Yehova, Muluku Oosivela
“Muluku ti osivela.”—1 YOHANI 4:8, 16, NN.
MACIPO: 18, 91
MWAAHAALA WAAKHULA HAI?
Osivela wa Muluku onahaala waavolowela hai yaale anamwiiwelela?
Yehova onooniherya hai osivela wa yaale apanke yoocheka?
Omwene onooniherya hai osivela wa Muluku ntakhara hiyo?
1. Tuuvi ori mukhalelo mutokweene wa Muluku, nave osuwela yeela enoovolowelani hai?
PIIPILIYA onnanleela wi “Muluku ti osivela.” (1 Yohani 4:8, NN) Nyenya ela enataphulela eheeni? Osivela mukhalelo mutokweene wa Yehova. Tahi wi orimoona okhalano osivela, nyenya owo ti osivela. Osivela onnavolowela ichu soothene onapakeiye. Ninnathamalela woona wi osivela waamweeriha Yehova opatuxa elapo ni soothene iri mwemmo!
2. Osivela wa Muluku onaniroromeliha eheeni? (Moone eruku yoopacerya.)
2 Yehova onnasivela soopatuxa sawe. Osivela wawe wa hiyo onnaniroromeliha wi yookhwela awe ntakhara achu, enahaala waakhwanela mmukhalelo waphaama. Enahaala okumiherya ohakalala weeparipari wa yaale anamwiiwelela. Ntoko yootakiherya, nthowa na osivela, Yehova oothanla “nihiku onereiye athorihe elapo ni wokolola ni mutxhu yowo Muluku omuthanlileiye,” Yesu Kiristu. (Saweriwa T’arummwa 17:31) Ninnaroromela wi othoriha owo onahaala weereya. Eyo enahaala okumiherya omwaahiyu waphaama wa achu awiiwelela.
SAWEEREYA INOONIHERYA EHEENI?
3. Okumi waahaala okhala hai waakhanle wi Muluku haanaasivela achu?
3 Achu yaahaala okhala awiihai waakhanle wi osivela tahi mukhalelo mutokweene wa Muluku? Yaahaala otitelela olamulelana mukina ni mukhwaawe ni ovoloweliwa ni muluku awiica ni ootakhala, Satana. (2 Korinto 4:4; 1 Yohani 5:19; mwaalakhanye Wupulula 12:9, 12.) Omwaahiyu wa achu waahaala okhala wawoopiha waakhanle wi Yehova haano osivela!
4. Ntakhara heeni Yehova oheemererya waakaahiwa?
4 Vaavaa Satana aamwaryenleiye olamulelo wa Muluku, owo tho aaweeriha makholo ahu oopacerya omwaryeya. Owo aahaakaaha ophwanelela wa Muluku wa okhala Mulamuleli a Elapo Yoothene. Satana aaloca wi olamulelo awe waahaala okhala waphaama ompwaha Muluku. (Maphatxuwelo 3:1-5) Mwa miruku, Yehova omvaha Satana elukuluku vakhaani wi ooniherye masu awe. Nyenya sookhumelela sinnooniherya wi achu naari Satana hanawerya okhala alamuleli aphaama.
5. Saweereya sa achu inooniherya eheeni?
5 Olelo elapo enamutepa opahuwa. Achu macikhwi macikhweene ahiiphiwa mu iyaakha nsana ivirale. Piipiliya onnaloca sa “mahiku òmaliherya” ariki: “Alipa ònanara murima ni òwoka eni enanvira etepaka.” (2 Timóteo 3:1, 13) Piipiliya tho onnaloca: “Pwiya, kosuwela phama: Havo onasuwela omala wa ekimi awe, havo onathanla ephiro yaphama.” (Yeremiya 10:23) Saweereya sinnooniherya wi masu ala teeparipari. Yehova haapatunxe achu ni mavyakelo naari ophwanelela wa wiilamulela ehirino ohoolela wawe.
6. Ntakhara heeni Yehova onneemererya onanara?
6 Moorweela wa weemererya onanara mweelukuluku vakhaani, Yehova ohooniherya wi pahiru olamulelo awe tori waphaama. Omwaahiyu, Muluku onahaala omaliha onanara woothene. Ohoolo waya, wakhala wi ookhala onii aakaahe olamulelo awe, Muluku onahaala weeravo echu mwawaakuveya. Onahaala opharihela yaweereya ya achu ntoko yawooniherya ya wi omwaryeya onaphwanela omalihiwa mwawaakuveya. Onanara horwa weemereryiwa wanaawiili.
MULUKU ONOONIHERYA HAI OSIVELA?
7, 8. (a) Yehova onooniherya hai osivela wawe?
7 Yehova onnooniherya osivela wawe otokweene mmikhalelo soohiyana hiyana. Muupuwele wunnuwa ni oreera wa erimu. Eyo yookhalano ikalasiya soohaalakhanyeya, nave ekalasiya emoha ennakhalano ilapo ni itheneeri soohaalakhanyeya. Mu ekalasiya ahu Via Láctea ninnaphwanyeyamo nsuwa. Nihirivo nsuwa, heki ekhalevo ekumi veelaponi yavathi. Soothene iha sinnooniherya wi Yehova ti Mpatuxa ahu, nave sinnooniherya mikhalelo sawe, ntoko owerya, miruku ni osivela wawe. Aai, Muluku mikhalelo sawe “òhoniha phama mwa sopatusa sawe owerya wawe ni omuluku awe.”—Aroma 1:20.
8 Yehova oopatuxa elapo wi ekhapeleleke okumi. Ichu soothene sa veelaponi sinnaakhaviherya axinama ni achu. Muluku aapaka nipuro nooreera wi achu ekhalekemo nave aahaavaha muupuwelo ni mwiili woophaameya wi ekhale mwawiikhalelaru. (Mwaalakhanye Wupulula 4:11.) Nlelo, Muluku ‘onnavaha yolya sothene inòna, ntakhara ikharari sawe ti sohimala.’—Salumu 136:25.
9. Naamwi Yehova ari Muluku oosivela, tiheeni owo oniiceiye?
9 Yehova, Muluku oosivela, mwawiihiiha onniica yoonanara. Ntoko yootakiherya Salumu 5:4-6 onnaloca sa Yehova: “Nyuwano mwa Muluku ohinasiveliwa ni atxhu ònanara murima . . . Atxhu òwali hewerya okhala vamithoni vanyu.” Owo tho onnawiica “othene yale anera sotakhala.”
MAKUCHUWELO A ONANARA AHAACAMELA
10, 11. (a) Tiheeni enahaala weereya ni achu oonanara murima? (b) Nlivelo taani Yehova onahaaleiye waavaha achu awiiwelela?
10 Mweelukuluku awe yoophwanelela, Yehova onahaala omaliha onanara voothevene nthowa na wi owo Muluku oosivela nave onniica yoonanara. Masu a Muluku annaroromeliha: “Amutakhali anamutolosiwa, nto, yale anàroromela Apwiya, anamukhalano muretxele. Vohilekela, amuthakhali anamurimela, wi owasye hiwaphwanyà.” Amwiicani a Yehova “anamulakaseya ntoko mwisi.”—Salumu 37:9, 10, 20.
11 Masu a Muluku annaroromeliha tho: “Atxhu awokololowa anamwakhela elapo, anamukhala wa mahiku othene.” (Salumu 37:29) Achu oororomeleya “anampuha saphama sothene.” (Salumu 37:11) Ntakhara heeni? Nthowa na wi Muluku ahu oosivela ikwaha soothene oneera ichu saphaama wa akapuro awe oororomeleya. Piipiliya onnanleela: “Muluku onanvuta mithori aya, nave horwa okhalavo tho okhwa nari winla, nari ikutxho, nari witxela, wona wi sa khalai sòvira.” (Wupulula 21:4) Onahaala okhala omwaahiyu woohakalaliha wa yaale anamwiiwelela Muluku ni ocicimiha osivela wawe!
12. “Mutxhu òhitxheka” taani?
12 Piipiliya onnanleela: “Nkamoneni mutxhu òhitxheka ni awokololowa; mutxhu a muretxele onamukhalano nloko nawe. Nto atxhu òtxheka anamutolosiwa; nloko naya nnammwaryiwa.” (Salumu 37:37, 38) “Mutxhu òhitxheka” onnamusuwela Yehova ni Mwanawe nave onneerano yookhwela ya Muluku. (Mwaalakhanye Yohani 17:3.) Onneemererya ni murima woothene wi “elapo enanvira vamoha ni minkhela saya, nto yole onera okhwela wa Muluku onnakhala mahiku ohimala.” (1 Yohani 2:17) Woona wi makuchuwelo a elapo ela ahaacamela, ti wawaakuveya wi ‘naroromeleke Apwiya [Yehova] ni otxhara iphiro saya.’—Salumu 37:34.
ENENEERYO ETOKWEENE YA OSIVELA WA MULUKU
13. Tiivi eri eneneeryo etokweene ya osivela wa Muluku?
13 Naamwi nri oohiphaameya, nnanwerya omwiiwelela Muluku. Nnanwerya tho okhalano onthamwene woolipa ni Yehova moorweela wa mukucho wa Yesu, yeeyo ekhanle eneneeryo etokweene ya osivela wa Muluku. Yehova oovaha mukucho wi achu awiiwelela ekhaleno ekari ya woopowa mu yoocheka ni okhwa. (Mwaalakhanye Aroma 5:12; 6:23.) Yesu aari oororomeleya wa Muluku mu elukuluku yincipale wirimu, mwawiihiiha, Yehova aanasuwela wi aahaala okhala oororomeleya veelaponi ya vathi. Ntoko Tiithi oosivela, Yehova aasooseya mmurimani vaavaa achu yaamukhalihaaya Mwanawe moonanara. Naamwi hiiha, Yesu aakhaviherya olamulelo wa Muluku nave aahooniherya wi muchu oophaameya onanwerya okhala oororomeleya wa Muluku naamwi akumanaka ni mikhalelo soovila.
14, 15. Tuuvi ori mphurelo wa okhwa wa Yesu?
14 Naamwi aakumanne ni saweeha sincipale, Yesu aahiikhalelaru oororomeleya nave aakhaviherya olamulelo wa Yehova. Nooniherye othamalela woona wi moorweela wa okhwa wawe, Yesu ooliva esisapo ya woopola wi achu ekhaleno ekari ya okhala mwawiikhalelaru mweelapo evyaani ya Muluku! Murummwa Paulo aaloca sa osivela yoowo Yehova ni Yesu yoonihenryaaya orweela wa woopola. Owo oriye: “Eparipari elukuluku naryahu òtxetxheya, yaphiyenraya elukuluku awe yophwanelela, Kristu àkhwa wa nthowa na atxhu ònanara murima. Nòsuwela wi ovila omphwanya mutxhu onawerya wileva wi akhwe wa nthowa na mutxhu awokololowa. Wakhweya òkhala onawerya wileva wi akhwe wa nthowa na mutxhu òrèra murima. Nto Muluku ononiha onikhwela wawe, ntakhara naryahu atxhu òtxheka, Yesu t’okhwileiye wa nthowa na hiyo.” (Aroma 5:6-8) Murummwa Yohani oorepa: “Muluku ononiha onikhwela wawe, vomurumihela Mwana awe mmoharu mwelaponi wi hiyano nikhale mwa yowo. Okhwela wa Muluku ti wu: tahi hiyo nimukhwenle Muluku, nto ti yowo onikhwenle ni onrumihela Mwanawe, ntoko yawopolano sotxheka sahu.”—1 Yohani 4:9, 10.
15 Yesu aaloca wi “Muluku òtepa wakhwela atxhu a mwelaponi, ophiyerya onvaha Mwana awe mmoharu, wi mutxhu onamwemererya yowo, ahirimele nto akhaleno okumi wohimala.” (Yohani 3:16) Naamwi waari woovila, Yehova amvaha Mwanawe ntoko woopola. Ela ennooniherya wi onnatepa waasivela achu. Nave osivela owo onahaala wiikhalelaru. Paulo aarepa: “Eparipari miyo kosuwelene wi nari okhwa, nari ekumi, nari ankelo, nari owerya wa wirimu, nari mutano, nari omwahiyu, nari ikuru sa wirimu, nari sa vathi, hiyavo yopatusiwa ekina enawerya onimwalanyiha ni okhwela Muluku onisuwelin’heiye mwa Yesu Kristu Pwiya ahu.”—Aroma 8:38, 39.
OMWENE WA MULUKU ONNALAMULELA
16. Omwene wa Mesiya tiheeni, nave taani Yehova omuthanlileiye wi akhale Mwene?
16 Olamulelo wa Muluku naari Omwene wa Mesiya, eneneeryo ekina ya osivela wa Yehova wa achu. Ntakhara heeni? Yehova oomuthanla Mulamuleli oophwanelela yoowo onaasivela achu, Yesu Kiristu. (Masiposipo 8:31) Muluku ohaathanla achu 144.000 wi elamulele ni Kiristu wirimu. Vaavaa anaviihiwaaya mookhwani annakuxa osuwela waya sa yeeyo enataphulela okhala muchu. (Wupulula 14:1) Vaavaa Yesu aareiye veelaponi ya vathi, Omwene waari mwaha mutokweene wa ohusiha wawe, nave aahaahusiha oomuchara awe ovekela: “Atithihu muru wirimu, nsina nanyu nèlihiwe. Omwene anyu orwe. Okhwela wanyu wereye, ntoko wirimu hiha vathiva.” (Mateu 6:9, 10) Ninnaweherya waakhwanela wa nivekelo nenla, vaavaa Omwene wa Muluku onahaalaaya oruuha mareeliho mancipale wa achu!
17. Ohiyana taani orivovo variyari va olamulelo wa Yesu ni wa achu?
17 Wookhalavo ohiyana otokweene variyari va olamulelo wa Yesu ni wa achu. Olamulelo wa achu onnatannya ikhoco inawiipha macikhwi aachu. Nyenya Mwene ahu Yesu, onnanisivela mweeparipari nave onnatakiherya mikhalelo sa Muluku, xaxaxa osivela wawe. (Wupulula 7:10, 16, 17) Yesu aaloca: “Rwani wa miyo othene nyuwo muri òvelavela ni ònyokoliwa, wona wi miyo kinan’witxhuwihani. Ireyani muritxi aka ni huseryani wa miyo kiri òrèra murima ni awiyeviha, nave munamphwanya witxhuwa wa minepa sanyu, wona wi muritxi aka honalimelasa ni ori woveya.” (Mateu 11:28-30) Ela yoororomeliha enooniherya osivela!
18. (a) Tiheeni eneereya opacerya 1914? (b) Tiheeni nnahaalaahu othokororya mmwaha onacharela?
18 Piipiliya onnooniherya wi Omwene wa Muluku onnalamulela opacerya 1914. Opacerya eyaakha yeeyo, annathukumanyiwa oohalela a yaale anahaala olamulela ni Yesu wirimu ni othukumanyiwa wa “muloko mutokwene” wa achu yaawo anahaala ovuluwa omakuchuwelo wa mukhalelo ola ni ovolowa mweelapo ya hiihaano. (Wupulula 7:9, 13, 14) Tuuvi ori waaca wa muloko mutokweene olelo? Tiheeni Muluku onaweheryeiye wa yaawo? Mwaha onacharela onahaala othokororya makoho yaala.