Wiiwelela Ekano Yoolopola Enanwerya Ovuluxa Ekumi Anyu!

MU 26 A TESEMPURU a 2004, mwaacikinye wunnuwa wawe 9.1 aapahula Simeulue, evilivili ya Sumatra, o Indonésia. Achu oothene yaaweha mu eniya. Maahi yaaweleelaxa opwaha vaava anakhalelaaya. Mwawaakuveya achu oothene yaapacerya ocimaka eyaaka mmiyaakoni ekuwelaka: “Smong! Smong!” nsu na vanipuroni nnataphulela sunami. Mpuwa mwa aminutu 30, maahi awaaca yaavolowela evilivili, ekumulaka ipa sincipale mmucecheni.

Evilivili ya Simeulue naari nipuro noopacerya ovoloweliwa ni sunami oopahula mu 2004 aarweela mu Oseyano Intiko. Achu awaakhwana 78.000, yaakhwile athanu napiili. Ntakhara heeni yaakhwilaaya pahiru achu vakhaani?a Muhapo wa achu a evilivili yeeyo onii: ‘Wakhala wi mwaacikinye mutokweene ookhumelela nave eniya eweleela, ocimakela o miyaakoni, muniya, mwawaakuveya ocimakela omokoni.’ Yaweereya ya khalai, achu o Simeulue annasuwela wakhala wi sunami onnaacamela vaavaa eniya enawelelaaya. Wiiwelela ekano yoolopola waavulusa ikumi saya.

Piipiliya onnaloca waacamela wa epahu, “ekoi etokotoko, ehintonko okhala ovinya nihiku nopatxerya elapo ophiyerya olelo, nari mano herwatho ekhala.” (Mateu 24:21) Ela tahi omala wa Elapo yavathi moorweela wa miteko sa achu naari epahu ya maphacuwelo—ntakhara wi yookhwela ya Muluku wi elapo yavathi yiikhaleleru. (Eklesiyaste 1:4) Opwaha yeeyo, ekoi etokotoko yaaweera ya Muluku wi ‘atolose yale anatolosa elapo ya vathi.’ Eyo enahaala okhala omala wa onanara ni ohooxeya. (Wupulula 11:18; Masiposipo 2:22) Awo anahaala okhala mareeliho!

Mwawiihiiha, moohiyana ni sunami, mwaacikinye, naari ophuwa wa elapo, epahu enoorwa henahaala owiipha achu ahirino nthowa. Piipiliya onnaloca “Muluku ti okhwela,” nave Muluku yoowo nsina nawe nri Yehova, onnalaiherya wi “atxhu awokololowa anamwakhela elapo, anamukhala wa mahiku othene.” (1 Yohani 4:8; Salumu 37:29) Vano munii nwerye hai ovuluwa mu ekoi etokotoko nave mpuhe mareeliho alaiheryiwe? Yoohulela ti ela: Wiiwelela ekano yoolopola!

MUKHALENO EPHOOLE NTAKHARA OTOROKEYA WA ELAPO

Hiyaano hinaano owerya wa osuwela nihiku onanara ni ohooxeya onahaalaaya omala, ntakhara Yesu ooloca: “Havo mutxhu onasuwela nihiku ni elukuluku itxhu seiha inaphatxuwaya: nari mano ankelo a wirimu, nari Mwana. Nto asuwenle t’Atithi pahi.” Nyenya Yesu onceenyerya wi “mwilipeleleke.” (Mateu 24:36; 25:13) Wa eheeni? Piipiliya onnanleela mukhalelo elapo yaahaala okhala Muluku ahaakumve oruuha makuchuwelo. Ntoko otorokeya wawaakuveya wa eniya waaloponlaaya anamakhala o Simeulue ntakhara waacamela wa sunami, otorokeya tho wa saweereya sa elapo yaahaala okhala eneneeryo wi makuchuwelo ahaacamela. Otorokeya taani wootikhiniha Piipiliya onaloceiye?—Moone ekaaxa enahoolela mwaha yoola.

Chiryene, saweereya ikina sa seiyo naari makhalelo—sinneereya nave soheereya khalai. Nyenya Yesu aaloca wi noona “itxhu sothene iha”, nnaphwanela osuwela wi makuchuwelo ahaacamela. (Mateu 24:33) Mwiikohe: ‘Ti liini mmiyaha sa achu ichu seiya seeren’yaaya (1) mu nipuro naari mmukhalelo wawunlaana, (2) seeren’yaaya mu elukuluku emohamoha, ni (3) inatepaaya onanara?’ Mwawooneya, hiyaano nnakhala mu elukuluku yeeyo.

YAWOONIHERYA YA OSIVELA WA MULUKU

“Ineneeryo soopacerya soolopola . . . sinnavulusa ikumi,” aaloca Musatoro akhalai o Estatu Unitu. Voocharela nipuro na sunami aarweela o Oseyano Intiko, yaakuhiwavo eneneeryo yoolopola wi esepiwe epahu emohamoha ya oyeleela ikumi omwaahiyu. Moolikana Muluku onnapaka marehereryo a olopola ehaakumve ophiya makuchuwelo. Piipiliya aaloherya: “Nave Mutxhaka ola wa Omwene onamulaleyiwa mwelaponi yothene wi ovahe onamona maloko othene. Vanonto t’onereya orwe okutxhula w’elapo.”—Mateu 24:14.

Mu eyaakha evinre, Anamoona a Yehova aamaliha iwora opwaha macikhwi 1.9 elaleeryaka michaka saphaama mu ilapo 239 ni elocelo opwaha 700. Oya vahoolo wa mahiku ahu onnavaha yawooniherya wi makuchuwelo ahaacamela. Moorweela wa waasivela amwaacamani aya, Anamoona a Yehova anniilipixerya wi yaalopole akina wi nihiku noothoriha na Muluku noohaacamela. (Mateu 22:39) Woona wi munanwerya okhaviheryeya orweela wa sooleeliherya seiya yawooniherya wa osivela wa Yehova ntakhara nyuwo. Muupuwele, ‘[Muluku] hanakhwela wi mutxhu arimele, nto wi othene erukunuse mirima.’ (2 Pedro 3:9) Apwanne munahaala waakhulela osivela wa Muluku ni wiiwelela ekano yoolopola?

MUCHAWE WI MOOPOWE

Muupuwele wi anamakhala a muceche wa o Simeulue yaachawenle va nipuro noocukhuwa wi evuluwe vaavaa yonnaaya eniya eweleelaka; hiyawehenrye ophiyerya okooka. Yoolakelelaaya yaaheeriha ovuluxa ikumi saya. Wi mvuluwe mu ekoi etokotoko enoorwa munaphwanela ochawela va nipuro noocukhuwa ohaakumve osavo. Mwawiihai? Mulipa a miririmu Isaiya aaveereliwa orepa vooloca sa nwopelo yoowo onavahiwa “omakutxuwelo wa mahiku,” elukuluku yeeyo hiyaano nnakhalaahu hiihaano. Owo onii: “Murwe, niwele mwako w’Apwiya . . . owo onamunthonyerya iphiro sawe nave hiyano nnamutxara seiho.”—Isaiya 2:2, 3.

Owela va mwaako onnookhaviheryaani okhala va nipuro noocukhuwa ni okhapeleleya. Mmukhalelo woolikana, okhalano nsuweliho na iphiro sa Muluku moorweela wa makupa a Piipiliya ennaakhaviherya macikhwi aachu orukurerya elapo olelo opaka matorokelo aphaama mu ikumi saya. (2 Timóteo 3:16, 17) Mu weerano hiiha, awo annapacerya ochara “iphiro” sa Muluku ni opuha ikharari ni okhapelela wawe.

Apwanne nyuwaano munnaakhulela nwopelo yoola ni ophura okhapelela woosivela wa Muluku mmahiku yaala ookuchula? Ninnooceenyeryaani wi mwaalikhele mwawiichaalela Soorempwa mu yawooniherya enaphwanyeya mu ekaaxa enahoolela mwaha yoola vooloca sa ichu soothene ineeriha elukuluku ahu okhala “mahiku òmaliherya.” Anamoona a Yehova a ekulucu anyu anahaala ohakalala woovahereryaani nikhaviheryo nri noothene munahaalaanyu ochuna wi mukhaleno wiiwexexa wookwakwaleya wa Soorempwa ni wookhaviheryaani mukhalelo wa opharihela muteko. Naari munahaala ophwanya maakhulo a makoho anyu moorweela wa omuxekurya site ahu, www.jw.org Moone vathi va ENSINOS BÍBLICOS > PERGUNTAS BÍBLICAS RESPONDIDAS.

[Nsu na vathi]

[Ekaaxa va ipaaxina 30, 31]

SAWEEREYA SA ELAPO SINNOONIHERYA WI MAKUCHUWELO AHAACAMELA

EKHOCO YA ELAPO YOOTHENE EWIIPHALE ACHU ANCIPALE

“Munamwiwa sa ekhotxo ni olotxiwa wa ekhotxo; muhituthuwe. Ikhotxo iho inamurwa, nto okutxhula wa elapo hiwakunve. Ntakhara nloko nnamurosa nloko nikina nave omwene onamurosa omwene . . . Itxhu sothene iho oni okhale opatxerya wa masoso.”—Mateu 24:6-8.

IPAHU NI ETALA ELAPO YOOTHENE

“Nave mapuro makina anarwa ekhalamo etala ni ipahu.” —Luka 21:11.

OHIIWANANA NI OVUHANA WA IKEREXA

“Nave anamoneya alipa a miririmu òwoka, ni anan’wototha awatxa. Nave wa nthowa na wunnuwa wa sonanara, okhwelana wa atxhu onanvukuwa.”—Mateu 24:11, 12.

WAACEERERYEYA WA OHIROROMELEYA

“Okhale òsuwela wi, mahiku òmaliherya inamphiya ilukuluku sokatxamiha. Atxhu anamukhala awisupuwelela mekhaya pahi, amìko . . . òhemererya, òhikhwela ni òhikurumuwa, awotha, òhisumaliha, òwali, amwitxana a ephama, amakhutxe, òtalaveryasa, òsareya wisona.”—2 Timóteo 3:1-4.

OLALEERYIWA WA MICHAKA SAPHAAMA SA OMWENE WA MULUKU VEELAPONI YOOTHENE

“Nave Mutxhaka ola wa omwene onamulaleyiwa mwelaponi yothene wi ovahe onamona maloko othene. Vanonto t’oneraya orwe okutxula w’elapo.”—Mateu 24:14.

ACHU OOVAANYA HIYAAHAALA WEEMERERYA WI MAKUCHUWELO AHAACAMELA

“Mahiku òmaliha anamurwa atxhu òroha, ni oroha waya, . . . eriki: ‘nri wowi nroromelo na orwa wa Kiristu? Txiri makholo ahu àkhwa ni sothesene siri ntoko saryaya ovinya wopatxeryani wa elapo.’”—2 Pedro 3:3, 4.

[Eruku va epaaxina 29]

[Mwaneene a eruku]

© Dermot Tatlow/Panos Pictures