Muhuserye Mukhalelo Yesu Ovoontheiye Saweeha

Yesu amanle opatisiwa ti Yohani, munepa wa Muluku onnamukeriha Yesu o ntakhwa no Yuteya. Owo onnakhalano sincipale wi uupuwelele. Mu opatisiwa wawe, “wirimu wàhuleyawo.” (Mateu 3:16) Owo onnawerya wuupuwelela ichu ikina aahusenryeiye ni aapankeiye wirimu. Opwaha seiya, sookhalavo sincipale wi uupuwelele!

Yesu oomaliha mahiku makhumi masese ohiyu ni othana ari otakhwani. Variyari va elukuluku yeeyo, halyiileru echu. Voocharela, vaavaa Yesu otempeiye ovoliwa etala, Satana Musaserya onnamwaacamela wi amweehe, alocaka: “Warì mwana a Muluku, olotxele maluku ala ethatuwe iphau.” (Mateu 4:3) Asuwelaka wi ti yoonanara opharihela mootikhiniha ikuru sawe wi akhwaaniherye yoochunaawe, Yesu onnakhooca yaweeha yeeyo.

Musaserya hakotenle vaava. Onneererya mu elukuluku ekina. Onnamweererya Yesu wi acuphe vasulu va empa ya Muluku. Nyenya Yesu heemerenrye wiimorihela vathi wi avulusiwe ni ankeelo. Aromolaka Soorempwa, Yesu onnooniherya wi ti yoonanara omweeha Muluku mmukhalelo yoowo.

Voocharela, mu yaweeha yaneeraru, Musaserya onnamooniha Yesu “somwene sothene sa mwelaponi ni ovuwa waya wothene” nave onnaloca: “Kinahawela wovaha itxhu sothene iha, wakokhorà okepesa.” Wanawiili moolipa murima Yesu onnakhooca ariki: “Pwahavo satana.” (Mateu 4:8-10) Owo haneemererya omorela muweehiwani wi apake yoonanara, asuwelaka wi Yehova pahiru tonamphwanela okokhoreliwa. Mweeparipari, owo onnathanla okhala oororomeleya wa Muluku.

Nnanwerya ohuseryavo echu orweela wa saweeha seiya ni mukhalelo Yesu aakhulenleiye. Musaserya ookhala nave yoopatusiwa yoomunepani, mwawiihiiha yaweereya yeela ennooniherya wi Musaserya tonalamulela elapo. Waakhanle wi hooye, haahaala opharihela iho wi amweeheno Kristu.

Opwaha yeeyo, Musaserya aahiloca wi aahaala omvaha nchuwelo Yesu waakhanle wi oomweepesa, ophiyerya omvaha Yesu omwene woothene wa mweelaponi. Musaserya onamweererya oneeha mmukhalelo woolikana, akhweya ahelaka variyari vahu ikari inahaala okhala saweeha wi nikhaleno muhakhu, owerya naari ovuwa. Ninnooniherya miruku vaavaa nnacharihaahu yootakiherya ya Yesu moorweela wa otitelela okhala oororomeleya wa Muluku moohipwacha yaweeha ene! Nyenya muupuwele wi Musaserya aahimuhiya Yesu “ophiyerya elukuluku yophwanelela.” (Luka 4:13) Eyo akhweya enamweereya ni hiyaano, nyenya niheemererya oyeleela wiikhapelela wahu.