MWAHA 18
Opatiso ni Waataana Wanyu ni Muluku
Opatiso Weekiristu onapakiwa hai?
Ichu taani munaphwanelaanyu weera wi mphwanelele opatiso?
Muchu oniiveleela hai wa Muluku?
Nthowa taani nnamweriha muchu opatisiwa?
1. Ntakhara heeni nahota a Etiopiya aaveka wi apatisiwe?
“ONANI mahi ala ari va. Ti seni enakhotxiha wi miyo kipatisiwe?” Nikoho nla naapakiwe ni nahota a Etiopiya, mu nsana noopacerya. Mukiristu ichaniwa Filipe aahooniherya wa yoowo wi Yesu aari Mesiya aalaiheryiwe. Mwa otannyiwa murima moorweela wa yeeyo owo aahusenryeiye mu Soorempwa, mulopwana a Etiyopiya aaheeravo echu. Owo aahooniherya wi aanachuna opatisiwa!—Saweriwa T’arummwa 8:26-36.
2. Ntakhara heeni munaphwanela wuupuwela phaama vooloca sa opatiso?
2 Wakhala wi nyuwo moohuserya mwawiichaalela miyaha ivinre sa liivuru ola ni mmoha a Anamoona a Yehova, nyuwo munaphwanela wiikoha: ‘Tiheeni enakihiiha miyo wi kihipatisiwe?’ Hiihaano nyuwo moohuserya vooloca sa yoolaiherya ya Piipiliya ya okumi woohimala mu Parataiso. (Luka 23:43; Wupulula 21:3, 4) Moohuserya tho vooloca sa mukhalelo wa achu ookhwa ni ewehereryo ya ovinya muukhwani. (Eklesiyaste 9:5; Yohani 5:28, 29) Akhweya nyuwo moophiya va mithukumano wa muloko wa Anamoona a Yehova nave moona mukhatinyu wi awo anneerano malapelo eeparipari. (Yohani 13:35) Eyo echu yoochuneya, nyuwo moopacerya wunnuwiha waataana wanyu ni Yehova Muluku.
3. (a) Tiheeni Yesu aalamulenleiye oomuchara awe? (b) Opatiso onapakiwa hai?
3 Nyuwo munahaala wooniherya hai wi munnachuna omurumeela Muluku? Yesu aahaaleela oomuchara awe: “Haweni, mwahusihe atxhu othene, mwapatisaka.” (Mateu 28:19) Yesu mukhateiye oovaha yootakiherya moorweela wa opatisiwa mmaahini. Owo haamiseryiwe maahi, naari oheliwa maahi vakhaani vamuruni. (Mateu 3:16) Nsu nawi “opatiso” nnarweela mu nsu na Ekriki nnataphulela “opwina.” Mwawiihiiha opatiso Weekiristu onataphulela opwinihiwa moomalela, naari oruweiwa mmaahini.
4. Opatiso wa mmaahini onathoonyerya eheeni?
4 Opatiso wa mmaahini ti nlamulo wa achu oothene yaale anachuna okhalano waataana ni Yehova Muluku. Onathoonyerya vanlakani ochuna wanyu omurumeela Muluku. Onathoonyerya tho wi nyuwo munnasiveliwa weera yookhwela ya Yehova. (Salumu 40:7, 8) Vanonto, wi mphwanelele opatiso, sookhalavo ichu munaphwanelaanyu okhwaaniherya.
NINNACHUNEYA NSUWELIHO NI NROROMELO
5. (a) Echu taani yoopacerya munaphwanelaanyu weera wi mphwanelele opatiso? (b) Ntakhara heeni mithukumano Yeekiristu ti soochuneya?
5 Nyuwo moopacerya okhwaaniherya echu yoopacerya. Mano mwawiihai? Mwa okhalano nsuweliho na Yehova Muluku ni Yesu Kiristu, moorweela wa omuhuserya Piipiliya mwamvai. (Mwaalakhanye Yohani 17:3.) Nyenya sookhalavo ichu sincipale wi muhuserye. Akiristu anachuna okhala ‘osareya osuwela wa okhwela [wa Muluku].’ (Kolosi 1:9) Ophiya mmithukumano sa Anamoona a Yehova moohihiyererya echu yoochuneyaxa. (Ahebri 10:24, 25) Eyo enahaala wookhaviheryaani waacererya nsuweliho nanyu vooloca sa Muluku.
6. Nsuweliho taani na Piipiliya nnachuneya okhalano wi mphwanelele opatiso?
6 Mwevelevelo, tahi yoochuneya osuwela ichu soothene sa Mpiipiliyani wi mphwanelele opatiso. Nahota a Etiyopiya aarino nsuweliho vakhaani, nyenya owo aachuna nikhaviheryo wi iwexexe makupa makina a Soorempwa. (Saweriwa T’arummwa 8:30, 31) Moophwanaphwana, sookhalavo ichu sincipale wi muhuserye. Mweeparipari, nyuwo hamunahaala omaala ohuserya vooloca sa Muluku. (Eklesiyaste 3:11) Nyenyanto, muhaakumve opatisiwa, munaphwanela osuwela ni weemererya soohusiha soopacerya sa Piipiliya. (Ahebri 5:12) Soohusiha iho inaphitaanyerya eparipari vooloca sa mukhalelo wa achu ookhwa, nsina na Muluku ni Omwene awe.
7. Yoohuserya ya Piipiliya enaphwanela woovolowelaani mwawiihai?
7 Vanonto, okhalano nsuweliho pahiru honaakhwana, “mutxhu ohirino wemererya [nroromelo] hanawerya omusivela Muluku.” (Ahebri 11:6) Piipiliya onnanleela wi vaavaa achu akina o Korinto yiiwalaaya michaka yaphaama, “yàwemererya Apwiya ni yàpatisiwa.” (Saweriwa T’arummwa 18:8) Moolikana, yoohuserya ya Piipiliya enaphwanela woovahaani nroromelo wi ala ti Masu ooveereliwa a Muluku. Yoohuserya ya Piipiliya enaphwanela wookhaviheryaani okhalano nroromelo mu soolaiherya sa Muluku ni mu ikuru sa ovuluxa sa mukucho wa Yesu.—Yosuwa 23:14; Saweriwa T’arummwa 4:12; 2 Timóteo 3:16, 17.
WAALEELA ACHU AKINA EPARIPARI YA PIIPILIYA
8. Tiheeni enahaala oweerihaani waaleela achu akina yeeyo muhusenryaanyu?
8 Vaavaa nroromelo nnannuwaaya mmurimani mwanyu, nyuwo munahaala woona okhala woovila ohaaleela achu akina yeeyo muhusenryaanyu. (Yeremiya 20:9) Nyuwo munahaala okhalano nchuno waaleela achu akina vooloca sa Muluku ni sookhwela sawe.—Mwaalakhanye 2 Korinto 4:13.
9, 10. (a) Taani munaphwanelaanyu opacerya waaleela eparipari ya Piipiliya? (b) Tiheeni munaphwanelaanyu weera wakhala wi munnachuna ovolowa mmuteko woolaleerya onapakiwa ni Anamoona a Yehova?
9 Mpacerye oloca eparipari ya Piipiliya, wa amusi anyu, asinthamwene anyu, amwaacamani anyu, ni akhwiinyu oomutekoni. Moovira wa elukuluku, munahaala ochuna ovolowa mmuteko woolaleerya onapakiwa ni Anamoona a Yehova. Mwawiihiiha, khalani ootaphuwa wi muloce mwaha ola ni Namoona yoowo onoohusihaani Piipiliya. Wakhala wi munnaphwanelela opaka makupa mmuteko wa olaleerya, anahaala opakiwa marehereryo wi nyuwo vamoha ni muhusiha anyu muthukumane ni asitokweene eeli a muloko.
10 Ela enahaala oweerihaani waasuwela phaama asitokweene akina Eekiristu, yaawo anakukhula muloko wa Muluku. (Saweriwa T’arummwa 20:28; 1 Pedro 5:2, 3) Wakhala wi asitokweene ala ahoona wi nyuwo munniiwexexa nave munnaroromela soohusiha soopacerya sa Piipiliya, nave wi munnakhala mwawiiwanana ni malamulo a Muluku, nave wi munnachuna okhala Namoona a Yehova, awo anahaala wooleelaani wi munnaphwanelela ovolowa mmuteko wa mmacani ntoko mulaleeryi oohipatisiwa a michaka yaphaama.
11. Matorokelo taani achu akina anaphwanelaaya opaka wi ephwanelele muteko wa mmacani?
11 Asitokweene awo akhweya anamoona wi nyuwo munaphwanela otoroka makhalelo makina a okumi anyu ni saweera sanyu wi mphwanelele muteko wa mmacani. Ela enaphitaanyerya ohiya saweera sikina seiyo saari soovitheya wa achu akina. Mwawiihiiha, muhaakumve oveka wi mukhale mulipa oolaleerya oohipatisiwa, munaphwanela okhala ootaphuwa wa soocheka soothene itokotoko, ntoko okonihana woohiphwanelela, ohapaliwa, ni olya mirece sootakhala.—Mwaalakhanye 1 Korinto 6:9, 10; Galasya 5:19-21.
OLAPHA NI ORUKUNUWA
12. Ntakhara heeni olapha ti woochuneya?
12 Nyuwo munaphwanela okhwaaniherya ichu ikina wi mphwanelele opatiso. Murummwa Petro ooloca: “Mulaphe, nave murukunuse mirima sanyu, wi sotxheka sanyu ileveleliwe.” (Saweriwa T’arummwa 3:19) Olapha onataphulela wiikhupanyerya weeparipari ntakhara ichu soonanara mpankaanyu. Mwawooneyaxa olapha ti woochuneya wakhala wi muchu owo aarino meecelo oonanara, nyenya ti woochuneya tho naamwi muchu owo ahaarino meecelo oonanara. Ntakhara heeni? Nthowa nawi achu oothene annacheka nave annachuna okhurumuweliwa ti Muluku. (Aroma 3:23; 5:12) Muhaakumve omuhuserya Piipiliya, nyuwo hamwaasuwela yookhwela ya Muluku. Mwawiihiiha, mwahaala owerya hai okhala mwawiiwanana ni yookhwela awe? Nthowa na yeeyo, olapha ti woochuneya.
13. Orukunuwa tiheeni?
13 Olapha onaphwanela ochareliwa ni orukunuwa naari ‘otoroka.’ Hamunaphwanela weemoona wiikhupanyerya. Munaphwanela okhooca meecelo a okumi anyu wa khalai ni othanla moolipa wi opacerya hiihaano oya muhoolo nyuwo munahaala weera yeeyo eri yaphaama. Olapha ni orukunuwa ichu munaphwanelaanyu okhwaaniherya muhaakumve opatisiwa.
WIIVELEELA WANYU MUKHATINYU
14. Echu taani yoochuneya munaphwanelaanyu okhwaaniherya muhaakumve opatisiwa?
14 Yookhalavo echu ekina yoochuneya munaphwanelaanyu okhwaaniherya muhaakumve opatisiwa. Nyuwo munaphwanela wiiveleela mukhatinyu wa Yehova Muluku.
15, 16. Wiiveleela mukhatinyu wa Muluku onataphulela eheeni, nave tiheeni enamweeriha muchu weera ela?
15 Vaavaa muniiveleelaanyu mukhatinyu wa Yehova Muluku mu nivekelo neeparipari, munalakana omurumeela yoowo pahiru okhala wookhala. (Malamulo 6:15) Vano, ntakhara heeni muchu onnaphwanela weera eyo? Wi naakhule nikoho nla hankooni nipharihele niphwanaphwaniho nla: Nkaanyiheryani wi mulopwana omwaakamela muthiyana. Vaavaa owo onamusuweleiye phaama muthiyana owo ni woona wi ookhalano makhalelo aphaama, omusivela wawe onahaala wunnuwa. Voovira wa elukuluku, owo onahaala omveka muthiyana owo wi amuthele. Mweeparipari, othela onahaala otaphulela okhalano mirici sawaacererya. Nyenya osivela onahaala omuceenyerya mulopwana owo okhwaaniherya echu eyo yoochuneya.
16 Vaavaa nyuwo munamusuwelaanyu ni omusivela Yehova, munahaala ochuna omurumeela yoowo ni murima anyu woothene ni ohikhalano mphimo mu omulapela wanyu. Muchu ori oothene onachuna omuchara Mwaana a Muluku, Yesu Kiristu, onaphwanela “ikhotxe mukhateiye.” (Marko 8:34) Hiyaano ninnikhooca mukhatiihu moorweela wa wiikasopa wi soochuna sahu sihinooceelihe omwiiwelela Muluku. Mwawiihiiha, muhaakumve opatisiwa, weera yookhwela ya Muluku enaphwanela okhala echu yoochuneyaxa mu okumi anyu.—Mwaalakhanye 1 Pedro 4: 2.
OVOOTHA WOOVA OCHEKA
17. Ntakhara heeni achu akina annoovelela wiiveleela wa Muluku?
17 Achu akina annoovelela wiiveleela wa Yehova nthowa na woova opaka yoocheka. Awo akhweya anoova wi ntoko Akiristu awiiveleela, anahaala okhalano mulacu wa Muluku. Yoovaka wi anahaala ocheka ni omuthananiha Yehova, awo anuupuwela wi ti waphaama ohiiveleela wa yoowo.
18. Tiheeni enahaala oweerihaani wiiveleela wa Muluku?
18 Vaavaa munahuseryaanyu omusivela Muluku, nyuwo munahaala ochuna wiiveleela wa yoowo ni opaka yeeyo munaweryaanyu wi mukhaleke mwawiiwanana ni wiiveleela wanyu. (Eklesiyaste 5:4) Mmanle wiiveleela, onahaala okhala woochuneya otitelela “otxhara metxelo awaphwanelela Apwiya wi mwasivelihe mwa sothene.” (Kolosi 1:10) Nthowa na omusivela wanyu Muluku, nyuwo hamunahaala wuupuwela wi ti woovila weera yookhwela awe. Moohikhwa minikwa, munahaala weemererya yeeyo murummwa Yohani, orempeiye: “Okhwela wa Muluku ti wu: okhapelele malamulo awe. Nave malamulo awe hanalimela.”—1 Yohani 5:3.
19. Ntakhara heeni hamunaphwanela woova wiiveleela wa Muluku?
19 Nyuwo hamunaphwanela okhala oophaameya wi mwiiveleela wa Muluku. Yehova onnasuwela opakiwa wanyu nave hanaveka ichu sincipale wa nyuwo ohiya yeeyo munaweryaanyu weera. (Salumu 103:14) Owo onachuna wi nyuwo mukhale phaama nave onahaala woolipihaani ni wookhaviheryaani nyuwo. (Mwaalakhanye Isaiya 41:10.) Musuwele wi, mwamuroromela Yehova ni murima anyu woothene, owo “onamothònyerya ephiro yaphama.”—Masiposipo 3:5, 6.
MOONIHERYE WIIVELEELA WANYU MOORWEELA WA OPATISO
20. Ntakhara heeni wiiveleela wa Yehova tahi mwaha wa weephiini?
20 Wuupuwelela ichu seiyo nthokoronryaahu inahaala wookhaviheryaani wiiveleela mukhatinyu wa Yehova mu nivekelo. Muchu ori oothene onamusivela Muluku chiryene onaphwanela tho “olokoha” vanlakani wi avuluxiwe. (Aroma 10:10) Munii muloce vanlakani mwawiihai?
21, 22. Nyuwo munahaala wooniherya mwawiihai “olokoha” vanlakani sa nroromelo nanyu?
21 Munaphwanela omuleela muhooleli a nikhuuru na atokweene a muloko anyu wi munnachuna opatisiwa. Owo onahaala opaka marehereryo wi asitokweene akina yoopakeleeni makoho a soohusiha soopacerya sa Piipiliya. Wakhala wi asitokweene ala anneemererya wi nyuwo munnaphwanelela opatiso, awo anahaala wooleelaani wi munahaala opatisiwa mmuthukumano onacharela.a Mwaha onathokororya yootaphulela ya opatiso ikwaha sincipale onnalociwa mmithukumano seiyo. Voocharela, namaloca onnaaveka alipa a wiiveleela ntakhara opatiso wi yaakhule makoho meeli ookhweya, ntoko mukhalelo mmoha wa “olokoha” vanlakani nroromelo naya.
22 Opatiso onnooniherya vanlakani wi nyuwo mohiiveleela wa Muluku nave wi vano mwa mmoha a Anamoona a Yehova. Alipa a wiiveleela ntakhara opatiso annapwinihiwa mmaahini moomalela wi yooniherye vanlakani wi awo ahiiveleela wa Yehova.
YOOTAPHULELA YA OPATISO ANYU
23. Opatisiwa “mu nsina na Atithi, na Mwana, na Munepa Wawela” onataphulela heeni?
23 Yesu aaloca wi oohuserya awe yahaala opatisiwa “mu nsina na Atithi, na Mwana, na Munepa Wawela.” (Mateu 28:19) Ela enataphulela wi mulipa a wiiveleela ntakhara opatiso onnasuwela otokweene wa Yehova Muluku ni wa Yesu Kiristu. (Salumu 83:18; Mateu 28:18) Owo tho onnasuwela muteko wa munepa waweela, naari ikuru sa Muluku.—Galasya 5:22, 23; 2 Pedro 1:21.
24, 25. (a) Opatiso onataphulela eheeni? (b) Nikoho taani nnaphwanela waakhuliwa?
24 Vano, opatiso tahi yaweera ya opwina mmaahini pahiru. Opatiso onasiphela echu ekina yoochuneya. Opwinihiwa mmaahini enasiphela wi nyuwo mookhwa ntakhara meecelo a okumi anyu wa khalai. Okumihiwa mmaahini enathoonyerya wi nyuwo vano mwa mukumi wi mweere yookhwela ya Muluku. Muhicuwale wi mwiivelenle wa Yehova Muluku, tahi wa muteko, wa echu, wa achu akina, naari wa marehereryo. Wiiveleela wanyu ni opatiso mapacereryo a onthamwene ni Muluku—waataana woolipa ni yoowo.—Salumu 25:14.
25 Opatiso honataphulela ovuluxiwa. Murummwa Paulo oorepa: “Mulapeleke ovuluwa wanyu ni wova ni othukumela.” (Filipi 2:12) Opatiso ti mapacereryo pahiru. Vano nikoho ti nla: Nyuwo munii nwerye hai wiikhapelela mu osivela wa Muluku? Mwaha wookuchulela onahaala waakhula.
[Nsu na vathi]
a Opatiso marehereryo anapaka makupa va mithukumano mitokotoko sa Anamoona a Yehova eyaakha ti eyaakha.
PIIPILIYA ONAHUSIHA EHEENI
▪ Opatiso Weekiristu ori opwinihiwa moomalela mmaahini, ohiya omiseryiwa maahi.—Mateu 3:16.
▪ Ichu inahoolela opatiso inapacerya ni okhalano nsuweliho ni wooniherya nroromelo enachareliwa ni olapha, orukunuwa, ni wiiveleela muchu mukhateiye wa Muluku.—Yohani 17:3; Saweriwa T’arummwa 3:19; 18:8.
▪ Wi mwiiveleele wa Yehova, nyuwo munaphwanela wiikhooca mukhatinyu, hiihaa ntoko achu akina yiikhoncaaya wi emuchare Yesu.—Marko 8:34.
▪ Opatiso onasiphela okhwa ntakhara meecelo a okumi anyu wa khalai ni okookela okhala mukumi wi mweere yookhwela ya Muluku.—1 Pedro 4:2.
[Eruku va epaaxina 180]
Okhalano nsuweliho neeparipari na Masu a Muluku ti yoochuneya wi mphwanelele opatiso
[Eruku va epaaxina 180]
Nroromelo nnahaala oweerihaani waaleela achu akina vooloca sa yeeyo munaroromelaanyu
[Eruku va epaaxina 181]
Nyuwo mohiiveleela mukhatinyu wa Muluku mu nivekelo?
[Eruku va epaaxina 181]
Opatiso onataphulela okhwa ntakhara meecelo a okumi anyu wa khalai ni okookela okhala mukumi wi mweere yookhwela ya Muluku