Ochuneya Waya Ovilela—Mwaha ola okuxiwe mu Anuário das Testemunhas de Jeová de 2013
Afrika
Epaaxina 45, eparakrafo 1, ophiyerya epaaxina 46, eparakrafo 1
‘Ti Wooweryeya Oloca Ni Yoowo?’
Ooweherya a esirkwitu o Etiopiya aamulaleerya empa ni empa ni munna mukina. Va echoko emoha, awo yaamoona namalapa a mwaamuthiyana, nave yaamukoha waakhanle wi yaanwerya oloca ni mwaneene a vaate. Vaavaa owo aakhunleiye wi honaweryeya, awo yaamukoha waakhanle wi yaanaphwanela ohiya yoolaleeryiwa wa yoowo. Namalapa aahivolowa wi amukohe pwiya awe, aachika, nave aloca wi owo onachuna opacerya toko woona yoolaleeryiwa eyo.
Mwawiihiiha, anna yaamunnya irevista wi amooniherye owo. Emanle elukuluku vakhaani, owo aachika nave aloca wi pwiya awe aaheemererya waalakhanya. Mmoha a anna aakoha: “Waakhanle wi hanawerya okhumela vaate, ti wooweryeya wi hiyaano nivolowe wi nloceno?” Wanaawiili aahikookelawo wi amukohe pwiya awe. Ekwaha ela owo aalekela ochika, nave anna yuupuwela wi hachika. Nave owo aachika ni aawopa wi evolowe. Vano anna yaahoona wi mulopwana Yirgu aari awuuluvala yoowo mu iyaakha khumi haawerya weeca naari okiraathi. Namalapa aalekela ochika nthowa na wi amukhaviherya pwiya awe owara ikuwo ni omviiha.
Anna yaaperekha michaka yaphaama. Ahakalanle ni yeeyo iiwaleiye, Yirgu aaheemererya yoohuserya ya Piipiliya. Vaavaa ohuserya waayaaya vahoolo, aanapenuwa. Moovira wa elukuluku, aanawerya ovinya ni weeca ni ekatera ya maroota. Ohoolo waya owo aapacerya ophiya mmithukumano nave opatisiwe mu kongreso a hiihaanoru.