Piipiliya Michaka sa Muluku wa Hiyaano

Yehova oonivaha Piipiliya. Eyo yamahala yaphaama erino aliivuru 66 akhaani. Akhweya munamwiikoha: ‘Piipiliya orweenle woowi? Taani ori mwaneene?’ Wi naakhule makoho yaala, hankooni nthokororye ti mwawiihai michaka sa Muluku inaphwanyeya Mpiipiliyani iphin’yaaya wa hiyaano.

1. Waakhanle wi achu tamurempe Piipiliya, ti mwawiihai Muluku oreiye Mwaneene?

Piipiliya orempwe ni achu awaakhwana 40 variyari va iyaakha 1.600 ovinyerya 1513 E.E.K. ophiyerya 98 E.K. Nave alipa oomurepa yaarweenle mmapuro oohiyanahiyana. Naamwi hiihaa, makupa oothene a Mpiipiliyani anniiwanana. Eyo enaweryeya hai? Nthowa nawi Muluku Mwaneene a Piipiliya. (Mwaalakhanye 1 Tesalónika 2:13.) Alipa oomurepa Piipiliya hiyaarempe miyuupuwelo saya. Ohiya yeeyo, awo “ehooleliwaka ti Munepa waweela ti yaaloca masu ookhuma wa Muluku.”a (2 Pedro 1:21) Muluku aahipharihela munepa awe waweela wi aaveerele, naari waaceenyerya, alopwana wi erepe miyuupuwelo sawe.—2 Timóteo 3:16.

2. Taani onaphwanela okhalano Piipiliya?

Achu ‘a ilapo, a mahimo, a ilocelo ni a maloko’ oothene ananwerya ophuravo ni michaka saphaama inaphwanyeya Mpiipiliyani. (Mwaalakhanye Wupulula 14:6.) Muluku oheeriha wi Piipiliya aphwanyeyeke mu ilocelo sincipale opwaha liivuru vyakala mmiyaha sa achu. Achu ancipale aakhalano ekari ya okhalano Piipiliya. Ela eparipari moohiphwacha elapo achu anakhalaayawo naari elocelo awo analocaaya.

3. Yehova omukhapelenle hai Piipiliya?

Piipiliya aarempwe mu ichu soovyavyaala ni ihinalekela, ntoko esapala ni papiru. Nyenya achu yaamusivela Piipiliya yaanamukhapelela emukopiyaaraka ni omurepa wiiliwiili ni mata. Naamwi achu oowerya yeerenrye omutoloxa Piipiliya, akina yaanahela ikumi saya va yawoopiha wi emukhapelele yoowo. Yehova heemerenrye wi muchu naari echu vyakala emmaalihe oloca ni hiyaano. Piipiliya onii: “Masu a Muluku ahu tookhala wookhala.”—Isaiya 40:8.

OHUSERYA MWAWIISEELA

4. Piipiliya onnanleela Mwaneene

Moone EXILEMA. Voocharela mwaalakhanye 2 Timóteo 3:16, nave muthokororye makoho anacharela.

EXILEMA: Mwaneene a Piipiliya Taani?—Makupa Akwatiwe (2:48)

• Waakhanle wi achu tamurempe Piipiliya, ntakhara heeni oniichaniweiye Masu a Muluku?

• Apwanne munneemererya wi Muluku aahaala waapharihela achu wi erepe miyuupuwelo sawe?

5. Piipiliya ookophola mu otoloxiwa

EXILEMA: Awo Yaanamucicimiha Piipiliya—Makupa Akwatiwe (William Tyndale) (6:17)

• Apwanne osuwela wi achu ancipale yaahiilipiserya wi emukhapelele Piipiliya ennaweerihaani omwaalakhanya? Ntakhara heeni?

Mwaalakhanye Salumu 119:97, nave muthokororye nikoho nla:

• Tiheeni yaaceenyenrye achu ancipale ohela ikumi saya va yawoopiha wi emutaphulele ni omukawa Piipiliya?

6. Liivuru wa achu oothene

Piipiliya liivuru yoowo otaphuleliwe ni okaiwa vancipale mmiyaha sa achu. Mwaalakhanye Saweriwa T’arummwa 10:34, 35, nave muthokororye makoho ala:

• Ntakhara heeni Muluku onachuna wi Masu awe etaphuleliwe ni okaiwa vancipale?

• Tiheeni enoosivelaani vooloca sa Piipiliya?

MUKWASU

Piipiliya Masu a Muluku, nave owo aaroromeliha wi aahaala ophwanyeyaka wa achu oothene.

Makoho awuuluulela

• Enataphulela eheeni vaavaa nnalocaahu wi Muluku aahaaveerela achu wi emurepe Piipiliya?

• Tiheeni enootikinihaani vooloca sa okhapeleliwa, otaphuleliwa, ni okaiwa wa Piipiliya?

• Munoona hai osuwela wi Muluku aapaka marehereryo yaala oothene wi aloceke ni nyuwaano?

OTHOLATHOLA

Mwaalakhanye miyaha sa Piipiliya—ovinyerya soorempwa ni mata soopacerya ophiyerya otaphuleliwa mmahiku ahu.

“Como a Bíblia chegou até nós” (Despertai!, novembro de 2007)

Muhuserye ti mwawiihai Piipiliya aakophonleiye mu sawoopiha raru ovinyerya vaavaa aataphuleliweiye.

“A incrível história da sobrevivência da Bíblia” (A Sentinela, n.º 4 de 2016)

Moone sawoopiha achu yaahoolenlaaya wi emutaphulele Piipiliya.

Eles amavam a Bíblia(14:26)

Piipiliya ookopiyaariwa ni ootaphuleliwa mu ikwaha sincipale. Muni muroromele hai wi Masu a Muluku hatoroken’ye?

“A Bíblia foi alterada?” (Artigo do jw.org)