa atxhu ntoko milepulo sovahiwa Muluku ni Eputxheputxhe.” (Wupulula 14:1, 4) Chiryene, awo oomuchara oororomeleya a Yesu Kiristu athanliwe wi yalamulele vamoha ni yoowo wirimu. Emanle oviihiwa muukhwani ntakhara okumi wa wirimu, awo anahaala olamulela veelaponi yavathi ntoko mamwene vamoha ni Yesu. (Wupulula 5:10) Opacerya mahiku aarummwa, Muluku onnaathanla Akiristu oororomeleya wi akhwaaniherye 144.000.
10. Ntakhara heeni ti yaphaama wi Yesu ni 144.000 elamulele nloko naachu?
10 Marehereryo wi Yesu ni 144.000 elamulele nloko naachu ti echu yoosivela. Echu emoha ti yawi, Yesu oosuwela tiheeni enataphulela okhala muchu ni ohooxeya. Paulo aaloca wi Yesu tahi wi “namukutxho ohinawerya omoriwa ikharari wa nthowa na sotxheka sahu, wona wi yowo ene òhereryiwa wa sothene ntoko hiyo, ohiya yotxheka.” (Ahebri 4:15; 5:8) Yaawo anaya olamulela ni yoowo aahooxeya tho nave aavilela saweeha ntoko achu. Mwawaacererya, awo aawana ni ohiphaameya nave aavilela ireca sa mukhalelo woothene. Mwevelevelo, awo anahaala wiiwexexa makacamiho yaawo achu anakumanaayano!
TIHEENI OMWENE WA MULUKU ONAHAALAAYA WEERA?
11. Ntakhara heeni Yesu aaloca wi oomuchara awe yaaphwanela ovekela wi yookhwela ya Muluku yeereye wirimu?
11 Vaavaa Yesu aaleenleiye oomuchara awe wi anaphwanela ovekela ntakhara orwa wa Omwene wa Muluku, owo tho aaloca wi awo yaaphwanela oveka yookhwela ya Muluku wi yeereye “ntoko wirimu hiha vathi va.” Muluku ori wirimu, nave elukuluku yoothene yookhwela awe enneriwa weiwo ni ankeelo awe oororomeleya. Vanonto, Mmwaha 3 wa liivuru ola, noohuserya wi munkeelo oonanara aahiya weera yookhwela ya Muluku nave eeriha wi Aatamu ni Haava echeke. Mmwaha 10 nnahaala ohuserya vancipale yeeyo Piipiliya onahusiheiye vooloca sa munkeelo oonanara yoowo oniichaniwa Satana Musaserya. Satana ni ankeelo anamuchara aniichaniwa masololo, yaaheemereryiwa okhala wirimu elukuluku vakhaani. Vano, tahi oothene wirimu yeera yookhwela ya Muluku. Eyo yaahaala otorokeya vaavaa Omwene wa Muluku waahaalaaya opacerya olamulela. Mwene otikitheryiwe hiihaano, Yesu Kiristu, aawana ekhoco ni Satana.—Mwaalakhanye Wupulula 12:7-9.
12. Ichu taani piili itokotoko inalociwa mu Wupulula 12:10?
12 Masu ooloherya anacharela annathoriha yeeyo yeerenye: “Káhíwatho nsu ntokotoko wirimu nlochaka: nòhereya vano nivuluso, owerya ni omwene wa Muluku ahu, ni otokwene wa Kristu awe, ntakhara òhikariwa namasomela a asinnihu yowo àsomela othana ni ohiyu vamithoni va Muluku ahu.” (Wupulula 12:10) Nyuwo mohiiwexexa ichu piili itokotoko inalociwa va eciciri ela ya Piipiliya? Yoopacerya, Omwene wa Muluku onalamuleliwa ti Yesu Kiristu woopacerya olamulela. Yanapiili, Satana ohiikariwa wirimu avonyeriwa veelaponi yavathi.
13. Tiheeni ekhumelenle nthowa na Satana wiikariwa wirimu?
13 Tiivi eri yookhumelela ya saweereya seiya piili? Vooloca sa yeeyo yeeren’ye wirimu hiyo ninnaalakhanya: “Tiva muhakalale nyuwo irimu ni nyuwano mmankemo.” (Wupulula 12:12) Ahee, ankeelo oororomeleya wirimu iwo annahakalala. Annahakalala ntakhara oothene weiwo toororomeleya wa Yehova Muluku. Eri hiihaa nthowa nawi Satana vamoha ni masololo awe ahiikariwa wirimu. Wirimu wookhalawo murecele woohimala ni wiiwanana wawaakhwanela. Mwawiihiiha yookhwela ya Muluku enneereya wirimu.
14. Tiheeni yeeren’ye nthowa na ovonyeriwa Satana veelaponi yavathi?
14 Hanka vooloca sa elapo yavathi? Piipiliya onii: “Otakhaliwa ti wa elapo ni ti wa ephareya, ntakhara musaserya okhuruwela sa nyuwo ni owali mutokwene vosuwela wi elukuluku awe ehanle vakhani.” (Wupulula 12:12) Satana oonanariwa nthowa na wiikariwa wirimu ni ohalano elukuluku vakhaani. Ni esara awe owo onnatannya makacamiho, naari “Otakhaliwa” veelaponi yavathi. Nnahaala ohuserya vancipale vooloca sa “Otakhaliwa” mu mwaha onacharela. Nyenya nuupuwelaka yeeyo nnanwerya okoha: Omwene owo onii owerye hai weeriha wi yookhwela ya Muluku yeereye veelaponi yavathi?
15. Tiivi eri yookhwela ya Muluku ni elapo yavathi?
15 Nkuupuwelani tiivi eri yookhwela ya Muluku ni elapo yavathi. Nyu moohuserya vooloca sa yeeyo Mmwaha 3. Mu Eeteni, Muluku aahooniherya wi yookhwela awe tiya wi elapo yavathi ekhale parataiso oosareya ni nloko naachu eekhaikhai, ahinakhwa. Satana aaheeriha wi Aatamu ni Haava echeke. Eyo yaaheeriha wi yookhwela ya Muluku ni elapo yavathi ehikhwaanele mu elukuluku aya. Nyenya tahi wi yookhwela awe eyo yaatorokeya. Nivano Yehova onnaroromeliha wii: “Atxhu awokololowa anamwakhela elapo, anamukhala wa mahiku othene.” (Salumu 37:29) Nave Omwene wa Muluku onahaala weerano eyo. Mano mwawiihai?
16, 17. Tiheeni Daniyeli 2:44 onanleeleiye vooloca sa Omwene wa Muluku?
16 Thokororyani yooloherya eri mu Daniyeli 2:44: “Mahiku a mamwene awo Muluku a Wirimu onamooneiha omwene woohiwereyaru omwariwa nave havoru mwene oni akuse yowo. Nto omwene owo onammaliha omwene okina nave onamukhala mahiku othene.” Mano ela enanleela eheeni vooloca sa Omwene wa Muluku?
17 Yoopacerya, ela enanleela wi Omwene wa Muluku waahaala otikitheryiwa mu “mahiku a mamwene awo,” naari erivovo alamuleli akina. Yanaawiili, ela enanleela wi Omwene owo onahaala otikitheryiwa, okhala wookhala. Owo horwa ovireliwa naari oraceeliwa ni olamulelo okina. Yaneeraru, ninnoona wi onahaala okhalavo ekhoco variyari va Omwene wa Muluku ni olamulelo wa elapo ela. Omwene wa Muluku onahaala ovootha. Vookuchula vaya, Omwene wa Muluku tonahaala okhala olamulelo mmoharu wa achu oothene. Vanonto achu anahaala opuha olamulela waphaama yoowo ahintonkaaya woona.
18. Tinivi nri nsina na ekhoco yookuchula variyari va Omwene wa Muluku ni mamwene a elapo ela?
18 Piipiliya onnaloca ichu sincipale sa ekhoco variyari va Omwene wa Muluku ni alamuleli a elapo ela. Ntoko yawooniherya, Piipiliya onnahusiha wi vaavaa makuchuwelo anaacamelaaya, minepa yoonanara inahaala omwaramwaxa sawootha wi saahuwelihe “mamwene a elapo yothene.” Ni yookhwela taani? “Yathukumanye [mamwene], wi ewane ekhotxo ya nihiku ntokotoko na Muluku a ikuru sothene.” Mamwene a elapo yavathi anahaala othukumanyiwa vamoha “va nipuroni nnitxhaniwa ni elotxelo ya Ahebri Harmagedón.” (Wupulula 16:14, 16) Nthowa na yeeyo elociwe mu iciciri seiya piili, makuchuwelo a owana variyari va alamuleli aachu ni Omwene wa Muluku aniichaniwa ekhoco ya Harmaketo.
19, 20. Omwene wa Muluku onahaala weeriha mwawiihai wi yookhwela ya Muluku yeereye veelaponi yavathi?
19 Omwene wa Muluku onahaala weera eheeni moorweela wa Harmaketo? Nkuupuwelani wanaawiili vooloca sa yeeyo eri yookhwela ya Muluku ntakhara elapo yavathi. Yehova Muluku oolaiherya wi elapo yavathi esareye ni nloko naachu oophaameya, eekhaikhai, emurumeelaka yoowo mu Parataiso. Tiheeni enooceeliha weereya eyo hihano? Yoopacerya, hiyaano naachu oocheka, ninniiceliwa nave ninnakhwa. Noohuserya Mmwaha 5, wi Yesu ookhwa ntakhara hiyaano wi niwerye okhalano ni okumi woohimala. Moophwanaphwana munnupuwela masu arempwe mu Michaka ya Yohani: “Muluku òtepa wakhwela atxhu a mwelaponi, ophiyerya omvaha Mwana awe mmoharu, wi mutxhu onamwemererya yowo, ahirimele, nto akhaleno ekumi yohimala.”—Yohani 3:16.
20 Nikacamiho nikina ti nawi achu ancipale anneera ichu soonanara. Awo annootha, anniiya, nave annararuwa. Awo hanachuna weera yookhwela ya Muluku. Achu aneera ichu soonanara anahaala otoloxiwa mu elukuluku ya ekhoco ya Muluku ya Armaketo. (Mwaalakhanye Salumu 37:10.) Nthowa nikina yookhwela ya Muluku ehineereyaya veelaponi yavathi ti nawi alamuleli hanaaceenyerya achu wi yeere eyo. Alamuleli ancipale aayeleela ikuru, akina toowali, naari ootakhala. Piipiliya mwevelevelo onii: “Atxhu akina àkhalano otokwene, eniha akina ekhalaka òhosiwa.”—Eklesiyaste 8:9.
21. Omwene wa Muluku onahaala weeriha mwawiihai wi yookhwela ya Muluku yeereye veelaponi yavathi?
21 Amanle Armaketo, achu anahaala okhalano olamulelo mmoha pahiru, Omwene wa Muluku. Omwene owo onahaala weera yookhwela ya Muluku nave onahaala oruuha mareeliho ootikiniha. Ntoko yawooniherya, owo onahaala omveihavo Satana ni masololo awe. (Wupulula 20:1-3) Ikuru sa mukucho wa Yesu inahaala ophariheliwa muteko ntakhara achu oororomeleya herwa tho yiiceliwa naari okhwa. Moorweela wa olamulela wa Omwene achu anahaala okhalano okumi woohimala. (Mwaalakhanye Wupulula 22:1-3.) Elapo yavathi enahaala okhala parataiso. Mwawiihiiha, Omwene onahaala weeriha wi yookhwela ya Muluku yeereye veelaponi yavathi nave onahaala weeliha nsina na Muluku. Mano ela enataphulela eheeni? Ela enataphulela wi moorweela wa Omwene wa Muluku muchu ori oothene onahaala ocicimiha nsina na Yehova.
TI LIINI OMWENE WA MULUKU ONAHAALAAYA WEERA ECHU?
22. Nnasuwela hai wi Omwene wa Muluku hiwaarwile mu elukuluku yeeyo Yesu aareiye veelaponi yavathi naari amanle oviihiwa mookhwani?
22 Vaavaa Yesu aalonceiye ni ohuserya awe wi evekeleke, “Omwene anyu orwe,” eyo yaari yawiiweyaxa wi Omwene owo hiwaaruule mu elukuluku ene yeele. Mano owo waarule vaavaa Yesu aakookenleiye wirimu? Hooye, ntakhara Petro ni Paulo aaloca wi Yesu amanle oviihiwa, yooloherya ya Salumu 110:1 yaakhwaaniheryeya wa yoowo: “Nsu na Apwiya [Yehova] wa pwiya aka: okirathi omononi waka wolopwana, ophiyerya miyo wàkuha amwitxana-à vathi va inani sà.” (Saweriwa T’arummwa 2:32-35; Ahebri 10:12, 13) Yaahikhalavo elukuluku ya owehererya.
23. (a) Omwene wa Muluku opacenrye olamulela liini? (b) Tiheeni enahaala othokororyiwa mmwaha onacharela?
23 Ophiyerya liini? Mu nsana 19 ni 20, oohuserya eeparipari a Piipiliya yaahiiwexexa wi elukuluku ya owehererya yaahaala omala mu 1914. (Vooloca sa nihiku nla vareryani Masu Awaacererya, “1914—Eyaakha Yoochuneya mu Yooloherya ya Piipiliya.”) Saweereya sa elapo ipacenrye mu 1914, sinnacicimiherya wi wiiwexexa wa oohuserya eeparipari a Piipiliya awo waari weeparipari. Okhwaaniheryeya wa yooloherya ya Piipiliya enooniherya wi mu 1914, Kiristu aakhala Mwene nave Omwene wa Muluku wa wirimu waapacerya olamulela. Vanonto, nnakhala mu “elukuluku . . . vakhani” yeeyo Satana ohanleiyeno. (Wupulula 12:12; Salumu 110:2) Nnanwerya oloca wi moohilekela Omwene wa Muluku onahaala weeriha wi yoochuna ya Muluku yeereye veelaponi yavathi. Munnoona michaka seiya okhala sootikhiniha? Munnaroromela wi ela ti eparipari? Mwaha onacharela onahaala wookhaviheryaani woona wi Piipiliya onnahusiha ichu seiya chiryene.
[Eruku va epaaxina 85]
PIIPILIYA ONAHUSIHA EHEENI
▪ Omwene wa Muluku olamulelo wa wirimu orino Mwene aya Yesu Kiristu, nave 144.000 anakuxiwa variyari va achu wi yalamulele vamoha ni yoowo.—Wupulula 14:1, 4.
▪ Omwene opacenrye olamulela mu eyaakha ya 1914, voocharela vaya Satana ohiikariwa wirimu avonyeriwa veelaponi yavathi.—Wupulula 12:9.
▪ Moohilekela Omwene wa Muluku onahaala otoloxa olamulelo wa achu, nave elapo yavathi enahaala okhala parataiso.—Wupulula 16:14, 16.
[Eruku va epaaxina 83]
Wiikariwa wa Satana ni masololo awe wirimu wooruuha otakhaliwa veelaponi yavathi. Makacamiho ntoko awo anahaala omala moohilekela
[Eruku va epaaxina 84, 85]
Moorweela wa olamulela wa Omwene, yookhwela ya Muluku enahaala weereya veelaponi yavathi hiihaa ntoko enereyaaya wirimu