Tesempuru

Apwanne Yehova ookhalano owerya wa waaviiha achu mookhwani? Moohikhwa minikwa, ookhalano! Owo ta “Ikuro Soothene.” (Wup. 1:8) Ookhalano ikuru sawaakhwanela sa omutoloxa mwiicani vyakala, ophiyerya tho okhwa. (1 Ako. 15:26) Noosuwela tho wi Yehova ookhalano owerya wa waaviiha achu akhwile nthowa nawi muupuwelo awe honakota. Owo onniichana etheneeri ti etheneeri ni nsina naya. (Yes. 40:26) Owo tho onnawuupuwela yaale akhwile. (Yupu 14:13; Luka 20:37, 38) Mookhweya onanwerya wuupuwela sooleeliherya soothene vooloca sa yaale onahaaleiye waaviiha mookhwani, ophitaanyerya mukhalelo yaaryaaya ni omuchu aya, saweereya sa okumi aya ni muupuwelo aya. Nnanwerya ororomela yoororomeliha ya Yehova ntakhara ovinya mookhwani omwaahiyu nthowa nawi noosuwela wi owo ookhalano nchuno ni owerya wa waakhwaniherya yeeyo. Muthokororye nthowa nikina na ororomela yoororomeliha ya Muluku ya waaviiha achu akhwile: Yehova oheerano yeela. Mu ilukuluku sa khalai, owo aahaavaha owerya alopwana oororomeleya avakhaani, ophitaanyerya Yesu wi yaaviihe alipa ookhwa. w23.04 ipaax. 9-10 ipara. 7-9

Vaavaa nnalocaahu mwaphaama ni moomaaleleya, achu anahaala okhalano nchuno ntokweene na oniwiriyana ni otitelela ovaanela. Eparipari wi wakhala wi muchu onnachuna waakhulana naari oloca moonanara soororomela sahu, hannakhinyereryiwa otitelela ovaanela ni omwaakhula muchu yoowo. (Mas. 26:4) Nyenya achu ancipale anahaala waakhulela phaama. Mweeparipari—ancipale anahaala—oniwiriyana. Mweeparipari, ninnaphura vancipale vaavaa nnakhalaahu achu oomaaleleya. Mvekele wa Yehova mvekaka ikuru munachunaanyu wi mutitelele okhala oomaaleleya vaavaa munaphwanelaanyu omwaakhula muchu onaakaaha naari oloca moonanara soororomela sanyu. Muupuwele wi naakhulo nanyu noomaaleleya nnanwerya osepa wi ochekula wanyu okhale waakhulana. Nave waakhula moomaaleleya ni ncicimiho onanwerya waakhaviherya akina ochuna owiriyana ni otoroka moonelo aya vooloca sa hiyo ni Piipiliya. Mukhale ‘ooreheryeya ilukuluku soothene wi mwaakihe’ soororomela sanyu, “mweerakano yeela mwawiichacala ni ncicimiho nawiixeela.” (1 Pet. 3:15) Mulakelele okhala oomaaleleya ilukuluku soothene ni wooniherya wi mwa muchu oolipa! w23.09 epaax. 19 ipara. 18-19

Moone mikhalelo misese seiho nnahaalaahu wooniherya opixa murima. Woopacerya, muchu oopixa murima hanaakuva oonyeenyeya. Vaavaa achu anamunyenyeihaaya, owo onnakhala oomaaleleya nave owo hanakookiha yoonanara wa akina. Owo hanaakhaliha akina moonanara naamwi ahoolelaka mikhalelo soovila. (Muk. 34:6) Yanaawiili, muchu oopixa murima onnawehererya moomaaleleya. Muchu oopixa murima onneererya okhala oomaaleleya ni oohuukhuwa vaavaa echu vyakala enalekelaaya opwaha mummo yawehereryiwaaya. (Mat. 18:26, 27) Yaneeraru, muchu opixa murima haneeravo echu ahuupuwelenle. Vaavaa muchu oopixa murima onakhaleiyeno echu wi apake, owo haneerano eyo ahaakumve wuupuwelela naari haneerano soothene moochimakiha wi akwaaxe mwawaakuveya. Ohiya yeeyo, owo onnaavya elukuluku wi awerye wuupuwelela mukhalelo onahaaleiye weerano ichu. Voocharela owo onnamaliha elukuluku yeeyo eri yoochuneya wi eereno soothene mwaphaama. Yaneesese, muchu oopixa murima onniilipixerya ohoolela makacamiho ahiikhupanyenrye. Owo onnapaka owetha wawe wi atitelele omurumeela Yehova moohakalala. (Ako. 1:11) Ntoko Akritu, nnaphwanela wooniherya mikhalelo soothesene seiya sa oopixa murima. w23.08 ipaax. 20-21 ipara. 3-6

Nthowa nimoha noochuneya nnaneeriha okhapelela murima ahu, tiwi Yehova onnaalikhela murima ahu. Moohiyana ni achu akina yaawo anoona mukhalelo ahu wa vaate, Yehova onnawerya waalikhela mukhalelo ahu wa mpuwa. Wakhala wi noosareiha muupuwelo ahu ni ikano sa miruku sa Yehova, owo onahaala onsivelaka nave tho onivaha ekumi yoohimala. (Yoh. 4:14) Mwawiihiiha, meecelo oohiphwanelela ni sawootha sa Satana hasinipahula nthowa nawi hinivahaka esisapo ichu seiha. (1 Yoh. 5:18, 19) Vaavaa nnamwaacamelaahu Yehova, omusivela ni omucicimiha wahu onahaala wunnuwa. Ninnamusivela vancipale Tiithi ahu Yehova, ophiyerya wi ninniica muupuwelo vyakala wa opaka yoocheka. Murokora mmoha awiichaniwa Marta onakhala o Krowasiya yoowo eehiwe wi apake ocapaheya, ooloca: “Wa miyaano, waari woovila wuupuwela phaama ni owaniha ni nchuno na opaka echu yoonanara pahiru mu ohakalala wa elukuluku ya vakhaani. Nto omoova Yehova waahikikhapelela.” Nyenya ti mwawiihai omoova Yehova waamukhavihenryaaya Marta? Marta ooloca wi aanuupuwelela sookhumelela sa opaka yoohesa. Nave hiyaano nnaphwanela opaka emohamoha. w23.06 ipaax. 20-21 ipara. 3-4

Yesu aanasuwela wi yookhwela ya Yehova waari weeliha nsina Nawe ni ovaanya sawootha seiyo saalociwa vooloca sa yoowo. Ti nthowa nene Yesu aahusinheiye oomuchara awe ovekelaka: “Atiithihu muri wirimu, nsina nanyu neelihiwe.” (Mat. 6:9) Yesu aaniiwexexa wi ela yaari echu yaavolowela ichu soothene. Hiyaavo yoopatuxiwa ekina wirimu epanke sincipale wi yeelihe nsina na Yehova ompwaha Yesu. Nyenya, vaavaa Yesu aaphariweiye, yoocheka taani amwiicani awe yaamothenryaaya? Onyemula! Mweeparipari, Yesu aanasuwela wi opharihela naari oloca moonanara nsina naweela na Atiithi awe yaari yoocheka etokweenexa muchu aahaaleiye opaka. Wootheriwa ni othoriheliwa yoocheka yeela yaahimuukhula vancipale. Akhweya nla naari nthowa ntokweenexa naamweerinhe Yesu okhala ‘awuukhuwaxa’ mu elukuluku ahaakumve ophariwa.—Luka 22:41-44. w24.02 epaax. 11 epara. 11

Mu ochimaka wahu ntakhara okumi, nnaphwanela omusivela vancipale Yehova ni Yesu opwaha mummo nnaasivelaahu achu aveemusini vahu. (Mat. 10:37) Nyenya eyo henataphulela wi hinnaphwanela othokororya mirici sahu sa veemusini. Moohiyana ni yeeyo, nnachuna omuhakalaliha Yehova ni Yesu, nave nnaphwanela othokororya mirici sahu sa veemusini. (1 Tim. 5:4, 8) Wakhala wi noheerano yeela, nnahaala okhala oohakalalaxa. Yehova onnasuwela wi ichoko inanwerya okhala soohakalala pahiru wakhala wi mulopwana ni muthiyana ennakhalihana mwa osivela ni ncicimiho, vaavaa asitiithi anaasivelaaya ni waahusiha anaaya ni vaavaa anamwane anawiiwelelaaya asitiithi aya. (Aef. 5:33; 6:1, 4) Moohipwacha waakhanle wi nyuwaano mwa mulopwana othenle, muthiyana otheliwe naari mwaana, echu yoochuneya ori opharihela ikano sa miruku sa Mpiipiliyani. Muheereryeke opaka echu yeeyo munoonaanyu wi ti yaphaama vamiithoni vanyu naari yookhovelela yawunlaana weiwo munakhalaanyuwo. Muheererye ochara ichu seiho achu aniiseera a masuwelelo analocaaya wi nyuwaano mpake. Mpharihele phaama soolaleeryiwa sahu inathipeleya Mpiipiliyani. Iho chiri, sinnaniruuhela sookhumelela saphaama vooloca sa opharihela malakiheryo a Mpiipiliyani. w23.08 epaax. 28 ipara. 6-7

Murokora ori mukiristu onaphwanela wunnuwiha mavyakelo oophara muteko. Ichu ikina sa seiha inanwerya ohuseryiwa ovinyerya woonamwaneni nave inanwerya okhaviherya mu okumi woothene. Ntoko yootakiherya, muhuserye waalakhanya ni orepa phaama. Mmapuro makina, achu anuupuwela wi osuwela waalakhanya ni orepa tahi woochuneya wa muthiyana. Nyenya ala mavyakelo oochuneyaxa wa Akristu oothene. (1 Tim. 4:13) Mwawiihiiha, muheemererye wi echu vyakala ewaakanyeryeeni ohuserya waalakhanya ni orepa phaama. Tisivi sinahaala okhala sookhumelela sene? Onahaala okhala wookhweyaxa wa nyuwo ophwanya muteko ni otitelela olapa. Nave tho munahaala okhala oohuserya a Piipiliya aphaama ni owerya waahusiha achu akina. Nyenya opwaha soothene, munahaala oweryaka omwaalakhanya Piipiliya ni wuupuwelela yeeyo erempwe mwemmo, nave hiihaa munahaala omwaacamela vancipale Yehova.—1 Tim. 4:15. w23.12 epaax. 20 ipara. 10-11

Mveke nikhaviheryo na Yehova wi mvoothe saweeha. Ntoko achu oohiphaameya, wiiliwiili nnaphwanela owaniha ni yaweeha ya opaka yeeyo eri yoonanara. Satana onnapaka ichu soothene onaweryeiye wi eerihe wi saweeha seiho sikhale soovila. Mukhalelo mmoha onaphariheleiye wi ananarihe muupuwelo ahu ori moorweela wa mathatelo ni ixilema soohiphwanelela. Ixilema ntoko seiho inanwerya oneeriha okhalano muupuwelo woohiphwanelela—muupuwelo yoowo onahaala oneeriha okhala ooriipiheya vamiithoni va Yehova ni oneeriha opaka soocheka itokweene. (Mar. 7:21-23; Tiy. 1:14, 15) Ninnachuna nikhaviheryo na Yehova wakhala wi ninnawaniha ni yaweeha ya opaka yeeyo eri yoonanara. Yesu aahiphitaanyerya yooveka enacharela mu nivekelo na ntakiheryo: “Muhinihiye mu weehiwani, nyenya munaakihe wa mulipa oonanara owo.” (Mat. 6:13) Yehova onnachuna onikhaviherya, nyenya nnaphwanela omveka nikhaviheryo nawe. Nnaphwanela weeraka ichu mwawiiwanana ni mavekelo ahu. w23.05 ipaax. 6-7 ipara. 15-17

Vaavaa atheli anavahaaya esisapo onthamwene aya ni Tiithi aya a wirimu, awo annakhala ooreheryerya opharihela ikano sawe, seiho sinaakhaviherya awo osepa ni ovootha makacamiho yaawo yaahaala weeriha wi osivela waya oriirye. Achu oolipa omunepani anniilipixerya tho omutakiherya Yehova ni wunnuwiha mikhalelo seiho owo onooniheryeiye, ntoko oreera murima, opixa murima ni okhurumuwela. (Aef. 4:32–5:1) Atheli yaawo anooniherya mikhalelo ntoko seiha, mookhweya, osivela waya onniinuwa. Murokora mmoha awiichaniwa Lena, yoowo otheliwe mu iyaakha opwaha 25, ooloca: “Onnakhala wookhweya omusivela ni omucicimiha muchu oolipa omunepani.” Muthokororye yootakiherya emoha ya Mpiipiliyani. Vaavaa Yehova aamuthanleiye mutheli wi amuyare Mesiya, Owo aahimuthanla Yosefe ni Mariya wa makholo ancipale a Tavite. Ntakhara heeni? Ooweeli yaahikhalano onthamwene woolipa ni Yehova nave Yehova aanasuwela wi awo yaahaala omukuha yoowo mu nipuro noopacerya mu othela waya. w23.05 epaax. 21 ipara. 3-4

Naamwi Muhooleli ahu, Yesu, ari oophaameya, yaale onaaphariheleiye wi yaahooleleke achu awe veelaponi yeela yavathi, toohiphaameya. Ti nthowa nene, ilukuluku ikina onakhalaaya woovila owiiwelela xaxaxa vaavaa ananivekaaya opaka echu yeeyo nihinachunaahu opaka. Mu ekwaha ekina, Petru aahikhalano nikacamiho na okhala awiiwelela. Owo aahaakhela nlakiheryo noorweela wa munkeelo wi aakhuure axinama yaawo yaari oothanyeya mwawiiwanana ni Nlamulo na Mose, nave Petru aahikhooca wiiwelela, ohiya pahiru mu ekwaha emoha, nyenya mu ikwaha raru! (Saw. 10:9-16) Ntakhara heeni Petru aaheerano yeela? Wa yene ohoolela yoole ovyaani hiwiiwexexeya. Mmakupa makina, murummwa Paulo aahiiwelela vaavaa Akristu yaahoolela o Yerusalemu yaamulenlaaya wi aakuxe alopwana axexe wi yiiseelihe mu empa ya Muluku. Mmukhalelo yoola, Paulo aahaala wooniherya wi aanacicimiha Nlamulo. Paulo aahisuwela wi Akristu hiyaaphwanela ocharihaka Nlamulo na Mose nave wi owo haapanke yoohesa. Naamwiihiiha, Paulo “aahaakuxa alopwana nave iiseeliha mwawiiwanana ni nlamulo vamoha ni yaawo.” (Saw. 21:23, 24, 26) Wiiwelela wa Paulo waahaakhaviherya anna okhala awiiwanana.—Aro. 14:19, 21. w23.10 epaax. 10 ipara. 15-16

Mwawooneya, waamukhala woovila wa nyuwaano oloca wi woova, mukhalelo woochuneya mu onthamwene. Yaale anachuna okhalano onthamwene woolipa ni Yehova, anaphwanela ‘omoovaka yoowo.’ Moohipwacha elukuluku nimalinhaahu nimurumeelaka Yehova, oothene ahu nnaphwanela omoovaka mmukhalelo woophwanelela. Omoova Muluku onataphulela eheeni? Omoova Yehova onataphulela omusivela vancipale Yene ni ohipaka echu vyakala yaahaala onanariha onthamwene ahu ni Yoowo. Ntoko yootakiherya, Yesu aahikhalano mukhalelo yoowo wa “omoova Muluku.” (Ahe. 5:7) Owo haamoova Yehova mmukhalelo woohiphwanelela. (Yes. 11:2, 3) Ohiya yeeyo, owo aanamusivela vancipale Yehova nave aanachuna omwiiwelela. (Yoh. 14:21, 31) Hiihaa ntoko Yesu, hiyaano ninnamucicimiha ni omutikhina vancipale Yehova, woona wi noosuwela wi owo toosivela, tamiruku, tawookololowa ni toowerya. Hiyaano tho noosuwela wi Yehova onnanisivela nave wi soothene nnapakaahu inanwerya omuhiciha naari omuhakalaliha.—Sal. 78:41; Mas. 27:11. w23.06 epaax. 14 ipara. 1-2; epaax. 15 epara. 5

Vaavaa Mwene Usiya aakhanleiye mulopwana ooweryaxa, owo aahicuwala ichu soothene saphaama seiho Yehova aampakenleiye. Tiheeni nnahuseryaahuvo? Nnaphwanela wuupuwelaka ilukuluku soothene wi mareeliho ahu oothene ni mirici sahu sinarwa wa Yehova. Ohiya wiirumiha ni ichu seiho nnaweryaahu opaka, nnaphwanela oveleelaka ncicimiho nahu noothene wa Yehova. (1 Ako. 4:7) Ohiya yeeyo, nnaphwanela okhala awiiyeviha ni osuwela wi naachu oohiphaameya nave ninnaphwanela olakiwa. Munna mmoha a iyaakha 60, oorepa: “Miyaano koohuserya ohikhala oonyeenyeya naari ooceecheya vaavaa akina anoonaaya soohesa saka. Ikwaha ikina kinnapaka soohesa soololo nave kinnavahiwa ikano nthowa na seiyo. Naamwiihiiha, kinneererya ni otitelela omvaha Yehova owetha waka.” Vaavaa nnamwiiwelelaahu Yehova ni otitelela okhala awiiyeviha, ninnakhalano ohakalala weeparipari.—Mas. 22:4. w23.09 epaax. 10 ipara. 10-11

Akristu oopacerya yaaphwanela ovilela. Ohiya pahiru ohoolela makacamiho yaawo yaari awunlaana wa achu oothene, awo tho yaahoolela saweeha sawaaceererya. Ancipale a yaawo yaahihoolela wiikariwa, ohiya pahiru ni ahooleli a malapelo a Ayuta naari athoriha o Roma, nyenya tho ni amusi aya. (Mat. 10:21) Nave mpuwa wa muloko, awo yaanaphwanela owaniha ni ovoloweliwa ni mahusiheryo oowoka a alipa oomwaryeya. (Saw. 20:29, 30) Mwawiihiiha, Akristu yaala yaahivilela. (Wup. 2:3) Mwawiihai? Awo yaahuupuwelela vooloca sa yootakiherya ya Mpiipiliyani sa ovilela wa Yupu. (Tiy. 5:10, 11) Awo yaavekela evekaka ikuru. (Saw. 4:29-31) Nave tho awo yaahitikitheryeya mu sookhumelela saphaama sa ovilela waya. (Saw. 5:41) Hiyaano tho nnanwerya ovilela wakhala wi ninnahuserya moohihiyererya sootakiherya sa ovilela sinaphwanyeya Mmasu a Muluku ni mu soolaleeryiwa sahu nave wuupuwelela seiho. w23.07 epaax. 3 ipara. 5-6

Yehova ni Yesu herwa enihiya. Murummwa Petru amanle omukhooca Yesu, aaphwanela opaka yoolakelela yoochuneya. Apwanne owo aahaala ohiya okhala oomuchara a Kristu naari aahaala otitelela ovilela? Yesu aahimveka Yehova ni murima woothene wi nroromelo na Petru nihiceecheye. Nave Yesu aahimuleela Petru wi aahipaka nivekelo nenlo nave aahooniherya wi aanaroromela wi Petru tho aahaala owerya waalipiha asinnawe. (Luka 22:31, 32) Moohikhwa minikwa Petru aanalipiheya vaavaa uupuweleiye yeeyo Yesu aalonceiye! Vaavaa nnachunaahu opaka yoolakelela yoochuneya mu okumi ahu, Yehova onanwerya waapharihela akukhula oosivela wi evahererye nlipiho nnachunaahu wi ntitelele okhala oororomeleya. (Aef. 4:8, 11) Hiihaa ntoko Yehova aavaherenryeiye soothowa soomwilini sa Petru ni sa arummwa akina, owo tho onahaala ovahererya soothowa sahu wakhala wi ninnakuha Omwene wa Muluku mu nipuro noopacerya mu okumi ahu. w23.09 ipaax. 24-25 ipara. 14-15

Yehova onnoona ophiyerya echu ekhaani nnaweerelaahu akina mooreera murima. Owo onnoona yeeyo ntoko mukucho wasisapo ni evaale yeeyo owo onahaaleiye oliva. Waakhanle wi morumeela ntoko murummwa orumeela naari mutokweene a mmulokoni, Yehova onnuupuwela muteko yoowo mphanraanyu khalai ni osivela yoowo wooceenyenryeeni weera. (1 Ako. 15:58) Owo onnoona osivela munatitelelaanyu wooniherya. Yehova onachuna wi oothene ahu ninnuwihe osivela wa yoowo nave tho ni wa akina. Hiyaano nnanwerya olipiha osivela wahu ntakhara Yehova moorweela wa waalakhanya Masu awe ni wuupuwelela vooloca sa yeeyo naalakhannyaahu ni oloca ni yoowo moohihiyererya mu nivekelo. Nnanwerya winnuwiha osivela wahu ntakhara annihu ni arokora, moorweela wa waakhaviherya mmukhalelo wawooneya. Vaavaa osivela wahu onannuwaaya, nnahaala okhala awaacameleyaxa ni Yehova vamoha ni emusi ahu yoomunepani. Nnahaala opuha onthamwene okhala wookhala! w23.07 epaax. 10 epara. 11; epaax. 11 epara. 13; epaax. 13 epara. 18

Mukristu ori oothene onaphwanela olakelela mukhalelo onahaaleiye okhapelela ekumi awe. Vaavaa Mukristu onayeiye olakelela mukhalelo wa oloola okumi awe, malamulo mamoha a Mpiipiliyani onayeiye opharihela ti yaawo analoca sa othanya nikhami ni onamulosiwe. (Saw. 15:20; Aka. 5:19, 20) Nto naamwiihiiha, Mukristu onaphwanela olakelela meekheiye mukhalelo wa oloola onahaaleiye weemererya. Hiyaano nnaphwanela ocicimiha ophwanelela munna ti munna oreiyeno wa olakelela oloola taani onahaaleiye opharihela, moohipwacha naaweemereryaka naari hooye. Mmukhalelo yoowo nnaphwanela okhalano mmuupuweloni ipontu inacharela: (1) Pahiru Omwene wa Muluku tonahaala omaliha ireca soothene. (Yes. 33:24) (2) Mukristu ori oothene onaphwanela ‘okhala oolekecheya’ moomalela wa yeeyo eri yaphaama wa yene. (Aro. 14:5) (3) Hinnaathoriha akina wa soolakelela anapakaaya, naari okhala nluku nookwaculiha wa yaawo. (Aro. 14:13) (4) Akristu annooniherya osivela nave aasuwela wi wiiwanana wa muloko ti woochuneya opwaha miyoonelo saya.—Aro. 14:15, 19, 20. w23.07 epaax. 24 epara. 15

Apwanne nyuwaano munnavaha esisapo onthamwene anyu ni Yehova? Moohikhwa minikwa aai! Ovinyerya mu ilukuluku sakhalai, achu ancipale oohaalakhanyeya anniisoona hiiha ntoko nyuwaano. (Sal. 104:33, 34) Ancipale yaahipaka wiilipixerya wi emulapele Yehova. Ti yeeyo yeeraaya Anasiri mu Aisarayeli khalai naari awiiveleela. Masu yaala annaathariha phaameene Aisarayeli amvai yaawo yaapanke owetha waya wi emurumeele Yehova mmukhalelo wavameekhaaya. Nlamulo na Mose naneemererya wi mulopwana naari muthiyana apake nlakano navameekhaaya wa Yehova, athanlaka okhala ntoko Nasiri mu elukuluku yammoori. (Nam. 6:1, 2) Nlakano nenla naari yoororomeliha yeela yavameekhaaya, yaanavolowela ochariha ikano seiho Aisarayeli akina yaahiryaayano ophwanelela ochariha. Mano ntakhara heeni Muisarayeli aanathanla opaka nlakano na okhala Nasiri? Muisarayeli owo akhweya aanaceenyeryiwa ni osivela wawiixeela wa Yehova ni othamalela mahala ni mareeliho Awe.—Malam. 6:5; 16:17. w24.02 epaax. 14 ipara. 1-2

Piipiliya wiiliwiili onnaloca sa “ororomeleya” naari “osivela woororomeleya” Muluku onawooniheryeiye asinthamwene awe. Piipiliya tho onnaloca sa ororomeleya yoowo alapeli a Muluku anooniheryanaaya mukina ni mukhwaawe. (2 Sam. 9:6, 7) Ororomeleya wahu onanwerya okhala woolipa moovira wa elukuluku. Vano hankooni noone mukhalelo ororomeleya wa Taniyeli waakhanlaaya woolipa. Ororomeleya wa Taniyeli ntakhara Yehova waaheehiwa variyari va okumi awe. Nyenya yaweeha etokweene yaakhumelenle vaavaa aareiyeno iyaakha opwaha 90. Ahooleli yaamulapela mwene Tariyu yaanamwiica Taniyeli nave tho hiyaamucicimiha Muluku awe. Mwawiihiiha, awo yaahipaka marehereryo wi emwiiphe Taniyeli. Awo yaahimweeriha mwene otikitherya nlamulo nenlo nahaala wooniherya waakhanle wi Taniyeli ahaala okhala ororomeleya wa Muluku naari wa mwene. Echu emoha Taniyeli aaphwaneleiye opaka wi ooniherye ororomeleya wa mwene waari omaala ovekela wa Yehova mu mahiku makhumi mararu. Taniyeli aahikhala oororomeleya wa Yehova.—Tan. 6:12-15, 20-22. w23.08 epaax. 5 ipara. 10-12

Yehova onachuna wi nivileleke moorweela wa wooniherya osivela wa anna ni arokora ahu. Vaavaa anna ni arokora ahu ahinanikhalihaaya mmukhalelo yoowo Mukristu aaphwaneleiye weera, nnaphwanela ororomela wi awo hiyaarino yoolakelela ya onikwaculiha nave wi awo anneererya opaka yeeyo Yehova analoceiye wi eyo ti yaphaama. (Mas. 12:18) Muluku onnaasivela alapeli awe oororomeleya, moohipwacha ohiphaameya waya. Naamwi nipakaka soohesa, owo onnatitelela okhala nthamwene ahu nave hananyeenyeya ni hiyaano. (Sal. 103:9) Ti woochuneyaxa omutakiherya Tiithi ahu oolevelela! (Aef. 4:32–5:1) Muupuwele tho wi, vaavaa makuchuwelo anaacamelaaya, ninnachuna otitelela okhala awaacameleya wa anna ni arokora ahu. Nnanwerya owehererya wi wiikariwa otepe. Ophiyerya tho wi nnanwerya okhala vamoha mukariposo nthowa na nroromelo nahu. Wakhala wi eyo yoheereya, nnamwaachuna anna ni arokora ahu opwaha khalai.—Mas. 17:17. w24.03 ipaax. 15-16 ipara. 6-7

Piipiliya onnaloca sa amiravo yaawo yaamwaacamenle Yehova, ereelihiwa ni yoowo nave ekhala oohakalala. Tavite mmoha a yaawo. Vaavaa aareiye mmiravo, owo aahithanla okhala nthamwene a Yehova nave voocharela aahikhala mwene oororomeleya. (1 Mam. 3:6; 9:4, 5; 14:8) Munoona hai ohuserya sincipale vooloca sa okumi wa Tavite? Moohikhwa minikwa, munamukhala oolipiheya ni ooceenyeryeya omurumeela Yehova moororomeleya. Nyuwaano tho munanwerya ohuserya vancipale vooloca sa yootakiherya ya Marku naari ya Timotiyu. Awo yaapacenrye omurumeela Yehova ereene amiravo nave yaahititelela okhala oororomeleya ophiyerya okhwa waya. Awo yaahaakhela weemereryiwa ni Yehova. Mukhalelo munapharihelaanyu okumi anyu hiihaano onahaala ovolowela omwaahiyu anyu. Wakhala wi munnamuroromela Yehova, ohiya wiiroromela mukhatiinyu, ilukuluku soothene onahaala wookhaviheryaani opaka soolakelela saphaama. Chiri nyuwaano munanwerya okhalano okumi woohakalala ni woosareya ichu sincipale saphaama. Nyenya muupuwele wi Yehova onnavaha esisapo yincipale yeeyo munapakaanyu ntakhara yoowo. Opharihela okumi anyu wi mmurumeele Tiithi anyu oosivela Yehova. w23.09 epaax. 13 ipara. 18-19

Murummwa Paulo aanasuwela wi anna ni arokora awe yaari oohiphaameya. Ntoko yootakiherya, owo aahithorihiwa moonanara vaavaa aapacenryeiye okhala vamoha ni muloko. (Saw. 9:26) Voocharela, achu akina yaanamuloca mmukhalelo woonanara wi eweerihe akina oyeleela nroromelo wa yoowo. (2 Ako. 10:10) Paulo aahimoona munna yoowo aari muhooleli apakaka yoolakelela yoonanara yeeyo yaahaala oweeriha akina okwaculiwa. (Aka. 2:11, 12) Mmoha a asinthamwene awaacameleya a Paulo, awiichaniwa Marku, aahimunyeenyeiha vancipale. (Saw. 15:37, 38) Paulo aanwerya weemererya wi mikhalelo vyakala sa seiha simweerihe ohiya okhala vamoha ni yaawo yaamunyeenyeiha. Naamwiihiiha, owo aahititelela waavaha esisapo anna ni arokora awe nave aahititelela omurumeela Yehova moororomeleya. Tiheeni yaamukhavihenrye Paulo ovilela? Paulo aanaasivela anna ni arokora awe. Osivela wa Paulo ntakhara akina waahimukhaviherya otikitheryeya ohiya mu ohiphaameya waya, nyenya mmikhalelo saya saphaama. Osivela tho waahimukhaviherya Paulo opaka yeeyo enalociwa mu yoorepa ya nihiku na olelo. w24.03 epaax. 15 ipara. 4-5

Piipiliya ookhalano miyaha mincipale seiho sinooniherya wi omaaleleya mukhalelo mmoha woochuneyaxa. Moone yootakiherya ya Isaki. Vaavaa owo aathammeiye wi akhaleke o Kerari, amwaacamani awe yaari Afilisti, yaahimukhalela nrima yoowo nave yuuheela ihime soothene seiho akapuro a apapaawe yaathimpaaya khalai. Ohiya wiimuwaniha wi eererye ohala ni ihime sawe, Isaki vamoha ni emusi awe yaahithaamela woorakamawo nave ethipa ihime ikina. (Map. 26:12-18) Nyenya Afilisti yaahiloca wi ihime seihe ivyaani saari sawaya tho. Nto naamwiihiiha, Isaki aahikhala oomaaleleya. (Map. 26:19-25) Vano ti mwawiihai Isaki aawenryeiye okhala oomaaleleya naamwi akina yeera soothene wi emuroxe? Mweeparipari, owo aahaalikhela yootakiherya ya asitiithi awe nave aahihuserya vancipale ni yootakiherya ya apapaawe, Aparahamu, yaawo yaari a murecele, ni yootakiherya ya Sara, yaawo yaarino ‘munepa woomaaleleya ni wawiichacala.’—1 Pet. 3:4-6; Map. 21:22-34. w23.09 epaax. 15 epara. 4

Wanthowa na osivela, Yehova aahimurumiha veelaponi ya vathi Mwanawe ooyariwa meekheiye mu elukuluku yeeyo owo aalakelenleiye. Mmukhalelo yoola, Yesu aanwerya waahusiha achu vooloca sa Omwene ni ovaha okumi awe wi anoopole wa yoocheka ni okhwa. Ohoolo waya, Yehova aahimviiha Yesu mookhwani wi akookele wirimu wi alamulele ntoko Mwene a Omwene wa Muluku. Mwaha ori muru wa Mpiipiliyani ti yawi nsina na Yehova nnahaala weelihiwa. Eyo enahaala weereya vaavaa owo onahaaleiye waakhwaniherya yoolakelela awe ntakhara elapo ya vathi moorweela wa Omwene awe, olamuleliwaka ni Kristu. Yookhwela ya Yehova herwa etorokiwa. Yehova oororomeliha wi ichu soothene inahaala weereya hiiheene ntoko olonceiye. (Yes. 46:10; Ahe. 6:17, 18) Mu elukuluku yoophwanelela, elapo enahaala otatuxiwa okhala parataiso mummo muyareriwo woophaameya ni wawookololowa wa Atamu ni Eva onahaalaaya ‘opuha okumi okhala wookhala.’ (Sal. 22:26, TNM) Nyenya Yehova ookhalano ichu sincipale mmuupuweloni mwawe ntakhara hiyaano. Yookhwela awe etokweene ori wi alapeli awe oothene, wirimu ni veelaponi yavathi emulapeleke yoowo mwawiiwanana. Mmukhalelo yoola, oothene anahaala okhala oororomeleya ni omwiiwelela Yehova ntoko Muluku a Owerya Woothene. (Aef. 1:8-11) Nyuwaano hamunatikhiniheya vaavaa munoonaanyu mukhalelo Yehova onaakhwaniheryeiye yoolakelela awe? w23.10 epaax. 20 ipara. 7-8

Vaavaa Ayuta yaakhumme o Papulu yaaphin’yaaya o Yerusalemu moohilekela yaahipacerya ohoolela makacamiho a ovakulela ichoko saya. Yaahikhalawo tho makacamiho mu olamulelo wo Persiya nave yaaniiciwa ni maloko awaacamela. Nyenya, akina a yaawo yaanoona okhala woovila otikitheryeya mu oteka wanaawiili empa ya Yehova. Mwawiihiiha, Yehova aahaapharihela alipa a miririmu eeli, Axeu ni Sakariya wi yaakhaviherye achu okuha mu nipuro noopacerya muteko wa oteka wanaawiili empa ya Muluku. (Axeu 1:1; Sak. 1:1) Waacamela iyaakha 50 ohoolo waya, Ayuta yaakookenle o Yerusalemu yaanachuna nlipiho wanaawiili. Voocharela, Estra, yoowo aari mulipa oorepa Malamulo amavyakelo, aakhuma o Papulu ayaaka o Yerusalemu wi aalipihe achu a Muluku okuha mu nipuro noopacerya malapelo eeparipari. (Estr. 7:1, 6) Hiihaa ntoko sooloherya sa Axeu ni Sakariya saakhavihenryaaya achu a Muluku khalai otitelela omuroromela Yehova variyari va wiiciwa, inanwerya tho onikhaviherya olelo otitelela ororomela nikhaviheryo na Yehova naamwi nihoolelaka makacamiho.—Mas. 22:19. w23.11 ipaax. 14-15 ipara. 2-3

Ti mwawiihai nnooniheryaahu osivela wahu wa anna ni arokora ahu? Mukhalelo mmoha wa weerano yeeyo ori moorweela wa waahakararya. Nnahaala owerya ‘otitelela ohakararyana mukina ni mukhwaawe’ wakhala wi ninnaceenyeryiwa nniphwanya. (1 Ate. 4:18) Nni niwerye hai otitelela olipiha osivela wahu mukina ni mukhwaawe? Moorweela wa opaka owetha wahu wi naakhurumuweleke akina. Ntakhara heeni ti woochuneya wooniherya osivela mukina ni mukhwaawe xaxaxa mmahiku ahu yaala? Moone nthowa nenlo Petru onavahereryeiye: “Makuchuwelo a ichu soothene ari vakhiviru. Mwawiihiiha, . . . mukhaleno osivela weeparipari wa mukina ni mukhwaawe.” (1 Pet. 4:7, 8) Vaavaa makuchuwelo a elapo yeela yoonanara anamviraaya yaacamelaka, tiheeni nnaphwanelaahu oweherya? Alocaka vooloca sa oomuchara awe, Yesu aahiloherya: “Nyuwo munarwa mwiiciwa ni maloko oothene vanthowa na nsina naka.” (Mat. 24:9) Wi nivilele wiica yoola, nnaphwanela otitelela okhala awiiwanana. Vaavaa nneeraahuno yeela, wiilipixerya wa Satana wa onikawanya hokhumelela phaama woona wi nimakeleliwe ni osivela.—Afi. 2:1, 2. w23.11 epaax. 13 ipara. 18-19

Iparipari sa Masu a Muluku sookhalano owerya otokweene. Vaavaa nnaahusihaahu achu vooloca sa Yehova ni mukhalelo owo oreiye eeparipari, ninnawerya woona echu yootikhiniha. Achu hanawokiwa tho ni sawootha sa Satana nave annapacerya woona mikhalelo saphaama sa Tiithi ahu hiiha ntoko hiyaano. Awo annasareya ni otikhiniheya ni Yehova moorweela wa ikuru sawe sihinamala. (Yes. 40:26) Awo annahuserya omuroromela yoowo nthowa na ororomeleya wawe ohinamala. (Malam. 32:4) Awo annamwaleeliwa moorweela wa miruku sawe sawiixeela. (Yes. 55:9; Aro. 11:33) Nave awo annahakararyeya vaavaa anasuwelaaya wi owo mwaneene a osivela. (1 Yoh. 4:8) Vaavaa anamwaacamelaaya Yehova, ewehereryo aya ya okhala okhala wookhala ntoko anamwane awe ennakhala yeeparipari. Ela ekari etokweene nryaahuno yawaakhaviherya achu wi emwaacamele Tiithi aya! Vaavaa nneeraahuno yeeyo, Yehova onnanoona ntoko “anamuteko akhwaawe.”—1 Ako. 3:5. w24.02 epaax. 12 epara. 15

Waakhanle wi nyuwaano mwa oohuserya a Piipiliya naari munaphwiiwa ni asitiithi anyu yaawo eri Anamoona a Yehova, apwanne munnuupuwela opatisiwa? Ela yoolakelela yaphaamaxa! Muhaakumve opatisiwa, nyuwaano munaphwanela wiiveleela wa Yehova. Ti mwawiihai nyuwaano munahaalaanyu wiiveleela wa Yehova? Nyuwaano munnamuroromeliha Yehova munivekelo wi munahaala omulapelaka pahiru yoowo, nave wi munahaala okuha mu nipuro noopacerya yookhwela awe mu okumi anyu. Nyuwaano munnamuroromeliha Yehova wi munahaala otitelela omusivela ‘ni murima anyu woothene, ni okumi anyu woothene ni muupuwelo anyu woothene vamoha ni ikuru sanyu soothene.’ (Mar. 12:30) Wiiveleela wanyu oneereya wiiphiini, variyari va nyuwaano ni Yehova. Moohiyana, opatiso ti wavanlakani; onnooniherya wa akina wi nyuwaano mohiiveleela. Wiiveleela wanyu nri nlakano noochuneyaxa, yoolakelela aya ori waakhwaniherya yoororomeliha yeela, nave Yehova onnaweherya wi mweereno yeeyo.—Ekl. 5:4. w24.03 epaax. 2 epara. 2; epaax. 3 epara. 5

Othela woothene onnakhalano makacamiho. Piipiliya onnacicimiherya wi achu yaawo eri atheli enamukhalano “sookacamiha mookumini.” (1 Ako. 7:28) Ntakhara heeni? Nthowa nawi mulopwana ni muthiyana toohiphaameya nave aakhalano mikhalelo ni ichu soohiyanahiyana seiyo sinaasivela ni sihinaasivela. Alipa oothelana ananwerya orweela mu sookhovelela ni mayareliwo oohiyanahiyana. Awo tho, moovira wa elukuluku ananwerya wooniherya mikhalelo seiho khalai ehaakumve othelana yahooniheryaaya. Mmukhalelo vyakala wa ichu seiha inanwerya oruuha ohiiwanana. Awo ananwerya okhupanyana mukina ni mukhwaawe wa makacamiho yaawo anakhumelela mu othela, naamwi oopiili ehesaka nave ephwanelaka wiilipixerya wi erehererye makacamiho aya. Ophiyerya wi awo ananwerya woonaka omwalamwala naari omwalana okhala ntoko mukhalelo mmoha wa oreherya makacamiho. Apwanne omwalamwala naari omwalana mukhalelo mmoha wa orehererya makacamiho? Hooye. Yehova onnavaha ohoolela wa achu athelanne wi ecicimiheke marehereryo a othela, naamwi okhalaka woovila okhala vamoha ni mmoha a oothelana aya. w24.03 epaax. 16 epara. 8; epaax. 17 epara. 11

Voocharela mmanle wiiveleela ni opatisiwa, munahaala otitelela osuwela sincipale vooloca sa Yehova nave osivela wanyu onahaala otitelela wunnuwa, mwawiihiiha, ewehereryo anyu tho ya okhala okhala wookhala Mparataiso velaponi ya vathi, enahaala otitelela wunnuwa. (Ahe. 5:13–6:1) Nyuwaano munahaala olawiha yeeyo Aroma 5:2-4. onaloceiye. Akhweya nyuwaano moohoolela makacamiho mancipale, nyenya mootitelela ovilela ni okhala aweemereryiwa ni Yehova. Nave musuwelaka wi Yehova onnoosivelaani, vano mookhalano mathowa mancipale a ororomela ichu seiho ororomelinheiye. Ewehereryo anyu yootepa olipa opwaha vaavaa mwaapacenryaanyu omuhuserya Piipiliya. Vano, ewehereryo yeela ti yeeparipari wa nyuwaano nave yookhalano yootaphulela yavameekhaaya wa nyuwaano. Eyo ennavolowela makupa oothene a okumi anyu etorokaka mukhalelo munaakhalihaanyu achu a veemusini vanyu, mukhalelo munapakaanyu soolakelela ni mukhalelo munapharihelaanyu elukuluku anyu. Murummwa Paulo nlelo onnatitelela oloca sa echu yaphaamaxa vooloca sa ewehereryo ahu nimanle weemereryiwa ni Yehova. Owo ooniroromeliha wi ewehereryo ahu enahaala waakhwanela chiryene.—Aro. 15:13. w23.12 ipaax. 12-13 ipara. 16-19

Vaavaa nnahoolelaahu yaweeha yoovila, mukhalelo ahu wa wuupuwelela, weera ichu onanwerya okhala woohiphimeleleya ntoko neeraahu khalai. Nnanwerya wiisoona ntoko nnavonyiwa ni echeku wu ni wu. Ti mwawiihai Yehova onanikhaviheryeiye vaavaa nnavoloweliwaahu ni miyoonelo ntoko seiho? Owo oororomeliha onipharelela. Vaavaa pophoro onaphwanyeiye echeku yawoopiha mphareya, owo onanwerya opacerya othekuwaka mwawoopiha akerihiwaka wu ni wu. Wi pophoro atitelele okhala ookhapeleleya, owo onanwerya okhalano maseese ootikhiniha yaawo anakhala mu iparari sawe. Maseese yaala ananwerya omukhaviherya pophoro ohithekuwaka vancipale. Mwawiihiiha, maseese yaala annalapa phaama vaavaa pophoro oneeceiye. Mmukhalelo woolikana, Yehova onahaala okhaviherya vaavaa nnatitelelaahu omurumeela yoowo moororomeleya mu ilukuluku sookacamiha. w24.01 epaax. 22 ipara. 7-8

Vaavaa munakhalaanyu awoova, mwiikohe: ‘Tiheeni Yehova opankeiye wa miyo?’ Muupuwele ichu seiho owo opatunxeiye. Ntoko yootakiherya, vaavaa “munavareryaanyu phaameene” mukhalelo Yehova onakhapeleleiye ipalame ni ithutu—seiho ihipatuxiwe moophwanaphwana ni yoowo nave ihinawerya omulapela—ninnannuwiha nroromelo nahu nawi owo onahaala tho onikhapelela. (Mat. 6:25-32) Muthokororye tho yeeyo Yehova opankeiye wa alapeli awe. Munanwerya ohuserya yaweereya ya muchu onalociwa Mpiipiliyani yoowo oonihenrye nroromelo neeparipari, naari munanwerya waalakhanya saweereya sa alapeli a Yehova a mmahiku ahu. Ohiya yeeyoru, muupuwele mukhalelo Yehova ookhapelenleiyeeni. Mmukhalelo taani owo ookerinheiyeeni mu eparipari? (Yoh. 6:44) Ti mwawiihai aakhunleiye mavekelo anyu? (1 Yoh. 5:14) Mmukhalelo taani munaphuraanyu mahiku oothene orweela wa mukucho wa Mwanawe oosiveliwa?—Aef. 1:7; Ahe. 4:14-16. w24.01 epaax. 4 epara. 6; epaax. 7 epara. 17