Yawuupuxerya-ya-murima Anyu Yoohoolela Yoororomeleya?

“Muteko wa malakelo ala ori okhwela onarwa wa murima wawela, wa nlèlo na murima waphama.”​—1 TIMÓTEO 1:5.

MACIPO: 57, 48

MWAHAALA WAAKHULA HAI?

Yawuupuxerya-ya-murima ahu enii enikhaviherye hai opaka soothanla mmwaha wa . . . 

oloola ekumi?

mathatelo?

muteko wa olaleerya?

1, 2. Taani onivanhe yawuupuxerya-ya-murima, nave ntakhara heeni nnaphwanela othamalela?

YEHOVA MULUKU aapatunxe achu ni othanla wootaphuwa, ela tiwii, opaka soolakelela moochuna. Yehova oonivaha yoohoolela wi enikhaviherye opaka soothanla saphaama. Yoohoolela eyo eniichaniwa yawuupuxerya-ya-murima yoowo ori mukhalelo onakhala mpuwa mwahu onanikhaviherya osuwela yaphaama ni yoonanara. Vaavaa nnapharihelaahu yawuupuxerya-ya-murima mmukhalelo waphaama, enahaala onikhaviherya opaka yaphaama ni osepa yoonanara. Yawuupuxerya-ya-murima yawooniherya ya wi Yehova onnanisivela nave wi onnachuna wi nikhumelele phaama.

² Olelo achu anneera yeeyo eri yaphaama nave anniica yoonanara naamwi ehisuwenle malakiheryo a Piipiliya. (Mwaalakhanye Aroma 2:14, 15.) Eneereya mwawiihai? Ela enneereya nthowa na yawuupuxerya-ya-murima aya. Ela ennaweeriha achu ancipale osepa yoonanara. Mwaanyiherye mukhalelo taani elapo yaahaalaaya onanara waakhanle wi achu haano yawuupuxerya-ya-murima! Naahaala wiiwa weereya wa ichu soonanaraxa opwaha nniiwaahu olelo. Ninnathamalela va nthowa na Yehova waavaha achu yawuupuxerya-ya-murima!

3. Yawuupuxerya-ya-murima ahu enii enikhaviherye hai mmulokoni?

³ Achu ancipale hanachuna ovyakiha yawuupuxerya-ya-murima aya. Nto, alapeli a Yehova annachuna wi yawuupuxerya-ya-murima aya elapeke phaama ntakhara wi eyo ennakhaviherya otikitherya wiiwanana mmulokoni. Nnachuna wi yawuupuxerya-ya-murima ahu enuupuxeryeke malakiheryo a Piipiliya vooloca sa yaphaama ni yoonanara. Nyenya wi nivyakihe ni opharihela yawuupuxerya-ya-murima ahu, nnaphwanela ohuserya yeeyo Piipiliya onaloceiye. Opwaha yeeyo, nnaphwanela osivela malakiheryo a Muluku ni ororomela wi malakiheryo awo atikitheryiwe wi nikhale phaama. Paulo aarepa: “Muteko wa malakelo ala ori okhwela onarwa wa murima wawela, wa nlèlo na murima waphama, ni wa nroromelo nohisotherya.” (1 Timoteo 1:5) Vaavaa nnavyakihaahu yawuupuxerya-ya-murima ahu ni opharihela, omusivela wahu Yehova ni omuroromela wahu onahaala wunnuwa. Mukhalelo nnapharihelaahu yawuupuxerya-ya-murima ahu onnooniherya waataana wahu ni Yehova nave onnooniherya nchuno nahu na omwiiwelela. Yawuupuxerya-ya-murima ahu ennooniherya tho omuchu ahu.

4. Nnii nivyakihe hai yawuupuxerya-ya-murima ahu?

⁴ Vano nnii nivyakihe hai yawuupuxerya-ya-murima ahu? Ti woochuneya omuhuserya Piipiliya moohihiyererya, wuupuwelela yeeyo nnaalakhanyaahu, ni omveka Yehova wi anikhaviherye opharihela yeeyo nihusenryaahu. Ela enataphulela wi nnaphwanela weera sincipale ohiya pahiru osuwela malamulo. Vaavaa nnamuhuseryaahu Piipiliya, yoolakelela ahu ekhale omusuwela phaama Yehova. Ninnasuwela omuchu awe, yeeyo enamusivela ni enamunanara. Vaavaa nnahuseryaahu sincipale sa Yehova, yawuupuxerya-ya-murima ahu enahaala osuwela yeeyo eri yaphaama ni yoonanara. Vaavaa nnavyakihaahu yawuupuxerya-ya-murima ahu, onahaala okhala wookhweya wuupuwela mwawiiwanana ni Yehova.

5. Tiheeni nnahaalaahu othokororya mmwaha yoola?

⁵ Nnaphwanela wiikoha: Yawuupuxerya-ya-murima yoovyakihiwa phaama enii enikhaviherye hai vaavaa nnachunaahu opaka yoolakelela? Nnii ncicimihe hai yawuupuxerya-ya-murima ya Akiristu akina? Nave yawuupuxerya-ya-murima enii enikhaviherye hai opaka yaphaama? Hankooni nthokororye makupa mararu oryaaya woochuneya yawuupuxerya-ya-murima yoovyakihiwa phaama: (1) oloola ekumi, (2) mathatelo ni (3) muteko ahu wa olaleerya.

MUKHALE OOPHIMELELA

6. Soolakelela taani nnapakaahu vooloca sa oloola ekumi?

⁶ Piipiliya onnanceenyerya osepa ichu inahaala onipahula ni okhala oophimelela mu sookhovelela, ntoko olya ni owurya. (Masiposipo 23:20; 2 Korinto 7:1) Vaavaa nniiwelelaahu ekano ya Piipiliya, nnahaala okhaviheryeya okhapelela ekumi ahu. Naamwi hiiha nnahaala wiiceliwa ni wuuluvala. Soolakelela taani nnaphwanelaahu opaka? Mu ilapo ikina sinnaphwanyeya mikhalelo miili sa oloola: oloola wa mmawaani ni wa alipa eekumi. Wiiliwiili ifiliyale sinnaakhela ikaarata sa anna ni arokora ekohaka sa oloola woohiyanahiyana. Ancipale annakoha: “Apwanne kapuro a Yehova onnaphwanela weemererya mukhalelo wammoori wa oloola naari hooye?”

7. Nnii nipake hai soolakelela saphaama mmwaha wa nikhami?

⁷ Efiliyale naari atokweene a mmulokoni haano ophwanelela wa ompakela Mukiristu yoolakelela mmwaha wa oloola, naamwi aakonhe echu ya weera. (Galasya 6:5) Nyenya, atokweene ananwerya omooniha Mukiristu yeeyo Yehova olonceiye wi emukhaviherye opaka yoolakelela ya miruku. Ntoko yootakiherya, Muluku onlamulela wi nsepe nikhami. (Saweriwa T’arummwa 15:29) Nlamulo nenla ninnamukhaviherya Mukiristu wiiwexexa wi hanaphwanela weemererya oloola yoowo onavolowela opharihela nikhami nawaakhwanela naari makupa aya maxexe. Nsuweliho nla naahaala ovolowela yawuupuxerya-ya-murima ya Mukiristu vaavaa onapakeiye yoolakelela vooloca sa weemererya naari hooye makupa a nikhami.a (Moone masu a vathi.) Ekano taani ya Piipiliya enahaala onikhaviherya opaka yoolakelela yaphaama mmwaha wa oloola?

8. Filipi 4:5 onii anikhaviherye hai opaka soolakelela sa miruku vooloca sa oloola ekumi?

⁸ Masiposipo 14:15, onii: “Òhikosopa onnemererya itxhu sothene inalotxiwà; Ole awisuwelela, onnavareryavo onanyikaleiyevo.” Akhweya hophwanyen’ye murece wa oloola ereca yammoori. Mwawiihiiha nnaphwanela okhalano ephoole sa ovuwiha meerelo a oloola yaawo anakhala ntoko annaloola ereca eniiha ehirino yawooniherya wi ta mphurelo. Murummwa Paulo aarepa: “Ophama wanyu osuweliwe t’atxhu othene.” (Filipi 4:5) Ophimelela onahaala onikhaviherya oteteiwa ni omulapela Yehova opwaha oteteiwa ni ekumi ahu naari ni miyaha sa oloola. Wakhala wi oloola ekumi ennakhala echu yoochuneyaxa mu okumi ahu, nnahaala okhala ooweiwa pahiru ni hiyo aneene. (Filipi 2:4) Noosuwela wi hannawerya okhalano ekumi yoophaameya mmukhalelo yoola wa ichu. Mwa yeeyo, mwiivareryele wi omurumeela Yehova ekhale echu yoochuneyaxa mu okumi anyu.​—Mwaalakhanye Filipi 1:10.

9. Aroma 14:13, 19 onavolowela hai soolakelela sahu vooloca sa oloola, nave wiiwanana wahu onii woopopiheye hai?

⁹ Mukiristu awiichacala haanaakhinyeererya akina opaka yeeyo onooneiye okhala yaphaama. Mu elapo ekina, mutheli mmoha aanaaceenyerya akina ochariha meerelo a oloola. Awo yaahaalekecha anna akina weerano yeeyo, nyenya akina hiyeemerenrye. Vaavaa meerelo awo a olya yahaakumihenryaaya mphurelo, anna ni arokora ancipale yaanyeenyeya. Mutheli owo aaphwanela opaka yoolakelela wa yoowo mukhateiye vooloca sa ochariha naari hooye meerelo a oloola. Apwanne waari woophwanelela woopopiha wiiwanana wa muloko nthowa na mwaha wa oloola? Khalai o Roma, Akiristu akina yaakhalano moonelo woohiyana vooloca sa soolya ni mahiku a ochapela. Ekano taani Paulo aavanheiye? Owo aahi: “Atxhu akina anupuwela wi mahiku annahiyana. Atxhu akina anupuwela wi mahiku othene anamulikana. Vano mutxhu ti mutxhu etxeleke murima awe.” Hankooni nikhaleno ephoole ni osepa waakwaculiha akina.​—Mwaalakhanye Aroma 14:5, 13, 15, 19, 20.

10. Ntakhara heeni nnaphwanelaahu ocicimiha soolakelela sa akina? (Moone eruku yoopacerya.)

¹⁰ Mu ilukuluku ikina, hinniiwexexa ntakhara heeni muchu a mmulokoni opankeiye yoolakelela mmwaha wa muchu mukhateiye. Tiheeni nnaphwanelaahu weera? Hannaphwanela waakuvela omuthoriha naari omukhinyererya otoroka muupuwelo awe. Akhweya owo onnachuna ovyakiha yawuupuxerya-ya-murima awe, akhweya yawuupuxerya-ya-murima awe ti yooceecheyaxa. (1 Korinto 8:11, 12) Akhweya yawuupuxerya-ya-murima ahu hevyakihiwe phaama. Muchu ti muchu a hiyo onaphwanela opaka yoolakelela awe ni weemererya sookhumelela sene.

MPUHE MATHATELO

11, 12. Piipiliya onanikhaviherya hai othanla mathatelo ahu?

¹¹ Yehova onipatunxe wi nipuheke mathatelo ni ophwanya mphurelo aya. Soolomoni aarepa wi yookhala elukuluku “yotheya” ni elukuluku “yawèliwa murima”. (Eklesiyaste 3:4) Nyenya tahi wi mathatelo oothene aakhalano mphurelo. Nnaphwanela tho osepa omaliha elukuluku yincipale mmathatelo. Yawuupuxerya-ya-murima ahu enii enikhaviherye hai opuha ni ophwanya mphurelo mmathatelo Yehova oneemereryeiye?

¹² Piipiliya onnalopola ntakhara “miteko sonanara sa mwili.” Miteko iho inaphitaanyerya “oraruwa, sawetxa pure, sotxapaheya, owepesa amuluku awotha, oriya okhwiri, witxana, wakhulana, ehatxe, onyenyeya, owanawana, ohiwanana, omwalana, nrima, ohapaliwa, wìpeliwa ni itxhu ikina inaphwana ni seiya.” Paulo aarepa wi “yale othene anera itxhu seiya hephwanya omwne wa Muluku.” (Galasya 5:19-21) Mwawiihiiha niikohe: ‘Apwanne yawuupuxerya-ya-murima aka ennakeeriha osepa mathatelo anavuwiha owanawana, nthalu naari nlala? Apwanne yawuupuxerya-ya-murima aka ennakilopola vaavaa kinachunaaka woona exilema enooniherya epwitikiri naari enavuwiha ohapaliwa, naari onamulosiwe?’

13. Ekano enaphwanyeya mu 1 Timóteo 4:8 ni Masiposipo 13:20 enii enikhaviherye hai vooloca sa mathatelo?

¹³ Malakiheryo a Piipiliya anahaala onikhaviherya ovyakiha yawuupuxerya-ya-murima ahu mmwaha wa mathatelo. Ntoko yootakiherya, Piipiliya onnaloca wi “solemeiherya mwili hinaphura etxhu.” (1 Timóteo 4:8) Achu ancipale anoona wi wookola mwiili wa wuuluulela onnakhaviherya okhalano ekumi yaphaama. Naamwi ori hiiha, hanka wakhala wi nnachuna weerano eyo ni achu akina? Apwanne ti woochuneya waathanla achu taani? Masiposipo 13:20, onnanleela: “Onetxa ni atxhu a miruku, onamukhala namiruku; onetxa n’alolo, onamphwanya epahu.” Chiryene ti woochuneya opharihela yawuupuxerya-ya-murima yoovyakihiwa ni Piipiliya vaavaa nnathanlaahu mathatelo.

14. Emusi emoha yaapharihenle hai yoorepa ya Aroma 14:2-4?

¹⁴ Kiristiyano ni Taniyela aakhalano anamwane apiili aasithiyana. Kiristiyano onnaloca: “Naathokororya sa mathatelo mmalapelo ahu a echoko. Naaphiyerya osuwela wi mathatelo makina taweemereryeya nyenya makina hooye. Naathokororya tho taani onaphwanela okhala nthamwene ahu aphaama. Mwanihu mmoha aaloca wi variyari va elukuluku ya wiichuuwa oxikola, amiravo akina Anamoona a Yehova annooniherya meecelo oohiphwanelela. Nave owo aakhinyereryeya okhalano meecelo yaawo. Naavaanela ni yoowo wi muchu ti muchu ookhalano yawuupuxerya-ya-murima, nave nnaphwanela ohooleliwaka ni yeeyo vaavaa nnathanlaahu echu yaweera ni asinthamwene.”​—Mwaalakhanye Aroma 14:2-4.

15. Mateu 6:33 onii anikhaviherye hai vaavaa nnalakelelaahu opaka mathatelo?

¹⁵ Munamaliha elukuluku hai mmathatelo? Apwanne munnahela mu nipuro noopacerya miteko ntoko mithukumano, olaleerya ni omuhuserya Piipiliya naari wi mathatelo takhanle ohoolo? Echu taani eri yoochuneyaxa wa nyuwaano? Yesu aahi: “Mpatxerye wasya omwene wa Muluku ni wokololowa waya, ni itxhu sothene ikina munamwatxereryiwa.” (Mateu 6:33) Vaavaa munalakelelaanyu mukhalelo wa opharihela elukuluku anyu, apwanne yawuupuxerya-ya-murima anyu ennawuupuxeryaani ekano ya Yesu?

NINNACEENYERYIWA OLALEERYA

16. Yawuupuxerya-ya-murima enanceenyera hai olaleerya?

¹⁶ Yawuupuxerya-ya-murima evyakihiwe ennanlopola weerano ichu soonanara, nyenya tho ennanceenyerya weerano ichu saphaama. Echu emoha yaphaama ori olaleerya empa ni empa ni waalaleerya yaale nnakumanaahuno moohilakelela. Ti yeeyo Paulo eereiye. Owo oorepa: “Kakelelihiwaka. Òtakhaliwa ti miyo kahinalaleya Mutxhaka Waphama!” (1 Korinto 9:16) Vaavaa nnamutakiheryaahu Paulo nnahaala okhalano yawuupuxerya-ya-murima yaphaama, nsuwelaka wi nneerano yeeyo eri yaphaama. Nave vaavaa nnaaleelaahu akina michaka yaphaama, ninnavyakiha yawuupuxerya-ya-murima aya. Paulo aaloca: “Nnalaleya eparipari nisemereryihaka wa murima wa atxhu othene vamithoni va Muluku.”​—2 Korinto 4:2.

17. Ti mwawiihai murokora mmoha aacharinheiye yawuupuxerya-ya-murima awe yoovyakihiwa ni Piipiliya?

¹⁷ Vaavaa Yakelina aareiyeno iyaakha 16 sa oyariwa, owo aanamuhuserya Piyoloxiya oxikola. Anaxikola yaahuserya vooloca sa othatuwa. Yakelina onnaloca: “Yawuupuxerya-ya-murima aka hiyaakeemererya ovaha maakhulo variyari va ohuserya ntoko keeraaka. Nkaaphwanela okhaviherya nihusiheryo na othatuwa. Kaamwaacamela muhusiha aka nave kaamutharihela soororomela saka. Owo aahooniherya onthamwene, nave aakivaha ekari ya oloca sa mwaha wa opatuxiwa variyari va anaxikola oothene.” Yakelina aahakalala osuwela wi aachariha yeeyo yawuupuxerya-ya-murima awe yaamuleelaaya. Apwanne yawuupuxerya-ya-murima anyu ennaweerihaani opaka yeeyo eri yaphaama?

18. Ntakhara heeni ninnachuna okhalano yawuupuxerya-ya-murima yaphaama ni yoororomeleya?

¹⁸ Yoolakelela ahu ori okhala mwawiiwanana ni malakiheryo a Yehova. Yawuupuxerya-ya-murima ahu enahaala onikhaviherya ophwanya yoolakelela yeeyo. Vaavaa moohihiyererya nnahuseryaahu ni wuupuwelela Masu a Muluku ni opharihela yeeyo nnahuseryaahu, ninnavyakiha yawuupuxerya-ya-murima. Voocharela yamahala yeela enahaala okhala yoohoolela yoororomeleya mu okumi ahu Weekiristu!

[Nsu na vathi]

[Ekaaxa va epaaxina 14]

MASU ATHARIHIWE

Yawuupuxerya-ya-murima: Mukhalelo wa osuwela yaphaama ni yoonanara onaphwanyeya mpuwa mwahu. Enanwerya onikhaviherya weerano yaphaama ni onihiiha opaka yoonanara. Vaavaa nnavyakihaahu ni ochariha yawuupuxerya-ya-murima ahu, omusivela wahu Yehova ni omuroromela onnannuwa