MWAHA 30
Oosiveliwa Anyu Yaawo Akhwile Anamukookela Okhala Akumi!
Okhwa onnaruuha makacamiho ni wiicela otokotoko. Ti nthowa nene Piipiliya oniichaneiye okhwa ntoko mwiicani. (1 Korinto 15:26) Mmwaha 27, moohuserya wi Yehova onahaala ommaliha mwiicani yoola. Vano tiheeni eni yeereye ni yaale akhwile? Mmwaha yoola, munahaala ohuserya vooloca sa yoolaiherya yootikhiniha ya Yehova. Owo onahaala waaviha macikhwi macikhweene a achu yaawo akhwile wi epuhe ekumi okhala wookhala! Apwanne eyo enahaala weereya chiryene? Vano achu awo yaviihiwa anahaala okhala wirimu naari veelaponi ya vathi?
1. Tiheeni Yehova onachuneiye oweerela amusi ni asinthamwene ahu akhwile?
Yehova onnachuna waaviha yaale akhwile. Mulopwana a nroromelo iichaniwa Yobi aanaroromela wi Muluku haahaala omucuwala vaavaa owo eereiye akhwe. Owo aahiloca wa Muluku ariki: “Mukiichanne, miyo kaamwaakhula [mmahiyeni].”—Mwaalakhanye Yobi 14:13-15.
2. Nnasuwela hai wi alipa ookhwa anamviihiwa?
Vaavaa Yesu aareiye veelaponi ya vathi, Muluku aamvaha owerya wa waaviiha achu ookhwa. Yesu aahimviiha nahano a iyaakha 12 vamoha ni mwaana a mwaamulopwana a naamukhweli. (Marko 5:41, 42; Luka 7:12-15) Ohoolo waya, nthamwene a Yesu, Lasaro, aahikhwa. Naamwi Lasaro aamalinhe mahiku maxexe akhwileene, owo aamviiha mookhwani. Yesu amanle ovekela owo aahi: “Laasaro, okhumele vaate!” Nave “muchu yoole aari ookhwa, aakhuma.” (Yohani 11:43, 44) Mwaanyiherye mukhalelo amusi ni asinthamwene yaaryaaya oohakalala!
3. Yoowehererya taani erivovo wa oosiveliwa anyu akhwile?
Piipiliya onnalaiherya: “Onarwa aaviha wookhwani.” (Saweriwa T’arummwa 24:15) Achu yaawo Yesu aaviihaleiye khalai hekelewo wirimu. (Yohani 3:13) Awo anamukhala oohakalala okookela okhala akumi veelaponi yavathi. Moolikana, Yesu onahaala waaviiha macikhwi macikhweene aachu wi epuhe okumi okhala wookhala mu parataiso veelaponi ya vathi. Owo aahiloca wi “oothene yaawo anuupuweleliwa ti Muluku”—anahaala oviihiwa, naamwi ekhalaka ntoko aacuwaliwa.—Yohani 5:28, 29.
OHUSERYA MWAWIISEELA
Moone Mpiipiliyani sawooniherya sawi achu ookhwa ananwerya oviihiwa nave tho wi eyo enahaala weereya chiryene. Moone tho ti mwawiihai ovinya mookhwani oneeraaya woovaheeni ewehereryo ni nihakararyo.
4. Yesu ohooniherya wi onanwerya waaviha alipa ookhwa
Muhuserye sincipale vooloca sa yeeyo Yesu enreiye wa nthamwene awe, Lasaro. Mwaalakhanye Yohani 11:14, 38-44, nave mvaanele sa makoho anacharela:
Nnasuwela hai wi Lasaro aakhwa chiryene? —Moone eversikulu 39.
Yesu aamviiha Lasaro wi akookele okhala veelaponi yeela yavathi. Waakhanle wi Lasaro aakele wirimu munoona wi Yesu anwerya weerano yeela?
5. Achu ancipale anahaala oviihiwa!
Mwaalakhanye Salumu 37:29, nave voocharela muthokororye nikoho nla:
Macikhwi macikhweene aachu anahaala oviihiwa anaya okhala woowi?
Yesu onahaala waaviha achu ancipale, ohiya pahiru yaale yaamurumeela Yehova. Mwaalakhanye Saweriwa T’arummwa 24:15, nave voocharela muthokororye nikoho nla:
Taani mwaahaalaanyu omoona aviihiwe mookhwani?
Muupuwele ela: Yesu onanwerya omviiha muchu mookhweya hiiha ntoko tiithi onamviiheiye mwanawe onarupa
6. Ovinya mookhwani onanwerya woovahaani nihakararyo ni ewehereryo
Yaweereya ya Mpiipiliyani ya ovinya mookhwani wa mwaana a Xairo yaahaalipiha ni waahakararya ancipale yaawo yaathanana. Mwaalakhanye yaweereya yeela yeeparipari mu Luka 8:40-42, 49-56.
Ahaakumve omviiha mwaana a mwaamuthiyana a Xairu Yesu aahi wa apapa awe ariki: “Ohoove weeremuroromela pahiru.” (Moone eversikulu 50.) Ewehereryo ya ovinya mookhwani eni yookhaviheryeeni hai . . .
vaavaa onakhweiye oosiveliwa ahu?
vaavaa ekumi anyu enakhalaaya va yawoopiha?
Moone EXILEMA, nave voocharela muthokororye nikoho nla.
Ti mwawiihai ewehereryo ya ovinya mookhwani enaahakararyaaya ni waalipiha asitiithi a Phelicity?
ACHU AKINA ANI: “Ti woovila weemererya wi achu akhwile anamukookela okhala akumi.”
Nyuwaano munuupuwela hai?
Yoorepa taani mwaahaalaanyu opharihela enooniherya wi ovinya mookhwani onahaala weereya chiryene?
MUKWASU
Piipiliya oororomeliha wi achu yaale akhwile anahaala ovinya mookhwani. Yehova onnachuna waakookiherya okumi yaale akhwile, nave owo omvaha owerya Yesu wi aaviihe yaawo.
Makoho awuuluulela
Tiheeni Yehova ni Yesu anachunaaya opaka wa yaale akhwile?
Macikhwi macikhweene aachu anahaala oviihiwa anahaala okhala woowi—wirimu naari veelaponi? Ntakhara heeni munalocaanyu yeeyo?
Tiheeni enoolekechaani wi oosiveliwa anyu okhwile onahaala okookela okhala ni ekumi?
OTHOLATHOLA
Moone mikhalelo saphaama seiyo sinahaala wookhaviheryaani ovilela wiicela wa omuyeleela oosiveliwa anyu.
Apwanne malakiheryo a Mpiipiliyani ananwerya omukhaviherya muchu okhweliwe?
Ti mwawiihai nnahaalaahu omukhaviherya mwaana ovootha wiicela wa omuyeleela muchu mookhwani?
Apwanne ookhala onahaala oviihiwa mookhwani wi aye wirimu? Taani ani ehiviihiwe mookhwani?